Read Mongondow SAMUEL 1 7 Bible Online

SAMUEL 1 7 - Mongondow bible

SAMUEL 1 7

¹Dá intau kon Kiryat-Yearim nogamá kon Poti Dodandian i TUHAN tatua bo dinia monia pinobayá in Baḷoi i Abinadab; baḷoi tatua in kon tudu in buḷud. Onda intua mosia noduí kon i Eleazar adí i Abinadab, sin mobaḻí moḷoḷukad kon Poti Dodandian tatua.

²Noonggotbí doman in Poti Dodandian tatua kon Kiryat-Yearim, degá doyowamai nopuḷú notaong, Bo kon dodai intua bayongan umat in Israel mokuanimai kon i TUHAN mokituḷung.

³Bo nogumandon in ki Samuel kon umat in Israel, “Aka moiko moibogdon mobui mangoi kon i TUHAN bo mosumba kon i-Nia takin ḻimbatú in ginamu, yo mustibí ḷumbúon monimu in bayongan dewa ibanea bo patong i Dewi Asytoret. Totu-totuudon posarakai in awakmu kon i TUHAN bo tongádon pooibada kon i-Nia, dá moiko in poḷuaton-Neadon nongkon intau in Pilistin.”

⁴Dá intau in Israel noḷumbúdon kon bayongan in patong i Dewa Baal bo patong i Dewi Asytoret, bo tongádon nogundoi kon i TUHAN.

⁵Nopaḷut mako kon tua ki Samuel noguman, “Sipundon in bayongan bangusa Israel kon Mizpa, sinbá akuoi mosambayang sin kopontingan monimu.”

⁶Bo noyosipundon in mosia kon Mizpa. Mosia in nonayú kon tubig bo pinopobutak nobaḻí sosumba kon i TUHAN, noiduduimai kon tua mosia in nopuasa in tosinggai tua. Guman monia, “Kami naa in binaradosadon kon i TUHAN.” (Kon Mizpa tua ki Samuel nomangkoidon nomaḷut kon pelekara mita yogenggeng in intau in Israel.)

⁷Naonda in kinodongogandon in intau in Pilistin kon intau in Israel noyosipundon kon Mizpa, datu in intau in Pilistin taya ḻima nobuatdon minayá intua takin tontara monia sin mayá monubu kon intau in Israel. Kinodongogan in intau in Israel intua bo noondokdon in mosia.

⁸Mosia in noguman kon i Samuel, “Dikadon mogoga-gogai in mosambayang kon i TUHAN Allah naton sinbá posaḷamaton-Nea in kita nongkon intau in Pilistin.”

⁹Tuamai in ki Samuel noratá kon ki adí in domba inta batáneapa, bodongka pinosumba nobaḻí sosumba payongon kon i TUHAN. Nopaḷut mako kon tua nosambayang in sia nopoigum sinbá ki TUHAN in motuḷung kon intau in Israel, bo inindogogan i TUHAN in sambayangnea tatua.

¹⁰Naonda in ki Samuel koyogot in noposumba in kuruban payongon tatua, intau in Pilistin nomangkoidon nonubu; táe kon dodai domandon tuata ki TUHAN nonggotup nongkon ḷangit kon tombutungonmai monia. Bo notombauk in mosia poḷat noḷagui posi bayá sin motoboḻingo.

¹¹Tontara in Israel iḻumuai nongkon Mizpa bo nondudur kon intau in Pilistin tatua nodapot kon Bet-Kar, bo nomogutú kon i monia.

¹²Nopaḷut mako kon tua ki Samuel noposindog in batu tobatú, kon pinosigadan in Mizpa bo Sen. Sia in noguman, “Ki TUHAN totu-totuudon notuḷung kon inaton.” — Bo batu tatua in sinangoiannea “Batu Pinotuḷungan”.

¹³Natuata in nobaḻí, intau in Pilistin sinaḷow. Diá inogoi i TUHAN in mosia sinumuot bui kon butá in Israel, kon dodai in ki Samuel nobiagpa.

¹⁴Bayongan in kotá in Israel inta ain pinotungkud in intau in Pilistin, pinangkoi kon Ekron nodapot kon Gat, pinobuidon kon Israel. Dá nouḻídon bui in Israel in bayongan butánea. Intau in Israel bo intau in Amori nobiagdon nodame.

¹⁵Ki Samuel in nomarenta kon Israel nodapot in minatoi in sia.

¹⁶Pomuḷoi in taong sia mayá moḻibu kon Betel, Gilgal, bo Mizpa. Bo kon tampat mita tatua sia mopoyotutui in pelekara mita yogenggengan.

¹⁷Umuranbí natua bo mopaḷut mako mobuidon in sia kon baḷoinea kon Rama. Kon tua sia nobaḻí hakim kon intau in Israel bo noposindog doman in mezbah tobatú kon i TUHAN.