Read Mongondow SAMUEL 1 9 Bible Online

SAMUEL 1 9 - Mongondow bible

SAMUEL 1 9

¹Oyúon in intau tobatú inta nobiag nooyúon bo kinobangkaḷ nongkon suku in Benyamin, tangoinea in ki Kish. Sia in tombonu in motoḷuadí i Bekhorat, uputpa nongkon in inanakan i Apiah. Ki amánea in ki Abiel bo ki akinea in ki Zeror.

²Ki Kish in kogadí kon ḷoḷaki, tangoinea in ki Saul, tayowmobiag tobatú inta moḷunat bo motorindog. Diábí in tobatúmai in kon bayongan Israel in noiḻiu kon koḷunatnea. Awaknea doman in moḷantu-ḷantud komintan; bayongan in intau in Israel tongá modapot in obaganea in koḷantud monia.

³Kon singgai tobatú tongonumai in keledai i Kish nobuḻi. Tuamai in ki Kish noguman kon i Saul, “Podiadon kon bobantung tobatú, bo tayakdon in keledai mita tatua.”

⁴Bo ki Saul takin bobantungnea noḻibu kon buḷud in Epraim bo butá in Salisa, táe diá nouḻí monia in bobiagon mita tatua. Onda intua minayá in mosia kon butá Sahalim, táe diábí doman in keledai mita tatua in kon tua. Mosia in minayá doman notayak kon butá in Benyamin, táe diábí doman in mangaḻenea.

⁵Naonda in mosia noidapot kon butá in Zup, ki Saul noguman kon bobantungnea, “Koḻigai mobuidon in kita, dika-dika bo moajardon in gina i amá in moraimai kon inaton poḻiu kon keledai mita tatua.”

⁶Bobantung tatua notubag, “Oḷatpa muna! Kon kotá tanaa oyúon in mogogundoi i Allah. Totok in sia ihoromat in intau sin onu in singogonnea in totu-totuubí kon mobaḻí. Igai in kita mayá kon inia, dika-dika bo motaaubí ḻibóon kon inia mongo kon onda in keledai mita tatua.”

⁷Guman i Saul, “Aka mayá in kita mokipodungkuḷ kon inia yo onu in ogoi naton kon inia? Tongkaaḷ inta dinia naton nodaitdon, bo diádon in motaau ogoi naton kon mogogundoi i Allah tatua!”

⁸Bobantung tatua notubag, “Noikoḷat totok kon inakó in oyúonpa in doit saḷaka tobatú. Tua in ogoikudon kon mogogundoi i Allah tatua sinbá motaaudon in sia mopotaau kon inaton mongo kon onda in keledai mita tatua.”

⁹“Mopia uḻe!” tubag i Saul, “Igai mayá in kita.” Bo minayádon in mosia kon kotá, kon tampat in mogogundoi i Allah tua. Naonda in mosia notakod kon buḷud inta mopobayá ná kotá tatua, noyodungkuḷdon in mosia in tongonumai in mongodeaga inta mayá monangkob kon tubig kon parigí. Bo mosia noḻibó kon mongodeaga mita tatua, “Degá mododoyangow oyúon kon kotá?” (Kon tungkuḷ intua nabi tobatú sinangoi mododoyangow, dá aka oyúon in intau moḻibó kon i Allah, dá sia in moguman nanaa, “Igai in kita mayá kon mododoyangow.”)

¹²“Oo, oyúon,” tubag in mongodeaga mita tatua, “bagupa in sia minayá noiuna kon i monimu. Aka moiko ḻimikat, yo degá kobatukanbí monimu in sia. Sia in bagu namangoi in kotá sin singgai naa kon tudu in mezbah kon buḷud oyúon in sosumba kuruban kon rayat. Intau mita inta sinoko oiní in diápabí mongaan aka diápa in sia moiangoi, sin sia in munapabí momarakat kon sosumba tatua. Aka moiko mayá kon tanaadon mako, yo moyodungkuḷbí monimu in sia kon dodai in sia diápa motakod kon buḷud sin mongaan.”

¹⁴Dá ki Saul bo bobantungnea minayádon in kotá bo naonda in mosia sinumuot kon ngara moḷoben, mosia in noyodungkuḷdon i Samuel inta mopobayádon in tampat pooibadaan kon buḷud.

¹⁵Táe tosinggai noiuna kon tua ki TUHAN ain nobogoi in koyow kon i Samuel nanaa,

¹⁶“Ikoḷom doḷo-doḷom degá orasmai nanaa, Akuoi in mopotabádon mangoi kon intau tobatú nongkon suku Benyamin mamangoi kon inimu. Duídon in sia takin upacara popotoguḷuan in ḷana sin baḻíon datu kon umat-Ku Israel. Sia in moposaḷamat kon umat-Ku nongkon intau in Pilistin. Akuoi in nokoontongdon kon roriga in umat-Ku bo nokodongogdon kon ombaḷ monia mokituḷung.”

¹⁷Naonda in ki Samuel nokoontong kon i Saul, ki TUHAN noguman kon i Samuel, “Naadon in intau inta pinoguman-Ku kon inimu tua. Sia in momarenta kon umat-Ku.”

¹⁸Kon dodai intua ki Saul dinimiug kon i Samuel kon diug in ngara moḷoben, bo noḻibó, “Ampung, Amá, kon onda degá in baḷoi in mododoyangow tatua?”

¹⁹Ki Samuel notubag, “Akuoi in mododoyangow inta kainimu nion. Unadon kon inakó kon tampat pooibadaan kon buḷud, sin kon singgai in naa moiko in mongaan moyotakinku. Ikoḷom doḷo-doḷom bayongan inta ḻibóonmu in potaauku, bain mopaḷut kon tua bo motaaudon mobui in moiko.

²⁰Soaḷ keledaimu mita inta ain toḷu nosinggai naa in nobuḻi tua, dika moḻia-ḻiaw in gina, sin ain nouḻí. Apa doman, inta totok in mopia kon bayongan Israel in ogoi bidon kon inimu bo kon motoḷuadí i amámu.”[17]

²¹Ki Saul notubag, “Akuoi naa in nongkon suku Benyamin, suku inta totok in mointok kon Israel, apa doman motoḷuadíku inta totok in diá in mangaḻenea kon bonu in suku tatua. Dá nongonu sin ki Amá in mogumanbí natua kon inakó?”

²²Onda intua ki Samuel nonongganut kon i Saul bo bobantungnea sinumuot kon bonu in yuang inta moḷoben, bo inogoiannea in tampat inta moponting kon i monia kon tayowon in intau mita inta sinoko oiní inta kobayongnea in toḷumai nopuḷú in intau.

²³Noiduduimai kon tua ki Samuel noguman kon mododungú, “Oḷudon in ponoyá inta koina inogoiku kon inimu tua.”

²⁴Bo mododungú tatua nogamá kon tongosilai inta totok in mopia nongkon tapú in paa, bo inoḷudnea kon tayowon i Saul. Samuel[18] noguman: “Naa in tonsilai inta sinondíku kon inimu sin kaanonmu tanaa mako moyotakin in intau mita inta sinoko oiní ibanea.[19] Pongaandon uḻe.” Bo nongaandon in ki Saul. Dá kon singgai tatua ki Saul in nongaan noyotakin i Samuel.

²⁵Nopaḷut mako kon tua nosiḻigdon in mosia nongkon tampat pinoibadaan tatua bo minayá in kotá. Ki Saul pinosadiaan kon pinosiugannea[20] kon tudu in baḷoi, [21]

²⁶bo sia in nosiug.[22] Naonda in nomukádon in singgai, ki Samuel nogoiní kon i Saul inta kon atop in baḷoi tatua, kainia, “Pobangondon, igai atodonku in iko mayá.” Nobangon in ki Saul, bo minayá noyotakin i Samuel.

²⁷Naonda in mosia nodapot kon bingkí in kotá, nogumandon in ki Samuel kon i Saul, “Potabádon in bobantung tatua mayá umuna kon i natonda.” Bo minayádon in bobantung tatua, bo ki Samuel noguman bui, “Pogogaipa motoyong kon naa, akuoi in mopotaaudon in koyow i Allah kon inimu.”