Read SEBR SÕNGO, 1998 Sɩngre 11 Bible Online

Sɩngre 11 - SEBR SÕNGO, 1998 bible

Sɩngre 11

¹Dũniyã gill fãa rag n gomda gom-bu-yende, tɩ gom-biisã yaa bũmb a yembre.

²Bãmb sẽn yik yaangã, b tɩ yãnda zĩ-long sẽn be Sineyaar soolmẽ wã, la bãmb tii beenẽ n kẽ.

³La bãmb yẽsa ne taab n yeele: «Wa-y tɩ d wẽ tãn-koɛɛma, n wʋme.» Dẽ, tãn-koɛɛma reega kug zĩiga, tɩ tan sũud reeg tãn-maas zĩig meebã yĩnga.

⁴Bãmb leb n yeelame: «Wa-y tɩ d me tẽnga, la d me gãosgo, t'a zugã woglem tẽkd saagã, la d bao yʋʋr n kõ d menga, n da wa sãeeg n pid dũniyã zãng ye.»

⁵Sẽn-Ka-Saab sigame n na n ges tẽngã ne gãosgã ninsaalbã kamb sẽn dag n metã.

⁶Sẽn-Ka-Saab yeelame: «Ade, nebã yaa bũmb a yembre! La b fãa gomda gom-bu-yende, la ad bãmb sẽn sɩng n na n maane! Moasã, bũmb ka leb n tõe n gɩdg-b tɩ b ka maan b sẽn dat n maanã ye.

⁷Dẽ wã, d sig n gẽdg b goamã taaba, tɩ b ka leb n wʋmd taab goam ye.»

⁸Sẽn-Ka-Saab kɩtame tɩ b yi n zãag ne beenẽ n sãeeg n kẽ dũniyã gill fãa. La bãmb basa tẽngã meebo.

⁹Yaa woto n kɩte, tɩ b pʋd zĩ-kãng yʋʋrã tɩ ‹Babɛlle›, bala, yaa beenẽ la Sẽn-Ka-Saab kɩt tɩ dũniyã nebã fãa goam gẽdg taaba. La yaa beenẽ la Sẽn-Ka-Saab kɩt tɩ b sãeeg n be dũniyã zĩigã fãa.

¹⁰Ad a Sɛm yagensã la woto: A Sɛm sẽn wa n tar yʋʋm koabga, a roga a Arpaksaade, la rẽ tɩ yaa sa-kẽengã loog tɩ yʋʋm-yiiblẽ.

¹¹A Arpaksaad rogmã zugẽ, a Sɛm vɩɩmda yʋʋm kobs-nu, la a roga kom-dibli la kom-pugli.

¹²A Arpaksaad sẽn wa n tar yʋʋm pis-tã la a nu, a roga a Sela.

¹³A Sela rogmã zugẽ, a Arpaksaad vɩɩmda yʋʋm kobs-naas la a tãabo, la a roga kom-dibli la kom-pugli.

¹⁴A Sela sẽn wa n tar yʋʋm pis-tã, a roga a Hebɛɛre.

¹⁵A Hebɛɛr dogma zugẽ, a Sela vɩɩmda yʋʋm kobs-naas la a tãabo, la a roga kom-dibli, la kom-pugli.

¹⁶A Hebɛɛr sẽn wa n tar yʋʋm pis-tã la a naase, a roga a Pelɛɛge.

¹⁷A Pelɛɛg rogmã zugẽ, a Hebɛɛr vɩɩmda yʋʋm kobs-naas la pis-naase, la a rog kom-dibli, la kom-pugli.

¹⁸A Pelɛɛg sẽn wa n tar yʋʋm pis-tã, a roga a Rewu.

¹⁹A Rewu rogmã zugẽ, a Pelɛɛg vɩɩmda yʋʋm kobessi la a wɛ, la a roga kom-dibli, la kom-pugli.

²⁰A Rewu sẽn wa n tar yʋʋm pis-tã la a yiibu, a roga a Seruugi.

²¹A Seruug rogmã zugẽ, a Rewu vɩɩmda yʋʋm kobessi la a yopoe, la a roga kom-dibli, la kom-pugli.

²²A Seruug sẽn wa n tar yʋʋm pis-tã, a roga a Nahoore.

²³A Nahoor dogma zugẽ, a Seruug vɩɩmda yʋʋm kobessi, la a roga kom-dibli, la kom-pugli.

²⁴A Nahoor sẽn wa n tar yʋʋm pisi la a wɛ, a roga a Teera.

²⁵A Teera rogmã zugẽ, a Nahoor vɩɩmda yʋʋm koabg la piig la a wɛ, la a roga kom-dibli, la kom-pugli.

²⁶A Teera sẽn wa n tar yʋʋm pis-yopoe, a roga a Abram, a Nahoor ne a Haran.

²⁷Ad a Teera yagensã: A Teera roga a Abram, a Nahoor ne a Haran. La a Haran roga a Lote.

²⁸A Haran kiime t'a ba a Teera ket n vɩ, la yaa yẽnda sẽn dog tẽng ningã pʋgẽ, yaa Ʋʋr sẽn be Kalde rãmba soolmẽ wã.

²⁹A Abram ne a Nahoor kẽe kãadem, la a Abram pagã yʋʋr la a Sarayi, t'a Nahoor pagã yʋʋr yaa a Milka, n yaa a Haran bi-pugla. A Haran yaa a Milka ne a Yiska ba.

³⁰A Sarayi rag n yaa kiiri, n ka tar biig ye.

³¹A Teera peega a biig a Abram ne a yageng a Lot sẽn yaa a Haran bi-riblã, ne a bi-pag a Sarayi sẽn yaa yẽnda bi-ribl a Abram pagã, la bãmb tũu taab n yi Ʋʋr sẽn be Kalde rãmba soolmẽ wã, n kẽng Kana tẽnga. Bãmb sẽn ta Haran tẽngã, bãmb zĩnda beenẽ.

³²A Teera vɩɩmda yʋʋm kobessi la a nu, la a kii Haran tẽngã pʋga.