Read SEBR SÕNGO, 1998 Sɩngre 13 Bible Online

Sɩngre 13 - SEBR SÕNGO, 1998 bible

Sɩngre 13

¹A Abram yii Ezɩpt tẽngã ne a pagã, la ne bũmb nins fãa yẽnda sẽn so wã, n lebg n leb Negɛɛve sẽnẽ, la a Lot dag n tũuda yẽnda.

²A Abram rag n yaa arzɛg-kẽeng soaba. A rag n tara rũms ne wanzuri la sãnem wʋsgo.

³Yẽnda yii Negɛɛv n kẽnd la a yalsd zĩig-zĩiga, hal n tɩ ta Betɛlle. Beenẽ yaa zĩig ning yẽnda sẽn dag n tilg a fu-roogã sɩngrẽ wã. Yaa Betɛll ne Ayi tẽngã sʋka,

⁴zĩig ning yẽnda sẽn dag me tẽn-kugr sɩngrẽ wã. La a Abram pʋʋsa ne Sẽn-Ka-Saab yʋʋr beenẽ.

⁵A Lot sẽn dag n tũud a Abramã me rag n tara rũm-bãoonego, la rũm-bɛd ne fu-rot me.

⁶Tẽngã rag n yaa bilf n ka sekd bãmb b yiibã ye. Bala, bãmb b yiibã arzegsã rag n yaa wʋsg tɩ b ka leb n tõe n zĩnd ne taab ye.

⁷La a Abram rũm-kɩɩmbã ne a Lot rũm-kɩɩmbã rag n zabda taaba. Wakat-kãng tɩ yaa Kana nebã ne Ferɛɛz-rãmbã n dag n be soolem-kãng pʋga.

⁸A Abram yeela a Lot yaa: «Mam kotame tɩ zabr da zĩnd maam ne foom sʋka, wall fo rũm-kɩɩmbã ne mam rũm-kɩɩmbã sʋk ye. Bala, tõnd yaa rogem.

⁹Ade, tẽngã fãa la fo sẽn ne wã. Bɩ f welg n bas maam. Fo sã n dabd goabga, mam na n kẽnga rɩtgo, la fo sã n dabd rɩtgo, mam na n kẽnga goabga.»

¹⁰Dẽ, a Lot zẽk n gesa Zʋrdẽ kunkubã fãa sẽnẽ zĩisã sẽn paam zãgsg sõama wã. La yaa sẽn deng Sẽn-Ka-Saab sẽn dag n nan ka sãam Sodom ne Gomoorã, la a rag wẽnda wa Sẽn-Ka-Saab zẽed zĩiga, wa Ezɩpt tẽngã sẽn yaa to-to wã, n tall n tɩ tãag Sowaar tẽngã.

¹¹La a Lot yãka Zʋrdẽ kunkubã zĩisã fãa, la a loogame n kẽng yaangã sẽnẽ. Rẽ, yɩɩ woto tɩ bãmb welg n bas taaba.

¹²A Abram paa Kana tẽnga, la a Lot tɩ zĩnda tẽms nins sẽn be kunkubẽ wã, la a tɩ tilga a fu-rotã Sodom tẽnga.

¹³Sodom tẽngã neb rag n yaa nin-wẽns meng-menga, la b maanda yel-wẽn n beegd Sẽn-Ka-Saabo.

¹⁴A Lot sẽn welg n bas a Abramã poore, Sẽn-Ka-Saab yeela a Abram yaa: «Ade, pa zĩig ning fo sẽn be wã n zẽk f neng n ges goabg la rɩtgo, la f ges yaang la taoore.

¹⁵Bala, mam na n dɩka soolem ning fo sẽn ne wã, n kõ foom ne f yagensã tɩ y soog wakat fãa yĩnga.

¹⁶Mam na n kɩtame tɩ fo yagensã yɩ wʋsg wa tẽng tom. Ned sã n tõog n sõd tẽngã tomã sõore, a na n tõog n sõda fo yagensã me sõore.

¹⁷Yik n gilg tẽngã n ges a woglmã ne a yalmã, bala, mam na n kõ-a-la foom tɩ f sooge.»

¹⁸Dẽ, a Abram tilga a fu-rotã Mamre tɩɩsã sẽnẽ, n yegl Ebrõ n kẽ. La a Abram mee tẽn-kugr beenẽ Sẽn-Ka-Saab yĩnga.