Read SEBR SÕNGO, 1998 Sɩngre 18 Bible Online

Sɩngre 18 - SEBR SÕNGO, 1998 bible

Sɩngre 18

¹Sẽn-Ka-Saab puka b meng ne a Abrahaam Mamre tɩɩsã zĩigẽ, wakat ning yẽnda sẽn wa n zĩ a fu-roogã noor tʋʋlg wakatã.

²A Abrahaam zẽka a neng n gese, la a yãnda raop a tãab sẽn yas yẽnda neng-taoore. A Abrahaam sẽn yãnd-bã, a yika a fu-roogã noor n wudg n seg-b n wõgemd tẽnga,

³n yeele: «Zu-soaba, yãmb sã n nonga maam, mam kot-y lame tɩ y ra loog n ka yals mam sẽn yaa yãmb tʋmtʋmdã nengẽ ye.

⁴Yaas-y tɩ b tall koom n wa kõ-y tɩ y waas y naoã! La y yals tɩ-kãngã tẽngr n vʋʋse.

⁵Tɩ m kẽng n tɩ tall rɩɩb bilf n wa tɩ y rɩ n paam pãnga. Rẽ poore, y na yaool n dɩk y sor n looge. Woto, yãmb sẽn wa mam sẽn yaa yãmb tʋmtʋmdã zakẽ wã kõn yɩ zaalem ye.» Bãmb leoka a Abrahaam yaa: «Beneere, bɩ f maan wa fo sẽn yeelã.»

⁶A Abrahaam wudg n kẽe fu-roogã pʋg n yeel a Saara yaa: «Saara, yik tao-tao n yãk zom-bãaneg wũmbl a tãab n nag n maan maasa.»

⁷La a Abrahaam bas n wudgame n kẽ a rũmsã sʋka, n yõk nag-bi-poll sẽn yaa sõama n kɩs bi-bɩɩg sẽn yaa yẽnda tʋmtʋmd t'a maneg n segle.

⁸Dẽ, a Abrahaam baoo bĩis-gõeem ne bĩis-naare, la a rɩk nag-bila nemdã sẽn dʋgã n tall n wa tẽgen bãmb taoore. A Abrahaam kell n yalsa yĩngr bãmb sɛɛgẽ tɩɩgã tẽngre, tɩ bãmb dag n dɩtẽ.

⁹Dẽ, bãmb soka a Abrahaam yaa: «Fo pag a Saara bee yɛɛnẽ?» T'a leok t'a Saara bee fu-roogã pʋga.

¹⁰La raop a tãabã ned a yembr yeela a Abrahaam yaa: «Ade, vẽer woto wẽnde, mam na n lebg n waa fo nengẽ, la rẽ tɩ fo pag a Saara roga bi-ribla.» Wakat-kãng t'a Saara rag n bee bãmb poorẽ, fu-roogã noor n yas n kelgdẽ.

¹¹A Abrahaam ne a Saara rag n kʋʋlame, la b yʋʋmã rag n yaa wʋsgo. La a Saara rag n ka leb n yaa pag sẽn yãt a pekr ye.

¹²Woto, a Saara la a sũurẽ n yeele: «Maam la sẽn lebg pʋg-yãan-kʋdrã la! Mam leb n tara bõe ratem? Mam soaalã me la sẽn lebg nin-kẽema la!»

¹³Sẽn-Ka-Saab yeela a Abrahaam yaa: «Bõe yĩng t'a Saara la, n yetẽ tɩ yẽnda yaa pʋg-yãang n ka leb n tõe n dog biiga?

¹⁴Rẽ yĩnga, bũmb bee Sẽn-Ka-Saab sẽn ka tõe n maan sɩda? Vẽer woto wẽnde, mam na n lebg n waa fo nengẽ, la rẽ t'a Saara paama bi-ribla.»

¹⁵La a Saara sẽn yɛɛsa yĩnga, a yaga zĩrẽ tɩ yẽnda ka la ye. La bãmb yeela yẽnda yaa: «Fo laame sẽ!»

¹⁶Raop a tãabã yikame n na n looge, la b rag n geta Sodom tẽngã sẽnẽ. A Abrahaam yãaga bãmb n na n pʋʋs-b wẽnd-na-taase.

¹⁷La Sẽn-Ka-Saab yeelame: «Dẽ yĩnga, mam na n solga a Abrahaam bũmb ning mam sẽn dat n maanã sɩda?

¹⁸A Abrahaam na n lebga bu-kãseng sẽn tar pãnga. Yẽnda zug maasem yĩnga, mam na n ninga dũniyã nebã fãa barka.

¹⁹Bala, mam yãka yẽnda t'a wilg a kambã ne a yagensã sẽn na n pʋgl yẽnda n wa wã, tɩ b tũ Sẽn-Ka-Saab sore, la b maan sẽn yaa tɩrga la sẽn zemse. Woto, Sẽn-Ka-Saab na n pidsa bũmb ning bãmb sẽn dag n gom a Abrahaam wɛɛngẽ wã n kõ-a.»

²⁰Sẽn-Ka-Saab yeelame yaa: «B sẽn gomd Sodom ne Gomoor tʋʋm-beedã yellã yaa wʋsgo, la b yel-wẽnã yaa wẽng wʋsgo.

²¹Dẽ, mam na n sigame n ges bãmb sã n sɩd maanda wa b sẽn gomd tɩ mam wʋmdẽ wã. La mam na n bãnga sã n yaa sɩda wall ka sɩda.»

²²Raopã wẽnemdame n na n kẽng Sodom. La a Abrahaam kell n paa Sẽn-Ka-Saab taoore.

²³Dẽ, a Abrahaam kolgame n sok yaa: «Dẽ yĩnga, yãmb na n naaga nin-tɩrsã ne nin-wẽnsã n sãam bɩ?

²⁴Tõeeme tɩ nin-tɩrs pis-nu bee tẽngã pʋga. Dẽ, yãmb na n sãama bãmb me n ka kõ tẽn-kãng sugr nin-tɩrs pis-nu wã sẽn be beenẽ wã yĩng sɩda?

²⁵Tɩ naag nin-tɩrs ne nin-wẽns n kʋ? Yell a woto buud maaneg zãra ne yãmba. Yãmb na n kɩtame tɩ nin-tɩrs paam sɩbgr ning nin-wẽnsã sẽn na n paamã sɩda? Yel-kãng buud maaneg zãra ne yãmba. Yãmb sẽn yaa dũniyã fãa bʋ-kaoodã, yãmb na n maana a wãn n kao bʋʋdã kegre.»

²⁶Sẽn-Ka-Saab yeelame: «Mam sã n yãnd nin-tɩrs pis-nu sẽn be Sodom tẽngã pʋga, mam na n kõo tẽn-kãng nebã sugr neb pis-nu wã maasem yĩnga.»

²⁷A Abrahaam leb n yeelame: «Mam leb n maanda raood n na n gom ne Zu-soabã. Mam yaool n yaa tẽng tom, la tompeglem bala.

²⁸La nin-tɩrs pis-nu sã n ka beẽ, tɩ yaa nin-tɩrs pis-naas la a nu n be, neb a nu wã sẽn paoogã yĩnga, yãmb na n baas n sãama tẽngã?» La Sẽn-Ka-Saab yeelame: «Mam sã n yãnd nin-tɩrs pis-naas la a nu beenẽ, mam ka na n sãam tẽngã ye.»

²⁹A Abrahaam kell n kẽnga taoor n gom n yeele: «La daar ninga, tõeeme tɩ nin-tɩrs pis-naas beeme.» La Sẽn-Ka-Saab yeelame: «Nin-tɩrs pis-naas sã n be, mam kõn maan tẽngã bũmb ye.»

³⁰A Abrahaam yeelame yaa: «Mam Zu-soaba, m kot-y lame tɩ y ra yik y sũur ye, tɩ m leb n gom ne-yã. La sã n mikame tɩ nin-tɩrs pis-tã n be beenẽ.» La Zu-soabã yeelame: «Mam sã n yãnd nin-tɩrs pis-tã beenẽ, mam kõn maan tẽngã bũmb ye.»

³¹La a Abrahaam yeelame yɛsa: «Mam maana raood n gom ne m Zu-soabã. La tõeeme tɩ nin-tɩrs pisi bee beenẽ.» La Zu-soabã yeelame: «Nin-tɩrs pisi sã n be beenẽ, bãmb maasem yĩnga, mam ka na n sãam tẽngã ye.»

³²A Abrahaam leb n yeelame: «Mam Zu-soaba, ra yik-y y sũur ye. Mam sã n gom woto n paase, mam ka na n leb n gom ye. Tõeeme tɩ b tõe n yãnda nin-tɩrs piig beenẽ.» La Zu-soabã yeelame: «Nin-tɩrs piig sã n be beenẽ, bãmb maasem yĩnga, mam ka na n sãam tẽngã ye.»

³³Sẽn-Ka-Saab sẽn gom a woto ne a Abrahaam n sɛ, b loogame. La a Abrahaam lebg n kuila a yiri.