Read SEBR SÕNGO, 1998 Sɩngre 2 Bible Online

Sɩngre 2 - SEBR SÕNGO, 1998 bible

Sɩngre 2

¹Yɩɩ woto la Wẽnnaam naan yĩngrã ne tẽngã, la bũmb nins sẽn be b pʋsẽ wã n sɛ.

²La sẽn wa n na n ta rasem a yopoe daarã, rẽ tɩ Wẽnnaam naana bũmbã fãa n sɛ. La rasem a yopoe daarã, Wẽnnaam vʋʋsa ne b tʋʋmã fãa.

³Woto, Wẽnnaam ninga rasem a yopoe wã daar barka, n welg-a toor b mengã yĩnga. Bala, bãmb vʋʋsa badaar ne tʋʋm nins fãa bãmb sẽn maanã.

⁴Yaa woto la b naan yĩngrã ne tẽngã b naanegã wakate. Wẽnnaam Sẽn-Ka-Saab sẽn wa n naan yĩngr la tẽngã wakate,

⁵rẽ tɩ tɩɩg baa a yembr ka be tẽn-gãongã zugu, la mood me rag n nan ka yi wetã pʋs ye. Bala, Wẽnnaam Sẽn-Ka-Saab rag n nan ka kɩt tɩ saag ni dũniyã zug ye, la ninsaal me rag n ka be dũniyã zug n na n ko-a ye.

⁶La koom n dag n pusgd n yit n zãgsd tẽn-gãongã.

⁷Wẽnnaam Sẽn-Ka-Saab yãka tẽngã tom n maan ninsaala. La Wẽnnaam fʋʋsa ninsaal yõ-bogdã pʋga, n ning vɩɩm ninsaal pʋgẽ. La ninsaal lebga nin-vɩɩga.

⁸Wẽnnaam Sẽn-Ka-Saab rag n maana zẽed zĩig n ning Edɛn tẽngã yaanga, la b rɩka ninsaal bãmb sẽn naanã n ning beenẽ.

⁹Wẽnnaam dag n kɩtame tɩ tɩɩs yi. Yaa tɩɩs buud toay-toay sẽn yaa neeba, la sẽn tar bi-nood sẽn tõe n dɩ. La zẽedã zĩig tẽn-sʋka, Wẽnnaam ninga tɩɩg sẽn kõt vɩɩm, ne wẽng la sõmb bãngr tɩɩga.

¹⁰Ko-zoetem n dag n yit Edɛn tẽngã pʋg n zãgsd zẽedã zĩiga. La zẽedã zĩigẽ wã, ko-zoetmã welga ko-soay a naase.

¹¹Pipi Ko-sorã yʋʋr boondame tɩ ‹Pison.› Ko-so-kãng gilga Havɩla tẽngã. Havɩla yaa tẽng sẽn tar sãnem.

¹²Havɩla tẽng sãnemã yaa sãnem halaale. Soolem-kãng pʋgẽ me, tɩɩs buud sũm sẽn tar yũ-noogo, la kugr buud b sẽn boond tɩ Onigs n be beenẽ.

¹³Ko-sor a yiibẽ soabã yʋʋr boondame tɩ ‹Gihon.› Ko-so-kãng zoetame n gilgd Kuus[2] tẽngã.

¹⁴Ko-sor a tãabẽ soabã yʋʋr boondame tɩ ‹tɩɩgre.› Ko-so-kãng zoetame n teesd Asiiri tẽngã yaanga. La yaoolem ko-sorã sẽn yaa naasẽ soabã yʋʋr boondame tɩ Efrate. [3]

¹⁵Wẽnnaam Sẽn-Ka-Saab talla ninsaal n tɩ ning Edɛn zẽedã zĩig pʋga, t'a ko-a la a ges a yelle.

¹⁶La Wẽnnaam Sẽn-Ka-Saab kõo ninsaal noor n yeele: «Fo tõe n dɩɩ tɩɩs nins fãa sẽn be zẽedã zĩig pʋgẽ wã biisi.»

¹⁷Bãmb leb n yeela ninsaala: «Yaa tɩɩg ning sẽn kɩtd tɩ ned bãng wẽnga, ne sõmb n bakã biis bal la fo ka tog n dɩ. Bala, daar ninga fo sẽn na n dɩ tɩ-kãngã bilã, fo na n kiime.»

¹⁸Wẽnnaam Sẽn-Ka-Saab yeelame: «A ka neer tɩ ninsaal zĩnd a yembr ye. Mam na n maana sõngd sẽn wẽnd yẽnda n kõ-a.»

¹⁹Wẽnnaam Sẽn-Ka-Saab rɩka tẽngã tom n maan we-rũmsã fãa, la bõn-yɩgdɩ wã fãa. Wẽnnaam talla bãmb n wa ninsaal nengẽ, n na n ges yẽnda sẽn na n pʋd b yʋyã to-to, tɩ bõn-vɩɩsã fãa yembr-yembr tõe n paam yʋʋr wa ninsaal sẽn na n kõ-a wã.

²⁰Ninsaal pʋda yir dũmsã fãa yʋyã, la bõn-yɩgdɩ sẽn yɩgd yĩngrã yʋyã, la a pʋd we-rũmsã fãa yʋyã. La ninsaal ka tol n yãnd sõangd sẽn wẽnd yẽnda ye.

²¹Woto, Wẽnnaam Sẽn-Ka-Saab kɩtame tɩ gõe-kãseng yõk ninsaal t'a gũsi. Dẽ, Wẽnnaam yãka ninsaal sĩif kõbr a yembre, la b lebs nemdã n page.

²²Wẽnnaam Sẽn-Ka-Saab rɩka sĩifã kõbr ning bãmb sẽn yãk ninsaalã sĩifẽ wã n naan pag n tall-a n wa ninsaal nengẽ.

²³La ninsaal yeelame: «Ade, moasã, yõwã yaa mam kõabã kõbre, la mam yĩngã neongo. B na n boonda yẽnda tɩ paga: [4] Bala, b yãka yẽnda rao yĩngẽ.»

²⁴Yaa woto yĩng n kɩte, tɩ rao na n bas a ba ne a ma, n tɩ loe a meng ne a paga. La bãmb na n lebga yĩng a yembre.

²⁵Raoã ne a pagã fãa rag n yaa b zaala, la b rag n ka mi yãnd ye.