Read SEBR SÕNGO, 1998 Sɩngre 20 Bible Online

Sɩngre 20 - SEBR SÕNGO, 1998 bible

Sɩngre 20

¹A Abrahaam yii beenẽ n kẽng Negɛɛve. La yẽnda zĩnda Kadɛɛs ne Sʋʋr sʋka. La a leb n zĩnda Geraare.

²A Abrahaam dag n yetame t'a pag a Saara yaa yẽnda tão. Geraar naab a Abimelɛk kɩtame tɩ b tɩ peeg a Saara n wa.

³La Wẽnnaam waa a Abimelɛk nengẽ yʋng zãmsd pʋg n yeel-a yaa: «Fo na n kii pag ning fo sẽn peegã poorẽ. Bala, yẽnda tara sɩda.»

⁴La rẽ t'a Abimelɛk dag n nan ka kẽ ne a Saara ye. Dẽ, yẽnda sokame yaa: «Zu-soaba, yãmb na n sak n sãama maam ne m tẽnga, baa mam sã n tar bʋʋm?

⁵Ka yẽnda meng n yeel maam tɩ yaa yẽnda tão la? Tɩ pagã me yeel maam tɩ yaa yẽnda kẽem la? Dẽ, mam sẽn maan yel-kãngã wã yaa ne pʋ-peelem, la m ka beeg ye.»

⁶Wẽnnaam leoka yẽnda zãmsdã pʋg n yeele: «Mam miime tɩ yel-kãngã pʋgẽ, fo bee f pʋ-peelem zugu. Rẽ n kɩte, tɩ mam mengã gɩdg foom tɩ f ra wa beeg maam ye. Yaa rẽ yĩnga, tɩ mam ka bas tɩ fo sɩɩs pagã ye.

⁷Moasã, lebs raoã a pagã, bala, a yaa no-rɛɛsa, la a na n pʋʋsa fo yĩnga tɩ f ra ki ye. La fo sã n ka lebs pagã, bɩ f bãng tɩ foom ne f sẽn so-b rãmbã fãa na n kiime.»

⁸A Abimelɛk yika yibeoog pĩnda n bool a tʋmtʋmdbã fãa n togs-b bõn-kãens fãa. La rabeem kãseng yõka bãmba.

⁹Dẽ, a Abimelɛk boola a Abrahaam me n yeel-a yaa: «Yaa bõe la fo sẽn maan tõnd woto wã? Mam beega foom ne bõe, tɩ fo na n kɩt tɩ mam soolmã ne mam mengã na n maan yel-wẽn-kẽen-kãngã? Fo maana maam bũmb ned sẽn ka segd n maan a to ye.»

¹⁰La a Abimelɛk yeela a Abrahaam yaa: «Fo tagsa a wãn-wãn n wa maand yel-kãngã?»

¹¹A Abrahaam leokame: «Mam tagsame tɩ zĩ-kãngã nebã ka zoet Wẽnnaam ye, la b tõe n kʋʋ maam m pagã yĩnga.

¹²La sẽn paasd yõwã, yaa sɩd tɩ yẽnda yaa mam tão. Bala, yẽnda yaa mam ba-biiga, la yẽnda ka mam ma-biig ye, la yẽnda lebga mam paga.

¹³Dẽ, Wẽnnaam sẽn kɩt tɩ mam yi n bas m tẽngã n gilgdẽ wã, mam yeela a Saara yaa: Mam kota foom tɩ f sak n maan mam sẽn na n yeel foom bũmb ningã, tɩ tõnd sẽn na n kẽng zĩig ning fãa, bɩ f yeel tɩ mam yaa fo tão.»

¹⁴A Abimelɛk yãka rũm-bãooneg ne rũm-bɛda, la a bao yem-daad ne yem-pogse, n kõ a Abrahaam. La a rɩk a pag a Saara me n lebs-a.

¹⁵A Abimelɛk yeela a Abrahaam yaa: «Ade, foom la sẽn ne mam soolmã zãng la. Kẽng n bao zĩig ning sẽn noom foom n zĩndi.»

¹⁶A Abimelɛk yeela a Saara yaa: «Ade, mam kõta f kẽema wanzuri wakɩ-koeems tusri, sẽn na n wilg neb nins sẽn be ne foomã, tɩ fo ka maan yell ye.»

¹⁷La a Abrahaam pʋʋsa Wẽnnaam a Abimelɛk yĩnga, la Wẽnnaam maaga yẽnda ne a pagã, la a yem-pogsã n kõ-b rogem.

¹⁸Bala, Wẽnnaam dag n kɩtame t'a Abimelɛk zakã pagb fãa lebg kiyã, a Abrahaam pag a Saara yĩnga.