Read SEBR SÕNGO, 1998 Sɩngre 22 Bible Online

Sɩngre 22 - SEBR SÕNGO, 1998 bible

Sɩngre 22

¹Bõn-kãensã fãa loogr zugẽ, Wẽnnaam maka a Abrahaam n yeele: «Abrahaam!» T'a sak tɩ naaba.

²Dẽ, Wẽnnaam yeela yẽnda yaa: «Ade, rɩk f biigã, fo bi-ribl-yendã, a Izak fo sẽn nongã, n kẽng Moriiza, la f sã n ta beenẽ, bɩ f rɩk-a n maan maoong sẽn yõogd bugum tãng ning mam sẽn na n wilg foomã zugu.»

³A Abrahaam sãda beoog n ning a bõang yolgo, la a peeg a tʋmtʋmdb a yiib sẽn yaa kom-bɩɩse, la a peeg a Izake. La a wesa raad maoong sẽn yõogd bugmã yĩnga, n dɩk sor n dabd zĩig ning Wẽnnaam sẽn dag n wilg yẽnda wã.

⁴La rasem a tãabã daare, a Abrahaam zẽka a neng n gese, la a yãnda zĩigã sẽn tond hal yɩɩga.

⁵Dẽ, a Abrahaam yeela a tʋmtʋmdbã yaa: «Bɩ Yãmb pa ka ne bõangã, tɩ maam ne bi-bɩɩgã na n kẽnga tãngã zug n tɩ pʋʋs Wẽnnaam la d lebg n wa paam yãmba.»

⁶A Abrahaam rɩka maoong sẽn yõogd bugmã raadã n tʋk a biig a Izake, la a rɩk bugmã ne sʋʋgã n zãad a nugẽ. Dẽ, bãmb b yiibã rag n tũuda taab n kẽnda.

⁷La a Izak yeela a ba a Abrahaam yaa: «M baaba!» T'a Abrahaam sak tɩ m biiga yaa a wãna. T'a Izak yeele: «Bugmã yẽ la woto wɛ, raadã me la woto, la pesgã sẽn na n maan maoong sẽn yõogd bugmã bee yɛɛnẽ?»

⁸A Abrahaam leoka a Izak n yeele: «M biiga, Wẽnnaam meng n na n ges tɩ peosg sẽn na n maan maoong sẽn yõogd bugmã wa.» La bãmb b yiibã rag n kell n tũuda taab n kẽnda.

⁹La bãmb sẽn ta zĩig ning Wẽnnaam sẽn dag n wilg a Abrahaamã, a Abrahaam maana tẽn-kugri, n dɩk raadã n dogle. La a sẽb a biig a Izak n dogl raadã sẽn be tẽn-kugrã zugã zugu.

¹⁰La a Abrahaam rɩka sʋʋgã n na n kodg a biigã.

¹¹Dẽ, Wẽnnaam malɛɛkã zĩnda yĩngr n bool a Abrahaam n yeele: «Abrahaam! Abrahaam!» La yẽnda sakame tɩ naaba.

¹²La malɛɛkã yeel-a lame yaa: «Ra sɩɩs bi-bɩɩgã ye. Ra maan-a bũmb ye. Bala, mam miime moasã, tɩ fo zoeta Wẽnnaam. Fo sẽn ka zãgs tɩ f ka na n dɩk f bi-riblã sẽn yaa fo bi-yendã n kõ maamã yĩnga.»

¹³La a Abrahaam sẽn zẽk a nengã, a yãnda pe-raoog sẽn be yẽnda poorẽ wã, t'a yɩɩlã gaag kãgre, la a Abrahaam kẽngame n tɩ yõk-a n wa maan maoong n yõog bugum n ledg a biig a Izak zĩigẽ.

¹⁴A Abrahaam pʋda zĩigã yʋʋr tɩ ‹Adonay-Yɩɩre› sẽn dat n togs tɩ ‹Sẽn-Ka-Saab n na n gese.› Rẽ kɩtame tɩ hal tɩ ta rũndã, b ket n yetame tɩ: ‹Sẽn-Ka-Saab tãngã zugu, bãmb geta yelle.›

¹⁵Sẽn-Ka-Saab malɛɛkã zĩnda saasẽ n bool a Abrahaam naoor a yiibẽ soaba.

¹⁶Malɛɛkã yeelame: «Mam wẽenda ne m menga! Yaa Sẽn-Ka-Saab koɛɛga. Fo sẽn maan bõn-kãngã n ka zãgs tɩ f ka na n kõ maam f biigã sẽn yaa fo bi-ribl-yendã,

¹⁷mam na n ninga foom bark hal wʋsgo, la m na n kɩtame tɩ fo yagensã fɩɩge, n lebg wa ãdsã sẽn be yĩngrã, la wa bĩisrã sẽn be ko-kãsengã noorã. Fo yagensã na n deega b bɛɛbã tẽms n sooge.

¹⁸Fo yagensã zug maasem yĩnga, dũniyã nebã buud fãa na n paama barka. Bala, fo saka mam noorã.»

¹⁹A Abrahaam lebg n leba kom-bɩɩsã sẽn yaa yẽnda tʋmtʋmdbã nengẽ, la bãmb tũu taab n leb Bɛɛr-Seba, bala, a Abrahaam rag n bee Bɛɛr-Seba.

²⁰Bõn-kãensã fãa loogr zugẽ, b yeela a Abrahaam tɩ yẽnda yao a Nakoor pag a Milka me rog a Nakoor kamba.

²¹A Uts n yaa pipi biiga, t'a Buuz pʋgda, a Kemuwɛll yaa a Aram ba,

²²ne a Kesɛɛd la a Haazo, ne a Pildaase, la a Yildafe, ne a Betuwɛlle.

²³A Betuwɛll n dog a Rebeka. Yaa a Milka sẽn dog a Abrahaam yao a Nakoor kamb a nii wã la woto.

²⁴Yẽnda pʋg-rɩkdgã yʋʋr boondame t'a Rewuma. La a paama kamb me ne pʋg-kãngã. Yaa a Teba, a Gaham, a Tahaase, ne a Maaka.