Read SEBR SÕNGO, 1998 Sɩngre 27 Bible Online

Sɩngre 27 - SEBR SÕNGO, 1998 bible

Sɩngre 27

¹A Izak rag n lebga nin-kẽema, t'a ninã pãng boog t'a ka leb n neẽ ye. A Izak boola yẽnda bi-kãseng a Ezayu, la a yeelame: «Ad-ma.»

²La a Izak yeela a Ezayu yaa: «Mam lebga nin-kẽema, la mam ka mi m kũum daar ye.

³Dẽ wã, m kot-f lame tɩ f rɩk f rao-teedã moas-moasã bala, f lokã ne f tãpã, n kẽng weoogẽ n tɩ bao we-nemd n wa kõ-ma.

⁴Segl rɩ-noog sẽn ta m yam n tall n wa kõ-m tɩ m dɩ, la m ning f zug barka, la m yaool n ki.»

⁵La a Rebeka rag n kelgda a Izak sẽn dag n gomd ne a biig a Ezayu wã. La a Ezayu yiime n loog weoog n na n tɩ bao we-nemd n wa.

⁶La a Rebeka yeela a biig a Zakoob yaa: «Ade, mam wʋma koɛɛga. F baaba rag n sõsda ne fo kẽem a Ezayu.

⁷A yeel-a lame t'a tɩ bao we-nemd n wa segl rɩ-noog n kõ-a t'a rɩ, la a ning-a bark Sẽn-Ka-Saab taoore, la a yaool n ki.

⁸M biig sõngo, kelg mam goamã neere, ad mam sẽn dat tɩ f maan bũmb ninga.

⁹M kot-f lame tɩ f kẽng rũmsã sʋk n tɩ bao bʋ-poal a yiib sẽn yaa sõama n wa, tɩ m na n maana rɩ-noog f baaba sẽn nong n kõ-a.

¹⁰Fo na n talla rɩɩbã n tɩ kõ f baaba t'a rɩ, la a ning-f bark sẽn deng a kũum.»

¹¹A Zakoob yeela a ma a Rebeka yaa: «Yaa sɩda, la mam kẽemã yaa yĩn-kõabneng soaba, tɩ mam yaool n ka yĩn-saalg soaba.

¹²M baaba tõe n saaga maam n gese, la a na n bãngame tɩ mam yaa zãmb soaba. Mam tõe n baoo kãab-wẽng n kõ m menga, tɩ ka yɩ bark ye.»

¹³A Zakoob ma a Rebeka yeel-a lame: «M biiga, bɩ kãab-wẽn-kãng lʋɩ mam zugu! Fo we n kelg mam goamã, la f kẽng n tɩ bao bʋ-poalã n wa kõ-ma.»

¹⁴Dẽ a Zakoob kẽngame n tɩ bao bʋ-poalã n wa kõ a ma t'a maan rɩ-noog sẽn ta a baaba wã yam.

¹⁵Rẽ poore, a Rebeka rɩka a Zakoob kẽem a Ezayu fu-neeb nins sẽn dag n pẽ yambẽ wã, n be roogã pʋgã n yeelg yẽnda bi-yao a Zakoobe.

¹⁶A Rebeka rɩka bʋ-poalã gãndã n pil a Zakoob nusã ne a yublã sẽn ka tar yĩn-koabnengã.

¹⁷Rẽ poore, a Rebeka rɩka rɩ-noogã ne burã yẽnda sẽn seglã n kɩs a biig a Zakoobe.

¹⁸A Zakoob kẽnga a ba a Izak nengẽ n tɩ yeele: «M baaba!» T'a Izak leoke: Ad-ma! M biiga, ãnda la foom?

¹⁹La a Zakoob leoka a baaba yaa: «Mam yaa yãmb bi-kãseng a Ezayu. Mam maana yãmb sẽn kosã, yik-y n zĩnd-y n deeg-y m we-nemdã n wãbe, la y ning-m barka.»

²⁰A Izak yeela a biig a Zakoob yaa: «Ad f paama nemdã tao-tao wɛ m biiga!» La a Zakoob leokame: «Sẽn-Ka-Saab sẽn yaa yãmb Wẽnnaamã kɩtame tɩ we-rũmsã wa mam sẽn beẽ wã.»

²¹La a Izak yeela a Zakoob yaa: «M biiga, bɩ f kolg tɩ m saag-f n ges fo sã n sɩd yaa mam biig a Ezayu.»

²²Dẽ, a Zakoob kolga a ba a Izake, t'a saag-a, n bas n yeele: «Koɛɛgã wẽnda a Zakoob koɛɛg wɛ, la nusã yaa a Ezayu nusi.»

²³La a Izak ka bãng a Zakoob ye. Bala, yẽnda nusã rag n tara kõbd wa a kẽem a Ezayu nusã sẽn tarã, la a Izak ninga a Zakoob zug barka.

²⁴A Izak sokame: «Fo sɩd yaa mam biig a Ezayu bɩ?» T'a leok tɩ n-yẽe.

²⁵Dẽ, a Izak yeelame: «M biiga, yãk we-nemdã n kõ-m tɩ m dɩ la m ning-f barka. La a Zakoob yãkame n kõ a Izak t'a rɩ.» La a tall reezẽ rãam n wa kõ-a t'a yũ.

²⁶Dẽ poore, a ba a Izak yeel-a lame: «M biiga, kolg n mok-ma.»

²⁷La a Zakoob kolgame n mok-a, la a Izak sẽn wʋm futã yũugã, a ning-a-la bark n yeele: «N-yẽe! Mam biigã yũug wẽnda wa pʋʋgo, Sẽn-Ka-Saab sẽn ning barka!

²⁸Bɩ Wẽnnaam kɩt tɩ yĩngr meenem sig f zugu. N kɩt tɩ f paam tẽngã bõn-koaadla, tɩ f paam bɩle ne reezẽ rã-paalg wʋsgo!

²⁹Bɩ soolem toay-toayã neb sak foom, tɩ buud toay-toayã wõgemd fo taoore! Fo na n yɩɩ f saam-biisã soaala. La bɩ fo ma-biisã wõgemd fo taoore! Ned ning sẽn na n kãab-a foom wẽnga, a soab na n paama kãab-wẽnga, La ned ning sẽn na n ning-a fo zug barka, A soab na n paama barka!»

³⁰A Izak sẽn ning a Zakoob bark n sɛ t'a Zakoob yik n yi bal yee, la a kẽem a Ezayu sẽn yi tãoosgã n be waoongẽ.

³¹A Ezayu me segla rɩ-noog n tall n na n wa kõ a baaba. Yẽnda yeela a baaba yaa: «M baaba, yik-y n deeg-y y biigã we-nemdã n wãb la y ning m zug barka.»

³²La a ba Izak sok-a lame: «Yaa ãnda la foom?» T'a leoke: «Mam yaa yãmb bi-kãseng a Ezayu.»

³³La a Izak pɛlengã yɩkame t'a rigda. A Izak pɛlengã yɩka wʋsg t'a soke: «La yaa ãnda la sẽn wa ne we-nemdã n wa kõ maamã? Mam zoe n paama fãa n dɩ tɩ fo nan ka wa ye, la mam zoe ninga a soab zug barka, la a na n paama barka.»

³⁴A Ezayu sẽn wʋm a ba wã goamã, a zẽka a koɛɛg n kelme, n yãb ne sũ-toog wʋsg n yeel a baaba yaa: «M baaba, ning-y maam me barka.»

³⁵La a Izak leok-a lame: «Fo yao wã wa n maana sɩlem n deeg fo barkã.»

³⁶A Ezayu yeelame: «Yaa b sẽn pʋd yẽnda yʋʋr t'a Zakoobã yĩng la yẽnda sẽn zãmb maam hal naoor a yiib fãa wã bɩ? Yẽnda reng n deega mam bi-kãsen-pʋɩɩrã, la a leb n deeg mam barkã yɛsa.» A Ezayu soka a baaba yaa: «Yãmb ka leb n tar bark baa bilf mam yĩnga?»

³⁷La a Izak leoka a Ezayu yaa: «Ade, mam kɩtame t'a na n lebg fo soaala, mam kõo yẽnda a saam-biisã fãa tɩ b na n yɩ yẽnda tʋmtʋmdba, la mam yeelame t'a paam koodo, la reezẽ rã-paalga. Dẽ wã, m biiga, bõe la mam tõe n leb n maan n kõ foom?»

³⁸A Ezayu yeela a baaba yaa: «Rẽ yĩnga, yaa bark a yembr bal la yãmb tar la? M baaba, ning-y maam me barka.» La a Ezayu zẽka a koɛɛg n yãbe.

³⁹A ba wã yeela yẽnda yaa: «Ade, fo yir na zãaga ne zĩ-bʋgsã, la a zãag ne saasẽ la yĩngr meenem me.

⁴⁰Fo na n talla f sʋʋg n zab n paam n vɩɩmde. Fo yao wã n na n sooga foom. La fo sẽn na n yeebdẽ, n gilgd n kẽnd ka la ka wã yĩnga, fo na n tõogame t'a ka leb n soog foom ye.»

⁴¹A Ezayu kisga a Zakoob a ba wã sẽn ning yẽnda barkã yĩnga. A Ezayu rag n tagsda a sũurẽ n yetẽ: «M baaba kũum kolgame, b kũumã poore, mam na n kʋʋ m yao a Zakoobe.»

⁴²B rɩka a Rebeka bi-kãseng a Ezayu goamã n tɩ togs a Rebeka. Dẽ, a Rebeka boola a bi-yao a Zakoob n yeel-a yaa: «Ade, fo kẽem a Ezayu rat n kʋ-f lame n dok a sũuri.

⁴³Moasã, m biiga, kelg mam goamã neere! Yik n zoe n kẽng mam tão a Labã sẽn be Haarã wã nengẽ n tɩ soonde!

⁴⁴Kell n zĩnd yẽnda nengẽ tɩ yɩ rasem a yiibu, hal tɩ fo kẽemã sũur wa sigi.

⁴⁵Fo kẽemã sũur sã n wa n sig ne foom, t'a yĩm bũmb ning fo sẽn dag n maan yẽnda wã, mam na yaool n kɩt tɩ f lebg n wa. Bala, na n yɩɩ a wãn tɩ mam na n kong yãmb y yiibã fãa daar a yembr pʋgẽ?»

⁴⁶A Rebeka yeela a Izak yaa: «Mam yamã yii ne m vɩɩmã, Hɛt nebã kom-pugli wã yĩnga. A Zakoob sã n dɩk Hɛt-rãmbã pʋg-sadbã sʋk pʋg-sad wa pʋg-bãmbã, mam vɩɩmã yõod bee yɛ?»