Read SEBR SÕNGO, 1998 Sɩngre 28 Bible Online

Sɩngre 28 - SEBR SÕNGO, 1998 bible

Sɩngre 28

¹A Izak boola a Zakoob n ning-a bark n kõ-a noor n yeele: «Da rɩk Kana tẽng bi-pugl n maan f pag ye.

²Yik n kẽng Padan-Aram, fo ma wã ba-yirã, a Betuwɛll nengẽ, n tɩ peeg bi-pugl a yembr f ma wã tão a Labã kom-pugli wã sʋk n maan f paga.

³Bɩ Pãng-Soab a Wẽnnaam ning f zug barka, la b kõ-f rogem, n kɩt tɩ f fɩɩge, n lebg buud wʋsgo!

⁴Bɩ Wẽnnaam kõ foom ne f yagensã fãa a Abrahaam barkã, n kɩt tɩ f soog tẽng ning fo sẽn yaa sãan a pʋgẽ wã. Wẽnnaam dag n dɩk-a lame n kõ a Abrahaam!»

⁵Woto, a Izak kɩtame t'a Zakoob loog n kẽng Padan-Aram, a Betuwɛll biig a Labã sẽn yaa Aram nedã yiri. A Labã yaa a Zakoob ne a Ezayu ma a Rebeka tão.

⁶A Ezayu mikame t'a Izak ninga a Zakoob zug barka, la a tʋma t'a kẽng Padan-Aram n tɩ bao pag beenẽ. La a ning-a bark n yeel-a t'a ra bao Kana tẽng pʋg-sad n maan a pag ye.

⁷La a Zakoob saka a baaba ne a ma noore, la a loogame n kẽng Padan-Aram tẽnga.

⁸A Ezayu mikame tɩ Kana kom-pugli wã ka ta yẽnda ba a Izak yam ye.

⁹Dẽ, a Ezayu yiime n kẽng a Ismayɛll nengẽ. Yẽnda tɩ rɩka a Abrahaam bi-ribl a Ismayɛll bi-pugl a Mahalat sẽn yaa a Nebayot tão-poakã n maan a paga, n paas a pagbã.

¹⁰A Zakoob yii Bɛɛr-Seba n kẽng Haarã.

¹¹Yẽnda taa zĩig a yembre, la a gãanda beenẽ yʋn-kãnga, bala, wĩndgã rag n kẽeme. Yẽnda rɩka kugr beenẽ n kʋgl n gãand zĩ-kãngã.

¹²Yẽnda paama zãmsdo. Yẽnda yãnda raodg sẽn tilg tẽng zugu, t'a zugã tẽkd saasã. La Wẽnnaam malɛgs n dag n dʋʋd beenẽ la b sigda.

¹³La mikame tɩ Sẽn-Ka-Saab rag n yasa raodgã zugẽ n yetẽ yaa: «Mam yaa Sẽn-Ka-Saabo, n yaa fo yaab a Abrahaam Wẽnnaam, la a Izak Wẽnnaam. Fo sẽn gãe tẽng ning zugã, mam na n kõ-a-la foom ne f yagensã tɩ y sooge.

¹⁴Fo yagensã sõor na n yɩɩ wʋsg wa tẽng tom. Fo yagensã na n saag n pida poorẽ la taoore, ne goabg la rɩtgo. Dũniyã nebã fãa na n paama bark foom ne f yagensã zug maasem yĩnga.

¹⁵La gese, mam mengã bee ne foom. Mam na n gũu foom zĩig ning fãa fo sẽn na n kẽnge, la mam na n talla foom n lebg n wa soolem-kãngã pʋga. Bala, mam ka na n tol n bas foom ye, mam na n pidsa bũmb ning mam sẽn yeel foomã.»

¹⁶La a Zakoob sẽn nek a gõeemẽ wã, a yeelame: «Mam mii hakɩɩka, tɩ Sẽn-Ka-Saab bee zĩ-kãngã, la mam dag n ka mi ye!»

¹⁷Dẽ, rabeem yõka yẽnda t'a yeele: «Ad zĩ-kãngã seka zoeese! Bala, zĩ-kãngã sɩd yaa Wẽnd doog bala. Zĩ-kãngã yaa arzãn dignoore.»

¹⁸A Zakoob yika yibeoog pĩnda, n dɩk kugr ning yẽnda sẽn kʋgl n gãandã, n vigl tẽn-kugri, n kiig kaam a zugu.

¹⁹Yẽnda pʋda zĩigã yʋʋr tɩ Betɛlle, la tẽngã meng yʋʋr dag n yaa Luuzi.

²⁰Yẽnda maana pʋleng n yeele: «Wẽnnaam sã n sɩd bee ne maam, la b sã n gũ maam sorã zug m kẽndã pʋga, la b sã n kõ maam dɩɩb tɩ m dɩ, la b kõ maam fut tɩ m yeelge,

²¹la b sã n sõng maam tɩ mam tõog n lebg n leb n ba wã zakẽ ne bãane, Sẽn-Ka-Saab na n yɩɩ mam Wẽnnaam.

²²Kug-kãngã mam sẽn vigl tɩ yaa tẽn-kugrã na n yɩɩ Wẽnnaam doogo. Mam na n yãka bũmb nins fãa yãmb sẽn na n kõ maamã piig pʋɩɩr n kõ yãmba.»