Read SEBR SÕNGO, 1998 Sɩngre 3 Bible Online

Sɩngre 3 - SEBR SÕNGO, 1998 bible

Sɩngre 3

¹Waaf rag n yaa sɩlem soab n yɩɩd we-rũmsã fãa Wẽnnaam Sẽn-Ka-Saab sẽn maanã. Waafã soka pagã yaa: «Sɩd-sɩdã, rẽ yĩnga, Wẽnnaam yeela yãmb tɩ y ra rɩ tɩɩsã fãa sẽn be zẽedã zĩigẽ wã biis sɩda?»

²Pagã yeela waafã yaa: «Wẽnnaam yeelame tɩ tõnd tõe n dɩɩ tɩɩsã sẽn be zẽedã zĩig pʋgẽ wã biisi.

³La sã n yaa ne tɩɩg ning sẽn be-a zẽedã zĩig tẽn-sʋkã, Wẽnnaam yeelame yaa: ‹Ra yãk-y-yã a biisã n dɩ, la y ra tol n sɩɩs-a me ye. Sã ka rẽ, yãmb sã n sɩɩs-a, yãmb na n kiime.› »

⁴Dẽ, waafã yeela pagã yaa: «Yãmb ka na n tol n ki ye!

⁵La yaa tɩ Wẽnnaam miime, tɩ yãmb sã n dɩ tɩɩgã bil daare, yãmb yamã na n wekame tɩ yãmb lebg wa Wẽnnaam, n mi sõama ne wẽng n bake.»

⁶Pagã gesame tɩ tɩɩgã biis yaa sõama tɩ rɩ, la a bee neer tɩ gese, la a yaa tɩɩg sẽn wat ne ratem tɩ rɩ n paam yam vẽnegre. Dẽ, pagã yãka tɩɩgã bil n dɩ, la a kõ a sɩdã sẽn dag n be ne yẽnda wã me t'a rɩ.

⁷Woto, bãmb b yiibã yam wekame, la bãmb bãngame tɩ b yaa b zaala. Dẽ, bãmb pãnema kankang vãad n sẽgne.

⁸Zaab-noor wakate, raoã ne a pagã wʋma Wẽnnaam sẽn dag n gõod zẽedã zĩig pʋg rãamde. Dẽ bãmb kẽe zẽedã zĩig tɩɩs sʋk n solg b meng ne Wẽnnaam Sẽn-Ka-Saabo.

⁹Wẽnnaam Sẽn-Ka-Saab boola raoã n sok-a yaa: «Fo bee yɛɛnẽ?»

¹⁰Raoã leokame: «Mam wʋma yãmb rãamd zẽedã zĩig pʋga, dẽ, rabeem yõka maam. Bala, mam yaa m zaala. Dẽ kɩtame tɩ mam zoe n soonde.»

¹¹Wẽnnaam Sẽn-Ka-Saab yeela yẽnda yaa: «Ãnda n yeel foom tɩ f yaa f zaala? M mi tɩ fo ka rɩ tɩɩg ning mam sẽn yeel foom tɩ f ra rɩ wã biis la?»

¹²Raoã leokame: «Yaa yãmb sẽn kõ maam pag ning t'a be ne maamã n yãk tɩɩgã bil n kõ maam tɩ m dɩ.»

¹³Dẽ, Wẽnnaam Sẽn-Ka-Saab soka pagã yaa: «Paga, yaa bõe tɩ fo maan woto?» La pagã leokame: «Yaa waafã n belg maam n kɩt tɩ mam dɩ tɩɩgã bila.»

¹⁴Wẽnnaam Sẽn-Ka-Saab yeela waafã yaa: «Fo sẽn maan woto wã yĩnga, kãab-wẽng bee fo zugu, yir rũmsã fãa ne we-rũmsã fãa sʋka. Fo kẽndã na n yɩɩ ne f pʋgã, la tẽngã tom n na n yɩ fo rɩɩbo, hal fo vɩɩmã tɛka.

¹⁵Mam na n ninga beem foom ne pagã sʋka, la fo yagengã ne pagã yageng sʋka. Pagã yageng na n bedsa fo zugu, la fo na n pogla yẽnda nao-kãsenkãare.»

¹⁶Wẽnnaam yeela pagã yaa: «Mam na n kɩtame tɩ fo tʋdb wakat yɩ toog wʋsg ne-fo. Fo rogem na n yɩɩ toogo. Fo ratmã ne f yamã na n loee ne f sɩdã. La fo sɩdã na n sooga foom ne f ratmã fãa.»

¹⁷Wẽnnaam yeela raoã yaa: «Fo sẽn sak f pagã noorã, n dɩ tɩɩg ning mam sẽn dag n yeel foom tɩ f ra rɩ wã biisã yĩnga, mam na n ninga kãab-wẽng tẽn-gãongã zugu. Tẽn-gãongã na n paama kãab-wẽng fo yĩnga. Fo vɩɩmã tɛka, f na n namsa wʋsg n yaool n paam f rɩɩbo.

¹⁸Gõos ne mo-gõos na n yii tẽn-gãongã zugu. Weoogã moodã na n yɩɩ fo rɩɩbo.

¹⁹La fo na n kaaga f rĩir tʋʋlg n yaool n paam dɩɩb n dɩ. Hal tɩ ta daar ning fo sẽn na n lebg n leb tẽng tomẽ wã. B sẽn yãk tẽng tom n maan foomã yĩnga. Bala, fo yaa tẽng tom, la fo na n leb n leba tẽng tomẽ.»

²⁰A Ãdem pʋda a pagã yʋʋr t'a Hawa, sẽn dat n togs t'a ‹vɩɩm›, yẽnda sẽn yaa nin-vɩɩsã fãa ma wã yĩnga.

²¹Wẽnnaam Sẽn-Ka-Saab rɩka gãnd n maan fut n yeelg a Ãdem ne a pagã.

²²Wẽnnaam Sẽn-Ka-Saab yeelame: «Moasã, ninsaal lebga wa tõndo, n mi sõama ne wẽng n bake, rẽ wã, bɩ d gũus t'a ra wa yãk tɩɩg ning biis sẽn kõt vɩɩmã me n dɩ, n kell n vɩ n ka kiidẽ ye.»

²³Wẽnnaam Sẽn-Ka-Saab riga yẽnda n yiis zẽedã zĩigẽ, n kɩt tɩ b ko tẽn-gãongã sẽn yaa zĩig ning b sẽn yãk tomã n maan bãmbã.

²⁴Wẽnnaam sẽn dig ninsaal n yiis zẽedã zĩig pʋgẽ wã loogr zugẽ, b ninga Serubẽ-rãmb Edɛn zẽedã zĩig yaanga, ne sʋʋg sẽn wit bugum t'a wẽnemded zĩigã fãa, n gũud zẽedã zĩigã sor ning sẽn dabd tɩɩg ning biis sẽn kõt vɩɩmã sẽnẽ wã.