Read SEBR SÕNGO, 1998 Sɩngre 37 Bible Online

Sɩngre 37 - SEBR SÕNGO, 1998 bible

Sɩngre 37

¹A Zakoob zĩnda Kana, tẽng ning yẽnda ba wã sẽn dag n zĩnd sãandã.

²Ad a Zakoob roogã kibare: A Zozɛf sẽn wa n tar yʋʋm piig la a yopoe, a rag n tũuda a kẽem-dãmbã n gũud piisi, la bʋʋse. La a rag n yaa bi-ribl-bilf bala. A Zozɛf rag n bee ne a ba wã pagb a Bila ne a Zilpa kambã. La a Zozɛf rag n dɩkda a kẽem-dãmbã gom-yoodã n kẽnd n togsd a ba wã.

³La a Israyɛll rag n nonga a Zozɛf n yɩɩd a kamb a taabã fãa. Bala, yaa yẽnda kʋʋlem wakate, la a rog a Zozɛfe. A Zakoob rag n sẽe fu-gʋlem n kõ a Zozɛfe.

⁴A Zozɛf kẽem-dãmbã sẽn mik tɩ b baaba nonga a Zozɛf n yɩɩd bãmb fãa wã, bãmb kisg-a lame. Dẽ, bãmb ka leb n tar mo-noog ne-a ye.

⁵A Zozɛf zãmsa zãmsdo, n dɩk n togs a kẽem-dãmbã, la bãmb kisg-a lame n paase.

⁶A Zozɛf yeel-b lame: «Kelg-y mam zãmsdã!

⁷Tõnd dag n bee pʋʋgẽ ne taab n gĩnd ka-gĩna, la mam ka-gĩndã yikame n yals yĩngri, la yãmb ka-gĩnã gũbga mam ka-gĩndã n wõgemded a taoore.»

⁸Yẽnda kẽem-dãmbã yeela yẽnda yaa: «Fo tagsdame tɩ fo na n sooga tõnd bɩ? Bɩ fo tagsdame tɩ f na n yɩɩ tõnd zu-soaba?» La bãmb leb n kisga a Zozɛf n yɩɩg pĩnda, yẽnda zãmsdã ne a goamã yĩnga.

⁹A Zozɛf leb n zãmsa zãmsd a to yɛsa, n leb n dɩk n togs a kẽem-dãmbã. Yẽnda yeelame: «Ges-y-yã! Mam leb n zãmsa zãmsdo! Ade, wĩndgã ne kiuugã la ãds piig la a yembr n dag n wõgemded mam taoore.»

¹⁰A Zozɛf rɩka zãmsdã n togs a ba wã ne a kẽem-dãmbã. La a baaba zab-a lame n sok-a yaa: «Yaa bõe zãmsd buud la fo sẽn zãmsã? Fo tagsdame tɩ f ma ne f kẽem-dãmbã ne mam mengã na wa n wõgemda tẽng fo taoor bɩ?»

¹¹A Zozɛf kẽem-dãmbã maana sũ-kiir ne yẽnda. La a Zozɛf ba a Zakoob rag n bĩngda yel-kãensã a sũurẽ.

¹²A Zozɛf kẽem-dãmbã wa n kẽnga Sɩkɛm n na n tɩ wãben b ba wã rũm-bãoonego.

¹³A Israyɛll yeela a Zozɛf yaa: «Fo kẽem-dãmbã bee Sɩkɛm n wãbend rũmsã. Wa tɩ m tʋm-f b nengẽ!» La a Zozɛf yeelame tɩ b tʋm-a.

¹⁴A Israyɛll yeela a Zozɛf yaa: «Kẽng n tɩ ges f kẽem-dãmbã tara laafɩ, la f bãng bũmb sã n ka tar rũm-bãoonegã! La f lebg n wa togs-ma.» Dẽ, yẽnda zĩnda Ebrõ tãngã longẽ n tʋma a Zozɛfe, la a Zozɛf kẽnga Sɩkɛm.

¹⁵Rao a yembr n yãnd a Zozɛf t'a be weoogã pʋg n gilimdẽ. Raoã soka a Zozɛf tɩ yaa bõe la yẽnda baooda.

¹⁶La a Zozɛf leokame: «Mam baooda m kẽem-dãmba. M kot-y lame tɩ y wilg maam b sẽn be zĩig ning n wãbend b rũmsã wɛ!»

¹⁷Raoã yeelame: «Bãmb yii zĩ-kãngã. Bala, mam dag n wʋmda b sẽn gomd tɩ b na n kẽnga Dotã.» A Zozɛf pʋga a kẽem-dãmbã nao n tɩ yãnd-b Dotã.

¹⁸Bãmb yãnda a Zozɛf t'a ket n be yɩɩga. La a Zozɛf sẽn nan ka ta bãmb sẽn beẽ wã, bãmb yẽsa ne taab n dat n kʋ-a.

¹⁹Ad bãmb sẽn gom ne taab n yeele: «Ad zãmsdã naab sẽn wate.

²⁰Wa-y tɩ d kʋ-a n lob bulgẽ, la d kuil n tɩ yeel tɩ yaa we-rũng n yõk-a n wãbe, la d ges yẽnda zãmsdã sẽn na yɩ bũmb ninga.»

²¹La a Rubɛn sẽn wʋm b goamã, yẽnda yãka yam n na n fãag a Zozɛfe. A Rubɛn yeel-b lame: «Wa-y tɩ d ra kʋ-a ye!»

²²A Rubɛn leb n yeelame: «Da raag-y-yã a zɩɩm ye. Lob-y-yã-a bulgã pʋg weoogẽ wã, la y ra sɩɩs-a ye.» A Rubɛn dag n maana woto n na n fãag a Zozɛf bãmb nusẽ n tall-a n tɩ lebs a baaba.

²³Dẽ, a Zozɛf sẽn ta a kẽem-dãmbã nengẽ, b yõk-a lame n yeeg a fu-gʋlmã a sẽn dag n yerã.

²⁴Bãmb yõka a Zozɛf n lob bulgã pʋga. La bulgã rag n yaa bul-koɛɛng sẽn ka tar koom ye.

²⁵Dẽ poore, bãmb zĩndame n na n dɩ b rɩɩbo. Bãmb sẽn zẽk n gese, b yãnda Ismayɛll buudã neb sẽn yi Galaad n tũud taab wʋsg n watẽ. Bãmb yʋgma wã rag n zɩlga tɩdare, ne kaam sẽn tar yũ-noogo, la wisdu, n tar n dabd Ezɩpt tẽnga.

²⁶La a Zʋʋda yeela a ba-biisã yaa: «Tõnd sã n kʋ d yao wã n mume, a nafda tõnd ne bõe?

²⁷Wa-y tɩ d koos-a ne Ismayɛll buudã nebã, la d ra maan-a bũmb ye. Bala, yẽnda yaa tõnd yao, a yaa bũmb a yembr ne tõndo.» La a Zʋʋda ba-biisã sak n deega a koɛɛgã.

²⁸Woto, Madiyã toandbã sẽn wa n loogdẽ wã, bãmb yiisa a Zozɛf bulgẽ wã, n koos-a ne Ismayɛll buudã neb wanzuri ligd pisi, la b talla a Zozɛf n kẽng Ezɩpt tẽnga.

²⁹La a Rubɛn sẽn lebg n wa bulgẽ wã n wa mik t'a Zozɛf ka be beenẽ wã, a pãrsa a futu,

³⁰n lebg n leb a yaopã nengẽ n tɩ sok-b yaa: «Mam na n kẽe yɛ? Biigã ka leb n be bulgẽ wã ye!»

³¹Dẽ, bãmb kʋʋ bull n dɩk a Zozɛf fuugã, n los zɩɩmẽ wã.

³²La bãmb dɩka fuugã n tʋm tɩ b tɩ kɩs b baaba n yeele: «Tõnd yãnda woto n dɩke, reeg-y n ges-y yaa yãmb biigã fuugã bɩ, bɩ ka rẽnda?»

³³La a Zakoob bãngame tɩ yaa a Zozɛf fuugã, la a yeelame: «Yaa mam biigã fuugu, yaa we-rũng n wãb-a! B fãsa a Zozɛfe!»

³⁴A Zakoob pãrsa a futu, n sẽgen boto, n yãb a Zozɛf kʋʋrã n kaoos rasem wʋsgo.

³⁵A Zakoob kom-dibli wã ne a kom-pugli wã fãa yikame n bels a Zakoobe, la a ka sak belsgã ye. Yẽnda yeelame: «Mam na n yãbame n ki n bʋʋg m biig a Zozɛf kɩɩm-kulgu.» La yẽnda yãba a biigã yĩnga.

³⁶Madiyã nebã tɩ koosa a Zozɛf Ezɩpt tẽng ne a Potifaar sẽn dag n yaa Faarõ sõgen-kãsengã, n yaa gũudbã naabã.