Read SEBR SÕNGO, 1998 Sɩngre 41 Bible Online

Sɩngre 41 - SEBR SÕNGO, 1998 bible

Sɩngre 41

¹Yʋʋm a yiib loogr zugẽ, rĩm a Faarõ zãmsa zãmsdo, n yãnd tɩ yẽnda tɩ yasa Nill kʋɩlgã noore.

²Yẽnda yãnda nag-yãan-nobds a yopoe sẽn yaa neeba, tɩ b yi kʋɩlgẽ wã. La b rag n bee kʋɩlgã noor n wãbd yamdo.

³Rẽ zugẽ, a leb n yãnda nag-yãans a yopoe sẽn yaa waga, n ka neeb ye. Bãmb me yii koomẽ wã, la b bʋʋga nag-yãan-nobds a yopoe wã sẽn yaa neebã, n tɩ yals n yegl bãmb kʋɩlgã noore.

⁴La nag-yãan-wagã sẽn ka neebã wãba nag-yãan-neeb a yopoe wã sẽn nobã. La Faarõ nekame.

⁵La yẽnda leb n gũsame n zãms zãmsd a yiibẽ soaba. Yẽnda yãnda kaaf a yembr sẽn wom ka-zu-bɛd a yopoe sẽn bɩ sõama n yaa neeba.

⁶Dẽ poore, rĩmã leb n yãndame tɩ ka-zu-faad a yopoe, sẽn wẽnd yaang sob-tʋʋlgã sẽn wẽ tɩ b faage, n pʋgl pĩnd dãmbã n yi.

⁷La ka-zut nins sẽn faagã rɩɩ ka-zu-bɛd nins sẽn bɩ sõama wã. Dẽ, Faarõ nekame. Rag yaa zãmsdo.

⁸Beoogã sẽn vẽege, Faarõ pɛlengã yɩkame t'a kɩt tɩ b bool tɩtã-rãmb fãa ne Ezɩpt tẽngã tɩtã-rãmb zãng tɩ b wa. La Faarõ togsa bãmb yẽnda zãmsdã sẽn yɩ to-to. La bãmb ned baa a yembr ka tõog n na n bilg zãmsd baa a yembr võor n kõ Faarõ ye.

⁹Dẽ, sõgen-kãsengã sẽn yaa bõn-yũudlã kɩtã goma ne Faarõ n yeele: «Rũndã, mam na n tẽega m kongrã yelle!

¹⁰Faarõ sũur dag n wa n yika ne b tʋmtʋmdbã, tɩ b kɩt tɩ b kẽes maam bi-bees roog gũudbã naab nengẽ. La yɩɩ maam ne rɩɩbã yell gesg taoor soabã.

¹¹Maam ne yẽnda, tõnd naaga taab n zãms zãmsd yʋng a yembre, la ned kam fãa zãmsd dag n tara a võore.

¹²La Ebre-rãmbã bi-bɩɩg a yembr n dag n be ne tõnd bi-bees roogã pʋga, n dag n yaa gũudbã naab yem-daoogo. Dẽ, tõnd togsa yẽnda d zãmsdã, la a bilga tõnd ned kam fãa a zãmsd võore.

¹³La bũmbã fãa kell n yɩɩ wa yẽnda sẽn bilg zãmsdã to-to n kõ tõndã. Bala, Faarõ leb n lebsa maam m tʋʋmdẽ, la b kɩt tɩ b luul ned a to wã sẽn yaa rɩɩbã seglg taoor soabã.»

¹⁴Dẽ, Faarõ tʋmame tɩ b tɩ tall a Zozɛf n wa. La b tɩ yiisa a Zozɛf bi-bees roogẽ wã tao-tao. B põnga a Zozɛf zugu, n tek a futu, n tall-a n kẽng Faarõ nengẽ.

¹⁵Faarõ yeela a Zozɛf yaa: «Mam zãmsa zãmsdo, la ned baa a yembr ka tõog n bilg maam a võor ye! La mam wʋmame tɩ b sã n togs foom zãmsdo, fo tõe n bilga a võore.»

¹⁶A Zozɛf leoka rĩma n yeele: «Ka maam n na n bilg a võorã ye! Yaa Wẽnnaam n na n bilg zãmsdã võor n kõ Faarõ!»

¹⁷Dẽ, Faarõ yeela a Zozɛf yaa: «Mam zãmsdã pʋga, mam yãndame tɩ m dag n yasa Nill kʋɩlg noore.

¹⁸La mam yãnda nag-yãan-nobds a yopoe sẽn yaa neeba, tɩ b yi koomẽ wã n wãbd yamd kʋɩlgã noore.

¹⁹La nag-yãan-wag a yopoe n pʋgl bãmb n yi, la b ka neeb ye. Mam zɩ n yãnd nag-yãan-wag a woto buud Ezɩpt soolmã pʋg ye.

²⁰La nag-yãan-wagã sẽn ka neebã wãba nag-yãan-nobds a yopoe nins sẽn deng n yi wã zãnga.

²¹Nag-yãan-wagã vela nag-yãan-nobdsã n ket n yas wa bãmb ka vel bũmb ye. Bãmb kell n yaa wag wa pĩndã. Dẽ poore, mam nekame.

²²Ade, mam leb n zãmsame yɛsa, n yãnd ka-zu-bɛd a yopoe sẽn yaa neeb sẽn yi kaaf a yembr zugu.

²³La ka-zu-faad a yopoe sẽn wẽnd yaang sebgã sẽn wẽ tɩ b faage, n pʋgl bãmb n yi.

²⁴La ka-zu-faadã sẽn faagã rɩɩ ka-zu-bɛd a yopoe nins sẽn ya-b neebã. Dẽ, mam togsa tɩtã-rãmb m zãmsdã, la ned baa a yembr ka tol n tõog n bilg maam a võorã sẽn dat n yeel tɩ bũmb ning ye.»

²⁵A Zozɛf yeela Faarõ yaa: «Yãmb zãmsd a yiibã fãa yaa bũmb a yembre. Wẽnnaam vẽnega Faarõ bũmb ning bãmb sẽn dat n maane.

²⁶Nag-yãan-nobds a yopoe wã mamsda yʋʋm a yopoe, tɩ ka-zu-bɛd a yopoe wã me mamsd yʋʋm a yopoe. Zãmsdã yaa bũmb a yembr bala.

²⁷La nag-yãan-wag a yopoe wã sẽn ka neebã sẽn yi n pʋgl pipi rãmbã mamsda yʋʋm a yopoe. La ka-zu-faad a yopoe wã yaang sob-tʋʋlgã sẽn wẽ tɩ yõogã wilgda yʋʋm a yopoe kom.

²⁸Woto, wa mam sẽn zoe n yeel Faarõ tɩ loogã, yaa Wẽnnaam n wilgd Faarõ bãmb a Wẽnnaam sẽn dat n maan bũmb ninga.

²⁹Ade, yʋʋm a yopoe n wate, n na n yɩ tɩgr yʋʋm Ezɩpt soolmã zãng pʋga.

³⁰La yʋʋm a yopoe sẽn yaa kom-kãseng yʋʋm n na n pʋgl n wa. La nebã fãa na n yĩma tɩgrã sẽn dag n zĩnd Ezɩpt soolmẽ wã yelle. Komã na n sooga Ezɩpt soolmã zãnga.

³¹Kom ning sẽn watã toolem yĩng na n kɩtame tɩ tẽngã ka leb n mi tɩ tɩgr n dag n zind ye.

³²Sã n yaa ne Faarõ zãmsdã sẽn yɩlem naoor a yiibã, rat n yeelame tɩ yaa Wẽnnaam meng n yãk yam n na n maan bõn-kãnga, la Wẽnnaam na n pids-a-la tao-tao.

³³Moasã, rẽndame tɩ Faarõ bao ned sẽn tar bãngre, la yam, n kõ yẽnda naam t'a ges Ezɩpt soolmã yelle.

³⁴Bɩ Faarõ sɩng moasã n yãk neb n kõ-b noor soolmã pʋgẽ, tɩ tɩgrã sẽn na n zĩnd yʋʋm a yopoe wã pʋgẽ wã, bɩ b reeg koodã peoog a nu sʋk fãa peoog a yembre. La tɩgrã sẽn na n zĩnd yʋʋm a yopoe wã pʋgẽ,

³⁵bɩ bãmb tigs koodã fãa, n wa kɩs Faarõ t'a kɩt tɩ rɩɩb zĩnd tẽngã fãa pʋgẽ, n kɩt tɩ b gũ.

³⁶Dẽ, tẽngã na n paama rɩɩbo, tɩ komã sẽn na n wa zĩnd yʋʋm a yopoe Ezɩpt soolmẽ wã ra tõog n sãam tẽngã ye.»

³⁷Rĩm a Faarõ ne a tʋmtʋmdbã fãa sũur yɩɩ noog ne gom-kãngã.

³⁸La Faarõ yeela bãmb yaa: «Tõnd tõe n leb n yãnda ned sẽn tar yam wa nin-kãngã, tɩ Wẽnnaam Sɩɩgã be a zug sɩda?»

³⁹Faarõ yeela a Zozɛf yaa: «Ade, Wẽnnaam sẽn tõog n kɩt tɩ fo bãng bõn-kãensã wã, tõnd ka leb n tõe n yãnd ned a to sẽn tar bãngre, la a tar yam wa foom ye.

⁴⁰Moasã, yaa foom n na n soog mam yirã, la mam nebã fãa na n saka fo noore. Yaa mam naamã bal n na n yɩɩg foom.»

⁴¹Faarõ leb n yeela a Zozɛf yaa: «Gese, mam dɩka Ezɩpt soolmã gill n ning fo nugẽ.»

⁴²Faarõ pidga a meng nugbĩngã sẽn tar nug-tikr bãndã n pid a Zozɛf nug-bila, la a kɩt tɩ b yeelg-a fu-neeb sẽn pɩnda, la a pid a Zozɛf loorã ne sãnem yãndo.

⁴³La rĩm a Faarõ kɩtame t'a Zozɛf kẽ Saar a yiibẽ soabã sẽn pʋgd yẽnda wã, la nebã rag n kelemdame n yetẽ tɩ: «Wõgemd-y-yã!» Rẽ, yɩɩ woto tɩ Faarõ kõ a Zozɛf noor t'a soog Ezɩpt soolmã zãnga.

⁴⁴Faarõ yeela a Zozɛf yɛsa: «Yaa maam la Faarõ, la sã n ka foom n kõ ned noor t'a maan bũmbu, ned kõn zẽk a nug-bil bɩ a naoor Ezɩpt soolmẽ wã ye.»

⁴⁵Rĩm a Faarõ pʋda a Zozɛf yʋʋr t'a Safnat-Paneya, la a rɩk bi-pugl a Asnat n kõ a Zozɛf t'a maan a paga. A Asnat yaa maan-kʋʋd a Poti-Feera sẽn be Onã wã bi-pugla. Dẽ, a Zozɛf yiime n na n gilg n ges Ezɩpt soolmã.

⁴⁶A Zozɛf sẽn wa n na n kẽng rĩm a Faarõ taoorã, rẽ t'a tara yʋʋm pis-tã. La yẽnda sẽn yi Faarõ nengẽ wã, a tɩ gilga Ezɩpt soolmã zãng n gese.

⁴⁷Tɩgrã yʋʋm a yopoe wã pʋga, pʋtã bõn-koaadl woma hal sõama.

⁴⁸La yʋʋm a yopoe wã pʋgẽ, a Zozɛf tigsa Ezɩpt soolmã koodã fãa. A Zozɛf tigsa koodã n bĩng tẽng fãa pʋgẽ. Yẽnda tigsa tẽng fãa pʋt bõn-koaadl n bĩng tẽng fãa pʋgẽ.

⁴⁹A Zozɛf sẽn wʋk koodã yaa wʋsg wa ko-kãsengã noor bĩisri, la rag n yaa wʋsg hal tɩ b ka leb n sõt ye. Bala, koodã rag n ka leb n tar sõor ye.

⁵⁰Sẽn deng kom-kãsengã sẽn na n sɩngã, rẽ tɩ On maan-kʋʋd a Poti-Feera bi-pugl a Asnat roga a Zozɛf kom-dibli a yiibu.

⁵¹A Zozɛf pʋda yẽnda bi-ribl-kãsengã yʋʋr t'a Manaase, sẽn dat n togs tɩ ‹yĩmbu.› Bala, a Zozɛf yeelame: «Wẽnnaam kɩtame tɩ mam yĩm m toogã ne m ba-yirã fãa yelle.»

⁵²A Zozɛf pʋda yiibẽ soabã yʋʋr t'a Efrayiim. Bala, yẽnda yeelame: «Wẽnnaam kɩtame tɩ mam paam dogem tẽng ning mam sẽn paam paoogrã pʋga.»

⁵³Yʋʋm a yopoe wã sẽn yɩ tɩgr yʋʋm Ezɩpt tẽngã wa n loogame.

⁵⁴La yʋʋm a yopoe kom-kãsengã sɩnga waoong wa a Zozɛf sẽn dag n togsã. La kom-kãsengã kẽe tẽmsã fãa pʋse. La Ezɩpt soolmã rag n tara rɩɩbo.

⁵⁵Dẽ, kom-kãsengã sẽn wa n sɩng n na n kẽ Ezɩpt soolmã gillã, nebã kelmame n yeel Faarõ t'a kõ bãmb rɩɩbo. La Faarõ yeela Ezɩpt nebã fãa yaa: «Kẽng-y n tɩ yãnd-y-yã a Zozɛfe, la a sẽn yeel yãmb tɩ y maan bũmb ning bɩ y maane!»

⁵⁶Kom-kãsengã rag n bee zĩiga fãa. Dẽ, a Zozɛf pagsa bao wã fãa, n koos koodã ne Ezɩpt tẽngã nebã. La komã wa n lebgda toog wʋsg Ezɩpt soolmã pʋg n paasdẽ.

⁵⁷La nebã rag n yita dũniyã zĩisã fãa pʋs n wat Ezɩpt tẽng n daad koodã a Zozɛf nengẽ. Bala, kom-kãsengã rag n kẽe dũniyã gill fãa.