Read SEBR SÕNGO, 1998 Sɩngre 48 Bible Online

Sɩngre 48 - SEBR SÕNGO, 1998 bible

Sɩngre 48

¹Yel-kãensã fãa loogr zugẽ, b wa n yeela a Zozɛf t'a baaba ka keem ye. La a Zozɛf peega a kamb a yiibã: A Manaase ne a Efrayiim, n kẽng a Zakoob nengẽ.

²B togsa a Zakoob n yeel yaa: «Ad yãmb biig a Zozɛf n wa n na n ges-yã. Dẽ, a Israyɛll modgame n yik n zĩnd a gãagã zugu.»

³A Zakoob yeela a Zozɛf yaa: «Pãng-Soab a Wẽnnaam vẽnega b meng ne maam Luuzi, Kana tẽnga pʋga, la b ninga maam barka.

⁴Bãmb yeela maam yaa: Ad maam! Mam na n kõ-f-la rogem, la m na n kɩtame tɩ f fɩɩg n lebg wʋsgo, la m kɩt tɩ f lebg buud wʋsg ba. Fo loogr poore, mam na n kɩtame tɩ fo yagensã soog tẽn-kãngã wakat sẽn kõn sa.

⁵Moasã, fo kamb a yiibã fo sẽn dog Ezɩpt soolmẽ wã sẽn deng mam sẽn na n wa fo nengẽ wã na n lebga mam dẽnda. Yaa a Efrayiim ne a Manaase, wa a Rubɛn ne a Sɩmyõ.

⁶La fo sẽn yaool n dog kamb nins bãmb zugẽ wã na n yɩɩ fo rẽnda. Bãmb na n naaga b ba-biisã n paam pʋɩɩre.

⁷Mam sẽn wa n yi Kana n watẽ wã, fo ma a Rasɛll tek n kii mam sɛɛgẽ, tõnd sẽn wa n be sorẽ n kolg Efratã. La mam mum-a-la beenẽ, Efrat sorã kɩrenga, zĩig ning b sẽn boond tɩ Betlehɛmã.»

⁸A Israyɛll gesa a Zozɛf kom-dibli wã n sok yaa: «Yaa ãnda rãmb la woto?»

⁹La a Zozɛf leoka a baaba n yeel tɩ yaa kom-dibli nins Wẽnnaam sẽn kõ yẽnda Ezɩpt tẽngã. A Israyɛll yeelame tɩ b tall kambã n kolg-a t'a ning-b barka.

¹⁰A Israyɛll rag n kʋʋlame t'a ninã pãng boog t'a ka leb n neẽ ye. Dẽ, a Zozɛf kɩtame tɩ kambã kolg a Israyɛlle, la a Israyɛll mobg-b lame n mok-ba.

¹¹A Israyɛll yeela a Zozɛf yaa: «Mam dag n ka tagsd tɩ mam na n leb n yãnda foom yɛs ye. La ade, Wẽnnaam kɩtame tɩ mam yãnd fo kamba!»

¹²A Zozɛf taka a kambã n yiis a ba wã rũmẽ, la a wõgemd n fõgen a neng tẽnga.

¹³A Zozɛf peega kamb a yiibã, n gãd a Efrayiim ne a rɩtg n ning a Israyɛll goabga, la a gãd a Manaase ne a goabg n ning a Israyɛll rɩtgo, n kɩt tɩ b yiibã fãa kolg a Israyɛlle.

¹⁴La a Israyɛll pɩʋʋga a nusã taaba, n dɩk a nug-rɩtgã n tik a Efrayiim sẽn yaa yao wã zugu, la a rɩk a nug-goabgã n tik a Manaase sẽn yaa kãsma zugu.

¹⁵A Zakoob ninga a Zozɛf zug bark n yeele: «Bɩ Wẽnnaam ning mam yaab a Abrahaam ne m ba a Izak sẽn dag n tũudã, soab ning sẽn yɩ-a mam pe-kɩɩm hal m dogmã daar n tãag rũndã wã,

¹⁶malɛɛk ning sẽn fãag-a maam wẽng buud fãa pʋgẽ wã, ning kom-bãmbã zut barka. La bɩ b boond kom-bãmbã ne mam yʋʋre, la ne m yaab a Abrahaam la m ba a Izak yʋʋre. Bɩ b fɩɩg n lebg wʋsg tẽng ning pʋg b sẽn be wã.»

¹⁷A Zozɛf sẽn yãnd t'a baaba tika a Efrayiim ne a nug-rɩtgã a sũurã ka yɩ noog ye. Dẽ, a Zozɛf gãda a baaba nugã n yãk n na n ning a Manaase zugu.

¹⁸A Zozɛf yeela a baaba yaa: «Ka woto ye m baaba! Bala, yaa ada soabã n yaa kẽema! Ning-y y nug-rɩtgã yẽnda zugu.»

¹⁹La a baaba zãgsame n yeele: «M biig sõngo, mam miime. Mam mii sõama! Yẽnda me na n lebga buud wʋsg ba, la yẽnda yao wã na n yɩɩ kãseng n yɩɩg yẽnda. La yẽnda yagensã na n yɩɩ buud wʋsgo, n zĩnd zĩig fãa.»

²⁰Badaare, a Zakoob ning-b-la bark n yeele: «Yãmb maasem yĩnga, Israyɛll nebã na n ningda nebã bark n yetẽ: ‹Wẽnd na kɩt tɩ f yɩ wa a Efrayiim, la wa a Manaase!› » Yɩɩ woto, t'a Zakoob reng n bool a Efrayiim yʋʋre, n yaool na n bool a Manaase yʋʋrã.

²¹A Israyɛll yeela a Zozɛf yaa: «Ade, mam yẽ na n kiime! La Wẽnnaam na n zĩnda ne yãmba, la b na n kɩtame tɩ y lebg n leb y yaab-rãmbã tẽngẽ.

²²Mam kõta foom pʋɩɩr n yɩɩd f kẽem-dãmbã. Yaa bũmb ning mam sẽn dag n zab ne sʋʋg la tãp n deeg Amoor-dãmbã nengẽ wã.»