Read SEBR SÕNGO, 1998 Sɩngre 5 Bible Online

Sɩngre 5 - SEBR SÕNGO, 1998 bible

Sɩngre 5

¹Ad sebr ning sẽn wilgd a Ãdem yagensã. Daar ning Wẽnnaam sẽn naan ninsaalbã, bãmb naan-b lame n wẽneg b menga.

²Wẽnnaam naana bãmba, raoa la paga. Wẽnnaam ninga bãmb bark n pʋd b yʋʋr tɩ ninsaala, b sẽn naan bãmbã wakate.

³A Ãdem sẽn wa n tar yʋʋm koabg la pis-tã, a roga bi-ribl n wẽneg a menga, wa yẽnda yalẽ wã sẽn yaa to-to wã, la a pʋda a yʋʋr t'a Sɛte.

⁴A Ãdem vɩɩmd n kaoosa yʋʋm kobs-nii a Sɛt rogmã zugẽ. La a roga kom-dibli la kom-pugli.

⁵A Ãdem vɩɩmã tɛk fãa yɩɩ yʋʋm kobs-wɛ la pis-tã, la a kiime.

⁶A Sɛt sẽn wa n tar yʋʋm koabg la a nu, a roga a Enoose.

⁷A Enoos rogmã zugẽ, a Sɛt vɩɩmd n kaoosa yʋʋm kobs-nii la a yopoe, la a roga kom-dibli la kom-pugli.

⁸A Sɛt vɩɩmã zãng yɩɩ yʋʋm kobs-wɛ la piig la a yiibu, la a kiime.

⁹A Enoos sẽn wa n tar yʋʋm pis-wɛ, a roga a Kenan.

¹⁰A Kenan rogmã zugẽ, a Enoos vɩɩmda yʋʋm kobs-nii la piig la a nu, la a roga kom-dibli la kom-pugli.

¹¹A Enoos vɩɩmã zãng yɩɩ yʋʋm kobs-wɛ la a nu, la a kiime.

¹²A Kenan sẽn wa n tar yʋʋm pis-yopoe, a roga a Mahalalɛlle.

¹³A Mahalaleyɛll rogmã zugẽ, a Kenan vɩɩmda yʋʋm kobs-nii la pis-naase, la a roga kom-dibli la kom-pugli.

¹⁴A Kenan vɩɩmã zãng yɩɩ yʋʋm kobs-wɛ la piiga, la a kiime.

¹⁵A Mahalaleyɛll sẽn wa n tar yʋʋm pis-yoob la a nu, a roga a Yerɛɛde.

¹⁶A Yerɛɛd rogmã zugẽ, a Mahalaleyɛll vɩɩmda yʋʋm kobs-nii la pis-tã, la a roga kom-dibli la kom-pugli.

¹⁷Mahalaleyɛll vɩɩmã zãng yɩɩ yʋʋm kobs-nii la pis-wɛ la a nu, la a kiime.

¹⁸A Yerɛɛd sẽn wa n tar yʋʋm koabg la pis-yoob la a yiibu, a roga a Enoke.

¹⁹A Enok rogmã zugẽ, a Yerɛɛd vɩɩmda yʋʋm kobs-nii, la a roga kom-dibli la kom-pugli.

²⁰A Yerɛɛd vɩɩmã zãng yɩɩ yʋʋm kobs-wɛ la pis-yoob la a yiibu, la a kiime.

²¹A Enok sẽn wa n tar yʋʋm pis-yoob la a nu, a roga a Matusela.

²²A Matusela rogmã zugẽ, a Enok tũu Wẽnnaam yʋʋm kobs-tã, la a roga kom-dibli la kom-pugli.

²³A Enok vɩɩmã zãng yɩɩ yʋʋm kobs-tã la pis-yoob la a nu.

²⁴A Enok tũu Wẽnnaam, la a wa n ka beẽ ye. Bala, Wẽnnaam zẽk-a lame n looge.

²⁵A Matusela sẽn wa n tar yʋʋm koabg la pis-nii la a yopoe, a roga a Lemeke.

²⁶A Lemek rogmã zugẽ, a Matusela vɩɩmda yʋʋm kobs-yopoe la pis-nii la a yiibu, la a roga kom-dibli la kom-pugli.

²⁷A Matusela vɩɩmã zãng yɩɩ yʋʋm kobs-wɛ la pis-yoob la a wɛ, la a kiime.

²⁸A Lemek sẽn wa n tar yʋʋm koabg la pis-nii la a yiibu, a roga bi-ribla.

²⁹A Lemek pʋda a biigã yʋʋr t'a Nowe, n yeele: «Bi-kãngã na n yɩɩ belsg tõnd yĩnga, d tʋʋm-toodã yĩnga. Yaa tʋʋm nins tõnd sẽn tʋmd tẽn-gãong ning Sẽn-Ka-Saab sẽn kãab wẽngã zugã.»

³⁰A Nowe rogmã zugẽ, a Lemek vɩɩmda yʋʋm kobs-nu la pis-wɛ la a nu, la a roga kom-dibli la kom-pugli.

³¹A Lemek vɩɩmã zãng yɩɩ yʋʋm kobs-yopoe la pis-yopoe la a yopoe, la a kiime.

³²A Nowe sẽn wa n tar yʋʋm kobs-nu, a roga a Sɛm, a Kam ne a Zafɛte.