Read SEBR SÕNGO, 1998 Sɩngre 50 Bible Online

Sɩngre 50 - SEBR SÕNGO, 1998 bible

Sɩngre 50

¹A Zozɛf vãbnega a nengã a ba wã neng zug n yãbe, la a mogsd-a.

²Rẽ zugẽ, a Zozɛf kɩtame t'a tʋmtʋmdb nins sẽn dag n be ne yẽnda n yaa logtoɛɛmbã segl a ba a Israyɛll kũumã ne wisd buud toor-toore. La logtoɛɛmbã sogla kũumã

³La bãmb rɩka rasem pis-naase, a Israyɛll kũumã seglg yĩnga, wa sẽn zems rasem sõor ning b sẽn tog dɩk n segl kũumã. Ezɩpt tẽng nebã rɩka rasem pis-yopoe n yãb a Israyɛll kũumã.

⁴La rasem sõor ning nebã sẽn tog n dɩk n yãb kũumã yĩngã sẽn sɛ, a Zozɛf goma ne rĩm a Faarõ yirã rãmb n yeele: «Yãmb sã n nong maam, mam kotame tɩ y yeel Faarõ,

⁵tɩ mam ba wã rag n kɩtame tɩ mam wẽen ne-a. A yeela maam a woto: ‹Mam na n kiime! La mam datame tɩ f mum maam yaoog ning pʋg mam sẽn dag n tu Kana tẽngã.› Dẽ wã, mam datame n kẽng n tɩ mum m ba wã la m wa.»

⁶La Faarõ yeela a Zozɛf yaa: «Kẽng n tɩ mum f ba wã, wala a sẽn dag n kɩt tɩ fo wẽen to-to wã.»

⁷Dẽ, a Zozɛf kẽngame n na n tɩ mum a ba wã. Woto, Faarõ na-yirã tʋmtʋmdbã fãa tũume, la Ezɩpt tẽngã kãsem-dãmbã fãa tũume.

⁸A Zozɛf zakã rãmb fãa, ne a kẽem-dãmbã, ne a ba wã zak-rãmb fãa tũume n kẽnge. Yaa kambã bala, ne rũm-bãoonegã ne rũm-bɛdã bal n pa Gosɛn tẽngã pʋga.

⁹La Saar-dãmb ne wed-rʋʋdb me n tũ a Zozɛfe. Rẽ kɩtame tɩ nebã sẽn dag n yãagd yẽnda wã sõor dag n yaa wʋsgo.

¹⁰La bãmb sẽn wa n dʋʋg Zʋrdẽ kʋɩlgã n ta Ataad zĩ-peellã, bãmb yãba wʋsgo, la a Zozɛf yãba a ba wã kʋʋr beenẽ rasem a yopoe.

¹¹La Kana tẽngã nebã sẽn yãnd bãmb sẽn be Ataad zĩ-peellẽ wã n yãbdã, bãmb yeelame: «Ad yõwã yaa Ezɩpt tẽng nebã kʋ-kãsenga.» Rẽ kɩtame tɩ b pʋd zĩ-kãng sẽn be Zʋrdẽ kʋɩlgã rʋʋndã yʋʋr tɩ Abɛll-Mitsrayim, sẽn dat n togs tɩ ‹Ezɩpt kʋʋre.›

¹²A Zakoob kambã maana wa bãmb ba wã sẽn dag n yeel bãmb tɩ b maanã.

¹³A Zakoob kambã talla yẽnda n kẽng Kana tẽng n tɩ mum Makpela pʋʋgã pʋg tãn-bokã pʋgẽ, sẽn yaa a Abrahaam pʋʋg a sẽn dag n deeg Hɛt ned a Efrõ nengẽ n da tɩ yaa a meng rẽnda, n lebg yaad zĩigã. Zĩ-kãng rag n pẽe Mamre.

¹⁴A Zozɛf sẽn tɩ mum a ba wã n sɛ, yẽnda ne a kẽem-dãmbã, la neb nins fãa sẽn tũ yẽnda n na n tɩ mum a ba wã, lebg n leba Ezɩpt tẽnga.

¹⁵A Zozɛf kẽem-dãmbã sẽn yãnd tɩ b ba wã kiime wã, bãmb yeelame: «Rẽ yĩnga, a Zozɛf ka na n kisg tõndo, a ka na n maan tõnd wẽng n lebs wẽng ning tõnd sẽn dag n maan yẽnda wã sɩda?»

¹⁶Dẽ, bãmb tʋmame tɩ b tɩ yeela a Zozɛf yaa: «Ad yãmb ba wã sẽn dag togs bũmb ning n yaool n ki:

¹⁷‹Yeel-y-yã a Zozɛf yaa: Mam kota foom tɩ f maan f kẽem-dãmbã sugri, b beegrã, ne b yel-wẽnã yĩnga. Bala, bãmb maana foom wẽnga! Dẽ, mam kot-f lame tɩ f maan f ba wã Wẽnnaam tʋmtʋmdb sugr b yel-wẽndã yĩnga!› » La b sẽn togs a Zozɛf gom-kãens n sɛ, a Zozɛf yãbame.

¹⁸A Zozɛf kẽem-dãmbã waa a Zozɛf nengẽ b toore, n ta n wõgemd a Zozɛf taoor n yeel yaa: «Tõnd la woto, tõnd yaa yãmb tʋmtʋmdba.»

¹⁹A Zozɛf yeela a kẽem-dãmbã yaa: «Ra zoe-y rabeem ye! Mam bee Wẽnnaam zĩigẽ la?

²⁰Yãmb dag n saagame n dat n maan maam wẽnga, la Wẽnnaam wẽnemd-a lame t'a lebg neere, sẽn na n yɩlẽ n pids bũmb ning sẽn maand rũndã wã, n fãag buud wʋsg vɩɩm.

²¹Dẽ wã, bɩ y ra leb n zoe rabeem ye. Mam na n gesa yãmb yell ne bũmb fãa, la m ges yãmb kambã yelle.» A Zozɛf goma ne bãmb a woto n bels-ba, la b pɛlgã gãandame.

²²A Zozɛf ne a yirã rãmb zĩnda Ezɩpt tẽnga. A Zozɛf vɩɩmda yʋʋm koabg la piiga.

²³A Zozɛf yãnda a Efrayiim kambã, ne a yagense, la a yãnd a yagensã kamba. La a Manaase biig a Makɩɩr kambã roga a Zozɛf nifẽ, la a reeg-b-la a naoẽ.

²⁴A Zozɛf yeela a kẽem-dãmbã yaa: «Mam na n wa n kiime! La Wẽnnaam na n wa yiisa yãmb tẽn-kãngã, la yaa bũmb sẽn na n pidsi, la b na n tall-y lame n kẽng tẽng ning bãmb sẽn dag n wẽen n yeel tɩ b na n kõ a Abrahaam ne a Izak la a Zakoobã.»

²⁵A Zozɛf kɩtame t'a Israyɛll kambã wẽene. La a yeel-b lame yaa: «Wẽnnaam sã n wa leok y kosgo, n yiis yãmb tẽn-kãngã, bɩ y zɩ mam kõabã n yi ka n looge.»

²⁶A Zozɛf sẽn wa n na n ki wã, t'a tara yʋʋm koabg la piiga. La b segla a Zozɛf kũumã n ning wisd buud toor-toore, n ning kũum koglg pʋg n bĩng Ezɩpt tẽngã pʋga.