Read SEBR SÕNGO, 1998 Sɩngre 8 Bible Online

Sɩngre 8 - SEBR SÕNGO, 1998 bible

Sɩngre 8

¹Wẽnnaam tẽega a Nowe ne we-rũmsã ne yir dũmsã fãa sẽn dag n be ne yẽnda koglgã pʋgẽ wã yelle, dẽ, b kɩtame tɩ sobg fʋʋs dũniyã zugu, la koomã boogame.

²Zĩ-zulumsã ko-ninã ne saagã ko-ninã fãa lebs n pagame, la saagã yoogame.

³Koomã rag n fẽbgda bilf-bilf dũniyã zugu, la rasem koabg la pis-nu pʋgẽ, a boogame.

⁴Kiuug a yopoe soabã rasem piig la a yopoe daarã, koglgã tɩ yalsa Ararat tãngã zugu.

⁵Koomã rag n ket n boogdame hal tɩ ta kiuug piig soabã. Kiuug piig soabã pipi daarã, tãmsã zut pukame.

⁶La sẽn ta rasem pis-naase, a Nowe paka koglgã võor ninga yẽnda sẽn dag n maanã.

⁷A Nowe basa gãabg t'a yi, la a kẽngdame la a lebgd n watẽ, hal tɩ koomã wa kʋɩ dũniyã zugu.

⁸A Nowe basa manwall me t'a yi, sẽn na n ges koomã sã n yõbga tẽn-gãongã zugu.

⁹La manwallã ka paam zĩig n na n zaoond ye, la a lebg n waa a Nowe nengẽ koglgã pʋga, bala, koomã rag n ket n bee tẽn-gãongã zãng fãa zugu. La a Nowe tẽega a nug tɩ wallã zomb t'a kẽes-a koglgã pʋga.

¹⁰La a Nowe leb n yals gũume tɩ ta rasem a yopoe, n yaool n leb n bas wallã t'a yi koglgã pʋga.

¹¹La zaabr sasa, manwallã lebg n waame, la ade, b mikame t'a yãka oliiv tɩɩg vãoog n zãad a noorẽ. Dẽ, a Nowe bãngame tɩ koomã yõbga dũniyã zugu.

¹²A Nowe leb n yaasa rasem a yopoe n paase, n yaool n leb n bas manwallã t'a yi. La wallã ka lebg n wa yẽnda nengẽ yɛs ye.

¹³A Nowe sẽn wa n tar yʋʋm kobs-yoob la a yembrã yʋʋmde, pipi kiuugã pipi daare, koomã kʋɩɩ dũniyã zugu. A Nowe paka koglgã limdã n ges n mik tɩ tẽn-gãongã zugã fãa kʋɩɩme.

¹⁴Kiuug a yiib soabã rasem pisi la a yopoe daarã, tẽngã zãng rag n yaa koɛɛnga.

¹⁵Woto, Wẽnnaam yeela a Nowe yaa:

¹⁶«Bɩ foom ne f pagã, la f kom-dibli wã, ne f bi-pagbã yi koglgã pʋga.

¹⁷Kɩt tɩ bõn-vɩɩlɩ wã buud fãa sẽn be ne foomã tũ foom n yi. Yaa bõn-yɩgdɩ wã, ne rũmsã la bõn-bãoonegã sẽn saagd tẽngã zugã. Bɩ bãmb doge, n fɩɩg n pid dũniyã.»

¹⁸A Nowe ne a kom-dibli wã, la a pagã ne a bi-pagbã yiime.

¹⁹Rũmsã fãa ne bõn-bãoonegã fãa, la bõn-yɩgdɩ wã fãa, la bũmb nins fãa sẽn saagd dũniyã zugã wa sẽn zems b buudã sẽn yaa to-to wã fãa yii koglgã pʋga.

²⁰A Nowe mee tẽn-kugr Sẽn-Ka-Saab yĩnga. A Nowe yãka rũm-sõama wã buud fãa, la bõn-yɩgdɩ nins fãa sẽn yaa sõama wã, n kʋ n maan maoong sẽn yõogd bugum tẽn-kugrã zug Sẽn-Ka-Saab yĩnga.

²¹Sẽn-Ka-Saab wʋma yũ-noogã, la bãmb yeela b sũurẽ: «Mam ka na n leb n kãab dũniyã kãab-wẽng ninsaal yĩng ye. Bala, hal ninsaal yãadem wakate, a tagsda wẽng maaneg bal a sũurẽ. La mam ka na n leb n sãam bõn-vɩɩsã wa mam sẽn zoe n maanã ye.

²²Dũniyã sẽn na n zĩnd tɛka, bʋdb wakat ne tigsg wakat kõn kong ye. Waood wakat ne tʋʋlg wakat kõn kong ye. Sẽoog ne sɩpaolg na n zĩndame. Wĩntoog ne yʋng na n kell n zĩndame.»