Read SEBR SÕNGO, 1998 2 Sãmwɛlle 1 Bible Online

2 Sãmwɛlle 1 - SEBR SÕNGO, 1998 bible

2 Sãmwɛlle 1

¹A Sayull kũumã wakate, t'a Davɩɩd dag n tõoga Amalɛk n lebg n wa Siklaag n zĩnd be rasem a yiibu.

²Da-tãtẽ daarã, ned a ye n yi a Sayull tãb-sika zĩigẽ n wa be, la a futa fãa rag n pãrsame t'a zugã yaa tom. Yẽnda sẽn ta a Davɩɩd nengẽ, yẽnda wõgemda tẽnga.

³A Davɩɩd sok-a lame t'a yii yɛ. Yẽnda leokame t'a yii Israyɛll nebã tãb-sik zĩigẽ.

⁴A Davɩɩd sok-a lame yaa: «M kotame tɩ f togs-ma! Yaa bõe n maan beenẽ?» Dẽ, yẽnda leokame: «Nebã zoeeme, la wʋsg kiime. A Sayull ne a biig a Zonatã me kiime.»

⁵A Davɩɩd sok-a lame: «Fo maana a wãn n bãng t'a Sayull ne a biig a Zonatã me kiime?»

⁶Bi-bɩɩgã leokame: «Mam dag n bee Gilboa tãngã zugu, la m yãame t'a Sayull tik a kãnde, la Saar dãmbã ne wed-rʋʋdbã rag n kolg n dɩdg-a lame.

⁷Dẽ a Sayull sẽn wẽneg n yãnd maam, a boola maam tɩ m wa. La mam leokame tɩ n-na! M waame.

⁸Dẽ, bãmb soka maam tɩ m yaa ãnda? Mam leokame tɩ m yaa Amalɛk neda.

⁹Dẽ, bãmb yeela maam yaa: «M kotame tɩ f wa kʋ-m n baase, bala, mam toogã yaa wʋsgo, la m ka kiid ye.

¹⁰La mam kolgame n baas-ba. Bala, mam bãngame tɩ b ka tõe n leb n põs b poglgã pʋgẽ ye. Dẽ, mam dɩka b maanfã, ne b zũurã sẽn dag n be b nugẽ wã n wat n na n kõ yãmba m soaalã.»

¹¹A Davɩɩd sũurã sãamame t'a pãrs a futu, la neb nins sẽn dag n be ne yẽnda wã me maana a woto.

¹²Bãmb wiisame n yãbe, la b loe noor hal tɩ ta zaabre a Sayull ne a biig a Zonatã, la Sẽn-Ka-Saab nebã yĩnga, ne Israyɛll buudã sẽn pa tãp pʋgẽ wã yĩnga.

¹³A Davɩɩd soka bi-bɩɩg ning sẽn togsã yẽ kibarã t'a yaa yɛ neda? La yẽnda leokame t'a yaa sãan biiga, la yẽnda yaa Amalɛk buudu.

¹⁴A Davɩɩd sok-a lame tɩ yɩɩ wãn tɩ yẽnda kʋ Wẽnnaam sẽn yãk-a soab t'a lebg rĩmã, n ka zoe rabeem.

¹⁵A Davɩɩd boola bi-bɩɩg a ye t'a wa kʋ-a, la bi-bɩɩgã kolg n kʋ-a lame.

¹⁶A Davɩɩd dag n yeela Amalɛk nedã yaa: «Fo yell bee f meng zugu. Bala, fo meng n togs tɩ f kʋʋ Sẽn-Ka-Saab sẽn yãk ned ning t'a lebg rĩmã.»

¹⁷A Davɩɩd yɩɩla sũ-sãang yɩɩll a Sayull ne a bi-ribl a Zonatã yĩnga.

¹⁸La yẽnda yeelame tɩ b zãms Zʋʋda kambã yɩɩllã. Yɩɩllã bee nin-tɩrg sebrã pʋgẽ.

¹⁹«Israyɛll nebã, yãmb ziirã paa tãmsã zutu. Maana a wãn tɩ gãndaadã sãame?

²⁰Da gom-y-yã a yell Gat tẽngã pʋgẽ ye. Da gom-y koe-kãngã Askalon soayã zutu, tɩ Filistẽ pagbã wa maan sũ-noogo, la tɩ moosã pagb wa kɩdem ye.

²¹Gilboa tãmse! Bɩ meenem la saag da leb n ni yãmb zutu, wall y pʋtã ra wom ye. Bala, gãndaadã gãn-tigs paama paoogr beenẽ, la a Sayull gãongã kõn tol n leb n paam kaam ye.

²²A Zonatã tãpã ka lebg n ka kʋ gãndaadã ye. A Sayull sʋʋgã ka lebg n ka raag bɛɛbã zɩɩm ye.

²³A Sayull ne a Zonatã, nebã rag n nong-y lame, b sɩd rag n nong-y lame, B rag n bee ne taab vɩɩmã pʋga, la b naaga taab kũumã pʋg me. Bãmb dag n yaa faasg ne zoeese, wala sɩlse, la b rag n tara pãng wa gɩgma.

²⁴Israyɛll pagba, yãb-y-yã a Sayull yĩnga, sẽn dag n kõt-a yãmb fu-miid sẽn yaa neeba, sẽn dag n kõt yãmb sãnem fãn-teedã.

²⁵Yɩɩ wãn tɩ gãndaadã pa tãpẽ? Maana a wãn t'a Zonatã ki tãmsã zutu?

²⁶M saam-biig a Zonatã, mam tara sũ-sãan-kãsenga, fo yĩnga. Mam dag n nong-f-la hal wʋsgo. Fo nonglmã dag n tara pãng wʋsg n yɩɩd ned sẽn nong pagba.

²⁷Maana a wãn tɩ gãndaadã lʋɩ? Maana a wãn tɩ b zab-teeda sãame?»