Read SEBR SÕNGO, 1998 2 Sãmwɛlle 12 Bible Online

2 Sãmwɛlle 12 - SEBR SÕNGO, 1998 bible

2 Sãmwɛlle 12

¹Bõn-kãens fãa loogr zugẽ, Sẽn-Ka-Saab tʋma a Natã t'a yeel a Davɩɩd yaa: «Raop a yiib n dag n be tẽng a yembre, a ye yaa rakãagre, t'a ye yaa naong soaba.

²Dakãagrã rag n tara piis ne niig wʋsgo.

³La naong soabã rag n tara a pe-bi-sadg a ye, a sẽn da n gʋʋndẽ. Raoã rag n naag-a a kambã ne pesgã n wubda. Bãmb sẽn dag n dɩt rɩɩb ningã, pesgã rɩta rẽ, bãmb sẽn dag n yũud bũmb ningã, pesgã me yũuda rẽ. La pesgã rag n gãee ne-a. Raoã rag n geta pesgã wa a biig bala.

⁴Daar a ye, sãan n wa n sig rakãagrã yiri, la rakãagrã rag n ka rat n yãk a peosg bɩ a naaf n kʋ n moe a sãanã ye. Yẽnda kẽng n tɩ yõka naong soabã pe-bi-yɛngã n kʋ n na n segl a sãanã.»

⁵Dẽ, a Davɩɩd sũur yika wʋsg ne rakãagrã manesmã, la yẽnda yeela a Natã yaa: «M wẽen ne Wẽnnaam sẽn vɩ wã tɩ ned ning sẽn maan-a woto wã segda ne kʋʋbo.

⁶Nin-kãngã sẽn maan woto n ka yɩ nimbãan-zoɛtã yĩnga, a na n baoo piis a naas n lebse.»

⁷Dẽ, a Natã yeela a Davɩɩd yaa: «N-na! Sẽn maan-a yel-kãngã wã, yaa yãmba. Dẽ, Sẽn-Ka-Saab sẽn yaa Israyɛll Wẽnnaamã yetame: Yaa maam n yãk foom, n kɩt tɩ f lebg Israyɛll rĩmã, la yaa maam n fãag foom a Sayull nugẽ.

⁸Mam dɩka fo zu-soab a Sayull zakã ne a pagbã n kõ foom. La mam kɩt tɩ f soog Israyɛll ne Zʋʋda buudã fãa. La bõn-kãens sã n dag n ket n paoodẽ, mam dag n na n kõ-f lame n paase.

⁹La yaa bõe tɩ fo paoog maam, n maan yel-beed a woto mam nifẽ? Fo kɩtame tɩ b kʋ Hɛt rao a Uuri, la f rɩk a pagã n maan f paga. Fo kɩtame tɩ Amo-rãmbã kʋ a Uuri ne sʋʋga.

¹⁰Beneere, sẽn sɩng ne moasã, toog ka na n tol n kong fo yirã ye. Bala, fo sẽn dɩk Hɛt rao a Uuri pagã yĩnga, fo paooga maam.»

¹¹Sẽn-Ka-Saab yeelame yaa: «Mam na n kɩtame tɩ yel-beed kẽ fo zakã. Mam na n dɩka fo pagbã f nifẽ n kõ fo pendã ned a yembr t'a gãand-b tɩ nebã fãa yã.

¹²Bala, fo soosame n maane, la mam na n kɩtame tɩ bõn-kãng maan ne wĩnto-sʋka, tɩ Israyɛll nebã fãa yã.»

¹³A Davɩɩd yeela a Natã yaa: «Sɩd-sɩdã, mam beega Sẽn-Ka-Saabo.» La a Natã yeela a Davɩɩd yaa: «Sã n yaa woto, Sẽn-Ka-Saab kõta foom sugri, la f ka na n ki ye.

¹⁴La yaa f bãng bala, tɩ f beegrã yaa kãseng Sẽn-Ka-Saab nifẽ. Woto yĩnga, fo biig ning sẽn nan dog-a wã na n kiime.»

¹⁵La rẽ zugẽ, a Natã lebg n kuilame. Sẽn-Ka-Saab kɩtame t'a Davɩɩd biig ning a Uuri pagã sẽn dogã lʋɩ bãaga.

¹⁶A Davɩɩd yõka Sẽn-Ka-Saab sɛɛg biigã yĩnga, la a loee noore. Yẽnda sã n dag n kẽ yʋng n na n gãande, a gãee tẽnga.

¹⁷Na-yirã nin-kãsems kẽngame n tɩ kos a Davɩɩd t'a yiki, la a ka sak ye. La yẽnda tol n zãgsame meng t'a kõn naag bãmb n dɩ ye.

¹⁸La rasem a yopoe zugẽ, biigã kiime. Dẽ, a Davɩɩd tʋmtʋmdbã rag n yɛɛsdame n ka rat n togs-a a biigã kũum ye. Bãmb yeelame yaa: «Biigã sẽn dag n ket n vɩ-wã menga, tõnd goma ne rĩmã tɩ b rag n ka sakd n kelg tõnd ye. La moasã, tõnd na n maana a wãn n togs-b tɩ biigã kiime? Rẽ yĩnga, b kõn maan b meng yell sɩda?»

¹⁹A Davɩɩd sẽn yã t'a tʋmtʋmdbã tar wal-wal ne taabã, yẽnda bãngame tɩ yell n maane. Dẽ, yẽnda soka bãmb yaa: «Mam biigã kiime la?» La bãmb leokame: N-na! A kiime!

²⁰Woto, a Davɩɩd tik n yikame n tɩ so koom, la a zɛ kaam n tek a futu. La yẽnda kẽnga Sẽn-Ka-Saab roogẽ wã n tɩ waoog bãmba. La rẽ zugẽ, a lebg n kuilame n tɩ yeel tɩ b kõ-a rɩɩbo, la yẽnda reegame n dɩ.

²¹Yẽnda tʋmtʋmdbã sokame: «N-na! Tõnd ka wʋmd yãmb sẽn maandã võor ye! Biigã sẽn wa n ket n vɩ-wã, yãmb dag n loeta noore, la y yãbda. La yaa bõe tɩ biigã ki, tɩ yãmb yaool n yik moasã n na n dɩ?»

²²A Davɩɩd leokame: «Yaa sɩda, biigã sẽn dag n ket n vɩ-wã, mam dag n loeta noore, la m yãbda, n tẽed tɩ daar ninga, Sẽn-Ka-Saab na n zoee mam nimbãaneg n fãag biigã.

²³La moasã, biigã sẽn ki wã, mam sã n leb n yik n zãgsd rɩɩbo, a tara yõod sɩda? Mam tõeeme tɩ biigã lebg n wa sɩda? Mam miime tɩ daar n wat tɩ mam na n kẽng yẽnda nengẽ, la yẽnda ka na n tol n leb n wa mam nengẽ ye.»

²⁴A Davɩɩd kẽng n tɩ belsa a pag a Batseba sũuri. La yẽnda kẽe ne-a, t'a rɩk pʋg n dog bi-ribla, la a Davɩɩd pʋda biigã yʋʋr t'a Salmo. Sẽn-Ka-Saab rag n nonga a Salmo. Dẽ, bãmb tʋma b no-rɛɛs a Natã t'a tɩ wilg a Davɩɩde. La a Natã sẽn ta, a Davɩɩd dɩka biigã n sagl yẽnda nugẽ, la a Natã pʋda biigã yʋʋr t'a Zedidiya, sẽn dat n togs tɩ ‹Sẽn-Ka-Saab sẽn nong a soabã.›

²⁶Wakat-kãnga a Zoaab zaba ne Amo nebã n tõog-b n deeg Raba sẽn yaa b na-tẽngã.

²⁷La yẽnda tʋma neb tɩ b tɩ yeel a Davɩɩd yaa: «Mam zaba ne Raba nebã n tõog n deeg b tẽngã ko-bao zĩisi.

²⁸Moasã, bɩ y tigim tãb-biis nins sẽn ketã n tilg y tãb-sikã n zab ne tẽngã n deeg-a, tɩ waoogrã ra wa yɩ maam a Zoaab rẽnd bal ye.»

²⁹Dẽ, a Davɩɩd tigma a nebã fãa n kẽng n tɩ zab n deeg Raba tẽngã.

³⁰La bãmb doka maanf ninga b sẽn dag n fõgen Amo-rãmbã wẽn-naandg a Milkomã. Maanfã rag n maana ne sãnem, t'a zɩslmã yaa kɩlo pistã. La kug-neer la b rag n tall n tablg maanfã. Bãmb laka kug-kãng n tablg a Davɩɩd maanfã. Sẽn leb n paase, bãmb wʋka teed wʋsg tẽn-kãng pʋgẽ.

³¹La a Davɩɩd modga tẽngã neb n kɩt tɩ kẽer wãad raado, tɩ kẽer peesd kuga, tɩ kẽer me kɛɛd tɩɩs ne laya. La a kɩt tɩ kẽer wẽed tãn-koeema. La b maana Amo nebã tẽms a taabã me a woto. La rẽ poore, a Davɩɩd ne a nebã lebg n kuila Zeruzalɛm.