Read SEBR SÕNGO, 1998 2 Sãmwɛlle 17 Bible Online

2 Sãmwɛlle 17 - SEBR SÕNGO, 1998 bible

2 Sãmwɛlle 17

¹A Ayitofɛll yeela a Absalom yaa: «M kot-y lame tɩ kõ-m noor tɩ m yãk neb tus-piig la a yiibu, n yik yʋngã bal n babs a Davɩɩde.

²Mam na n tɩ ling-b-la wakat ning b sẽn yɛ, tɩ b raoodã boogã, n yɛɛs-ba, n kɩt tɩ b nebã fãa sẽn be ne-bã zoe n sãeeg n bas-ba. Wakat-kãnga, yaa rĩmã b yembr bal la mam na n kʋ.

³Mam sã n wa paam n kʋ ned ning yãmb sẽn baoodã, mam na n talla nebã fãa tɩ b lebg n wa yãmb nengẽ, n wa vɩɩmd ne bãane.»

⁴La gomdã ta a Absalom ne Israyɛll kãsem-dãmbã fãa yam.

⁵La baoosgo, a Absalom yeelame yaa: «M kos tɩ y tɩ bool Ark tẽng rao a Husayi me t'a wa tɩ b kelg yẽnda me koɛɛga.»

⁶A Husayi sẽn kẽng a Absalom nengẽ, a Absalom togs-a-la a Ayitofɛll sẽn gomã. La a Absalom soka yẽnda yaa: «Tõnd tog n maana wa a Ayitofɛll sẽn yeelã bɩ? Sã n ka segde, bɩ f wilg f tagsgo.»

⁷A Husayi leoka a Absalom yaa: «So-kãngã yẽ, a Ayitofɛll saglgã ka sõama ye.

⁸Yãmb meng miime tɩ y ba wã ne a nebã yaa gãndaado, la b sũyã yika wa b sẽn yõg gɩgem-yãang sẽn be weoogẽ kamb t'a wurdẽ. Yãmb ba wã yaa rao sẽn mi zabr sõama. Rẽ wã, bãmb ka na n sak n gãand b nebã sẽn be zĩig ningã ye.

⁹B na n solga bok ning pʋgẽ, wall zĩig a to. La zabr sã n yik tɩ b kʋ yãmb neb kẽere, nebã na n wʋmame tɩ b tõoga yãmb nebã.

¹⁰La a sã n yɩ woto, neb nins sẽn tar-b pãng tɩ b sũyã yaa wa gɩgma sũyã na n yɛɛsame. Bala nebã fãa miime tɩ y ba yaa gãndaoogo, la neb nins sẽn be-b ne bãmbã me tara sũ-keelem.

¹¹Mam sagenda yãmb tɩ y reng n bool Israyɛll nebã fãa, sẽn sɩng ne Dan hal tɩ ta Bɛɛr-Seba tɩ b wa yãmb nengẽ n yɩ wʋsg wa bĩisr sẽn be ko-kãsengã noore. La bɩ yãmb mengã yãag-b zabrã zĩigẽ.

¹²Woto, baa bãmb sẽn be zĩig ning fãa, d tõe n ling-b lame n paam-b wa meenem sẽn dʋʋgd tẽn-gãongã zugu, la bãmb ne neb nins fãa sẽn be ne-bã ka na n tõog n põs ye.

¹³La baa bãmb sã n kẽ tẽng a ye pʋgẽ, Israyɛll nebã fãa na n talla wĩy n kẽ beenẽ n kãag tẽngã n tɩ lob ko-soogẽ, hal tɩ kugr baa a ye meng da kell be ye.»

¹⁴A Absalom ne Israyɛll nebã fãa yeelame t'a Husayi saglgã yaa sõama n yɩɩd a Ayitofɛll saglgã. Yaool n yaa Sẽn-Ka-Saab n dag n dat t'a Ayitofɛll saglgã lebg zaalem, sẽn na yɩl tɩ yel-beed paam a Absalom.

¹⁵A Husayi togsa maan-kʋʋdb a Sadok ne a Abiyataar a Ayitofɛll sẽn sagl a Absalom ne Israyɛll kãsem-dãmbã bũmb ninsã, ne yẽnda mengã sẽn dag n togsã.

¹⁶Yẽnda wilga a Sadok ne a Abiyataar tɩ b tʋm ned tao-tao t'a tɩ wilg a Davɩɩd t'a rʋʋg Zʋrdẽ kʋɩlgã n kẽng taoor n zãage, la a ra gãand we-raoogã tẽn-lamdẽ wã ye. Sã n ka rẽ, b na n kʋʋ rĩmã ne neb nins fãa sẽn be ne bãmbã.

¹⁷A Zonatã ne a Ayimaas dag n yasa Ɛn-Rogɛlle, la yem-poak a yembr n wa n togs bãmb tɩ b tɩ togs naab a Davɩɩde, bala bãmb dag n ka tõe n kẽ tẽngã pʋgẽ tɩ b ka yãnd-b ye.

¹⁸La bi-bɩɩg a ye n yãnd bãmb n tɩ togs a Absalom. La bãmb b yiibã zoe tao-tao n ta Bahurim ned a ye zakẽ. Bulg n dag n be a soabã zakẽ, la bãmb kẽe bulgẽ wã.

¹⁹Pagã rɩka pĩir n lud bulgã noore, n yɛdg ki pĩirã zugu, tɩ ned ra wa sãmb tɩ bũmb n be beenẽ ye.

²⁰A Absalom tʋmtʋmdbã kẽe zakã pʋgẽ n sok pagã yaa: «A Ayimaas ne a Zonatã bee yɛɛnẽ?» Pagã yeelame tɩ b rʋʋga kʋɩlgã n zoe. Bãmb babs-b lame n ka yãnd-b ye. La b lebg n kẽnga Zeruzalɛm.

²¹Bãmb sẽn loogã, a Ayimaas ne a Zonatã yii bulgã pʋgẽ, n kẽng n tɩ togs naab a Davɩɩde. Bãmb yeelame: «Bɩ yãmb ne neb nins fãa sẽn be ne yãmbã yik n dʋʋg kʋɩlgã tao-tao.» Bãmb togsa a Davɩɩd a Ayitofɛll sẽn sagl a Absalom bũmb ninsã.

²²A Davɩɩd ne neb nins sẽn be-b ne bãmbã yikame n dʋʋg Zʋrdẽ kʋɩlgã. La beoogã ne a na n vẽege, rẽ tɩ ned ka be sẽn nan ka paam n dʋʋg kʋɩlgã ye.

²³A Ayitofɛll sẽn yã tɩ b ka reeg a saglgã, a zomba a bõang n kuil a yiri. La a basa a yaoolem koees ne a zakã rãmba, n yaool n kẽng n tɩ luuli. B mum-a-la a ba yaoogẽ.

²⁴A Absalom ne Israyɛll nebã fãa sẽn wa n dʋʋg Zʋrdẽ kʋɩlgã, rẽ tɩ yaa a Davɩɩd sẽn tat Mahanayim.

²⁵A Absalom kɩtame t'a Amasa reeg a Zoaab zĩig n lebg tãb-biisã naaba. A Amasa rag n yaa Israyɛll ned a Yitra biiga. A Yitra rag n peega a Nakaas bi-pugl a Abigayɩll n maan a paga. A Abigayɩll yaa a Zoaab ma a Seruya tão-poaka.

²⁶A Absalom ne Israyɛll nebã fãa tilga b tãb-sikã Galaad tẽnga.

²⁷A Davɩɩd sẽn ta Mahanayimã, neb n wa n kõ yẽnda kũuni: Yaa a Nakaas biig a Sobi sẽn yaa Amo nebã tẽng a ye b sẽn boond tɩ Raba wã neda, ne Lodebaar rao a Amiyɛll biig a Makɩɩre, la Galaad tẽng ned a Barzɩlayi sẽn be Rogelimã.

²⁸Bãmb waa ne fu-gobse, laase, rʋgdo, orze, zom, ka-sãrdɩ, bɛnga,

²⁹sɩɩdo, piis bĩis-gõeem, ne niig bĩis-kaam, n tɩ kõ a Davɩɩd ne neb nins sẽn be ne bãmbã tɩ b rɩ. Bala bãmb dag n miime tɩ kom, ne yaamse la ko-yũud n dag n tar bãmb we-raoogã pʋgẽ.