Read SEBR SÕNGO, 1998 2 Sãmwɛlle 19 Bible Online

2 Sãmwɛlle 19 - SEBR SÕNGO, 1998 bible

2 Sãmwɛlle 19

¹Rĩmã sũur sãama hal wʋsgo, tɩ b rʋʋd n dabd tẽngã noor doog a ye pʋgẽ, la b yãbda. Rĩmã rag n kẽndame la b yetẽ: «M biig a Absalom, m biig a Absalom mam sã n dag n ki tɩ fo põs n são. M biiga! M biiga!»

²Neb n tɩ wilg a Zoaab tɩ rĩmã yãbdame n wiisd a Absalom yĩnga.

³La badaare, tõogrã lebga sũ-sãang nebã fãa yĩnga, bala, nebã fãa wʋmame tɩ rĩmã maanda sũ-sãang a biigã yĩnga.

⁴Badaare, nebã soosame n kẽ tẽngã pʋgẽ wa neb sẽn bas zabr n zoe tɩ yãnd tar-ba.

⁵Rĩmã pila a neng n zẽk a koɛɛg n yãb n yeel yaa: «M biig a Absalom! Absalom! M biiga! M biiga!»

⁶A Zoaab kẽe roogã pʋg n yeel rĩmã yaa: «Rũndã, yãmb ningda y tʋmtʋmdb nins fãa sẽn fãag yãmb ne y kom-dibli wã ne y kom-pugli wã, la y pagbã ne y pʋg-rɩkdsã yãnde.

⁷Bala, yãmb nonga y bɛɛbã, la y kis neb nins sẽn nong yãmbã. Tõnd bãnga rũndã tɩ tãb-biisã nanambs ne tãb-biisã kũum ka yell ne yãmb ye. Mam bãnga rũndã, tɩ yãmb sã n dag n paame tɩ tõnd fãa ki t'a Absalom vɩɩmde, woto n yaa sõama ne yãmba.

⁸Moasã, yik-y n yi-y n gom-y ne nebã n paas b raoodo. Mam wẽenda ne Wẽnnaam tɩ yãmb sã n ka yi, ned ba a ye kõn pa ne yãmb rũndã yʋngã ye, la woto na n yɩɩ toog ne yãmb n yɩɩd tood nins fãa sẽn paam yãmb y yãadmẽ hal tɩ ta moasã wã.»

⁹La rĩmã yikame n yi n tɩ zĩnd tẽngã noore. La b wilga nebã tɩ rĩmã zĩi tẽngã noore, la bãmb kẽnga rĩmã nengẽ. La rẽ tɩ Israyɛll nebã fãa zoeeme n kuili.

¹⁰Israyɛll buudã fãa pʋgẽ, nebã rag n sõsda ne taab n yetẽ: «Rĩmã fãaga tõnd d bɛɛbã nusẽ. Yaa bãmb n fãag tõnd Filistẽ-dãmbã nusẽ, la b yaool n zoeeme n zãag tẽngã, a Absalom yĩnga.

¹¹Tõnd dag n yãka a Absalom t'a soog tõndo, la yẽnda paa tãp pʋgẽ. La moasã, yaa bõe tɩ y zĩẽ n sĩnda, n ka na n kɩt tɩ b bool rĩmã tɩ b wa?»

¹²Rĩm a Davɩɩd tʋmame tɩ b tɩ yeel maan-kʋʋdb a Sadok ne a Abiyataar tɩ b yeel Zʋʋda kãsem-dãmbã: «Yaa bõe tɩ yãmb na n bas tɩ nebã fãa reng yãmb n peeg rĩmã n kuil a na-yirã? Bala, goam nins Israyɛll nebã fãa sẽn gomã, rĩmã zĩnda a sẽn beẽ wã n wʋme.

¹³Yãmb yaa mam saam-biisi, yãmb ne maam n yaa bũmb a yembre, la maana a wãn tɩ neb a taab na n deng yãmb n wa peeg maam n kuili?»

¹⁴La rĩmã leb n yeelame tɩ b yeel a Amasa yaa: «Foom ne maam ka bũmb a yembr sɩda? Mam sã n ka kɩt tɩ fo reeg a Zoaab zĩig n lebg mam tãb-biisã naab wakat fãa, bɩ Sẽn-Ka-Saab sɩbg maam ne sɩbg-kãsenga.»

¹⁵A Davɩɩd goamã tõogame tɩ Zʋʋda nebã fãa paam yam a yembre, n lebg wa nin-yende. La Zʋʋda nebã tʋma koɛɛg n yeel rĩmã t'a lebg n wa ne a nebã fãa.

¹⁶Rĩmã lebg n waa Zʋrdẽ kʋɩlgã noore, la Zʋʋda nebã kẽnga Gilgall n tɩ seg rĩmã n sõng-a t'a rʋʋg kʋɩlgã.

¹⁷Benzame ned a Geera biig a Simeyi sẽn be Bahurimã zoee tao-tao n tũ Zʋʋda nebã n tɩ seg rĩm a Davɩɩde.

¹⁸Benzame neb tusr n dag n tũud a Simeyi, ne a Siba sẽn dag n tʋmd a Sayull yirã ne a kom-dibli piig la a nu wã, la a tʋmtʋmdb pisi wã. Bãmb renga rĩmã n ta Zʋrdẽ kʋɩlgã.

¹⁹La wakat-kãnga, ko-rugdbã sõnga rĩmã yir dãmb tɩ b rʋʋg kʋɩlgã wa sẽn zems rĩmã tʋlsmã. Rĩmã sẽn wa n pɩʋʋg kʋɩlgã n sɛ, a Geera biig a Simeyi wa n lʋɩɩme n fõgen a neng tẽng rĩmã taoor n yeel-b yaa:

²⁰«Bɩ m soaalã ra geelg mam kongrã ye. Bɩ b ra tẽeg b tʋmtʋmdã sẽn maan beegr ning daar ning yãmb sẽn yi Zeruzalɛmã ye. Da bĩng-y yel-kãngã y sũurẽ ye.

²¹Bala, mam miime tɩ m beegame, yaa rẽ yĩnga, tɩ mam yaa a Zozɛf roogã fãa pipi ned sẽn wa n na n seg yãmb m soaalã sẽn yaa m dĩmã.»

²²A Seruya biig a Abisayi yeelame: «B segd n kʋ a Simeyi yel-kãng yĩnga, bala, yẽnda tʋʋsa Wẽnnaam sẽn yãk-a soabã.»

²³La a Davɩɩd yeelame: «Seruya kamba, da maan-y beem ne maam tɩ y toor ka be yel-kãngã pʋgẽ ye. B ka na n kʋ Israyɛll ned rũndã daarã ye. Mam miime tɩ m yaa Israyɛll dĩmã.»

²⁴La rĩmã wẽename n yeel a Simeyi yaa: «Fo ka na n ki ye.»

²⁵A Sayull yageng a Mefibosɛt me kẽngame n tɩ seg rĩmã. Sẽn sɩng ne daar ning a Davɩɩd sẽn yi Zeruzalɛm n zoe wã, n tãag a sẽn na n lebg n wa ne laafɩ wã, a Mefibosɛt ka tol n waas a nao, wall a wõrs a no-kõbdã, wall a pegs a fut ye.

²⁶La a Mefibosɛt sẽn yi Zeruzalɛm n seg rĩmã, rĩmã sok-a lame: «Mefibosɛte, yaa bõe tɩ fo ka tũ maam?»

²⁷La yẽnda leokame: «Dĩmã sẽn yaa m soaala, mam tʋmtʋmd n belg maam. Mam yeel-a lame t'a wa kõ-m bõang tɩ m zomb n yãag yãmb tɩ m yaa põore.

²⁸La yẽnda waa yãmb nengẽ n wa kãneg maam. La yãmb yaa wa Wẽnnaam malɛɛka. Maan-y wa yãmb sẽn date.

²⁹Bala, mam ba wã zak-rãmb fãa yɩɩ neb sẽn zems kũum yãmb taoore, la baoosgo, yãmb kɩtame tɩ mam lagem neb nins sẽn dɩt ne yãmbã n dɩtẽ. Mam maana bõe sẽn zems tɩ m tõe n leb n yõk rĩmã sɛɛg n kos-b bũmb a to?»

³⁰Rĩmã yeel-a lame: «Yaa bõe tɩ f gomd a woto? Mam yeelame tɩ foom ne a Siba pʋɩ taab pʋtã.»

³¹La a Mefibosɛt yeela rĩmã: «Dĩm sẽn yaa m soaala, bas-y t'a reeg fãa n sooge, yãmb sẽn tõog n lebg n wa yir ne laafɩ wã sekame.»

³²Galaad rao a Barzɩlayi yii Rogelim n wa yãag rĩmã n dʋʋg Zʋrdẽ kʋɩlgã n pʋʋs-b wẽnd na taase.

³³A Barzɩlayi rag n kʋʋla wʋsgo, n tar yʋʋm pis-nii. Yẽnda rag n yaa nin-kãsenga. La yaa yẽnda n dag n kõt rĩmã rɩɩb b sẽn wa n be Mahanayimã wakate.

³⁴Rĩmã yeela a Barzɩlayi yaa: «Wa tũ maam n kẽng mam yirã Zeruzalɛm tɩ m tɩ ges f yelle.»

³⁵La a Barzɩlayi leokame yaa: «Mam vɩɩmã rasem sõor ka leb n yaa wʋsg ye, dẽ wã, ka tɩlɛ tɩ mam tũ yãmb n kẽng Zeruzalɛm ye.

³⁶Mam tara yʋʋm pis-nii moasã. Mam ka leb n mi bũmb sẽn yaa noogo, ne bũmb sẽn ka noog n bak ye. Mam ka leb n mi rɩ-noog ne rã-noog ye. Yɩɩn-yɩɩndb yɩɩl noosem ka leb n kẽed maam ye. Dẽ wã, ka tɩlɛ tɩ mam wa yãmb nengẽ, n wa nams yãmb ye.

³⁷Mam na n dʋʋga kʋɩlgã ne yãmba, n yãag-y bilf la m lebge. Yaa bõe yĩng tɩ rĩmã rat n dol maam woto fãa?

³⁸M kotame tɩ y bas y tʋmtʋmdã, t'a kuil a tẽngẽ n tɩ ki tɩ b mum-a zĩig ning a ba wã ne a ma wã yaad sẽn beẽ wã. La ade, a Kimham bee kaanẽ, bɩ yẽnda tũ yãmb tɩ y maan-a wa y sẽn data.»

³⁹Rĩmã yeelame: «Bɩ a Kimham wa tũ maam, la mam na n maana bũmb ning fo sẽn datã n kõ-a. Mam na n maana bũmb ning fãa fo sẽn date.»

⁴⁰Rĩmã ne nebã fãa sẽn dʋʋg kʋɩlgã n sɛ, rĩmã moka a Barzɩlayi n ning a zug barka. La a Barzɩlayi lebg n kuilame.

⁴¹Rĩmã pɩʋʋgame n kẽng Gilgall sẽnẽ, la a Kimham tũu bãmba. Zʋʋda nebã fãa ne Israyɛll nebã pʋɩ-sʋk yãaga rĩmã n pɩʋʋg kʋɩlgã.

⁴²La Israyɛll nebã fãa tũu taab n kẽng rĩmã nengẽ n tɩ yeel yaa: «Yaa bõe tɩ Zʋʋda nebã sẽn yaa d saam-biisã kẽng n tɩ peeg yãmb ne y yirã dãmbã, la y nebã fãa n dʋʋg kʋɩlgã n ka wilg tõndo?»

⁴³Zʋʋda nebã leoka Israyɛll nebã yaa: «Yaa rĩmã sẽn yaa tõnd roogã nedã yĩnga. Yaa wãn tɩ yãmb sũy yikd yõwã yĩnga? Yaa rĩmã n dag n dɩlgd tõnd la? Bɩ rĩmã kõo tõnd bũmbu?»

⁴⁴La Israyɛll nebã yeela Zʋʋda nebã yaa: «Baa rĩmã sã n yaa yãmb buudu, bãmb yaa tõnd buud naoor piig n yɩɩda. Yaa bõe tɩ y paoogd tõndo? Ka tõnd n yɩ pipi n yeel tɩ d ratame tɩ rĩmã lebg n wa la?» La Zʋʋda nebã goma ne pãng n yɩɩd Israyɛll nebã.