Read SEBR SÕNGO, 1998 2 Sãmwɛlle 23 Bible Online

2 Sãmwɛlle 23 - SEBR SÕNGO, 1998 bible

2 Sãmwɛlle 23

¹Gom-kãensã yaa a Izayi biig a Davɩɩd yaoolem goamã. Yaa a Zakoob Wẽnnaamã sẽn yãk-a soab t'a yɩ Israyɛll rĩmã, n kɩt t'a lebg nin-kãsengã n gomde. A Davɩɩd dag n yaa Israyɛll yɩɩn-yɩɩnda.

²«Sẽn-Ka-Saab Sɩɩgã rɩka maam n gomda. Bãmb goamã bee mam zelemdẽ.

³Israyɛll Wẽnnaamã gomame, Israyɛll pĩig kugrã yeela maam yaa: ‹Ned sã n soog neb ne tɩrlem la Wẽnnaam rabeem zoeese,

⁴yẽnda soab wẽnda wa yibeoog sõor sẽn pukdi. La a wẽnda wa wĩntoog sẽn kõt a vẽenem, tɩ saag niid n kɩtdẽ tɩ mood yit dũni wã zugu.›

⁵N-yẽe! Mam doogã me na n yɩɩ woto Wẽnnaam taoore. Bala, bãmb maana kaool sẽn kõn sɛ ne maam. Bũmbã fãa manegame tɩ zemse. Bãmb na n kɩtame tɩ m paam fãagre, la bũmb ning fãa sẽn yaa sõama.

⁶La nin-yoodã sẽn paoogd-b Wẽnnaamã, yaa wa gõos neb sẽn kɛɛd n lobda. La ned ka tõe n dɩk-b ne b nus ye.

⁷La ned ka tõe n sɩɩs-b me ye. Sã n ka tɩ b kãas-b n yõog bugum bala.»

⁸Ad a Davɩɩd gãndaadã yʋya: Takmoon dao a Yosɛɛb-Basebɛte, sẽn yaa gãndaadã sull a yembr ned a yembrã. Yaa yẽnda n tall kãnd zabr pʋgẽ n kʋ neb kobs nii zĩig pʋgẽ balã. B rag n boond-a lame me t'a Ɛsni tẽng rao a Adino.

⁹La sẽn pʋgd yẽnda, yaa a Akoki biig a Dodo biig a Eliyazaare. Yẽnda yaa gãndaad a tãabã nin-yende. Bãmb n dag n be ne a Davɩɩd wakat ning Filistẽ nebã sẽn wa n tigim taab n dat n zab ne a Davɩɩdã. Sasa-kãnga, Israyɛll nebã fãa rag n zoeeme n dʋ tãmsã zutu.

¹⁰A Eliyazaar yikame n kʋ Filistẽ nebã ne sʋʋg hal t'a nugã yɛ, n wa tabend ne a sʋʋgã. Badaare, Sẽn-Ka-Saab kɩtame t'a paam tõog-kãsenga. Israyɛll nebã lebg n wa tũu a Eliyazaar tɩ b tɩ wʋk neb nins sẽn ki wã teedo.

¹¹Sẽn pʋgd yẽnda, yaa Haraar dao a Aage biig a Sama. Filistẽ nebã rag n tigma Leki tẽnga, la bɛng pʋʋg n dag n be beenẽ, Filistẽ nebã riga Israyɛll nebã tɩ b zoe.

¹²La a Sama tɩ yalsa pʋʋgã tẽn-sʋka n na n deeg pʋʋgã, la a zaba ne Filistẽ nebã, la Sẽn-Ka-Saab kõo bãmb nebã fãagr-kãsenga.

¹³Koodã tigsg wakate, nanambs pis-tã wã neb a tãab kẽnga a Davɩɩd nengẽ Adulam tãngã bok pʋgẽ wakat ning Filistẽ nebã tãb-bi-sull a ye sẽn dag n tilg b tãb-sikã Refayim longẽ wã.

¹⁴Wakat-kãng t'a Davɩɩd dag n ket n bee tãmsã pẽgsẽ, la Filistẽ tãb-biisã rag n tilga b sik zĩigã Betlehɛm.

¹⁵Ko-yũud n wa n yõk a Davɩɩd t'a yeele: «Yaa ãndã n na n sõng maam tɩ m paam bulgã sẽn be Betlehɛm tẽngã noorã koom n yũ?»

¹⁶La gãndaad a tãabã modgame n pɩʋʋg Filistẽ nebã tãb-sikã sʋka, n tɩ toog koomã Betlehɛm tẽngã noor bulgã pʋgẽ n wa kõ a Davɩɩde. La yẽnda ka sak n yũ koomã ye. Yẽnda raaga koomã Sẽn-Ka-Saab taoore,

¹⁷n yeele: «Sẽn-Ka-Saabo, mam ka tõe n sak n maan a woto ye. Bala, a na n yɩɩ wa mam sẽn yũud neb nins sẽn gẽneg b yõy n kẽngã zɩɩm.» La yẽnda ka yũ koomã ye. Gãnda-kãens a tãabã me sẽn leb n tʋm la woto.

¹⁸A Zoaab sẽn yaa a Seruya biiga yao a Abisayi talla kãnd n kʋ neb kobs-tã zĩig pʋgẽ. La yẽnda me yʋʋrã yii wa gãndaad a tãabã sullã.

¹⁹Yẽnda yʋʋrã yiime n yɩɩd neb pis-tã wã fãa. Yẽnda yaa bãmb naaba, la yẽnda ka ta pipi gãndaad a tãabã ye.

²⁰A Zehozada biig a Benaya rag n yaa gãndaoog sẽn paam tõogr wʋsgo. Yẽnda rag n yaa Kabseyɛll neda. Yaa yẽnda n kʋ Moaab gãndaad a yiibã. La daar a yembre, wao-kãseng wakate, yẽnda kẽe bokẽ n kʋ gɩgemde.

²¹Leb n yaa a Benaya n kʋ Ezɩpt nin-daoog a yembrã. Ezɩpt nin-daoogã rag n zãada kãnd n segd a Benaya, la a Benaya rag n zãada dasaare. A Benaya reega Ezɩpt nedã kãndã n wẽneg n kõs-a n kʋ.

²²A Zehozada biig a Benaya maana a woto t'a yʋʋrã yi wa gãndaad a tãabã.

²³Gãndaad pis-tã wã fãa sʋka, yẽnda me yɩɩ ned yʋʋr sẽn yi n yɩɩda. La yẽnda rag n ka be pipi gãndaad a tãabã sʋk ye. La a Davɩɩd yãka yẽnda t'a lebg a gũudbã naaba.

²⁴Ad neb pis-tã wã sull neb a taabã yʋya: A Zoaab yao a Azayɛll yaa gãndaad pis-tã wã ned a yembre, ne Betlehɛm dao a Dodo biig a Ɛlkana,

²⁵la Harood daop a Sama ne a Elika,

²⁶la Pelɛt dao a Helɛs ne Tekoa rao a Ikɛs biig a Iira.

²⁷La Anatot rao a Abiyezɛɛr ne Husa rao a Mebunayi,

²⁸la Akoki rao a Salmon ne Netofa rao a Maharayi,

²⁹la Netofa tẽng rao a Baana biig a Helɛɛbe, ne Gibeya sẽn be Benzame soolmẽ wã rao a Ribayi biig a Itayi.

³⁰La Piraton tẽng rao a Benaya ne Gaas ko-soogẽ dao a Hidayi,

³¹la Araba tẽn-nabd-koɛɛngẽ dao a Abi-Albon, ne Bahurim rao a Azmavɛte,

³²la Salbon tẽng rao a Eliyakba ne a Bene-Yasɛm, la a Zonatã,

³³ne Haraar dao a Sama, la Araar dao a Saraar biig a Akiyam,

³⁴ne Maaka rao a Akasbayi biig a Elifelɛte, la Gilo rao a Ayitofɛll biig a Eliyam,

³⁵ne Karmell dao a Hɛsrayi, la Araab rao a Parayi

³⁶ne Soba rao a Natã biig a Yigyalle, la Gaad buudã rao a Bani,

³⁷ne Amo rao a Selɛke, la Beerot rao a Naharayi sẽn dag n zãad a Seruya biig a Zoaab zab-teedã.

³⁸N paas Yetɛɛr raop a Iira ne a Garɛɛbe,

³⁹la Hɛt dao a Uuri. Bãmbã fãa sõorã yaa neb pis-tã la a yopoe.