Read SEBR SÕNGO, 1998 2 Sãmwɛlle 24 Bible Online

2 Sãmwɛlle 24 - SEBR SÕNGO, 1998 bible

2 Sãmwɛlle 24

¹Sẽn-Ka-Saab sũur leb n yika ne Israyɛll nebã, la b kɩtame t'a Davɩɩd maan yell n yeel tɩ b sõd Israyɛll ne Zʋʋda nebã fãa.

²Dẽ, rĩmã yeela tãb-biis naab a Zoaab sẽn dag n be ne yẽnda wã yaa: «M kotame tɩ f kẽng n tɩ sõd Israyɛll buudã fãa, sẽn sɩng ne Dan hal tɩ ta Bɛɛr-seba, tɩ m tõe n bãng b sõorã.»

³La a Zoaab yeela rĩmã yaa: «Bɩ Sẽn-Ka-Saab sẽn yaa yãmb Wẽnnaamã kɩt tɩ nebã sõor paas naoor koabg n yɩɩd woto, tɩ rĩmã sẽn yaa m soaalã tõe n yã. La bõe yĩng tɩ rĩmã rat n maan bũmb a woto?»

⁴La rĩmã pẽdgr sẽn dag n yaa wʋsgã, a Zoaab ne tãb-biisã nanambs sak n maana bũmb ning a sẽn yeelã. A Zoaab ne tãb-biisã nanambs yii rĩmã nengẽ n na n tɩ sõd Israyɛll nebã.

⁵Bãmb dʋʋga Zʋrdẽ kʋɩlgã, n sɩng sõadgã Arowɛɛre, ne tẽng ning sẽn be ko-soogẽ wã, n tees Gaad tẽngã sẽn be Yayezɛɛr sẽnẽ wã.

⁶Bãmb kẽnga Galaad soolem ne Tatim-Hodsi, la b kẽng Dãn-Yaan ne Sidõ sẽnẽ.

⁷Bãmb kẽnga Tɩ soolem b sẽn me lals n gũbgã pʋgẽ, ne Hevi nebã ne Kanan nebã tẽms fãa pʋgẽ. La bãmb sẽn yi beenẽ, bãmb kẽng n tɩ baasa sõadgã Bɛɛr-seba sẽn be Zʋʋda soolmã nug goabgã.

⁸Woto, bãmb saaga soolmã fãa kiis a wɛ la rasem pisi pʋgẽ, la b lebg n leba Zeruzalɛm.

⁹Dẽ, a Zoaab wilga rĩmã nebã b sẽn sõdã sõore. Israyɛll gãndaad nins sẽn tõe n bob zab-teedã sõor yaa neb tus kobs-nii, la Zʋʋda tãb-biisã sõor yaa neb tus kobs-nu.

¹⁰A Davɩɩd sẽn sõd nebã zugẽ, a sũurã sãamame t'a yeel Sẽn-Ka-Saab yaa: «Mam beega beeg-kãseng ne bũmb ning mam sẽn maanã. Moasã, Sẽn-Ka-Saabo, m kot-y lame tɩ y kõ mam sẽn yaa yãmb tʋmtʋmdã sugr a beegrã yĩnga. Bala, mam sẽn maanã yaa yalemd meng-menga.»

¹¹A Davɩɩd sẽn yik vẽkembeoog yibeoogo, Sẽn-Ka-Saab yeela bãmb no-rɛɛs a Gaad sẽn yaa a Davɩɩd bãngdã yaa:

¹²«Kẽng n tɩ yeel a Davɩɩd tɩ Sẽn-Ka-Saab yetame: Mam wilgda foom tood a tãabo. Yãk a yembr bãmb sʋkã, tɩ m sɩbg-f ne to-kãnga.»

¹³Dẽ, a Gaad kẽnga a Davɩɩd nengẽ n tɩ yeel-a yaa: «Yaa to-bʋg la yãmb data? Yʋʋm a yopoe kom bɩ? Bɩ y bɛɛbã sẽn na n dig-y tɩ y zoe kiis a tãab bɩ? Bɩ rasem a tãab bã-loangdga? Moasã, tags-y-yã, la y kõ-m koɛɛg ning m sẽn na n tɩ leok sẽn tʋm-a maamã.»

¹⁴A Davɩɩd leoka a Gaad yaa: «Sũ-sãan-kãseng n tar maam! Mam kot-f lame tɩ f bas tɩ d lʋɩ Sẽn-Ka-Saab nugẽ, la d ra lʋɩ ninsaalb nusẽ ye. Bala, Sẽn-Ka-Saab nimbãan-zoeerã yaa kãsenga.»

¹⁵Dẽ, Sẽn-Ka-Saab kɩtame tɩ bã-loangdg kẽ Israyɛll soolmẽ wã, sẽn sɩng ne yibeoogo, hal n tãag wakat ning b sẽn yãkã. La sẽn sɩng ne Dan n tɩ tãag Bɛɛr-seba, neb tus pis-yopoe n ki.

¹⁶La wakat ning malɛɛkã sẽn kʋʋd nebã sẽn wa n tẽeg a nug n na n sãam Zeruzalɛmã, Sẽn-Ka-Saab sũurã sãama ne sɩbgrã tɩ b yeele: «A sekame! Base. Yãk f nugu.» La Sẽn-Ka-Saab malɛɛkã yalsa zĩig sẽn pẽ ne Zebuus rao a Aravna zɛɛgã.

¹⁷A Davɩɩd sẽn yã Malɛɛkã sẽn kʋʋd nebã, a yeelame yaa: «Sẽn-Ka-Saabo, yaa maam n beeg yãmba. La nin-bãmbã maana bõe? M kotame tɩ y sɩbgrã yɩ maam ne m yirã rãmba.»

¹⁸Badaare, a Gaad kẽnga a Davɩɩd nengẽ n tɩ yeel-a yaa: «Yik-y n kẽng-y Zebuus rao a Aravna zɛɛgẽ wã, n tɩ me tẽn-kugr Sẽn-Ka-Saab yĩnga.»

¹⁹La a Davɩɩd saka a Gaad sẽn yeel yẽnda wã, n yik n kẽng zɛɛgẽ wã, wa sẽn zems Sẽn-Ka-Saab sẽn dag n togsã.

²⁰A Aravna sẽn wa n be tãngã zugu, a tool n yãnda rĩmã ne a tʋmtʋmdbã sẽn wat yẽnda nengẽ. La a Aravna yi a sẽn beẽ wã, n wõgemd n fõgen a neng tẽng rĩmã taoor n yeel yaa:

²¹«Yaa noog tɩ m dĩmã wat b tʋmtʋmdã nengẽ?» La a Davɩɩd wilg-a lame t'a rat n da-a zɛɛgã n me tẽn-kugr Sẽn-Ka-Saab yĩnga, tɩ bã-loangdgã sẽn tar nebã sɛ.

²²A Aravna yeelame: «Mam dĩma, la m soaala, reeg-y zɛɛgã n maan maoong sẽn yõogd bugum wa sẽn zems yãmb sẽn datã. Reeg-y niigã m sẽn tar n pãbd m koodã n maan maoong sẽn yõogd bugmã, la y reeg b ra-vuudsã ne b ra-balgdsã n maan maoongã bugum daado.

²³M dĩmã, maam a Aravna kõta yãmb bõn-kãensã fãa.» La a Aravna leb n yeela rĩmã yaa: «Bɩ Sẽn-Ka-Saab sẽn yaa yãmb Wẽnnaamã reeg y maoongã.»

²⁴La rĩmã leoka a Aravna yaa: «Ayo, mam na n daa bõn-kãens fo nengẽ wa sẽn zems b ligdã. Mam ka na n dɩk zaalem bũmb n maan maoong sẽn yõogd bugum n kõ Sẽn-Ka-Saab sẽn yaa mam Wẽnnaamã ye.» Dẽ, a Davɩɩd raa zɛɛgã ne niigã wakɩ-koeems pis-nu.

²⁵A Davɩɩd mee tẽn-kugr beenẽ, n kõ Sẽn-Ka-Saabo, la yẽnda maana maand sẽn yõogd bugum ne zems-n-taar maando. Woto, Sẽn-Ka-Saab sũurã sigame tɩ b kɩt tɩ bã-loangdgã sẽn da sãamd Israyɛll soolmã looge.