Read SEBR SÕNGO, 1998 2 Sãmwɛlle 3 Bible Online

2 Sãmwɛlle 3 - SEBR SÕNGO, 1998 bible

2 Sãmwɛlle 3

¹Zabrã kaoosa wʋsg a Davɩɩd buudã ne a Sayull buudã sʋka. A Davɩɩd pãngã rag n paasdame la a Sayull buudã pãng da boogdame.

²A Davɩɩd doga kom-dibli Ebrõ. Yẽnda bi-kãsenga yaa a Amno, t'a ma yʋʋr la a Akinoam sẽn yaa a Zizreyɛll biiga.

³Yẽnda bi-pʋgdg la a Kileyab t'a ma yʋʋr la a Abigayɩll sẽn yɩ Karmell dao a Naball pagã. Tãabẽ soabã yaa a Absalom, t'a ma yʋʋr la a Maaka sẽn yaa Gesʋʋr naab a Talmayi biigã.

⁴Naasẽ soaba yaa a Adoniza, t'a ma yʋʋr la a Hagiti. A nu soabã yaa a Sefatiya, a ma yʋʋr la a Abitalle.

⁵A yoob soabã yaa a Zitreyam, a Davɩɩd pag a Egla biiga. Bãmb yaa a Davɩɩd kamb sẽn dog Ebrõ wã.

⁶Zabr ning sẽn dag n be a Davɩɩd buudã ne a Sayull buudã sʋk wakatã, a Abneer paama pãng a Sayull buudã sʋka.

⁷A Sayull dag n tara pʋg-rɩkdga t'a yʋʋr la a Ritspa n yaa a Aya biiga. A Is-Bosɛt yeela a Abneer yaa: «Yaa bõe tɩ yãmb kẽ ne m ba wã paga?»

⁸Rẽ, a Abneer sũurã yika wʋsg a Is-Bosɛt goamã yĩnga, t'a yeel-a: «Mam yaa Zʋʋda nebã baag la? Mam maana pʋ-peelem ne f ba a Sayull yirã rãmba, ne a saam-biisã, la a zo-rãmbã, la mam ka bas t'a Davɩɩd tõog foom ye, tɩ fo wa yas rũndã n ningd maam taal pʋg-kãngã poorẽ?

⁹Sẽn-Ka-Saab rag n wẽename n yeel a Davɩɩd tɩ bãmb na n deega a Sayull rĩungã n kõ-a t'a soog Israyɛll soolmã ne Zʋʋda, sẽn sɩng ne Dan hal tɩ ta Bɛɛr-seba. Mam sã n ka kɩt tɩ yellã yɩ wa Sẽn-Ka-Saab sẽn dag n wẽen n togs a Davɩɩdã, bɩ Sẽn-Ka-Saab ra bas maam ye.»

¹¹A Is-Bosɛt ka saag n leok a Abneer tɩ bũmb ye. Bala, yẽnda ra zoet-a lame.

¹²A Abneer tʋma neb a Davɩɩd nengẽ tɩ b tɩ yeel-a yaa: «Tẽngã yaa ãndã n so? Maan-y kaool ne maam tɩ m kɩt tɩ Israyɛll nebã fãa wẽnemd n kẽ-yã.»

¹³Dẽ, a Davɩɩd yeelame: «Beneere! Mam na n maana kaool ne foom. La yaa bũmb a yembr bal la mam kot foom. Yaa tɩ f sã n dat n yãnd mam nengã, bɩ f reng n kɩt tɩ b tall a Sayull bi-pugl a Mikall n wa kõ-ma, tɩ fo mengã yaool n wa.»

¹⁴La a Davɩɩd tʋma neb a Sayull biig a Is-Bosɛt nengẽ tɩ b tɩ yeel-a yaa: «Lebs maam m pag a Mikall mam sẽn dag n wõrs Filistẽ-dãmbã yo-gãnd koabg n yao n deeg-a n maan m pagã.»

¹⁵A Is-Bosɛt tʋmame tɩ b tɩ deeg a Mikall a sɩd a Paltiyɛll sẽn yaa a Layik biiga nengẽ n wa.

¹⁶A sɩd a Paltiyɛll dag n pʋgd-a lame, la a yãbda, hal n tɩ tãag Bahurim. La a Abneer yeel-a lame t'a lebg n kuili. Dẽ, yẽnda lebgame n kuili.

¹⁷A Abneer yẽsa ne Israyɛll nebã kãsem-dãmb n yeel-b yaa: «Yãmb dag n sɩng n datame t'a Davɩɩd yɩ y rĩmã!

¹⁸Moasã, bɩ y maan wa yãmb sẽn dag n datã, bala, Sẽn-Ka-Saab dag n goma b yell n yeel tɩ yaa ne b tʋmtʋmd a Davɩɩd la b na n fãag Israyɛll sẽn yaa bãmb nebã Filistẽ nebã nusẽ, la bãmb bɛɛbã fãa nusẽ.»

¹⁹Dẽ, a Abneer goma ne Benzame nebã me woto. La yẽnda kẽnga Ebrõ n tɩ togs a Davɩɩd bũmb nins Israyɛll nebã la Benzame nebã fãa sẽn dat n maanã.

²⁰Neb pisi n yãag a Abneer n kẽng a Davɩɩd nengẽ Ebrõ. La a Davɩɩd maana tigr bãmb yĩnga.

²¹A Abneer yeela a Davɩɩd yaa: «Mam na n kẽngame n tɩ tigim Israyɛll nebã fãa tɩ b yam kẽ yãmba. Bãmb na n maana kaool ne yãmba, la y na n dɩ y naamã wa y sẽn date.» A Davɩɩd basa a Abneer t'a lebg n kuil ne bãane.

²²Sẽn yɩ bilfu, a Davɩɩd nebã ne a Zoaab yii zabr weoog n wat ne teed wʋsgo. La rẽ t'a Abneer dag n ka leb n be a Davɩɩd nengẽ Ebrõ ye. Bala, a Davɩɩd dag n kõ-a-la sor t'a lebg n kuil ne laafɩ.

²³La a Zoaab ne tãb-biis nins fãa sẽn dag n be ne yẽnda wã sẽn ta, b togsa a Zoaab yaa: «Ade, a Neer biig Abneer waa rĩm a Davɩɩd nengẽ, la bãmb bas-a lame t'a lebg n kuil ne laafɩ.»

²⁴A Zoaab kẽnga rĩm a Davɩɩd nengẽ n tɩ yeel-b yaa: «Yaa Bõe la yãmb sẽn maan a woto wã? A Abneer waa yãmb nengẽ, la yɩɩ wãn tɩ yãmb bas-a t'a loog ne laafɩ?

²⁵Yãmb meng mi a Neer biig a Abneer sẽn yaa ned ninga. Yẽnda waame n na n belg yãmb n bãng y sẽn saagd n na n kẽng zĩis ninsi, la y sẽn dat n na n maan bũmb ningã fãa.»

²⁶A Zoaab sẽn yi a Davɩɩd nengẽ, a tʋma neb tɩ b babs a Abneer n tɩ paam-a Sira bulga noor n tall-a n lebg n wa. La a Davɩɩd dag n ka bãng ye.

²⁷A Abneer sẽn lebg n wa Ebrõ wã, A Zoaab tall-a lame n kẽng tẽngã noore, wa a rat n lillame n togs-a koɛɛga. La a Zoaab kõsa a Abneer pʋga t'a ki. A Zoaab maana woto n na n dol a yao a Azayɛll kũumã.

²⁸A Davɩɩd sẽn wʋm yellã, a yeelame: «Sẽn-Ka-Saab miime t'a Neer biig a Abneer kũumã taal ka rog maam ne m rĩungã zug ye.

²⁹Bɩ a Abneer zɩɩmã raagr taal zĩnd a Zoaab ne a zakã rãmb fãa zugu. Bɩ ned da kong a Zoaab buudã pʋgẽ, sẽn tar taoor bãaga, bɩ wãoodo, wall nin-saan-paga, wall ned sẽn ki ne sʋʋga, bɩ ned sẽn ka tar n dɩtẽ ye.»

³⁰Yɩɩ woto la a Zoaab ne a yao a Abisayi kʋ a Abneere, yẽnda sẽn dag n kʋ bãmb yao a Azayɛll zabrã zĩigẽ Gabawõ wã yĩnga.

³¹A Davɩɩd yeela a Zoaab ne neb nins fãa sẽn dag n be-b ne yẽnda wã tɩ b pãrs b futu, n yeelg sũ-sãang futu, n yãb a Abneer kũumã yĩnga. La rĩm a Davɩɩd dag n kẽndame n pʋgd kũumã pãndare.

³²Bãmb muma a Abneer Ebrõ. La rĩmã yãba nintãm, la nebã fãa me yãbame.

³³Rĩmã pʋda sũ-sãang yɩɩll n yeele: «A Abneer ka tog n ki wa yalem ye.

³⁴B rag n ka sẽb fo nusã ye, la b rag n ka balg f nao ne bãens me ye. La b yaool n kʋʋ foom wa nin-wẽnsã sẽn kʋʋd ned to-to wã.»

³⁵La nebã fãa leb n yãba a Abneer yĩnga. Nebã fãa kolga a Davɩɩd badaar n na n yeel-a t'a rɩ tɩ wĩndgã nan ka kẽ ye. La a Davɩɩd wẽename n yeele: «Mam sã n lemb rɩɩbo, tɩ wĩndgã nan ka kẽ, bɩ Wẽnnaam da bas-m ye.»

³⁶Nebã fãa yãame tɩ rĩmã sẽn maanã yaa sõama wa a sẽn zoe n maan tɩ loogã.

³⁷Badaare, Zʋʋda nebã ne Israyɛll nebã fãa bãngame, tɩ ka rĩm a Davɩɩd n dag n kõ noor tɩ b kʋ a Neer biig Abneer ye.

³⁸Rĩmã yeela a nebã yaa: «Yãmb ka mi tɩ na-biig sẽn yaa nin-kãseng n ki Israyɛll tẽngã pʋg rũndã la?

³⁹Baa ne b sẽn pʋdg mam zug rĩung kaam tɩ m lebg rĩmã, mam ket n ka tar pãng ye. La nin-bãmbã sẽn yaa a Seruza kambã nen-keglem yɩɩda maam. Ned ning sẽn maan-a wẽnga, bɩ Sẽn-Ka-Saab rol yẽnda wa sẽn zems wẽng ning a sẽn maanã.»