Read SEBR SÕNGO, 1998 2 Sãmwɛlle 5 Bible Online

2 Sãmwɛlle 5 - SEBR SÕNGO, 1998 bible

2 Sãmwɛlle 5

¹Israyɛll buudã fãa kẽnga a Davɩɩd nengẽ n tɩ yeel-b yaa: «Tõnd ne yãmb yaa bũmb a yembre.

²A Sayull sẽn dag n yaa tõnd dĩmã wakate, yaa yãmb n dag n luɩt Israyɛll nebã taoor wakat fãa tɩ b kẽnd n zabdẽ, la y lʋɩt b taoor tɩ b lebg n wa.» Sẽn-Ka-Saab yeela yãmb yaa: «Foom n na n yɩ Israyɛll sẽn yaa mam nebã pe-kɩɩma, foom n na n lebg Israyɛll naaba.»

³Dẽ, Israyɛll kãsem-dãmbã fãa kẽnga rĩm a Davɩɩd nengẽ Ebrõ, la rĩm a Davɩɩd maana kaool Sẽn-Ka-Saab taoor ne bãmb Ebrõ. Bãmb pʋdga a Davɩɩd zug rĩung kaam t'a lebg Israyɛll rĩmã.

⁴A Davɩɩd sẽn wa n na n deeg naamã t'a tara yʋʋm pis-tã. La yẽnda rɩɩ naamã yʋʋm pis-naase.

⁵Yẽnda rɩɩ naam Ebrõ n soog Zʋʋda yʋʋm a yopoe la kiis a yoobe. La yẽnda rɩɩ naam Zeruzalɛm n soog Israyɛll gilli, ne Zʋʋda nebã yʋʋm pis-tã la a tãabo.

⁶Rĩm a Davɩɩd ne a nebã kẽnga Zeruzalɛm n na n tɩ zab ne Zebuus-rãmbã sẽn dag n be tẽn-kãng pʋgẽ wã. La bãmb yeela a Davɩɩd yaa: «Yãmb kõn kẽ ka ye! Zoensã ne wobsã b yeyn-yeyn bal n na n gɩdg yãmba.» B rat n yeelame t'a Davɩɩd ka na n kẽ be ye.

⁷La baoosgo, a Davɩɩd zab n deega Sɩyõ tẽngã pãng zĩiga. Yaa be la b sẽn boond t'a Davɩɩd tẽngã.

⁸Badaare, a Davɩɩd yeelame: «Ned sã n dat n tõog Zebuus-rãmbã, bɩ a tũ ko-sorã n kʋ põyã ne zoensã tɩ b yaa mam bɛɛba.» Yaa woto yĩng la b sẽn yet tɩ zoensã ne põyã ka tõe n kẽ Sẽn-Ka-Saab roog pʋg ye.

⁹A Davɩɩd zĩnda tẽn-kãng sẽn yaa pãngã zĩigã, la a pʋd-a tẽngã yʋʋr t'a Davɩɩd tẽnga. Yẽnda mee lalg Milo n tɩ yek a zakã.

¹⁰A Davɩɩd dag n paamda pãng n paasdẽ, la Sẽn-Ka-Saab sẽn yaa Saasẽ-Pãng-Soab a Wẽnnaamã rag n bee ne yẽnda.

¹¹Tɩɩr dĩm a Hiram tʋma neb a Davɩɩd nengẽ ne sɛɛdr daado, la a kɩt tɩ tãn-metb ne ra-wãadb kẽng n tɩ me zak n kõ a Davɩɩde.

¹²Woto, a Davɩɩd bãngame tɩ yaa Sẽn-Ka-Saab n yãk yẽnda n kɩt t'a lebg Israyɛll dĩma, la a rĩungã rag n paamda pãng n paasdẽ, Israyɛll sẽn yaa bãmb nebã maasem yĩnga.

¹³A Davɩɩd sẽn yi Ebrõ n wa Zeruzalɛmã, a peega pagb a taaba, pʋg-rɩkdse ne kãadem pagba, la bãmb me roga a Davɩɩd kom-dibli la a kom-pulgi a taaba.

¹⁴Kamb nins a Davɩɩd sẽn dog Zeruzalɛmã yʋy la woto: yaa a Simeya ne a Sobaabe, la a Natã ne a Salmo,

¹⁵la a Yibaar ne a Elisuwa, la a Nefɛɛg ne a Zafiya,

¹⁶la a Elisama ne a Eliyada la a Elifelɛte.

¹⁷Filistẽ-dãmbã sẽn wʋm tɩ b pʋdga a Davɩɩd zug rĩung kaam t'a lebg Israyɛll rĩmã, bãmb fãa kẽngame n tɩ baood-a n na n yõke. A Davɩɩd wʋmame n kẽng n tɩ kẽ tẽngã pãng zĩigẽ.

¹⁸Filistẽ-dãmbã kẽng n tɩ sũu tãp Refayim longẽ wã.

¹⁹Dẽ, a Davɩɩd soka Sẽn-Ka-Saab yaa: «Mam tog n kẽngame n tɩ zab ne Filistẽ-dãmbã bɩ? Yãmb na n kɩtame tɩ mam tõog Filistẽ nebã bɩ?» La Sẽn-Ka-Saab leoka a Davɩɩd yaa: «Kẽng tɩ m na n kɩtame tɩ f tõog Filistẽ-dãmbã.»

²⁰A Davɩɩd kẽnga Baall-Peratsim n tɩ zab n tõog Filistẽ-dãmbã, n bas n yeele: «Sẽn-Ka-Saab larga mam bɛɛbã m taoore, wa koom sẽn pãrg bɛoongo.» Yaa rẽ n kɩt tɩ b pʋd zĩ-kãng yʋʋre, tɩ Baall-Peratsim,[1] rat n yeel tɩ Sẽn-Ka-Saab pãrgda sore.

²¹Filistẽ-dãmbã zoeeme n bas b wẽn-naandsã be, t'a Davɩɩd ne a nebã wʋk n looge.

²²Filistẽ-dãmbã leb n kẽng n tɩ sũu tãp Refayim longã pʋga.

²³A Davɩɩd soka Sẽn-Ka-Saabo, la Sẽn-Ka-Saab yeela yẽnda yaa: «Ra kẽng n tɩ seg-b ye. Gilg b poorẽ wã, n tɩ paam-b tɩɩsã neng taoore.»

²⁴La fo sã n wa wʋm bʋrg sẽn wẽnd nao rãamd tɩɩsã zutu, bɩ f yik tao-tao tɩ yaa Sẽn-Ka-Saab n dat n lʋɩ f taoor n zab n tõog Filistẽ nebã tãb-biisã.»

²⁵A Davɩɩd maana wa Sẽn-Ka-Saab sẽn dag n yeel yẽnda wã, la yẽnda tõoga Filistẽ-dãmbã, n dig-ba, sẽn sɩng ne Geba hal n tɩ tãag Gezɛɛre.