Read SEBR SÕNGO, 1998 1 Rĩm-dãmbã 11 Bible Online

1 Rĩm-dãmbã 11 - SEBR SÕNGO, 1998 bible

1 Rĩm-dãmbã 11

¹Rĩm a Salmo rɩgsa bu-zẽms kom-pugli wʋsg n maan a pagba, n paas Ezɩpt rĩm a Faarõ bi-puglã. Pʋg-kãens dag n yaa Amo, Moaabe, Edom, ne Sidõ la Hɛt buudã kom-pugli.

²Sẽn-Ka-Saab yaool n dag n goma ne Israyɛll nebã bu-bãmb wɛɛngẽ n yeele: «Bɩ y ra kẽng n tɩ naag bu-kãense, la y ra bas-b tɩ b wa naag yãmb ye. Bala, b na n kɩtame tɩ yãmb yamã tek tɩ y wẽnemd n bas Sẽn-Ka-Saab n tũ b wẽn-naandsã.» La a Salmo sẽn dag n nong pʋg-bãmbã wã yĩng kɩtame t'a loe a meng ne-ba.

³Rĩm a Salmo rag n tara na-bi-pogs kobs-yopoe tɩ yaa a pagba, la pʋg-rɩkds kobs-tã. La pʋg-kãens tõog n wẽnemda a yamã.

⁴Rĩm a Salmo sẽn wa n kʋʋle, a pagbã tõog n wẽnemda a yamã t'a tũ wẽn-naandse, la a yamã rag n ka loe ne Sẽn-Ka-Saab sẽn yaa yẽnda Wẽnnaamã zãnga, wa a ba a Davɩɩd yamã sẽn dag n loe ne Sẽn-Ka-Saab to-to wã ye.

⁵Yẽnda tũu Sɩdõ nebã wẽn-naan-poak a Astarte, la a pʋʋs Amo-rãmbã wẽn-naan-yoog a Milkom.

⁶A Salmo maana sẽn yaa wẽng Sẽn-Ka-Saab nifẽ, n ka tũ bãmb ne a sũur fãa wa a ba Davɩɩd ye.

⁷Dẽ, yẽnda mee maoong kʋʋb zĩig tãng ning sẽn tees Zeruzalɛm tẽngã n kõ Moaab-rãmbã wẽn-yook a Kemoose, la a me maoong kʋʋb zĩig n kõ Amo nebã wẽn-yook a Moloke.

⁸A Salmo rag n maanda a woto n kõt a pagb nins fãa sẽn yaa bu-zẽmsã. Pʋg-kãens dag n yõogda wisdu, la b maand maand n kõt b wẽn-naandsã.

⁹Sẽn-Ka-Saab sũur yika ne a Salmo, yẽnda yamã sẽn wẽnemd n bas bãmbã yĩnga. Sẽn-Ka-Saab sẽn yaa Israyɛll Wẽnnaamã yaool n dag n vẽnega b meng ne a Salmo naoor a yiibu.

¹⁰Sẽn-Ka-Saab rag n goma ne a Salmo yel-kãng wɛɛngẽ n yeel-a t'a ra sak n pʋʋs Wẽnnaam a to ye. La a Salmo ka sak Sẽn-Ka-Saab noorã ye.

¹¹Dẽ, Sẽn-Ka-Saab yeela a Salmo yaa: «Fo sẽn maan yel-kãngã n ka sak mam kaoolã ne m tõodã mam sẽn dag n kõ foomã yĩnga, mam na n welga f rĩungã n dɩka n kõ f tʋmtʋmda.

¹²La fo ba a Davɩɩd maasem yĩnga, mam ka na n maan bõn-kãng fo sẽn ket n vɩ wakat ye. Mam na n maan-a-la wakat ning sẽn wat n yaa fo biig n dɩt naamã.

¹³La baoosgo, m ka na n deeg naamã zãng ye. Mam tʋmtʋmd a Davɩɩd maasem yĩnga, ne Zeruzalɛm tẽngã mam sẽn yãkã yĩnga, mam na n basame tɩ f biig soog buud a yembre.»

¹⁴Sẽn-Ka-Saab kɩtame t'a Salmo paam bɛyã. Yaa Edom tẽngã na-biig a Hadaade.

¹⁵Wakat ning rĩm a Davɩɩd sẽn dag n tɩ zab ne Edom nebã n tõog-bã, yẽnda tãb-biisã naab a Zoaab dag n kẽng n tɩ muma neb nins sẽn ki-b zabrẽ wã, la a tɩ kʋ Edom raopã zãnga.

¹⁶A Zoaab kell n paa beenẽ kiis a yoob ne Israyɛll nebã, hal n tõog n kʋ Edom raopã zãnga.

¹⁷La wakat-kãng t'a Hadaad dag n yaa bi-ribl-bilf bala, la yẽnda tũu Edom neb kẽer sẽn dag n yaa yẽnda ba wã tʋmtʋmdb n zoe n kẽng Ezɩpt tẽnga.

¹⁸Bãmb yii Madiyã n kẽng Paarã we-raoogẽ wã. La b peega Paarã raop kẽer tɩ b tũ bãmb n kẽng Ezɩpt rĩm a Faarõ nengẽ. La Faarõ kõ a Hadaad roogo, n ges a rɩɩb yelle, la a kõ-a pʋʋgo.

¹⁹La Faarõ dag n nonga a Hadaad hal wʋsgo, n tol n dɩk a na-pʋg-rʋmd a Tapenes yao-bi-pugl n kõ-a t'a maan a paga.

²⁰A Tapenes yao-bi-puglã roga a Hadaad bi-ribl t'a yʋʋr boondẽ t'a Genubate. A Tapenes kɩtame tɩ b wub biigã Faarõ zakẽ wã. Biigã naaga Faarõ kambã n be na-yirã.

²¹Wakat ning a Hadaad sẽn wa n be Ezɩpt n wʋm t'a Davɩɩd kiime, la a Zoaab sẽn yaa yẽnda tãb-biisã naabã me kiime. A kosa Faarõ yaa: «M kotame tɩ y bas-m tɩ m lebg n leb m tẽngẽ.»

²²Faarõ soka yẽnda yaa: «Fo sẽn be ne maamã, bõe n paoog foom tɩ f rat n lebg n kuil f tẽngẽ?» A Hadaad yeelame: «Bũmb ka paoog-m ye, la yãmb we n bas-m tɩ m kuili.»

²³Wẽnnaam kɩtame t'a Salmo leb n paam bɛ a to. Yaa a Elyada biig a Reezõ. Yẽnda rag n zoe n basa a soaal a Hadadezɛɛr sẽn yaa Soba rĩmã.

²⁴Wakat ning rĩm a Davɩɩd sẽn dag n kʋ a soaal a Hadadezɛɛr tãb-biisã zãngã, a Reezõ tigma neb n lebg b tãb-biis naaba. Dẽ, bãmb zoe n kẽnga Damaas n tɩ zĩnd be n dɩ naam.

²⁵A Salmo vɩɩmã tɛka, a Reezõ yɩɩ Israyɛll nebã bɛ. La a maana wẽng wa a Hadaad sẽn maan Israyɛllã. La a Reezõ sẽn yɩ Siiri rĩmã tɛka, a kisga Israyɛll nebã.

²⁶Baa ne a Zeroboaam sẽn dag n yaa a Salmo tʋmtʋmd-tɩrgã yika zabr ne rĩm a Salmo. A Zeroboaam rag n yaa Sereda sẽn be Efrayiim tẽngã rao a Nebat biiga. La a ma wã yaa pʋg-kõore, t'a yʋʋr boondẽ t'a Seruwa.

²⁷A Zeroboaam dag n yaa a Salmo tʋmtʋmda, la a zaba ne rĩmã. Ad bũmb ning sẽn kɩt tɩ b zab taabã. A Salmo manega zĩig tãngã zug n na n ko, la a yẽd võorã sẽn dag n be yẽnda ba a Davɩɩd tẽngã lalgẽ wã.

²⁸A Zeroboaam dag n yaa gãndaoog n tar pãnga. La rĩm a Salmo sẽn yã bi-bɩ-kãng sẽn tʋmd sõama to-to wã, a kɩtame tɩ yẽnda soog Efrayiim ne Manaase buudã neb tɩ b tʋmd tʋʋm-wɛglã.

²⁹Wakat-kãnga, a Zeroboaam yii Zeruzalɛm, la Wẽnnaam no-rɛɛs a Akiya sẽn yit Sɩlo tẽng raoã tek n sega yẽnda sorẽ. A Akiya dag n yera fu-paalle. La yaa bãmb b yiibã bal n dag n be weoogã pʋga.

³⁰A Akiya gãda fu-paall ning yẽnda sẽn yerã n tak n pãrs zĩis piig la a yiibu.

³¹La a Akiya yeela a Zeroboaam yaa: «Reeg peen-gɩrs piigã n sooge. Bala, Sẽn-Ka-Saab sẽn yaa Israyɛll Wẽnnaamã yetame: Mam na n deega naamã a Salmo nugẽ, la mam na n kõo foom buud piig tɩ f sooge.

³²La mam tʋmtʋmd a Davɩɩd maasem yĩnga, ne Zeruzalɛm sẽn yaa tẽng mam sẽn yãk Israyɛll tẽmsã sʋkã yĩnga, a Salmo biig n na n soog buud a yembr bala.

³³Bala, bãmb basa maam n waoog Sɩdõ nebã wẽn-naan-poak a Astarte, ne Moaab nebã wẽn-naandg a Kemoose, ne Amo nebã wẽn-naandg a Milkom. La bãmb ka sak n tũ maam, n kẽn wa sẽn zemsd mam tõodã ne m noyã, wa a Salmo ba a Davɩɩd sẽn dag n kẽn to-to wã, n maan sẽn yaa tɩrg mam nifẽ ye.

³⁴Mam tʋmtʋmd a Davɩɩd mam sẽn yãkã sẽn sak maam, n kẽn wa sẽn zems mam tõodã ne m noyã maasem yĩnga, mam ka na n deeg soolmã zãng n bas a Salmo ye. Yẽnda na n kell n yɩɩ rĩm a vɩɩmã tɛka.

³⁵La yaa a Salmo biig nugẽ, la m na n deeg naamã, la m na n kõo foom a Zeroboaam buud piig tɩ f sooge.

³⁶Baoosgo, mam na n kõo a biigã buud a yembr t'a sooge, sẽn na n yɩlẽ tɩ mam tʋmtʋmd a Davɩɩd yʋʋrã ra menem mam taoor Zeruzalɛm sẽn yaa tẽng ning mam sẽn yãk m yʋʋrã yĩngã pʋgẽ ye.

³⁷La mam na n kɩtame tɩ foom a Zeroboaam dɩ naamã wa f sẽn date, n yɩ Israyɛll rĩmã.

³⁸Fo sã n sak n maan bũmb nins mam sẽn yeel foomã neere, n sak n kẽn wa mam sẽn datã, la f maan sẽn tat mam yam, n tũ mam tõodã ne m noyã, wa mam tʋmtʋmd a Davɩɩd sẽn dag n maandã, mam na n zĩnda ne foom n kɩt tɩ f roogã kaoos wa mam sẽn maan a Davɩɩd yĩngã, la m kɩt tɩ f soog Israyɛlle.

³⁹Mam na n maana a woto n ning a Davɩɩd doogã yãnde, la ka na n yɩ wakat fãa yĩng ye.»

⁴⁰Dẽ, rĩm a Salmo baoome n na n kʋ a Zeroboaam. La a Zeroboaam yikame n zoe n kẽng Ezɩpt tẽng rĩm a Sɩsak nengẽ. A Zeroboaam zĩnda be hal n tãag a Salmo kũum.

⁴¹Rĩm a Salmo yɛl a taabã ne a sẽn maan bũmb ninsã fãa, ne a yamã tʋʋmã fãa gʋlsa a Salmo tʋʋmã sebr pʋga.

⁴²Rĩm a Salmo rɩɩ naam Zeruzalɛm n soog Israyɛll nebã yʋʋm pis-naase.

⁴³Rĩm a Salmo saka a saam-dãmba, la b mum-a-la a ba a Davɩɩd tẽngã pʋga. La a Salmo biig a Roboaam n deeg yẽnda zĩig n dɩ naamã.