Read SEBR SÕNGO, 1998 1 Rĩm-dãmbã 14 Bible Online

1 Rĩm-dãmbã 14 - SEBR SÕNGO, 1998 bible

1 Rĩm-dãmbã 14

¹Wakat-kãnga, a Zeroboaam bi-ribl a Abiya lʋɩɩ bãaga.

²Dẽ, a Zeroboaam yeela a pagã yaa: «M kotame tɩ f yik n teem fut ned sẽn kõn yãnd n bãng tɩ yaa foom la rĩm a Zeroboaam pagã ye. Kẽng Sɩlo tẽnga, tɩ Wẽnnaam no-rɛɛs a Akiya bee be. Yaa yẽnda la sẽn dag n yeel maam tɩ m na n lebga Israyɛll nebã rĩmã.

³Bao bur piiga, ne sams bilfu, la sɩɩdo, n zã n tɩ kõ-a. Fo sã n kẽnge, yẽnda na n wilga foom tõnd biigã yell sẽn na n baas to-to.»

⁴Dẽ, a Zeroboaam pagã maana wa a sɩdã sẽn yeel yẽnda wã. A yikame n kẽng Wẽnnaam no-rɛɛs a Akiya nengẽ Silo. La a Akiya dag n kʋʋla wʋsg t'a ninã ka leb n neẽ ye.

⁵Sẽn-Ka-Saab rag n yeela a Akiya yaa: «Ade, a Zeroboaam pagã biig n yaa bãada, t'a wat n na n yãnd foom n sok a biigã yell sẽn na n yɩ to-to. La a na n maana a mengã, fo sẽn kõn bãng tɩ yaa yẽnda ye. La mam na n wilga foom, fo sẽn na n togs-a bũmb ninga.»

⁶La pagã sẽn ta roogã noore, a Akiya wʋma a naoã rãamd n yeel-a yaa: «A Zeroboaam paga, wa kẽ wɛ. Yaa bõe tɩ f solgd f meng n ka rat tɩ b bãng tɩ yaa foom? Fo sẽn maaneg me, b tʋma maam tɩ m togs-f koe-beedo.

⁷Lebg n kẽng n tɩ yeel a Zeroboaam tɩ Sẽn-Ka-Saab sẽn yaa Israyɛll Wẽnnaamã yeetame: ‹Fo rag n yaa nin-zaalg n be Israyɛll nebã sʋka, tɩ mam sẽn zẽk foom n kɩt tɩ f lebg Israyɛll nebã naaba.

⁸Mam deega naamã a Davɩɩd buudã nugẽ n kõ foom. La fo ka sak n maan wa mam tʋmtʋmd a Davɩɩd sẽn sak mam tõodã, n tũ maam ne a sũur fãa, n ka tol n maan bũmb sẽn ka tat mam yamã ye.

⁹Fo maana wẽng n yɩɩd rĩm-dãmb nins fãa sẽn deng-b foomã. Fo wẽnemd n basa maam, n maan f meng wẽn-naandse, n kɩt tɩ m sũurã yiki.

¹⁰Woto yĩnga, mam na n kɩtame tɩ yel-beed paam a Zeroboaam buudã. Mam na n sãama a Zeroboaam buudã raopã ne kom-dibli wã fãa sẽn be Israyɛllã, sã n yaa yembse, wall burkĩmba. Mam na n pɩɩsa foom a Zeroboaam buudã wa ned sẽn pɩɩsd sagdo, n kɩt t'a menem zãnga.

¹¹La fo buudã ned sã n ki tẽngã pʋgẽ, baas n na n wãb-a, la a sã n ki weoogẽ, weoogã bõn-yɩgdɩ n na dɩ-a. Yaa Sẽn-Ka-Saab meng n yeele.› »

¹²La Wẽnnaam no-rɛɛs a Akiya leb n yeela pagã yaa: «Foom a Zeroboaam paga, yik n kuil f yiri! La bãng tɩ yaa wakat ning fo naoorã sẽn na n kẽ tẽngã pʋgẽ wã la fo biigã na n ki.

¹³Israyɛll nebã fãa na n yãba biigã kʋʋre, la b mum-a. A Zeroboaam buudã sʋka, yaa bi-kãng bal n na n paam yaoogo. Bala, a Zeroboaam buudã sʋka, bi-kãng a yembr bal pʋgẽ, la Sẽn-Ka-Saab sẽn yaa Israyɛll Wẽnnaamã yã bũmb sẽn ta bãmb yam.

¹⁴Rẽ zugẽ, Sẽn-Ka-Saab na n yãka rĩm n kõ Israyɛlle, la yaa rĩm-kãng n na n menes a Zeroboaam buudã. La rũndã bala, bõn-kãng zoe n sɩngame.

¹⁵Sẽn-Ka-Saab na n sɩbga Israyɛlle, la b miim-a wa tãnwĩig sẽn be koom noore. Sẽn-Ka-Saab na n yiisa Israyɛll nebã tẽn-sõng-kãngã bãmb sẽn dag n kõ b yaab-rãmbã pʋgẽ, n kɩt tɩ b sãeeg n kẽng hal Efrat kʋɩlgã rʋʋnde. Bala, bãmb peesa ra-lugds wẽn-naan-poak a Aseera yĩng n kɩt tɩ Sẽn-Ka-Saab sũurã puugi.

¹⁶A Zeroboaam sẽn beeg n kɩt tɩ Israyɛll nebã lʋɩ kongr pʋgẽ wã yĩnga, Sẽn-Ka-Saab na n basa Israyɛll nebã.»

¹⁷A Zeroboaam pagã yikame n lebg n kuil a yir Tirsa. La yẽnda sẽn ta a roogã noor bal yee, la a bi-riblã sẽn be kũumẽ.

¹⁸Dẽ, b muma biigã, la Israyɛll nebã fãa yãba a kʋʋre, wa Sẽn-Ka-Saab sẽn dag n kɩt tɩ b no-rɛɛs a Akiya togsã.

¹⁹A Zeroboaam tʋʋm a taabã sẽn wilgd yẽnda sẽn zab zabã ne a rĩungã yɛlã gʋlsa Israyɛll rĩm-dãmbã kibay sebr pʋga.

²⁰A Zeroboaam dɩɩ naam yʋʋm pisi la a yiibu. La a saka a saam-dãmba, t'a biig a Nadaab reeg a zĩig n dɩ naamã.

²¹Rĩm a Salmo biig a Roboaam dɩɩ naam Zʋʋda. Yẽnda sẽn wa n na n deeg naamã t'a tara yʋʋm pis-naas la a yembre. Yẽnda rɩɩ a naamã yʋʋm piig la a yopoe Zeruzalɛm tẽngã, tẽng ning Sẽn-Ka-Saab sẽn yãk n ning b yʋʋrã a pʋgẽ wã. A Roboaam ma wã rag n yaa Amo neda, t'a yʋʋr boondẽ t'a Naama.

²²Zʋʋda buudã neb maana wẽng Sẽn-Ka-Saab nifẽ, n yɩɩd b yaab-rãmbã sẽn dag n maanã, n kɩt tɩ Sẽn-Ka-Saab sũurã yik ne-ba.

²³Bãmb me mee tẽn-kuga, la maoong kʋʋb zĩisi, la b pees kug-viginds ne ra-lugds n vigl kunkubã fãa zutu, ne tɩɩs nins sẽn tar maasmã tẽngre.

²⁴Bãmb dag n tara pagb ne raop sẽn be pʋʋsg rotã zĩisẽ n maand yoob n waoogd wẽn-naandse. Bãmb maana tʋʋm-beed buud toor-toore, wa buud nins Sẽn-Ka-Saab sẽn kɩt tɩ Israyɛll nebã rigã sẽn dag n maandã.

²⁵A Roboaam sẽn deeg naam tɩ yʋʋm nuunẽ, la Ezɩpt rĩm a Sɩsak yik zabr ne Zeruzalɛm.

²⁶A Sɩsak wʋka Sẽn-Ka-Saab roogã laog zãnga, la a wʋk na-yirã laogã me zãnga. Yẽnda wʋka sãnem gãnd nins fãa rĩm a Salmo sẽn dag n kɩt tɩ b maanã.

²⁷Rĩm a Roboaam maana zũud gãndo, n ledg sãnem gãndã zĩigẽ, la a rɩk-b n gũnug tãb-biis nins sẽn yaa rĩmã gũudbã nanambsã sẽn gũud rĩmã zak noorã.

²⁸Wakat ning fãa rĩmã sẽn dabd Sẽn-Ka-Saab roogẽ wã, tãb-biisã sẽn gũud rĩmã zãada gãndã n yãagd rĩmã. La b sã n sɛ, b lebgd n tɩ lebsa gãndã tãb-biisã sẽn yaa rĩmã gũudbã roogẽ.

²⁹Rĩm a Roboaam tʋʋm a taabã ne a sẽn maan bũmb ninsã fãa gʋlsa Zʋʋda rĩm-dãmbã kibay sebr pʋga.

³⁰Rĩm a Roboaam ne a Zeroboaam dag n zabda taab wakat fãa.

³¹A Roboaam saka a saam-dãmba, la b mum-a lame n naag a saam-dãmbã, a Davɩɩd tẽngã pʋga. Yẽnda ma wã rag n yaa Amo neda, t'a yʋʋr boondẽ t'a Naama. La a Roboaam biig a Abiyam n led a zĩigẽ n dɩ naamã.