Read SEBR SÕNGO, 1998 1 Rĩm-dãmbã 17 Bible Online

1 Rĩm-dãmbã 17 - SEBR SÕNGO, 1998 bible

1 Rĩm-dãmbã 17

¹Rao a ye n dag n be t'a yʋʋr boondẽ t'a Eli, n yit Tisbe sẽn be Galaad tẽnga. Yẽnda yeela a Akaab yaa: «Mam wẽenda ne Sẽn-Ka-Saab sẽn yaa Israyɛll Wẽnnaamã sẽn vɩ wã, mam sẽn yaa a soab tʋmtʋmdã, tɩ yʋʋm nins sẽn watã pʋgẽ, meenem ka na n zĩndi, la saag me ka na n ni, hal tɩ mam leb n wa gome.»

²Sẽn-Ka-Saab yeela a Eli yaa:

³«Yi ka n kẽng yaang sẽnẽ n tɩ soond Kerit ko-soogã sẽn be Zʋrdẽ kʋɩlgã neng-taoorã sɛɛga.

⁴Fo na n yũuda ko-soogã koom, la mam na n kɩtame tɩ gãabd wat n kõt foom dɩɩb beenẽ.»

⁵A Eli loogame, la a maana wa Sẽn-Ka-Saab sẽn yeel-a wã, n tɩ soond Kerit ko-soogã sẽn be Zʋrdẽ kʋɩlgã neng taoorã sɛɛga.

⁶La yibeoog ne zaabr fãa, gãabdã rag n kẽnd n kõta a Eli buri, ne nemdo, la yẽnda rag n yũuda Kerit ko-soogã koom.

⁷La sẽn wa n kaoos bilfu, ko-soogã koom sɛɛme, bala saag ka tol n ni tẽngã ye.

⁸Rẽ zugẽ, Sẽn-Ka-Saab goma ne a Eli n yeel-a yaa:

⁹«Yik n kẽng Sarepta sẽn be Sɩdõ soolmẽ wã n tɩ zĩndi. Mam kɩtame tɩ pʋg-kõor a yembr sẽn be beenẽ na n dɩlg foom.»

¹⁰A Eli yikame n dɩk Sarepta sore, la yẽnda sẽn ta tẽngã noore, a yãnda pʋg-kõor sẽn dag n wɩɩsd raado. A Eli boola pʋg-kõorã n yeel-a: «Paga, m kotame tɩ f kẽng n tɩ toog koom bilf ne wamd n wa kõ-m tɩ m yũ.»

¹¹Pʋg-kõorã kẽng n tɩ tooga koomã n wa. A Eli leb n boola pʋg-kõorã n yeel-a yaa: «Mam leb n kotame tɩ f kẽng n tɩ bao rɩɩb bilf n wa kõ-ma.»

¹²Pʋg-kõorã leokame: «Mam wẽenda ne Sẽn-Ka-Saab sẽn yaa yãmb Wẽnnaamã sẽn vɩ wã, tɩ m ka leb n tar sag-võr meng ye. Yaa zom sẽn ka yɩɩd nug pʋgẽ bal n be rʋk pʋga, n paas kaam bilf sẽn be lengrẽ. Yãmb sẽn ne mam sẽn wɩɩsd ribli a yiibã, yaa sẽn na n kuil n tɩ segl rɩɩb tɩ maam ne m biigã rɩ la d ki.»

¹³A Eli leoka pʋg-kõorã yaa: «Ra zoe rabeem ye! Kẽng n kuil n tɩ maan wa fo sẽn yeelã bala. La bũmb ning sẽn be, reng n segl rɩɩb bilf n wa kõ maam, la f yaool n kẽng n tɩ segl foom ne f biigã yĩnga.

¹⁴Bala, Sẽn-Ka-Saab sẽn yaa Israyɛll Wẽnnaamã yetame: ‹Zom ning sẽn be rʋkẽ wã ka na n sɛ ye. La kaamã sẽn be lengrẽ wã me kõn sɛ, hal tɩ ta daar ning maam a Sẽn-Ka-Saab sẽn na n kɩt tɩ saagã ni tẽng zugu.› »

¹⁵Dẽ, pʋg-kõorã kẽng n tɩ maana wa a Eli sẽn yeel-a wã. La yẽnda ne a zakã rãmba, la a Eli mengã paama rɩɩb n dɩ rasem wʋsgo.

¹⁶La zomã sẽn dag n be rʋkẽ wã ka tol n sɛ, la kaamã sẽn dag n be lengrẽ wã me ka sɛ, wa Sẽn-Ka-Saab sẽn dag n kɩt t'a Eli togsã.

¹⁷Bõn-kãens fãa zugẽ, pʋg-kõorã biig lʋɩɩ bãaga, la bãagã yɩɩ kɛgeng wʋsgo, tɩ biigã ki.

¹⁸La pʋg-kõorã yeela a Eli yaa: «Wẽnnaam daoa, yaa bõe beem n be maam ne yãmb sʋka? Yãmb wa n na n kɩtame tɩ m biigã ki, tɩ m tẽeg tɩ m konga ne Sẽn-Ka-Saabo?»

¹⁹La a Eli yeela pʋg-kõorã t'a wa ne biigã yẽnda nengẽ. Dẽ, a Eli reega biigã pagã nugẽ, n tall-a n dʋ yĩngr doog ning pʋg yẽnda sẽn dag n gãeẽ wã, n gãneg biigã yẽnda gãagã zugu.

²⁰A Eli zẽka a koɛɛg n pʋʋs Sẽn-Ka-Saab n yeele: «Mam Wẽnnaam Sẽn-Ka-Saabo, yãmb na n sak n maana pʋg-kõ-kãngã mam sẽn sig-a soab yirã wẽnga, halɩ n kɩt t'a biig ki?»

²¹A Eli gãandame n tẽeg a meng biigã zug naoor a tãab n pʋʋs Sẽn-Ka-Saab n yeele: «Wẽnnaam Sẽn-Ka-Saabo, mam Wẽnnaam, mam kot-y lame tɩ y kɩt tɩ biigã leb n paam vɩɩm!»

²²La Sẽn-Ka-Saab wʋma a Eli kosgã, n kɩt tɩ biigã vʋʋge.

²³A Eli talla biigã n sig n kɩs-a a ma, n yeele: «Gese, fo biigã vɩɩme!»

²⁴Pʋg-kõorã yeela a Eli yaa: «Moasã, mam bãngame tɩ yãmb yaa Wẽnnaam ned meng-menga, la Sẽn-Ka-Saab goamã yãmb sẽn togsdã yaa sɩda.»