Read SEBR SÕNGO, 1998 1 Rĩm-dãmbã 8 Bible Online

1 Rĩm-dãmbã 8 - SEBR SÕNGO, 1998 bible

1 Rĩm-dãmbã 8

¹Wakat-kãnga, rĩm a Salmo kɩtame tɩ Israyɛll kãsem-dãmbã ne Israyɛll buudã nanambsã ne b rotã nanambs wa tigim bãmb nengẽ Zeruzalɛm, n na n kɩt tɩ b kẽng Sɩyõ sẽn yaa rĩm a Davɩɩd tẽngã, n tɩ tall Sẽn-Ka-Saab kaoolã koglgã n wa Sẽn-Ka-Saab roogẽ wã.

²Dẽ, Israyɛll raopã fãa tigma taab rĩm a Salmo nengẽ, la yɩɩ Etanim kiuugã sẽn yaa kiuug a yopoe soabã tigr wakate.

³La Israyɛll kãsem-dãmbã fãa sẽn na n wa wã, tɩ rag n yaa maan-kʋʋdbã n tʋk kaoolã koglgã.

⁴Dẽ, maan-kʋʋdbã ne Leevi buudã tʋka kaoolã koglgã ne sɛk roogã, la teed nins fãa sẽn welg toor Wẽnnaam yĩngã.

⁵Rĩm a Salmo ne Israyɛll nebã b sẽn bool tɩ b wa bãmb nengẽ wã rag n yasa yĩngr kaoolã koglgã taoor ne yẽnda. La b maana rũm-bãooneg ne rũm-bɛd maoongo. La rũmsã yɩɩ wʋsg hal tɩ ned ka tõog n bãng b sõor ye.

⁶Dẽ, maan-kʋʋdbã talla Sẽn-Ka-Saab kaoolã koglgã n tɩ ning-a a zĩigẽ, ro-taoorã sẽn yaa zĩig sẽn welg toor n yɩɩdã pʋgẽ. La b rɩgl-a-la serubẽ-rãmbã pɩgs tẽngre.

⁷Bala, serubẽ-rãmbã pɩgsã rag n yɛdgame n lud zĩig ning kaoolã koglgã sẽn beẽ wã. Serubẽ-rãmbã pɩgs luda kaoolã koglgã ne a ra-bɩlmã sẽn be a zugã.

⁸B rag n maana ra-bɩlmã tɩ b yaa wogd n sãde, tɩ ned sã n be zĩ-sõngẽ wã bɩ a tõe n yãnd-ba. La ned sã n be yɩnga, a ka tõe n yãnd-b ye. Bãmb kell n paa beenẽ hal tɩ ta rũndã.

⁹Bũmb a to rag n ka be kaoolã koglgã pʋga, n zʋʋg kug-wals a yiibã a Moyiis sẽn ning be Horɛɛb tãngã zugã, wakat ning Sẽn-Ka-Saab sẽn maan kaool ne Israyɛll nebã b sẽn wa n yit Ezɩpt yembdã pʋgẽ wã ye.

¹⁰La maan-kʋʋdbã sẽn wa n yit zĩ-sõngẽ wã, sawaodg n wa n pid Sẽn-Ka-Saab roogã.

¹¹Sawaodgã yĩng kɩtame tɩ maan-kʋʋdbã ka tõog n na n yals n maan b tʋʋmdã ye. Bala, Sẽn-Ka-Saab ziirã rag n pida b roogã.

¹²Dẽ, rĩm a Salmo zẽka a koɛɛg n yeele: «Sẽn-Ka-Saabo, yãmb yeelame tɩ y rat n zĩnda zĩ-libsgẽ.

¹³Yaa woto tɩ mam me roog sẽn tar ziir n na n kõ yãmba. Tɩ yãmb tõe n zĩnd be wakat sẽn kõn sa yĩnga.»

¹⁴Israyɛll nebã fãa ra yasa yĩngri, la rĩm a Salmo wẽnemdame n tees-b n ning-b barka.

¹⁵Rĩm a Salmo yeelame yaa: «Bɩ Sẽn-Ka-Saab sẽn yaa Israyɛll Wẽnnaamã yʋʋr paam waoogre. Bala, yãmb pidsa kãab-noog ning yãmb sẽn dag n kãab m ba a Davɩɩd n yeel tɩ:

¹⁶‹Hal daar ning mam sẽn yiis Israyɛll sẽn yaa mam nebã Ezɩpt tẽngã tɩ ta rũndã, mam ka yãk tẽng ba a yembr Israyɛll buudã tẽms sʋk n yeel tɩ b me roog mam yʋʋrã sẽn na n zĩnd a pʋgẽ ye. La mam yãka a Davɩɩd t'a yɩ Israyɛll sẽn yaa mam nebã naaba.›

¹⁷Mam ba a Davɩɩd dag n data ne b sũur fãa n me roog Sẽn-Ka-Saab sẽn yaa Israyɛll Wẽnnaamã yʋʋrã yĩnga.

¹⁸La Sẽn-Ka-Saab yeela m ba a Davɩɩd yaa: ‹Fo sẽn tags n dat n me roog mam yʋʋrã yĩngã, fo maana neere.

¹⁹La bũmb sẽn be bala, ka foom n na n me roogã ye. Yaa fo meng bi-roak n na n me roogã mam yʋʋrã yĩnga.›

²⁰Woto, Sẽn-Ka-Saab pidsa b kãabgã. Mam leda m ba a Davɩɩd zĩigẽ, n dɩt naam Israyɛlle, wa Sẽn-Ka-Saab sẽn dag n yeelã, la mam mee roogã Sẽn-Ka-Saab sẽn yaa Israyɛll Wẽnnaamã yʋʋr yĩnga.

²¹Mam yãka zĩig roogã pʋga, tɩ zĩ-kãng yaa Sẽn-Ka-Saab kaoolã koglg bĩngr zĩiga. Yaa kaool ning Sẽn-Ka-Saab sẽn dag n maan ne tõnd yaab-rãmbã, wakat ning bãmb sẽn yiis-b Ezɩpt tẽngã.»

²²Rĩm a Salmo yalsa Sẽn-Ka-Saab tẽn-kugrã taoore, tɩ b nengã tees Israyɛll nebã fãa. La a zẽka a nus n tees yĩngr n yeele:

²³«Sẽn-Ka-Saab sẽn yaa Israyɛll Wẽnnaam, saasẽ ne tẽng zug ka, Wẽnnaam a to ka be sẽn zem yãmb ye. Yãmb ka sãamd y kaoola, la y nonga neb nins sẽn tũud yãmb ne b sũur fãa wã wakat fãa.

²⁴Yãmb pidsa kãab-noog ning yãmb sẽn dag n kãab m ba a Davɩɩd sẽn yaa yãmb tʋmtʋmdã. Yãmb noorã sẽn yeel bũmb ninsã, yãmb pids-b-la rũndã ne yãmb meng nusi.

²⁵Moasã, Sẽn-Ka-Saab sẽn yaa Israyɛll Wẽnnaam, bɩ y maan wa yãmb sẽn dag n yeel m ba a Davɩɩd sẽn dag n yaa yãmb tʋmtʋmdã. Yãmb dag n yeelame: ‹Fo yagensã sã n gũus ne b yel-manesmã, la b tũ maam wa fo sẽn tũ maamã, ned ka na n kong bãmb sʋkã sẽn na n led fo zĩigẽ n dɩ naamã Israyɛll ye.›

²⁶Moasã, Israyɛll Wẽnnaam, m kot-y lame tɩ y kɩt tɩ goam nins yãmb sẽn dag n togs m ba a Davɩɩd sẽn yaa yãmb tʋmtʋmdã paam pidsgu.

²⁷Dẽ yĩnga, Wẽnnaam sɩd tõe n zĩnda dũniyã zug la? Yĩngr ne a yalmã, a ka tõe n deeg yãmb a Wẽnnaam ye. Dẽ, roog ning mam sẽn me wã na n maana a wãn n tõog n deeg yãmba?

²⁸Woto yĩngã, Sẽn-Ka-Saab sẽn yaa mam Wẽnnaam, bɩ y wʋm mam sẽn yaa y tʋmtʋmdã pʋʋsgã, ne m kosgã, la y kelg m sẽn kelemd n boond yãmb rũndã wã.

²⁹Bɩ y kɩt tɩ y belmã zĩnd ro-kãngã pʋg wĩndg la yʋngo, bala, a yaa zĩig yãmb sẽn dag n yeel tɩ y yʋʋrã na n zĩnda a pʋgẽ! Moasã, bɩ y kelg y tʋmtʋmdã sẽn be ro-kãngã pʋg n pʋʋsd yãmbã.

³⁰N-yẽe! Sẽn-Ka-Saabo, bɩ y kelg y tʋmtʋmdã kosgã. La Israyɛll sẽn yaa yãmb nebã sã n tees zĩ-kãngã n kos yãmba, bɩ y kelg-ba. Bɩ y zĩnd yĩngr yãmb sẽn beẽ wã n kelg tõnd zĩ-kãngã, la y kõ-d sugri.

³¹B sã n dõd ned n yeel t'a beega a to, tɩ b kɩt t'a wẽen ro-kãngã pʋg yãmb tẽn-kugrã taoore,

³²bɩ y zĩnd y zĩigẽ wã yĩngr n kelge. La y kao y tʋmtʋmdbã bʋʋd n kɩt tɩ sẽn ka tar-a bʋʋmã paam sɩbgr wa sẽn zems a sẽn tʋmã, la y bas sẽn tar-a bʋʋmã t'a loog ne laafɩ.

³³Israyɛll sẽn yaa yãmb nebã bɛɛb sã n tõog bãmb b sẽn beeg yãmb yĩnga, b sã n lebg n wa yãmb nengẽ, n wa waoog yãmb yʋʋrã, la b pʋʋs yãmb ro-kãngã pʋg n kose,

³⁴bɩ y zĩnd y zĩigẽ yĩngr n kelg-ba. Bɩ y kõ Israyɛll sẽn yaa yãmb nebã sugr b beegrã yĩnga, la y kɩt tɩ b lebg n wa tẽng ning yãmb sẽn kõ b yaab-rãmbã pʋgẽ.

³⁵Bãmb sã n beeg yãmba, tɩ yãmb sɩbg-b n kɩt tɩ saagã ka niida, b sã n pʋʋs yãmb zĩ-kãngã, la b waoog yãmb yʋʋrã, la b bas b yel-wẽnã,

³⁶bɩ y zĩnd y zĩigẽ wã yĩngr n kelg-ba, la y kõ y tʋmtʋmdbã ne Israyɛll sẽn yaa yãmb nebã sugr b beegrã yĩnga. Woto, yãmb zãmsda bãmb tɩ b rɩk so-sõng ning b sẽn tog n tũ wã, la y kɩtdame tɩ saagã ni tẽng ning yãmb sẽn dag n kõ y nebã tɩ yaa b pʋɩɩrã pʋgẽ.

³⁷Kom wall bã-loangdg sã n kẽ tẽngã, ka rẽ bɩ wãoong ne gãnem, wall sʋy bɩ zũnzũy sã n kẽ tẽngã, la baa bɛɛbã sã n zab ne yãmb nebã n tõog n deeg tẽngã, la baa bãas buud toor-toor sã n kẽ tẽngã,

³⁸tɩ toodã kɩt tɩ Israyɛll sẽn yaa yãmb nebã sũyã sãame, tɩ b tẽeg b nus n tees ro-kãngã n pʋʋs yãmb n kose,

³⁹bɩ y zĩnd y zĩigẽ yĩngr n kelg-ba, la y kõ-b b yel-wẽnã sugri, la y keo ned kam fãa wa sẽn zems a tʋʋmã. Bala, yaa yãmb y yembr bal n mi ninsaalbã fãa sũyã tagsgo.

⁴⁰Rẽ na n kɩtame tɩ Israyɛll nebã sẽn be tẽng ning yãmb sẽn kõ tõnd yaab-rãmbã zoe yãmb wakat fãa.

⁴¹Woto me, sãamb nins sẽn ka Israyɛll buudã sã n yi zĩ-zãrsẽ n wa yãmb yʋʋrã yĩnga,

⁴²b sẽn wʋm tɩ yãmb yʋʋrã yaa kãseng n tar pãngã, la y maanda tʋʋm-kãsemsã yĩnga, b sã n kẽ ro-kãngã pʋg n pʋʋs yãmba,

⁴³bɩ y zĩnd y zĩigẽ yĩngr n kelg-ba, la y leok-ba, tɩ buudã fãa sẽn be dũniyã zugã tõe n bãng yãmb yʋʋrã la b zoe yãmb wa Israyɛll nebã sẽn zoet yãmbã. La b tõe n bãng tɩ yãmb yʋʋrã bee ro-kãngã me sẽn me wã pʋga.

⁴⁴Yãmb nebã sã n yi n na n tɩ zab ne b bɛɛbã n sak n tũ sor ning yãmb sẽn wilg-bã, la b sã n tees tẽng ning yãmb sẽn yãkã, ne roog ning mam sẽn me yãmb yʋʋrã yĩngã n pʋʋs yãmba,

⁴⁵bɩ y zĩnd y zĩigẽ n kelg b pʋʋsgã ne b kosgã, la y sõng-ba.

⁴⁶Sẽn-Ka-Saabo, ned ka be n ka beegdẽ ye. La yãmb nebã sã n beeg yãmba, tɩ yãmb sũurã yik ne-ba, tɩ yãmb bas tɩ bɛɛbã tõog-ba, n yõg-b n kẽes yembd tẽn-zãrgẽ wall tẽng sẽn pẽ pʋga,

⁴⁷bãmb sã n zĩnd b yembdã tẽng pʋgẽ, n tek yam n wẽnemd n bao yãmba, n yõk yãmb sɛɛg n yeele: ‹Tõnd beegame, tõnd maana sẽn ka zemse, tõnd maana sẽn yaa wẽnga!›

⁴⁸Bãmb sã n zĩnd b yembdã tẽng pʋg n wẽnemd n bao yãmb ne b sũyã fãa, ne b yamã fãa, la b sã n tees Zeruzalɛm tẽngã, tẽng ning yãmb sẽn yãk Israyɛll tẽmsã sʋk n kõ b yaab-rãmbã, la b tees roog ning mam sẽn me yãmb yʋʋrã yĩngã n pʋʋse,

⁴⁹bɩ y zĩnd y zĩigẽ yĩngr n kelg b pʋʋsgã ne b kosgã, la y leok-ba.

⁵⁰Sẽn-Ka-Saabo, bɩ y kõ y nebã sugri, b sẽn beeg yãmbã yĩnga, la y kõ-b sugr wẽng ning fãa b sẽn maanã yĩnga. Bɩ y kɩt tɩ neb nins sẽn kẽes bãmb yembdã zoe bãmb nimbãanega.

⁵¹Bala, Israyɛll nebã yaa yãmb nebã, n yaa yãmb pʋɩɩre. Bãmb dag n bee kut wʋng pʋg Ezɩpt tẽnga, tɩ yãmb fãag-ba.

⁵²Sẽn-Ka-Saabo, bɩ y ges y tʋmtʋmdã se-yõkrã, la y kelg Israyɛll sẽn yaa yãmb nebã kosgo, wakat ning fãa b sẽn na n bool yãmba.

⁵³Wẽnnaam Sẽn-Ka-Saabo, yãmb welga Israyɛll nebã toor ne dũniyã neb a taabã, n kɩt tɩ b lebg yãmb pʋɩɩre, wa yãmb sẽn dag n yeel y tʋmtʋmd a Moyiis wakat ning yãmb sẽn yiis tõnd yaab-rãmbã Ezɩpt tẽngã.»

⁵⁴Rĩm a Salmo sẽn yĩgimd Sẽn-Ka-Saab tẽn-kugrã taoor n pʋʋs Sẽn-Ka-Saabo, la a maan a kosgã n sɛ, a yikame n yals n zẽk a nus n tees yĩngri,

⁵⁵n zẽk a koɛɛg n ning Israyɛll nebã fãa zut bark n yeele:

⁵⁶«Mam pʋʋsda Sẽn-Ka-Saab barka. Bãmb kõo Israyɛll sẽn yaa bãmb nebã vɩ-bãane, wa bãmb sẽn dag n yeelã! Kãab-nood nins bãmb sẽn dag n tũnug b tʋmtʋmd a Moyiis n kãabã fãa paama pidsgu.

⁵⁷Bɩ Sẽn-Ka-Saab sẽn yaa tõnd Wẽnnaamã zĩnd ne tõndo, wa bãmb sẽn dag n be ne tõnd yaab-rãmbã. Bɩ b ra bas-do, la bɩ b ra zãag ne-d ye.

⁵⁸Bɩ Sẽn-Ka-Saab wẽnemd tõnd sũyã n tees bãmba, n kɩt tɩ tõnd sak bãmb tʋlsmã fãa, ne b tõodã la b noyã ne b minind nins fãa bãmb sẽn dag n kõ tõnd yaab-rãmbã.

⁵⁹Bɩ Sẽn-Ka-Saab tẽeg kosg nins fãa mam sẽn kot bãmb rũndã wã wĩndg ne yʋngo, n sõng bãmb tʋmtʋmdã ne Israyɛll sẽn yaa bãmb nebã daar fãa.

⁶⁰Woto, dũniyã nebã fãa na n bãngame tɩ Sẽn-Ka-Saab bal n yaa Wẽnnaam, la Wẽnnaam a to ka be ye.

⁶¹Yãmb sẽn nong Sẽn-Ka-Saab ne y sũyã fãa to-to rũndã wã, bɩ y kell n nong bãmb woto wakat fãa, la y sak bãmb noyã, n kẽn wa sẽn zems bãmb tõodã.»

⁶²La rĩm a Salmo ne Israyɛll nebã naaga taab n maan maand n kõ Sẽn-Ka-Saabo.

⁶³Rĩm a Salmo maana zems-n-taar maando. Yẽnda rɩka rũm-bɛd tus pisi la a yiibu, ne rũm-bãooneg tus koabg la pisi n maan maoong Sẽn-Ka-Saab yĩnga. La rĩmã ne Israyɛll nebã fãa ninga Sẽn-Ka-Saab roogã barka.

⁶⁴Badaare, rĩmã welga Sẽn-Ka-Saab roogã samand toore, n maan maand sẽn yõogd bugum la b kõ bõn-koaadl kũunã, la b yõog zems-n-taar maandã kaam beenẽ, bala, zũud tẽn-kugrã sẽn dag n be Sẽn-Ka-Saab roogã neng taoorã yaa bilf n ka tõe n deeg maan-kãens fãa ye.

⁶⁵Wakat-kãnga, rĩm a Salmo ne Israyɛll neb kʋʋngã maana tigr rasem a yopoe Sẽn-Ka-Saab sẽn yaa tõnd Wẽnnaamã taoore. Yɩɩ neodg meng-menga. Neb kẽer yii hal sẽn sɩng ne Lebo-Hamat tẽn-kɩrengã n tall n tɩ tãag Ezɩpt ko-soogã. La b leb n maana rasem a yopoe n paase, la fãa yaa rasem piig la a naase.

⁶⁶La rasem a nii wã daare, rĩm a Salmo kuilsa nebã. Nebã kãaba rĩmã kãab-noodo, la b kuili. Bãmb dag n kɩdemdame n maand sũ-noog ne bõn-sõama nins fãa Sẽn-Ka-Saab sẽn maan n kõ b tʋmtʋmd a Davɩɩd ne Israyɛll nebã.