Read SEBR SÕNGO, 1998 2 Rĩm-dãmba 10 Bible Online

2 Rĩm-dãmba 10 - SEBR SÕNGO, 1998 bible

2 Rĩm-dãmba 10

¹Rĩm a Akaab kom-dibli pis-yopoe n dag n be Samaari tẽnga. A Zehu gʋlsa sɛb n tʋm neb tɩ b kẽng Samaari tẽngã, n tɩ kɩs Zizreyɛll nanambsã, kãsem-dãmbã, ne neb nins fãa sẽn dag n get a Akaab kom-dibli wã yellã. A sẽn gʋls sɛbã pʋgã la woto:

²«Ade, yãmb soaalã kom-dibli pis-yopoe wã bee ne yãmba, la yãmb tara saar-dãmba, y tara wiidi, y tẽngã me n gũbgame, y leb n tara zab-teedo. Woto, seb-kãngã sã n ta yãmb nengẽ,

³bɩ y ges yãmb soaalã kom-dibli sʋka, n yãk biig ning sẽn yaa-a sõama, n ka tar yelle, n kɩt t'a lebg yãmb dĩm n zaoond a ba wã zaoorẽ n dɩ naamã, tɩ y zab n fãag y soaal a Akaab buudã.»

⁴Woto, rabeem-kãseng yõka bãmb fãa tɩ b yeele: «Sã n yaa tɩ yẽnda tõoga rĩm-dãmb [8] a yiibu, tõnd na n maana a wãn n tõog-a.»

⁵La na-yirã balem-naabã ne tẽngã tãb-biis naabã, la kãsem-dãmbã, ne neb nins sẽn get-b a Akaab kom-dibli wã yellã, tʋma ned t'a kẽng n tɩ yeel a Zehu yaa: «Tõnd yaa yãmb tʋmtʋmdba, dẽ wã, yãmb sẽn yeel tõnd tɩ d maan bũmb ning fãa, tõnd na n maaname. La sã n yaa ne koɛɛg ning yãmb sẽn yeel tõndã, tõnd ka na n yãk ned ba a yembr t'a lebg tõnd dĩm ye. Bɩ y maan bũmb ning yãmb sẽn tagsd tɩ yaa sõama.»

⁶Woto, a Zehu leb n gʋlsa sebr a to n yeele: «Sã n mikame tɩ yãmb bee mam poorẽ, la y sã n sakda maam, bɩ y fiuus y soaalã kamb zut n tall n wa kõ maam Zizreyɛll beoog woto wẽnde.» Rĩmã kamb pis-yopoe wã rag n bee Samaari tẽngã nin-bɛd nins sẽn get bãmb yellã zagsẽ.

⁷Bãmb sẽn deeg sebrã, bãmb tigma rĩmã kom-dibli pis-yopoe wã fãa, n kʋ-b n fiuus b zutã n ning pet pʋse, n tʋm tɩ kẽng a Zehu nengẽ Zizreyɛll tẽnga.

⁸B kẽ n togsa a Zehu tɩ b talla rĩmã kom-dibli zut n wa. Dẽ, a Zehu yeelame: «Rʋʋg-y zutã zĩis a yiib tẽngã rignoorẽ, n bas-b be hal tɩ ta beoog yibeoogo.»

⁹Vẽkembeoog yibeoogo, a Zehu yi n yalsa nebã fãa taoor n yeele: «Ra ning-y y mens taal ye! Mam yẽ n zãmb m soaalã n kʋ-a. La nin-bãmbã fãa, yaa ãnda soab n kʋ-ba?»

¹⁰Dẽ wã, bɩ y bãng tɩ Sẽn-Ka-Saab sẽn dag n gom a Akaab buudã wɛɛngẽ wã, gomd ba a yembr ka na n pa n ka paam pidsg ye. Sẽn-Ka-Saab pidsa bãmb gomd ning b sẽn dag n kɩt tɩ bãmb tʋmtʋmd a Eli togsã.

¹¹Woto, a Zehu kʋʋ a Akaab buudã neb nins fãa sẽn dag n ket n be Zizreyɛllã zãnga. Yẽnda kʋ a nin-kãsemsã, a zo-rãmbã, la a maan-kʋʋdbã n ka bas ba a yembr tɩ põs ye.

¹²Dẽ zugẽ, a Zehu rɩka sor n na n kẽng Samaari. La yẽnda sẽn ta Bɛt-Ekɛɛd sẽn yaa rũm-kɩɩmbã sɛk zĩigã,

¹³yẽnda sega Zʋʋda rĩm a Akaazɩya saam-biisi, n sok-b yaa: «Yãmb yaa ãnda rãmba?» Dẽ, bãmb leokame: «Tõnd yaa a Akaazɩya saam-biisi, la tõnd dabd n na n tɩ pʋʋsa rĩmã kamba, ne rĩmã ma kamba.»

¹⁴A Zehu yeelame tɩ b yõg-b vɩɩse. Dẽ, a Zehu tũud-n-taasã yõga bãmb vɩɩse, n kood-b n dɩk b kũumã n lob bok ning sẽn be Bɛt-Ekɛɛdã. Nin-bãmb sõorã rag n yaa neb pis-naas la a yiibu, la a Zehu ka bas bãmb ned ba a yembr tɩ põs ye.

¹⁵A Zehu sẽn yi beenẽ, a yãnda a Rekaab biig a Yonadaab sẽn kẽnd n segd yẽnda, la a Zehu pʋʋs-a lame n sok-a: «Fo pʋgã peela ne maam wa mam pʋgã sẽn peel ne foomã bɩ?» A Yonadaab leokame tɩ n-yẽe. La a Zehu yeel-a lame yaa: «Sã n yaa tɩ fo pʋgã peela ne maam, bɩ f yõk mam nugã.» La a Yonadaab yõka a Zehu nugu. Dẽ, a Zehu kɩtame t'a Yonadaab kẽ n naag yẽnda a saarã pʋga.

¹⁶A Zehu yeela a Yonadaab yaa: «Wa n tũ maam, la fo na yãnd mam sẽn nong Sẽn-Ka-Saab to-to.» Woto, a Zehu talla a Yonadaab a saarã pʋga, tɩ b looge.

¹⁷A Zehu sẽn ta Samaari, yẽnda kʋ a Akaab buudã neb nins sẽn dag n ket Samaari tẽngã n sãam-b zãnga, tɩ kell n yɩ wa Sẽn-Ka-Saab sẽn dag n kɩt t'a Eli togsã.

¹⁸A Zehu tigma Samaari tẽngã nebã fãa n yeel-b yaa: «A Akaab tũu Baall bilfu, la maam a Zehu na n tũu Baall wʋsgo.

¹⁹Rẽ wã, bool-y Baall no-rɛɛsdbã fãa, neb nins sẽn pʋʋsd-b Baallã zãnga, ne b maan-kʋʋdbã fãa tɩ b wa mam nengẽ, la y ra bas bãmb ned ba a yembr n ka bool ye. Bala, mam dat n maana maoon-kãseng n kõ Baalle. Ned sã n vaal tigin-kãngã, b na n kʋʋ a soaba.» A Zehu sẽn dag n maandã yaa ne sɩlem, sẽn na n yɩlẽ n tõog n sãam neb nins fãa sẽn tũud Baallã.

²⁰La a Zehu yeelame tɩ b moon tigr a Baall yĩnga. La b moona tigrã.

²¹A Zehu tʋma neb tɩ b kẽng Israyɛll tẽngã zĩigã fãa, n kɩt tɩ neb nins fãa sẽn pʋʋsd Baallã wa. La bãmb ned ba a yembr ka pa n ka wa ye. Dẽ, bãmb fãa kẽe Baall pʋʋsg roogẽ wã, la roogã pida zãnga.

²²A Zehu yeela ned ning sẽn get futã bĩngr yellã yaa: «Yiis futã n kõ neb nins fãa sẽn pʋʋsd Baallã.» La yẽnda yiisa futã n kõ-bã.

²³La a Zehu ne a Rekaab biig a Yonadaab tũu taab n wa Baall pʋʋsg roogẽ wã. La a Zehu yeela neb nins fãa sẽn pʋʋsd Baallã yaa: «Gẽes-y n ges-y tɩ Sẽn-Ka-Saab tʋmtʋmd ra wa zĩnd sʋk ye. Mam datame tɩ yɩ Baall pʋʋsdbã bala.»

²⁴Dẽ poore, bãmb kẽeme n na n maan maoongo, ne maoong sẽn yõogd bugum. La mikame t'a Zehu rag n yãka tãb-biis pis-nii tɩ b be yɩnga. Yẽnda yeela neb pis-nii wã yaa: «Ade, mam ningda nin-bãmbã yãmb nugẽ, ned ning sẽn na n bas-a nin-bãmbã ned a ye t'a põse, yaa yẽnda soab la mam na n kʋ n lebse.»

²⁵A Zehu sẽn maan maoong sẽn yõogd bugmã n sɛ, a yeela gũudbã ne b wed-kɩɩm-nanambsã yaa: «Kẽ-y-yã! Kʋ-y-b zãnga, la y ra bas ned ba a yembr tɩ põs ye.» Woto, tãb-biisã ne b nanambsã kʋʋ Baall pʋʋsdbã zãng ne zabr sʋʋga. B kʋ-b lame n lobe, la b sãag n kẽ tẽng ning Baall pʋʋsg roogã sẽn beẽ wã.

²⁶Bãmb yiisa Baall kug-viginds nins sẽn be Baall roogã pʋg n yõog bugum.

²⁷La bãmb pãba Baall kug-vigindgã n wã, la b wã Baall pʋʋsg roogã me, n kɩt t'a zĩigã lebg bĩnd sãab zĩig hal tɩ ta rũndã.

²⁸Woto, a Zehu menesa Baall Israyɛll soolmã pʋga.

²⁹Baoosg zãnga, a Zehu ka bas yel-wẽn nins a Nebat biig a Zeroboaam sẽn dag n maan n kɩt tɩ Israyɛll nebã lʋɩ kongr pʋgã ye. Bala, a Zeroboaam dag n kɩtame tɩ Israyɛll nebã maan sãnem nag-bi n ning Betɛll ne Dan n waoogdẽ.

³⁰Dẽ, Sẽn-Ka-Saab yeela a Zehu yaa: «Beneere, fo maana sẽn yaa tɩrg mam nifẽ. Fo kell n maana a Akaab buudã wa mam sẽn dag n yeelã. Dẽ wã, mam na n kɩtame tɩ fo yagensã soog Israyɛll rĩungã hal tɩ ta zamaan a naase.»

³¹La baa ne rẽ fãa, a Zehu ka sak Sẽn-Ka-Saab sẽn yaa Israyɛll Wẽnnaamã tõodã ne a sũur fãa ye. Yẽnda kell n maana yel-wẽn nins a Zeroboaam sẽn dag n maan n kɩt tɩ Israyɛll nebã lʋɩ kongr pʋgẽ wã.

³²Wakat-kãnga, Sẽn-Ka-Saab sɩngame n na n boogd Israyɛll nebã soolem. La a Azayɛll zaba ne Israyɛll nebã b soolmã fãa pʋga.

³³Bãmb zab n tõoga Israyɛll nebã n deeg b soolmã tẽmse, sẽn sɩng ne Zʋrdẽ kʋɩlgã yaangã. Yaa Galaad ne Gaad nebã tẽmse, la Rubɛn nebã ne Manaase nebã tẽmse. Leb n yaa sẽn sɩng ne Arowɛɛr sẽn be Arno ko-soogã noorã hal tɩ ta Galaad ne Basan.

³⁴A Zehu tʋʋm a taabã fãa, ne a gãndaalmã tʋʋmã fãa, la a sẽn maan bũmb ninsã gʋlsa Israyɛll dĩm-dãmbã kibay sebr pʋga.

³⁵A Zehu saka a saam-dãmba, la b mum-a-la Samaari tẽngã pʋga. La yẽnda biig a Zoakaaz n led yẽnda zĩigẽ n dɩ naam.

³⁶A Zehu zĩnda Samaari n dɩ Israyɛll naamã yʋʋm pisi la a nii.