Read SEBR SÕNGO, 1998 2 Rĩm-dãmba 11 Bible Online

2 Rĩm-dãmba 11 - SEBR SÕNGO, 1998 bible

2 Rĩm-dãmba 11

¹A Akaazɩya ma a Atali sẽn mik tɩ yẽnda biigã kiime, a yikame n kɩt tɩ b kʋ na-biisã zãnga.

²Wakat ning b sẽn wa n kʋʋd rĩmã kom-dibli wã, rĩm a Zoram bi-pugl a Zoseba sẽn yaa a Akaazɩya tão wã soosame, n dɩk rĩm a Akaazɩya bi-ribl a Zoaas n yiis rĩmã kamb sʋka, n loog ne-a tɩ ned ka bãng ye. La a talla a Zoaas ne a ma-wubdgã n tɩ solg gãasã roog pʋga. B solga a Zoaas tɩ rĩmã ma a Atali ka yãnd-a ye. Dẽ, b ka paam bi-kãng n kʋ ye.

³Woto, biigã kell n paa ne a ma-wubdgã n soond Sẽn-Ka-Saab roogã pʋg yʋʋm a yoobe. Wakat-kãng tɩ yaa a Atali n so tẽngã n dɩt naam.

⁴Yʋʋm a yopoe soabã pʋga, maan-kʋʋd kãsem a Zehozada tʋmame tɩ b tɩ bool sãambã sẽn yaa tãb-biis koabg-koabg nanambsã ne gũudbã tɩ b wa. Yẽnda kɩtame tɩ b wa yẽnda nengẽ Sẽn-Ka-Saab roogã pʋga. Yẽnda maana kaool ne-ba, n kɩt tɩ b wẽen Sẽn-Ka-Saab roogẽ wã, n yaool n wilg-b rĩmã biiga.

⁵Dẽ poore, a kõo bãmb noor n yeele: «Ad yãmb sẽn na n maan bũmb ninga: Yãmb neb nins sẽn dɩkd b tʋʋmd vʋʋsg daarã, na n pʋɩɩ nebã sul a tãabo, tɩ sull a yembr gũud na-yirã,

⁶tɩ sull a yembr gũud Wẽnnaam doogã zak noor ning b sẽn boond tɩ Suurã, t'a yembr gũud Sẽn-Ka-Saab roogã zak noor ning sẽn be gũudbã roog poorẽ wã. Yãmb na n gũuda roogã a woto n deesd taaba.

⁷La yãmb sul a yiib nins sẽn ka tʋmd vʋʋsg daarã na n wa gũu Sẽn-Ka-Saab roogã, zĩig ning rĩmã sẽn beẽ wã.

⁸Yãmb ned kam fãa na n zãada a zab-teed a nugẽ n gũbg rĩmã. La ned sã n wa rat n kolg yãmb sullã, bɩ y kʋ-a. Yãmb na n bee rĩmã sɛɛgẽ wakat fãa, n yãagd-a t'a kẽnd a sẽn datẽ la a watẽ.»

⁹Dẽ, tãb-biis koabg-koabg nanambsã kell n maana wa maan-kʋʋd a Zehozada sẽn yeel-b tɩ b maanã. Bãmb ned kam fãa peega a neb nins sẽn tʋmd vʋʋsg daarã, ne neb nins sẽn sigd-b tʋʋm vʋʋsg daarã n kẽng maan-kʋʋd a Zehozada nengẽ.

¹⁰Maan-kʋʋd a Zehozada rɩka rĩm a Davɩɩd kãnã ne a gãn[9] nins sẽn dag n be Sẽn-Ka-Saab roogẽ wã, n kɩs tãb-biis koabg-koabg nanambsã.

¹¹Gũudbã ned kam fãa rag n zãada a zab-teed a nugẽ, n yas Wẽnnaam doogã rɩtg kɩrengã, n tɩ tãag a goabgã, n pẽneg tẽn-kugrã ne na-yirã, n gũbg rĩmã sẽn beẽ wã.

¹²La maan-kʋʋd kãsem a Zehozada kɩtame tɩ b wa ne rĩmã biigã, t'a rɩk rĩungã kaset teedã n ning-a, la a rɩk naam maanfã n fõgn-a. La b ning a zug naam kaam n kõ-a rĩungã. La bãmb wẽe nug-pogs n yeele: «Wẽnd na kaoos rĩmã.»

¹³A Atali sẽn wʋm gũudbã ne nin-buiidã sẽn kilsdã, yẽnda me yiime n bʋʋg-b Sẽn-Ka-Saab roogẽ wã.

¹⁴La yẽnda sẽn ta, a yãnda rĩmã sẽn yas ra-lugdgã sɛɛg wa sẽn zems b rog-n-mikã, tɩ tãb-biisã nanambsã ne bar-pɛɛbdbã be rĩmã sɛɛgẽ, tɩ tẽngã nebã fãa maand sũ-noogo, la b peebd bardo. A Atali sẽn yã rẽ, a pãrsa a fut n kelem n yeele: «Yaa zãmbo! Yaa zãmbo!»

¹⁵Dẽ, maan-kʋʋd a Zehozada yeela tãb-biis koabg-koabg nanambsã yaa: «Tall-y-yã a Atali n yi nebã sʋka, la ned sã n yeel t'a be a poorẽ, bɩ y kʋ a soab ne zabr sʋʋga.» Bala, maan-kʋʋd a Zehozada rag n yeelame tɩ b ra kʋ-a Sẽn-Ka-Saab roogã pʋg ye.

¹⁶Woto, b yõka a Atali, n tall-a n tũ sor ning wiidã sẽn tũud n kẽed na-yirã, n ta na-yirã zak noore, la b kʋ-a-la beenẽ.

¹⁷Dẽ, maan-kʋʋd a Zehozada kɩtame tɩ rĩmã ne nebã maan kaool n yeel tɩ b na n saka Sẽn-Ka-Saabo. La a leb n kɩt tɩ nebã wẽen n yeel tɩ b na n saka rĩmã.

¹⁸Rẽ poore, tẽngã nebã fãa kẽnga Baall pʋʋsg roogẽ wã, n tɩ pãb-a n wã, la b pãb a tẽn-kugã ne a bõn-naandsã fãa n wã, la b kʋ wẽn-naandg a Baall maan-kʋʋd a Matã tẽn-kugã sɛɛgẽ. La Wẽnnaam maan-kʋʋd a Zehozada yãka gũudb n kɩt tɩ b gũ Sẽn-Ka-Saab roogã.

¹⁹La yẽnda peega tãb-biis koabg-koabg nanambsã ne sãamb nins sẽn yaa tãb-biis koabg-koabg nanambsã ne gũudbã, la tẽngã nebã fãa. La b talla rĩmã n yi Sẽn-Ka-Saab roogẽ wã n tũ gũudbã sẽn be noor ningã n kẽ na-yirã. Bãmb sẽn ta beenẽ, a Zoaas zaoonda a naamã geer zugu.

²⁰Tẽngã nebã fãa rag n maanda sũ-noogo, la tẽngã rag n gãee bãane. Yɩɩ woto la b kʋ a Atali ne zabr sʋʋg na-yirã pʋga.