Read SEBR SÕNGO, 1998 2 Rĩm-dãmba 13 Bible Online

2 Rĩm-dãmba 13 - SEBR SÕNGO, 1998 bible

2 Rĩm-dãmba 13

¹Zʋʋda rĩm a Akaazɩya biig a Zoaas sẽn deeg naam tɩ yʋʋm pisi la a tãablẽ, la a Zehu biig a Zoakaaz me lebg Israyɛll dĩm Samaari tẽnga. La yẽnda rɩɩ naamã yʋʋm piig la a yopoe.

²Rĩm a Zoakaaz maana sẽn yaa wẽng Sẽn-Ka-Saab nifẽ. Yẽnda maana yel-wẽns nins a Nebat biig a Zeroboaam sẽn maan n kɩt tɩ Israyɛll nebã lʋɩ kongr pʋgã, la yẽnda kell n ka bas yel-wẽn-kãens maaneg ye.

³Woto, Sẽn-Ka-Saab sũur yika ne Israyɛll nebã. Dẽ, bãmb basame tɩ Siiri rĩm a Azayɛll ne a biig a Bɛn-Hadaad tõog Israyɛll nebã wakat fãa.

⁴La a Zoakaaz yõka Sẽn-Ka-Saab sɛɛga, n kos-b tɩ b maan sugri, la Sẽn-Ka-Saab leoka a pʋʋsgã, bala, bãmb yãnda namsg ning Siiri rĩmã sẽn dag n namsd Israyɛll nebã.

⁵Dẽ, Sẽn-Ka-Saab yãka fãagd n kõ Israyɛll nebã, la sẽn sɩng ne wakat-kãnga, b paama b meng ne Siiri nebã sẽn dag n namsd-bã. Woto, Israyɛll nebã leb n tõog n vɩɩmda b fu-rotã pʋs wa pĩndã.

⁶La baoosg zãnga, bãmb ka bas yel-wẽn nins a Zeroboaam doogã neb sẽn dag n maan n kɩt tɩ Israyɛll nebã lʋɩ kongr pʋgẽ wã ye. Bãmb maana yel-wẽn-kãense, n kell n bas wẽn-naandg a Aseera ra-lugdgã t'a ket n be Samaari tẽnga.

⁷Bũmb nins Sẽn-Ka-Saab sẽn bas ne a Zoakaaz yaa wed-rʋʋdb pis-nu, ne saar-dãmb piiga, n paas tãb-biis tus-piig sẽn kẽnd ne nao. Bala, Siiri rĩmã sãama bãmb n kɩt tɩ b lebg zaalem wa tẽng tom tɩ b tabd ne nao.

⁸A Zoakaaz tʋʋm a taabã ne a sẽn maan bũmb ninsã, ne a gãndaalmã gʋlsa Israyɛll dĩm-dãmbã kibay sebr pʋga.

⁹A Zoakaaz saka a saam-dãmba, la b mum-a-la Samaari tẽnga, la a biig a Zoaas n led yẽnda zĩigẽ n dɩ naamã.

¹⁰Zʋʋda rĩm a Zoaas sẽn deeg naam tɩ yʋʋm pis-tã la a yopoɛɛlẽ, la a Zoakaaz biig a Zoaas lebg Israyɛll dĩm Samaari tẽnga. Yẽnda rɩɩ naam yʋʋm piig la a yoobe.

¹¹Yẽnda maana sẽn yaa wẽng Sẽn-Ka-Saab nifẽ. Yẽnda ka tol n bas yel-wẽn nins a Nebat biig a Zeroboaam sẽn dag n maan n kɩt tɩ Israyɛll nebã lʋɩ kongr pʋgã ye. Yẽnda me kell n maana yel-wẽn-bãmba.

¹²A Zoaas tʋʋm a taabã, ne a yɛl a taabã n paas a gãndaalmã, ne yẽnda sẽn zab ne Zʋʋda rĩm a Amatsɩya wã kibar gʋlsa Israyɛll dĩm-dãmbã kibay sebr pʋga.

¹³A Zoaas saka a saam-dãmba, la a Zeroboaam n led yẽnda zĩigẽ. B muma a Zoaas Samaari tẽng n naag Israyɛll dĩm-dãmbã.

¹⁴A Eliize lʋɩɩ bãaga, la rag n yaa a yõor bãaga. Israyɛll dĩm a Zoaas kẽnga a Eliize nengẽ n tɩ yãb a zug n yeele: «M ba! M ba! Israyɛll saar-dãmb ne a wed-rʋʋdba!»

¹⁵La a Eliize yeel-a lame yaa: «Kẽng n tɩ bao tãp ne pɛɛm n wa.» Yẽnda tɩ baoo tãpã ne pɛɛmã n wa.

¹⁶La a Eliize yeela Israyɛll dĩmã yaa: «Rɩk f tãpã n dʋʋse.» La rĩmã sẽn dʋʋs tãpã, a Eliize rɩka a nus n tik rĩmã nus n yeele:

¹⁷«Lak võorã sẽn teesd yaangã!» La rĩmã laka võorã. A Eliize yeelame t'a tão tãpã. La rĩmã tãoome. La a Eliize yeelame: «Yõwã yaa tõogr peemd sẽn yit Sẽn-Ka-Saab nengẽ. Yaa peemd sẽn na n kɩt tɩ yãmb tõog Siiri nebã. Fo na n tõoga Siiri nebã n dig-b n ta Afɛk n menes-b zãnga.»

¹⁸A Eliize leb n yeela rĩmã t'a rɩk a pɛɛmã. La a rɩk-b lame. Dẽ, a Eliize yeela Israyɛll dĩmã yaa: «Rɩk-y pɛɛmã n wẽ tẽngã!» Dẽ, rĩmã rɩka pɛɛmã n wẽ tẽng naoor a tãab n bas n yalse.

¹⁹Wẽnnaam dao a Eliize sũurã yika ne rĩmã t'a yeele: «Yãmb dag n kõn wẽe naoor a nu bɩ a yoobe. Woto, yãmb dag n na n tõog n menesa Siiri nebã zãnga. La moasã wã, yãmb na n tõog-b-la naoor tãab bala.»[10]

²⁰A Eliize kiime tɩ b mum-a. La yʋʋmdã sẽn vẽke, Moaab tãb-biisã kẽe Israyɛll tẽngã.

²¹La daar a yembre, neb n dag n dabd kũum mumbu, la b yãnda Moaab tãb-bi-sull a ye sẽn wate. Dẽ, b rɩka kũumã n lob a Eliize yaoogẽ wã. La raoã kũum sẽn sɩɩs a Eliize kõabã, raoã vʋʋgame n yik n yalse.

²²A Zoakaaz vɩɩmã tɛka, Siiri rĩm a Azayɛll namsa Israyɛll nebã.

²³La Sẽn-Ka-Saab zoee Israyɛll nebã nimbãanega, n maan-b neere. Kaool ning Sẽn-Ka-Saab sẽn dag n maan ne a Abrahaam la Izak ne a Zakoobã yĩnga, b ka tʋlg n na n sãam Israyɛll nebã ye. La hal tɩ ta rũndã, Sẽn-Ka-Saab ka rig-b tɩ b zãag ne bãmb me ye.

²⁴Siiri rĩm a Azayɛll kiime, la a biig a Bɛn-Hadaad n led yẽnda zĩigẽ n lebg rĩmã.

²⁵A Zoaas zaba ne a Bɛn-Hadaad n tõog-a, n deeg tẽms nins a Bɛn-Hadaad ba a Azayɛll sẽn dag n zab n deeg yẽnda ba a Zoakaaz nengẽ wã. A Zoaas zaba ne a Bɛn-Hadaad naoor a tãabo, n tõog n leb n deeg Israyɛll tẽmsã n lebse.