Read SEBR SÕNGO, 1998 2 Rĩm-dãmba 15 Bible Online

2 Rĩm-dãmba 15 - SEBR SÕNGO, 1998 bible

2 Rĩm-dãmba 15

¹Israyɛll dĩm a Zeroboaam sẽn wa n deeg a naamã tɩ yʋʋm pisi la a yopoɛɛlẽ, la a Amatsɩya biig a Azariya [13] lebg Zʋʋda rĩmã.

²A Azariya sẽn wa n na n deeg naamã t'a rag n tara yʋʋm piig la a yoobe, la yẽnda rɩɩ naamã yʋʋm pis-nu la a yiib Zeruzalɛm. Yẽnda ma wã yʋʋr la Yekoliya n yaa Zeruzalɛm bi-pugla.

³A Azariya maana sẽn yaa tɩrg Sẽn-Ka-Saab nifẽ. Yẽnda kell n maana wa a ba a Amatsɩya sẽn dag n maanã.

⁴La baoosg zãnga, b ka menes maoong kʋʋb zĩisã ye. Nebã rag n ket n kẽnd n maanda maand la b yõogd wisd maoong kʋʋb zĩisẽ wã.

⁵Woto, Sẽn-Ka-Saab kɩtame tɩ wãood yõk rĩmã hal n tãag a kũum. Rẽ rag n kɩtame tɩ rĩmã welg n tɩ vɩ kɛɛng n ka naag nebã ye. Dẽ, yẽnda biig a Zotam lebga na-yirã zak naaba, n soog tẽngã neb fãa.

⁶A Azariya tʋʋmã fãa ne a sẽn maan bũmb ninsã fãa gʋlsa Zʋʋda rĩm-dãmbã kibay sebr pʋga.

⁷A Azariya saka a saam-dãmba, la b mum-a lame n naag a ba-rãmbã a Davɩɩd tẽngã pʋga. La yẽnda biig a Zotam n led yẽnda zĩig n dɩ naamã.

⁸Zʋʋda rĩm a Azariya sẽn deeg naam tɩ yʋʋm pis-tã la a niinẽ, la a Zeroboaam biig a Zakari me lebg Israyɛll dĩm Samaari tẽnga, la yẽnda rɩ a naamã kiis a yoobe.

⁹A Zakari maana sẽn yaa wẽng Sẽn-Ka-Saab nifẽ, wa yẽnda ba-rãmbã sẽn dag n maanã. Yẽnda ka bas yel-wẽn nins a Nebat biig a Zeroboaam sẽn dag n kɩt tɩ Israyɛll nebã lʋɩ kongr pʋgã ye.

¹⁰Ned a yembr yʋʋr sẽn boond t'a Salum n yaa a Yabɛɛs biig zãmba a Zakari, n kʋ-a nebã fãa nifẽ, n deeg yẽnda zĩig n dɩ naamã.

¹¹A Zakari tʋʋm a taabã gʋlsa Israyɛll dĩm-dãmbã kibay sebr pʋga.

¹²Bõn-kãens paama pidsg wa Sẽn-Ka-Saab sẽn dag n gom ne a Zehu wã. Bãmb dag n yeelame: «Fo yagensã na n dɩɩ Israyɛll naamã hal n tɩ tãag zamaan a naasẽ soabã.» La a yɩɩ woto.

¹³Zʋʋda rĩm a Azariya sẽn deeg naam tɩ yʋʋm pis-tã la a wɛɛlẽ, la a Yabɛɛs biig a Salum lebg rĩmã. A Yabɛɛs rɩɩ naamã kiuug a yembr bal Samaari tẽngã pʋga.

¹⁴A Gadi biig a Menahɛm yii Tirsa n kẽng Samaari n tɩ kʋ a Yabɛɛs biig a Salum n deeg naamã.

¹⁵A Salum tʋʋm a taabã ne a sẽn zãmb a Zakari wã gʋlsa Israyɛll dĩm-dãmbã kibay sebr pʋga.

¹⁶Wakat-kãnga, a Menahɛm kẽnga Tifsa n tɩ kʋ neb nins fãa sẽn dag n be beenẽ wã, la a kʋ neb nins sẽn dag n be toadgẽ wã, sẽn sɩng ne Tirsa tẽngã n tɩ tãag Tifsa. Yẽnda sãama tẽn-bãmb b sẽn ka sak n deeg yẽnda wã yĩnga. La yẽnda weeda pagb nins sẽn tʋtã fãa pʋse.

¹⁷Zʋʋda rĩm a Azariya sẽn deeg naam tɩ yʋʋm pis-tã la a wɛɛlẽ, la a Gadi biig a Menahɛm lebg Israyɛll dĩmã. A Menahɛm rɩ a naamã Samaari tẽng yʋʋm piiga.

¹⁸A Menahɛm vɩɩmã tɛka, a maana sẽn yaa wẽng Sẽn-Ka-Saab nifẽ. Yẽnda ka bas yel-wẽn nins a Nebat biig a Zeroboaam sẽn dag n maan n kɩt tɩ Israyɛll nebã lʋɩ kongr pʋgã ye.

¹⁹Asiiri rĩm a Pull wa n kẽe tẽngã pʋga. La a Menahɛm kõo yẽnda wanzuri toan pis-tã, n na n kos-a t'a sõng-a t'a rĩungã paam pãnga.

²⁰Yaa Israyɛll tẽngã arzegs rãmb nengẽ la a Menahɛm reeg ligd-kãng n kõ Asiiri rĩm a Pulli. Bãmb ned kam fãa yaoo wanzuri wakɩ-koeems pis-nu. Woto, Asiiri rĩm a Pull lebg n loogame n ka kaoos tẽngã pʋg ye.

²¹A Menahɛm tʋʋm a taabã ne a sẽn maan bũmb ninsã fãa gʋlsa Israyɛll dĩm-dãmbã kibay sebr pʋga.

²²A Menahɛm saka a saam-dãmba, t'a biig a Pekaya n led yẽnda zĩigẽ n dɩ naamã.

²³Zʋʋda rĩm a Azariya sẽn deeg a naamã tɩ yʋʋm pis-nuunẽ, la a Menahɛm biig a Pekaya lebg Israyɛll dĩm Samaari. A Pekaya rɩ a naamã yʋʋm a yiibu.

²⁴A Pekaya maana sẽn yaa wẽng Sẽn-Ka-Saab nifẽ, bala, yẽnda ka bas yel-wẽn nins a Nebat biig a Zeroboaam sẽn dag n maan n kɩt tɩ Israyɛll nebã lʋɩ kongr pʋgã ye.

²⁵La a Remaliya biig a Peka sẽn yaa yẽnda wed-kɩɩm-naabã zãmb-a lame. A Peka peega Galaad neb pis-nu n kẽng na-yirã sẽn be Samaari wã, n tɩ kẽ n kʋ rĩm a Pekaya, la a kʋ a Argoob ne a Ariye. A Peka kʋʋ a Pekaya n deeg a zĩig n dɩ naamã.

²⁶A Pekaya tʋʋmã ne a sẽn maan bũmb ninsã fãa gʋlsa Israyɛll dĩm-dãmbã kibay sebr pʋga.

²⁷Zʋʋda rĩm a Azariya sẽn deeg a naamã tɩ yʋʋm pis-nu la a yiiblẽ, la a Remaliya biig a Peka lebg Israyɛll dĩm Samaari tẽnga. Yẽnda rɩɩ naamã yʋʋm pisi.

²⁸A Peka maana sẽn yaa wẽng Sẽn-Ka-Saab nifẽ. Yẽnda ka bas yel-wẽn nins a Nebat biig a Zeroboaam sẽn maan n kɩt tɩ Israyɛll nebã lʋɩ kongr pʋgã ye.

²⁹A Peka sẽn wa n yaa Israyɛll dĩmã wakate, Asiiri rĩm a Tɩlgat-Pilezɛɛr wa n zab n deega Iyon, Abɛll-Bɛt-Maaka, ne Yanoak la Kedɛɛse, la a reeg Hatsoor ne Galaad la Galɩle, n paas Neftali tẽngã zãnga, la a yõg tẽn-kãens nebã n tall n kẽng Asiiri.

³⁰A Ela biig a Ooze zãmba a Remaliya biig a Peka n kʋ-a, n deeg a zĩig n dɩ naam. La rẽ tɩ yaa a Azariya biig a Zotam sẽn deeg naam tɩ yʋʋm pissiiblẽ.

³¹A Peka tʋʋm a taabã ne a sẽn maan bũmb ninsã fãa gʋlsa Israyɛll dĩm-dãmbã kibay sebr pʋga.

³²A Remaliya biig a Peka sẽn deeg Israyɛll naam tɩ yʋʋm yiiblẽ, la a Azariya biig a Zotam lebg Zʋʋda rĩmã.

³³Yẽnda sẽn wa n na n lebg rĩmã, t'a tara yʋʋm pisi la a nu, la yẽnda rɩɩ naamã yʋʋm piig la a yoob Zeruzalɛm. A Zotam ma wã yʋʋr la a Yeruusa, n yaa a Sadok bi-pugla.

³⁴Zʋʋda rĩm a Zotam maana sẽn yaa tɩrg Sẽn-Ka-Saab nifẽ. Yẽnda kell n maana wa yẽnda ba a Azariya sẽn dag n maanã.

³⁵La baoosg zãnga, bãmb ka menes maoong kʋʋb zĩisã ye. Nebã rag n ket n kẽnd n maanda maand la b yõogd wisd maoong kʋʋb zĩisẽ wã. A Zotam mee Sẽn-Ka-Saab roogã yĩngr doogã dignoore.

³⁶A Zotam tʋʋm a taabã ne a sẽn maan bũmb ninsã fãa gʋlsa Zʋʋda rĩm-dãmbã kibay sebr pʋga.

³⁷Yaa Wakat-kãng la Sẽn-Ka-Saab sɩng n na n tʋm Siiri rĩm a Retsĩn ne Israyɛll dĩm a Peka sẽn yaa a Remaliya biigã tɩ b na n tɩ zab ne Zʋʋda tẽngã.

³⁸Rĩm a Zotam saka a saam-dãmba, tɩ b mum-a n naag a ba-rãmbã, a yaab a Davɩɩd tẽngã pʋga. La yẽnda biig a Akaaz leda yẽnda zĩigẽ n dɩ naamã.