Read SEBR SÕNGO, 1998 2 Rĩm-dãmba 17 Bible Online

2 Rĩm-dãmba 17 - SEBR SÕNGO, 1998 bible

2 Rĩm-dãmba 17

¹Zʋʋda rĩm a Akaaz sẽn deeg naam tɩ yʋʋm piig la a yiiblẽ, la a Ela biig a Ooze lebg Israyɛll dĩm Samaari. Yẽnda rɩɩ naam yʋʋm a wɛ.

²A Ooze maana sẽn yaa wẽng Sẽn-Ka-Saab nifẽ, la baoosg zãnga, yẽnda wẽngã maaneg ka ta Israyɛll dĩm-dãmb a taabã sẽn deng yẽnda wã ye.

³Asiiri rĩm a Salmanasaar waame n na n zab ne rĩm a Ooze. La yẽnda tõoga a Ooze n kɩt t'a yaood yaood yʋʋmd fãa.

⁴La Asiiri rĩmã wa n bãngame t'a Ooze zãmbda yẽnda. Sɩd me, a Ooze dag n soos n tʋma neb Ezɩpt rĩm a So [14] nengẽ, n ka yao Asiiri rĩmã yaood ning a sẽn dag n yaood yʋʋmd fãa wã ye. Asiiri rĩmã kɩtame tɩ b yõk a Ooze n kẽes bi-bees roog n balg-a ne bãense.

⁵Dẽ zugẽ, Asiiri rĩmã zaba ne Israyɛll soolmã tẽms fãa, la yẽnda wa n gũbga Samaari [15] tẽngã yʋʋm a tãabo.

⁶La yaa a Ooze sẽn deeg naam tɩ yʋʋm wɛɛlẽ, la Asiiri rĩmã tõog n deeg Samaari tẽngã. Asiiri rĩmã yõga Israyɛll nebã n tall n kẽng a tẽngẽ wã. Yẽnda kɩtame tɩ Israyɛll nebã tɩ zĩnd Hala, ne Goozã kʋɩlg ning b sẽn boond tɩ Haboorã noore, la Meed rãmbã tẽmsẽ.

⁷Bõn-kãens sẽn yɩ woto wã, yaa tɩ Israyɛll nebã maana yel-wẽn n beeg Sẽn-Ka-Saab sẽn yaa bãmb Wẽnnaamã. Bãmb basa Wẽnnaam ning sẽn fãag-a bãmb Ezɩpt rĩm a Faarõ yembdã pʋgẽ, n yiis bãmb Ezɩpt tẽngã, n waoog wẽnnaam-dãmb a taaba.

⁸Israyɛll nebã maana wa buud nins Sẽn-Ka-Saab sẽn dag n kɩt tɩ bãmb digã sẽn dag n maandã. Yaa woto la Israyɛll dĩm-dãmbã rag n maanda.

⁹Israyɛll nebã soos n maana sẽn kisi, n beeg Sẽn-Ka-Saab sẽn yaa bãmb Wẽnnaamã. Bãmb mee maoong kʋʋb zĩis b tẽmsã fãa pʋse, sẽn sɩng ne gũudbã gãsdã hal n tɩ tãag tẽms nins sẽn me n gũbg ne lalsã.

¹⁰Israyɛll nebã baoo kug-viginds ne Aseera ra-lugdsi, n lugl maoong kʋʋb zĩisẽ wã, ne tɩɩs nins fãa sẽn tar maasmã tẽngre.

¹¹Woto, Israyɛll nebã yõoga wisd maoong kʋʋb zĩisẽ wã fãa, wa buud nins Sẽn-Ka-Saab sẽn dag n kɩt tɩ b rigã sẽn dag n maandã. Bãmb maana tʋʋm-wẽns wʋsg hal n kɩt tɩ Sẽn-Ka-Saab sũur puugi.

¹²Bãmb waooga wẽn-naandse, tɩ Sẽn-Ka-Saab yaool n dag n yeel bãmb tɩ b ra sak n maan bũmb a woto ye.

¹³Sẽn-Ka-Saab rag n kɩtame tɩ bãmb no-rɛɛsdbã ne b bãngdbã fãa keoog Israyɛll ne Zʋʋda nebã n yeel-b yaa: «Wẽnemd-y n bas-y y tʋʋm-wẽnsã, n sak mam tõodã ne m noyã, la y sak tõod nins fãa mam sẽn kɩt tɩ m tʋmtʋmdbã ne m no-rɛɛsdbã togs yãmb ba-rãmbã.»

¹⁴La bãmb ka kelg ye. Bãmb kenga b sũyã, wa bãmb ba-rãmbã me sẽn dag n ka tẽ Sẽn-Ka-Saab sẽn yaa bãmb Wẽnnaamã.

¹⁵Bãmb kɩɩsa Sẽn-Ka-Saab noyã ne b kaoolã b sẽn dag n maan ne bãmb ba-rãmbã, la zãmsg ning Sẽn-Ka-Saab sẽn dag n kõ bãmbã. Bãmb nebã lagma b mens ne sẽn ka yõodo, tɩ bãmb mensã lebg sẽn ka yõodo. Bãmb tɩ naaga b mens ne bu-zẽms nins sẽn dag n gũbg bãmbã, la Sẽn-Ka-Saab yaool n dag n yeela bãmb tɩ b ra maan wa bu-bãmb ye.

¹⁶Bãmb basa Sẽn-Ka-Saab sẽn yaa bãmb Wẽnnaamã tõodã fãa, n yõg nag-bi a yiibu, la b vigl Aseera ra-lugdg n wõgemded a taoor n waoogd-a. Bãmb dag n wõgemded n waoogda yĩngr ãdse, la b waoogd wẽn-naandg a Baalle.

¹⁷Bãmb dɩka b kom-dibli ne b kom-pugli n maan maoong n yõog bugum. Bãmb dag n maanda tɩto, la b bʋgd bagre. Bãmb maana sẽn yaa wẽng Sẽn-Ka-Saab nifẽ, n kɩt tɩ b sũurã puugi.

¹⁸Dẽ, Sẽn-Ka-Saab sũurã puuga ne Israyɛll nebã hal wʋsgo, tɩ b kɩt tɩ b zãag ne bãmba. La yaa Zʋʋda buudã bal n dag n kete.

¹⁹La Zʋʋda nebã me ka tall Sẽn-Ka-Saab sẽn yaa bãmb Wẽnnaamã tõodã ye. Bãmb tũu Israyɛll nebã minindu.

²⁰Woto, Sẽn-Ka-Saab basa Israyɛll buudã zãng n ning-b yãnde, n bas tɩ fãadb wa fã-ba. La Sẽn-Ka-Saab baas n dig-b lame tɩ b zãag ne bãmba.

²¹Wakat ning Sẽn-Ka-Saab sẽn wa n welg Israyɛll buudã n bas a Davɩɩd roogã, rẽ tɩ yaa Israyɛll nebã sẽn yãk a Nebat biig a Zeroboaam t'a yaa rĩmã. La a Zeroboaam tudga Israyɛll nebã n kɩt tɩ b wẽnemd n bas Sẽn-Ka-Saab n lʋɩ kong-kãseng pʋgẽ.

²²Israyɛll nebã maana yel-wẽn nins fãa a Zeroboaam sẽn dag n maanã n ka bas ye.

²³B maana woto hal tɩ Sẽn-Ka-Saab wa n wẽnemd b neng n bas-b wa b sẽn dag n kɩt bãmb no-rɛɛsdbã sẽn yaa b tʋmtʋmdbã togsã. La b yiisa Israyɛll nebã b tẽngẽ wã, n tall-b n kẽng Asiiri tẽngã, la b kell n paa be hal tɩ ta rũndã.

²⁴La Asiiri rĩmã kɩtame tɩ Babilond ne Kuta la Ava ne Hamat ne Sefarvayim neb wa kẽ Samaari tẽmsã pʋs n zĩnd be, n led Israyɛll nebã zĩigẽ. Bãmb sooga Samaari tẽngã n zĩnd a tẽmsã pʋse.

²⁵Bãmb sẽn wa n kẽ Samaari tẽngã, bãmb ka waoog Sẽn-Ka-Saab ye. Rẽ kɩtame tɩ Sẽn-Ka-Saab tʋm gɩgma tɩ b yõg bãmb neb wʋsg n kʋ.

²⁶La b kẽng n tɩ yeela Asiiri rĩmã yaa: «Buud nins yãmb sẽn yõg n tall n wa kẽes Samaari tẽmsã pʋsã ka mi tẽngã wẽnnaamã sẽn waoogd to-to ye. Rẽ kɩtame tɩ wẽnnaamã tʋm gɩgmã tɩ b wa wãb bãmb n kʋ, b sẽn ka sakd Wẽnnaam tõodã yĩnga.»

²⁷Asiiri rĩmã kõo noor n yeele: «Sã n yaa woto, bɩ y kɩt tɩ maan-kʋʋdb nins yãmb sẽn yõg n wa Asiiri ka wã ned a yembr kẽng n tɩ zĩnd beenẽ ne bãmba, n zãms-b tẽngã wẽnnaamã sẽn waoogd to-to.»

²⁸Woto, maan-kʋʋdb nins b sẽn yõg n tall n yi Samaari tẽngã ned a yembr yii Asiiri n kẽng n tɩ zĩnd Betɛlle, la maan-kʋʋdã zãmsa nebã b sẽn na n waoog Sẽn-Ka-Saab to-to.

²⁹La buud fãa maana a wẽnnaam-dãmba, n dɩk-b n tɩ ning maoong kʋʋb zĩisã rot pʋsẽ, Samaari tẽmsã nebã sẽn dag n me wã. La buud fãa maana woto tẽms nins bãmb sẽn be wã pʋse.

³⁰Babilond nebã maana wẽn-naandg a Sukot-Benote, tɩ Kut nebã maan wẽn-naandg a Nergalle, la Hamat nebã maana wẽn-naandg a Asima.

³¹Ava nebã maana wẽn-naandg a Nibaaz ne wẽn-naandg a Tartake. La Sefarvayim nebã rag n dɩkda b kamb n maand maoong n yõogd bugum n kõt a Adramelɛk ne a Anamelɛk sẽn yaa Sefarvayim nebã wẽnnaam-dãmbã.

³²Bãmb dag n waoogda Sẽn-Ka-Saab me. Woto, bãmb yãka neb bãmb sʋkã, tɩ b yɩ pʋʋsg rotã sẽn be maoong kʋʋb zĩisẽ wã maan-kʋʋdba, n maand maoong b yʋʋr yĩnga.

³³Woto, bãmb dag n waoogda Sẽn-Ka-Saabo, la b baas n ket n pʋʋsda b mens wẽn-naandsã wa bãmb sẽn yi buud nins sʋk n wa wã sẽn minim n maandẽ wã.

³⁴La hal tɩ ta rũndã, bãmb ket n maanda b sẽn minim n maandẽ wã. Bãmb ka waoogd Sẽn-Ka-Saab ye. Bãmb ka tũud no-tũuds nins ne minind nins b sẽn zãms bãmbã ye. La b ka sakd tõodã ne noy nins Sẽn-Ka-Saab sẽn dag n kõ a Zakoob yagensã ye. Yaa a Zakoob la Sẽn-Ka-Saab sẽn dag n pʋd a yʋʋr t'a Israyɛllã.

³⁵Sẽn-Ka-Saab yaool n dag n maana kaool ne a Zakoob yagensã n yeele: «Ra waoog-y wẽnnaam-dãmb a taabã ye. Ra wõgemd-y bãmb taoor n pʋʋs-ba, la y ra maan maoong n kõ-b ye.

³⁶Bɩ y waoog Sẽn-Ka-Saab sẽn tẽeg b kangã n yiis yãmb Ezɩpt tẽngã ne pãn-kãsengã. Yaa bãmb taoor bal la yãmb tog n wõgemde, la yaa bãmb b yembr bal la yãmb tog n maan maoong n kõ.

³⁷Bɩ y sak no-tũudsã ne minindã la noyã, ne tõod nins Sẽn-Ka-Saab sẽn kõ yãmbã daar fãa, la y ra waoog wẽnnaam-dãmb a taab ye.

³⁸Da yĩm-y kaool ning mam sẽn maan ne yãmbã yelle, la y ra waoog wẽnnaam-dãmb a taab ye.

³⁹Yãmb tog n waooga Sẽn-Ka-Saab sẽn yaa yãmb Wẽnnaamã b yembr bala, yaa bãmb n na n fãag yãmb y bɛɛbã fãa nugẽ.»

⁴⁰La nebã ka kelg ye. Bãmb kell n maana wa b sẽn minim n maandẽ wã bala.

⁴¹Bu-kãens rag n waoogda Sẽn-Ka-Saabo, la b pʋʋsd b wẽn-naandsã me. Bãmb kambã ne b yagensã me ket n maanda woto hal tɩ ta rũndã, wa bãmb ba-rãmbã sẽn dag n maandã.