Read SEBR SÕNGO, 1998 2 Rĩm-dãmba 18 Bible Online

2 Rĩm-dãmba 18 - SEBR SÕNGO, 1998 bible

2 Rĩm-dãmba 18

¹A Ela biig a Ooze sẽn yaa Israyɛll dĩmã sẽn deeg naam tɩ yʋʋm tãablẽ, la a Akaaz biig a Ezekɩyaas me lebg Zʋʋda rĩmã.

²A Ezekɩyaas sẽn wa n na n deeg naamã t'a tara yʋʋm pisi la a nu. La yẽnda rɩɩ naamã yʋʋm pisi la a wɛ Zeruzalɛm tẽnga. Yẽnda ma yʋʋr la a Abi, n yaa a Zakari bi-pugla.

³A Ezekɩyaas maana sẽn yaa tɩrg Sẽn-Ka-Saab nifẽ, wa yẽnda yaab a Davɩɩd sẽn dag n maan to-to wã.

⁴Yẽnda menesa maoong kʋʋb zĩisã, la a wã kug-vigindsã, la a kɛ Aseera ra-lugdsã, la a pãb zũud waafã a Moyiis sẽn dag n maanã n wã, bala, Israyɛll nebã rag n ket n yõogda wisd waafã taoore, la b rag n pʋd-a t'a Nehustan.

⁵A Ezekɩyaas rɩka a teegrã zãng n teeg Sẽn-Ka-Saab sẽn yaa Israyɛll Wẽnnaamã. La Zʋʋda rĩm-dãmb nins fãa sẽn pʋgl a Ezekɩyaasã ne sẽn deng-b yẽnda n zĩndã sʋka, ned ba a yembr ka tõog n maan wa yẽnda ye.

⁶A Ezekɩyaas sũurã rag n loee ne Sẽn-Ka-Saabo, la yẽnda ka tol n wẽnemd n bas-b ye. La yẽnda rag n sakda tõod nins Sẽn-Ka-Saab sẽn dag n kõ a Moyiisã.

⁷Sẽn-Ka-Saab rag n bee ne a Ezekɩyaas. A Ezekɩyaas rag n paamda tõogr ne a tʋʋmã fãa. La yẽnda kɩɩsa Asiiri rĩmã, t'a ka leb n sak n bas t'a soog-b ye.

⁸Yaa a Ezekɩyaas n zab n tõog Filistẽ-dãmbã hal n tɩ tãag Gaaza tẽnga, n deeg zĩisã fãa, sẽn sɩng ne gũudbã gãsdã hal n tɩ tãag tẽms nins sẽn me n gũbg ne lalsã.

⁹Rĩm a Ezekɩyaas sẽn deeg a naamã tɩ yʋʋm naaslẽ, t'a Ela biig a Ooze sẽn lebg Israyɛll dĩm tɩ yʋʋm yopoɛɛlẽ, la Asiiri rĩm a Salmanasaar wa n gũbg Samaari n na n zab ne-a.

¹⁰A Salmanasaar zaba ne Samaari tẽngã yʋʋm a tãab n yaool n tõog n deeg-a. La yaa rĩm a Ezekɩyaas sẽn deeg naam tɩ yʋʋm yoaablẽ, la Israyɛll dĩm a Ooze sẽn deeg a naamã tɩ yʋʋm wɛɛlẽ, la a Salmanasaar tõog n deeg Samaari tẽngã.

¹¹Asiiri rĩmã talla Israyɛll nebã n kẽng a tẽngẽ wã, n dɩk-b n tɩ ning Hala, ne Goozã kʋɩlg ning b sẽn boond tɩ Haboorã noore, la ne Meed rãmbã tẽms pʋse.

¹²Sẽn yɩ woto wã yaa tɩ Israyɛll nebã ka kelg Sẽn-Ka-Saab sẽn yaa bãmb Wẽnnaamã koɛɛg ye. Bãmb kɩɩsa kaoolã, la b ka kelg Sẽn-Ka-Saab tʋmtʋmd a Moyiis koɛɛgã, n maan bũmb nins fãa a sẽn yeelã ye.

¹³Rĩm a Ezekɩyaas sẽn deeg a naamã tɩ yʋʋm piig la a naaslẽ, Asiiri rĩm a Senakeriib wa n na n zaba ne Zʋʋda tẽms nins sẽn gũbg ne lalsã n deeg-ba.

¹⁴Zʋʋda rĩm a Ezekɩyaas tʋmame tɩ b kẽng Lakiis tẽng n tɩ yeel Asiiri rĩm a Senakeriib yaa: «Mam kongame! Da wa-y n zab-y ne-m ye. Yãmb sẽn na n yaoolg maam yaood ning fãa, mam na n yaoome.» Woto, Asiiri rĩm a Senakeriib yeela Zʋʋda rĩm a Ezekɩyaas t'a yao yẽnda wanzuri toan a wɛ, ne sãnem kɩlo kobs-wɛ.

¹⁵Woto, rĩm a Ezekɩyaas wʋka wanzuri ning sẽn be Wẽnnaam doogã pʋgã, ne na-yirã laog bĩngr zĩisẽ wã n kõ Asiiri rĩm a Senakeriibi.

¹⁶Wakat-kãnga, a Ezekɩyaas pãba Sẽn-Ka-Saab roogã ra-lugdsã ne kʋɩlemsã n wã n yãk sãnemã sẽn dag n bolg bãmb zutã n tɩ kõ Asiiri rĩm a Senakeriibi.

¹⁷Asiiri rĩmã tʋma a tãnsoben-kãsengã ne a tãb-biis naabã ne a zu-soben-kãsengã n paas tãb-biis wʋsg tɩ b yi Lakiis n kẽng rĩm a Ezekɩyaas nengẽ Zeruzalɛm. Bãmb sẽn ta Zeruzalɛm, b kẽng n tɩ yalsa bãkã ko-so-kãsengã sẽn be ga-loasdã pʋʋgã sor noorã.

¹⁸Bãmb baoome n na n gom ne rĩmã. Woto, a Hilkiiza biig a Eliyakim sẽn yaa na-yirã balem-naabã ne a Sebna sẽn yaa na-yirã seb-gʋndã ne a Azaf biig a Yoa sẽn yaa seb-bĩngdã yiime n tɩ seg bãmba.

¹⁹La tãb-biis naabã yeela bãmb yaa: «M kotame tɩ y yeel a Ezekɩyaas woto: ‹Ade, rĩm-kãsengã sẽn yaa Asiiri rĩmã yetame: Fo teega bõe?

²⁰Yãmb tẽedame tɩ gom-zaal yaa yam sẽn kõt ned raood ne pãng t'a tõe n kẽng zabr la? Pʋs n yaa ãnda soab la yãmb teeg yã, n yik n dat n kɩɩs maam?

²¹Moasã fo rɩka f teegrã n teeg Ezɩpte, Ezɩpt yaool n yaa wa tãnwĩ-kaoongo, n kõsd ned ning fãa sẽn tik yẽnda wã nugu. Ezɩpt rĩm a Faarõ maanda a woto ne neb nins fãa sẽn dɩk b teegr n teeg yẽnda wã.

²²Daar ning yãmb na n yeela maam yaa: ‹Yaa Sẽn-Ka-Saab sẽn yaa tõnd Wẽnnaamã la tõnd teeg yã. La ka Wẽnnaam-kãng maoong kʋʋb zĩisã ne a tẽn-kugã la foom a Ezekɩyaas sẽn dag n sãame n bas tẽn-kugr a yembr n yeel Zʋʋda ne Zeruzalɛm nebã tɩ yaa tẽn-kug-kãng taoor la b na n wõgemded n waoogd Wẽnnaamã la!

²³Moasã, mam kota foom, tɩ f maan sard ne mam soaalã sẽn yaa Asiiri rĩmã, la sã n mikame tɩ yãmb tara wed-rʋʋdb sẽn tõe n zomb wiidi, mam na n kõo yãmb wiid tus a yiibu.

²⁴Rẽ yĩnga, yãmb tõe n diga mam soaalã tʋmtʋmd ning sẽn yaa-a bilf n yɩɩdã meng t'a serge. Yãmb sẽn teeg Ezɩptã yaa b sẽn tar saar-dãmb ne wed-rʋʋdbã yĩnga.

²⁵Sẽn paas me, yãmb tẽedame tɩ maam n soog n wa zab ne zĩ-kãngã n sãam-a tɩ ka tũ ne Sẽn-Ka-Saab raab la? Yaa Sẽn-Ka-Saab n yeel maam yaa: ‹Zab ne tẽn-kãngã n sãam-a.› »

²⁶A Hilkiiza biig a Eliyakim ne a Sebna la a Yoa yeela sõgen-kãsengã yaa: «Tõnd kotame tɩ y gom ne tõnd ne Aram-dãmbã goamã, tɩ tõnd wʋmdame. Da gom-y ne tõnd ne Zʋʋda nebã goam tɩ neb nins sẽn be lalgã zugã wa wʋm ye.»

²⁷Sõgen-kãsengã yeela bãmb yaa: «Yãmb tẽedame tɩ mam soaalã koɛɛgã yaa yãmb ne y soaalã yĩng bal la? Koɛɛgã yaa neb nins sẽn be-b lalgã zugã me yĩnga. Bãmb ne yãmb na n dɩɩ y bĩndã la y yũ y rʋʋd-koomã.»

²⁸Dẽ, sõgen-kãsengã yaasa yĩngr n zẽk a koɛɛg n gom ne Zʋʋda buudã goam n yeele: «Kelg-y Asiiri rĩmã sẽn yaa rĩm-kãsengã koɛɛga.

²⁹Asiiri rĩmã yetame: ‹Ra sak-y t'a Ezekɩyaas belg yãmb ye. Bala, yẽnda ka tõe n fãag yãmb mam nugẽ ye.

³⁰Da bas-y t'a belg yãmb tɩ y wa tẽed tɩ y sã n teeg Sẽn-Ka-Saabo, b na n fãaga yãmba, la b ka na n sak tɩ Asiiri rĩmã tõog yãmb tẽngã ye.

³¹Da kelg-y rĩm a Ezekɩyaas ye.› Asiiri rĩmã yetame: ‹Bɩ y bao zems-n-taar ne maam. Bas-y tɩ m soog-yã. Woto, yãmb ned kam fãa na paam lohorem tɩ rɩ a reezẽ tɩɩsã ne a kankamã, la a tõog n yũ a bulgã koom,

³²hal tɩ mam wa tall yãmb n kẽng tẽng sẽn wẽnd yãmb tẽngã. Yaa tẽng sẽn tar bɩle ne reezẽ rãam, la rɩɩb ne reezẽ tɩɩse, la yaa tẽng sẽn tar oliiv tɩɩs sẽn kõt kaam, la sɩɩd bee be. Woto, yãmb na n vɩɩmdame n ka ki ye. Dẽ wã, da kelg-y-yã a Ezekɩyaas sẽn belgd yãmb n yetẽ tɩ Sẽn-Ka-Saab na n fãag-y lame wã ye.

³³Rẽ yĩnga, buud a taabã wẽnnaam-dãmb tõog n fãag-b-la Asiiri rĩmã nugẽ sɩda?

³⁴Hamat-rãmbã ne Arpaad nebã wẽnnaam-dãmb bee yɛɛnẽ? Sefarvayim ne Hena la Iva nebã wẽnnaam-dãmbã bee yɛɛnẽ? Wẽnnaam-kãens tõog n fãaga Samaari tẽngã mam nugẽ sɩda?

³⁵Tẽmsã fãa wẽnnaam-dãmbã fãa sʋka, wẽnnaam-bʋg n tõog n fãag a tẽng mam nugẽ, tɩ Sẽn-Ka-Saab na n wa tõog n fãag Zeruzalɛm mam nugẽ?› »

³⁶Nebã sĩnda b noore. B ka leok yẽnda tɩ bũmb ye. Bala, rĩm a Ezekɩyaas rag n yeelame yaa: «Da leok-y-yã-a ye.»

³⁷A Hilkiiza biig a Eliyakim sẽn yaa na-yirã zak naabã, ne a Sebna sẽn yaa seb-gʋndã ne a Azaf biig a Yoa sẽn yaa seb-bĩngdã pãrsa b futu. Bãmb lebg n leba rĩm a Ezekɩyaas nengẽ, n tɩ togs-a goam nins fãa Asiiri rĩmã sõgen-kãsengã sẽn gomã.