Read SEBR SÕNGO, 1998 2 Rĩm-dãmba 2 Bible Online

2 Rĩm-dãmba 2 - SEBR SÕNGO, 1998 bible

2 Rĩm-dãmba 2

¹Wakat ning Sẽn-Ka-Saab sẽn kɩt tɩ sɩlmandã rɩk a Eli n loog saasẽ wã, rẽ tɩ yaa a Eli ne a Eliize sẽn yi Gilgall n tũud taab n kẽnda.

²A Eli yeela a Eliize yaa: «M kotame tɩ f pa kaanẽ, bala, Sẽn-Ka-Saab tʋma maam tɩ m kẽng hal Betɛlle.» A Eliize leoka a Eli yaa: «Mam wẽenda ne Sẽn-Ka-Saab sẽn vɩ wã, la ne yãmb sẽn vɩ wã, tɩ mam kõn pa ka n bas yãmb ye!» Dẽ, bãmb kell n tũu taab n kẽng Betɛlle.

³No-rɛɛsdbã karen-biis n dag n be Betɛlle. Bãmb yii n sega a Eliize n sok-a yaa: «Fo bãngame tɩ rũndã, Sẽn-Ka-Saab na n zẽka f soaal a Eli t'a loog saasẽ?» A Eliize leokame tɩ b sĩnd tɩ yẽnda me bãngame.

⁴A Eli yeela a Eliize yaa: «Eliize, m kotame tɩ f lebg ka, bala, Sẽn-Ka-Saab tʋma maam tɩ m kẽng Zeeriko.» La a Eliize yeelame: «Mam wẽenda ne Sẽn-Ka-Saab sẽn vɩ wã, la ne yãmba, tɩ mam kõn lebg n bas yãmb ye!» Dẽ, bãmb tũu taab n ta Zeeriko.

⁵No-rɛɛsdbã karen-biis sẽn dag n be Zeeriko wã kolga a Eliize n sok-a yaa: «Fo bãngame tɩ rũndã, Sẽn-Ka-Saab na n zẽka f soaal a Eli t'a loog saasẽ?» A Eliize leokame yaa: «Sĩnd-y tɩ mam me bãngame.»

⁶A Eli yeela a Eliize yaa: «Eliize, m kot-f lame tɩ f pa ka, bala, Sẽn-Ka-Saab tʋma maam tɩ m kẽng Zʋrdẽ kʋɩlga.» La a Eliize yeelame: «Mam wẽenda ne Sẽn-Ka-Saab sẽn vɩ wã, la ne yãmb sẽn vɩ wã, tɩ mam kõn pa ka n bas yãmb ye!» Woto, bãmb b yiibã kell n tũu taab n dɩk sore.

⁷No-rɛɛsdbã karen-biis sʋka, no-rɛɛsdb pis-nu n yi n yals a Eli ne a Eliize taoor hal yɩɩga, la bãmb b yiibã rag n yasa Zʋrdẽ kʋɩlgã noore.

⁸La a Eli yeega a fuugã n wẽ koomã, la koomã welga goabg la rɩtgo, la bãmb b yiibã fãa tũu taab n pɩʋʋg tẽn-koɛɛngã n looge.

⁹La bãmb sẽn ta kʋɩlgã rʋʋnde, a Eli yeela a Eliize yaa: «Kos maam bũmb ning fo sẽn dat tɩ m maan n kõ-fo, sẽn deng b sẽn na n zẽk maam tɩ m loog n bas foomã.» A Eliize leokame: «Mam kotame tɩ y kõ maam sɩɩg ning yãmb sẽn tarã naoor a yiibu.»

¹⁰A Eli yeela a Eliize yaa: «Fo sẽn kot bũmb ningã yaa toogo, la fo sã n tõog n yãnd b sẽn na n dɩk maam n loog n bas foomã, fo na n paama bũmb ning fo sẽn kotã. La fo sã n ka yã mam loogrã, fo kõn paam bõn-kãng ye.»

¹¹Bãmb sẽn tũud taab n kẽnd la b sõsda, bugum saar ne bugum[2] wiid n wa n kẽ bãmb b yiibã sʋka. La zĩig pʋgẽ bala, sɩlmand n wa n dɩk a Eli n loog saasẽ.

¹²A Eliize sẽn yãnd a Eli sẽn loogdã, a zẽka a koɛɛg n yeel yaa: «M ba, m ba! Israyɛll saar-dãmb ne b wiidi!» La yẽnda ka leb n yãnd a Eli ye. Dẽ, yẽnda gãda a fuug n tak n kẽeg a yiibu.

¹³La a Eliize zõondame n dɩk fuugã a Eli sẽn bas tɩ lʋɩ wã, n lebg n kuiisẽ. La yẽnda sẽn ta Zʋrdẽ kʋɩlgã noore, a yalsame.

¹⁴A Eliize rɩka fuugã a Eli sẽn bas tɩ lʋɩ wã n wẽ koomã n yeele: «Sẽn-Ka-Saab sẽn yaa a Eli Wẽnnaamã bee yɛɛnẽ?» Dẽ, yẽnda me wẽe koomã, t'a welg zĩis a yiibu, goabg la rɩtgo, la yẽnda pɩʋʋgame n looge.

¹⁵No-rɛɛsdbã karen-biis nins sẽn be Zeeriko tẽngã noorã sẽn yãnd a Eliize sẽn maanã, b yeelame: «A Eli pãngã siga a Eliize zugu!» La bãmb kẽng n tɩ sega a Eliize, n wõgemd a taoor n fõgen b nens tẽnga.

¹⁶Bãmb yeela a Eliize yaa: «Ade, tõnd sẽn yaa yãmb tʋmtʋmdbã sʋka, gãndaad pis-nu n be be. Nin-bãmb tõe n kẽngame n tɩ bao yãmb soaal a Eli, tɩ tõeeme tɩ Sẽn-Ka-Saab Sɩɩgã rɩk-b lame n kẽng tãng ning zugu, wall tãng long ning pʋga!» La a Eliize yeel-b lame tɩ b ra tʋm ned ye.

¹⁷Bãmb kell n pẽdga a Eliize. Dẽ, a Eliize yeelame tɩ b tʋm-b tɩ b kẽnge. Woto, bãmb tʋma neb pis-nu wã tɩ b kẽng n tɩ bao a Eli hal rasem a tãabo, la b ka yãnd-a ye.

¹⁸La bãmb lebg n waa Zeeriko n mik t'a Eliize ket beenẽ. A Eliize yeel-b lame: «Mam dag n ka yeel yãmb tɩ y ra kẽng sɩda?»

¹⁹Zeeriko tẽngã neb wa n yeela a Eliize yaa: «Tẽn-kãngã pʋg vɩɩm yaa noogo. Karen-saamba, yãmb meng la sẽn ne wã la! Yaa tẽngã koom bal n ka sõama, la tẽn-gãongã ka sakd bɩle ye.»

²⁰A Eliize yeel-b lame tɩ b tall la-paall n wa, la b bao yamsem n ning laagã pʋga. Dẽ, bãmb talla laagã ne yamsmã n wa.

²¹La a Eliize yiime n kẽng ko-bundmã sẽnẽ, la a loba yamsmã koomã pʋg n yeele: «Sẽn-Ka-Saab yetame: Mam yɩlga ko-kãngã t'a lebg ko-sõngo. Ned kõn leb n yũ ko-kãngã n ki ye. La tẽn-gãongã na n leb n saka koodo.»

²²Sẽn sɩng ne wakat-kãnga, koomã lebga yɩlemd hal tɩ ta rũndã wa a Eliize sẽn yeelã.

²³A Eliize yii Zeeriko n dabd Betɛlle. La yẽnda sẽn be sorẽ n kẽnda, kom-bãooneg n yi tẽngã pʋg n paoog yẽnda n yeele: «Zu-kõogã, looge! Zu-kõogã, looge!»

²⁴La a Eliize wẽnemdame n ges kambã, n kãab-b wẽng ne Sẽn-Ka-Saab yʋʋre. Dẽ, rigd-n-yĩids [3] a yiib n yi tʋgrẽ n yõg kamb pis-naas la a yiib bãmb sʋkã n kʋ.

²⁵A Eliize sẽn yi Betɛlle, a kẽnga Karmell tãngã n tɩ zĩndi, n yi beenẽ n lebg n leb Samaari.