Read SEBR SÕNGO, 1998 2 Rĩm-dãmba 3 Bible Online

2 Rĩm-dãmba 3 - SEBR SÕNGO, 1998 bible

2 Rĩm-dãmba 3

¹Zʋʋda rĩm a Zozafat sẽn deeg naam tɩ yʋʋm piig la a niinẽ, la a Akaab biig a Zoram me lebg Israyɛll dĩm Samaari tẽnga. Yẽnda rɩɩ naamã yʋʋm piig la a yiibu.

²La a Zoram maana sẽn yaa wẽng Sẽn-Ka-Saab nifẽ. Baoosgo, yẽnda wẽngã maaneg ka ta a ba wã ne a ma wã sẽn dag n maanã ye. Bala, yẽnda pãba a ba wã sẽn dag n vigl kugr ning n kõ a Baallã fãa n wã.

³Baoosg zãnga, yẽnda kell n maana yel-wẽn nins a Nebat biig a Zeroboaam sẽn dag n maan n kɩt tɩ Israyɛll nebã lʋɩ kongr pʋgã. La a ka tol n bas yel-wẽn-kãens maaneg ye.

⁴Moaab rĩm a Mesa dag n yaa gʋʋn-gʋʋnda. La yʋʋmd fãa, yẽnda rag n yaooda Israyɛll dĩmã yaoodo. Rag n yaa pe-ribli tus-koabga, ne pe-raad tus-koabga, ne b kõbdã sẽn ka wõrse.[4]

⁵Rĩm a Akaab sẽn wa n ki wã, Moaab rĩmã zãgsame tɩ yẽnda ka na n leb n yao Israyɛll dĩmã yaoodã ye.

⁶Dẽ, rĩm a Zoram yii Samaari n saag n sõd Israyɛll nebã fãa.

⁷Rĩm a Zoram sẽn lebg n kuili, a tʋma neb tɩ b kẽng n tɩ yeel Zʋʋda rĩm a Zozafat yaa: «Moaab rĩmã kɩɩsa mam noore. Yãmb na n sak n tũu maam n kẽng n tɩ zab ne Moaab nebã bɩ?» Zʋʋda rĩm a Zozafat leokame n yeele: «Mam na n wa tũu yãmb tɩ d kẽnge. Maam ne yãmb yaa bũmb a yembre, mam nebã yaa yãmb nebã, mam wiidã yaa wa yãmb wiidi.»

⁸Rĩm a Zozafat leb n yeelame: «Yaa so-bʋg la tõnd na n tũ n kẽng zabrã?» La rĩm a Zoram yeel-a lame tɩ yaa Edom we-raoogã sore.

⁹Israyɛll dĩmã ne Zʋʋda rĩmã, n paas Edom dĩmã tũu taab n na n kẽng zabrã. Bãmb kẽna rasem a yopoe. La bãmb dɩka so-gõdem-gõdem, la koom wa n ka leb n be nebã ne rũmsã sẽn tũud bãmbã sẽn na n yũ ye.

¹⁰Woto, Israyɛll dĩmã yeelame: «Kayto! Sẽn-Ka-Saab peega tõnd d tãabã sẽn yaa rĩm-dãmbã n na n wa kõ Moaab nebã.»

¹¹La Zʋʋda rĩm a Zozafat sokame: «Rẽ yĩnga, Sẽn-Ka-Saab no-rɛɛs ba a yembr ka be ka tɩ tõnd tõe n kɩt t'a sok Sẽn-Ka-Saab n gese?» Dẽ, Israyɛll dĩmã tʋmtʋmd a yembr leokame: «A Safat biig a Eliize sẽn dag n tũud a Eli n sõngd-a wã n be ka.»

¹²Rĩm a Zozafat yeelame: «Sẽn-Ka-Saab bee ne a Eliize, la b gomda ne-a.» Woto, Israyɛll dĩmã ne a Zozafat n paas Edom dĩmã tũu taab n kẽng a Eliize nengẽ.

¹³A Eliize yeela Israyɛll dĩmã yaa: «Mam toor ka be ne yãmb ye! Kẽng-y yãmb ba wã ne y ma wã no-rɛɛsdb nengẽ.» Dẽ, Israyɛll dĩmã yeela a Eliize yaa: «Ayo, m ka na n kẽng be ye! Bala, Sẽn-Ka-Saab talla tõnd d tãabã n na n wa kõ Moaab rãmbã tɩ b kʋ.»

¹⁴A Eliize leokame: «Mam wẽenda ne Saasẽ-Pãng-Soabã sẽn vɩ wã, mam sẽn pʋʋsd-a soabã, tɩ sã n ka Zʋʋda rĩm a Zozafat yĩnga, mam kõn kelg yãmba, la mam kõn wẽneg n ges-y meng ye.»

¹⁵A Eliize kell n yeelame: «Moasã, kẽng-y n tɩ tall-y yʋʋm n wa.» La yʋʋmã sẽn wa n yɩɩndẽ wã, Sẽn-Ka-Saab pãngã siga a Eliize zugu.

¹⁶A Eliize yeelame: «Ade, Sẽn-Ka-Saab yetame tɩ y sig ko-soogã pʋg n tu bogd yãmb sẽn tõe tɛka.

¹⁷Bala, Sẽn-Ka-Saab yetame tɩ yãmb ka na n yãnd sebgo, wall saag ye. La kʋɩl-koɛɛn-kãngã na n pida ne koom tɩ yãmb ne y rũmsã yũ.

¹⁸La bãng-y tɩ woto nan ka baa fɩ Sẽn-Ka-Saab nifẽ ye. Sẽn-Ka-Saab na n kɩtame tɩ y tõog Moaab nebã.

¹⁹Yãmb na n sãama b tẽms nins sẽn tar pãngã ne b tẽn-bɛdã. Yãmb na n kɛɛ b tɩ-rɩtsã fãa, la y yẽd b bulsã sẽn bund koomã, la y wʋk kug n dʋʋg b pʋtã pʋse, n sãam-ba.»

²⁰Beoogã sẽn vẽege, sẽn zems maoong maaneg wakate, ade, koom n yi Edom tẽngã sẽnẽ n wa pid tẽn-gãongã zãnga.

²¹Wakat-kãnga, Moaab nebã sẽn wʋm tɩ rĩm-dãmb a tãabã wat n na n zaba ne bãmbã, b tigma neb nins fãa yʋʋm sẽn sek tɩ bob zab-teedã, tɩ b fãa kẽng n tɩ yals toadgẽ wã.

²²Dẽ, Moaab nebã yika yibeoog pĩnda, wakat ning sõorã sẽn puk n yãgd koomã zugã, la b yãame tɩ koomã yaa miuug wa zɩɩm.

²³Woto, bãmb yeelame: «Ad-y yaa zɩɩm! Israyɛll dĩm-dãmbã zaba taab n kʋ taaba. Haya! Moaab nebã, wa-y tɩ d kẽng n tɩ zɛ b teedã.»

²⁴La Moaab nebã sẽn ta Israyɛll nebã tãb-sikẽ wã, Israyɛll nebã yikame n zab ne-b n tõog-b tɩ b zoe. La Israyɛll nebã ne b poorẽ dãmbã kell n pʋgl-b lame n kẽ b tẽngẽ wã n kʋ-b zãnga.

²⁵Israyɛll nebã sãama tẽmsã, la b ned kam fãa rɩka kugri, n lob Moaab nebã pʋ-sõama wã pʋs tɩ pidi. La b yẽda bãmb ko-bundsã zĩis fãa, n kɛ b tɩ-rɩtsã fãa n lubi. Rag n yaa Kɩɩr-Haresɛt[5] tẽngã bal n dag n keta. Dẽ, neb nins sẽn zabd ne loobsã gũbga tẽngã n zab ne-a.

²⁶Moaab rĩmã sẽn mik tɩ zabrã yɩɩda a pãnga, a peega raop kobs-yopoe sẽn zãad zabr sʋʋse, tɩ b na n wẽdg ne pãnga, sẽn na n yɩl n tõog n ta Edom dĩmã nengẽ, la b ka tõog ye.

²⁷Woto, Moaab rĩmã rɩka a bi-ribl-kãsengã sẽn dag n tog n led yẽnda zĩigẽ n dɩ naamã, n maan maoong sẽn yõogd bugum lalgã zugu. Dẽ, bõn-kãng yĩng kɩtame tɩ Israyɛll nebã sũy sãam wʋsgo, la b lebg n basa Moaab rĩmã n kuili.