Read SEBR SÕNGO, 1998 2 Rĩm-dãmba 8 Bible Online

2 Rĩm-dãmba 8 - SEBR SÕNGO, 1998 bible

2 Rĩm-dãmba 8

¹A Eliize rag n yeela pag ning biig yẽnda sẽn dag n vʋʋgã yaa: «Peeg f yirã rãmb n bao zĩig n kẽnge. Bala, Sẽn-Ka-Saab na n kɩtame tɩ kom kẽ tẽngã. La komã na n kaoosa yʋʋm a yopoe.»

²Pagã yikame n maan wa Wẽnnaam daoã sẽn yeel-a wã. Yẽnda ne a yirã rãmb yiime n looge. La bãmb tɩ zĩnda Filistẽ-dãmbã tẽngẽ yʋʋm a yopoe.

³Yʋʋm a yopoe wã sẽn pidi, pagã yii Filistẽ-dãmbã tẽngẽ n lebg n wa n na n yãb n kos rĩmã tɩ b sõng-a t'a leb n paam a zakã ne a pʋʋgã.

⁴Wakat-kãng tɩ rĩmã rag n sõsda ne Wẽnnaam daoã rakõor a Geyaazi. La rĩmã yeela a Geyaazi yaa: «M kotame tɩ f togs maam tʋʋm-kãsems nins fãa a Eliize sẽn maanã.»

⁵La a Geyaazi sẽn wa n togsd rĩmã a Eliize sẽn vʋʋg kũumã to-to wã, la pag ning biig b sẽn dag n vʋʋgã sẽn be waoongẽ. Pagã taame n yãb n kos rĩmã tɩ b sõng-a t'a leb n paam a zakã ne a pʋʋgã. A Geyaazi yeela rĩmã yaa: «N-na! M soaala, ad pag ning yell mam sẽn dag n gomdã, ad a biigã a Eliize sẽn vʋʋgã.»

⁶Rĩmã soka pagã, la pagã togsa bũmbã fãa sẽn yɩ to-to. Woto, rĩmã yãka a sõgen a yembr n yeel-a yaa: «Kɩt tɩ b lebs pagã a sẽn so wã fãa, la b lebs-a a pʋʋgã ne b sẽn yõd n ko n paam yõod ningã, sẽn sɩng ne daar ning a sẽn yi tẽngẽ wã, hal tɩ ta rũndã wã.»

⁷A Eliize kẽnga Damaase. La mikame tɩ Siiri rĩm a Bɛn-Hadaad rag n gãee ne bãaga. La b togsa rĩm a Bɛn-Hadaad tɩ Wẽnnaam daoã waa tẽngẽ beenẽ.

⁸Rĩmã yeela a Azayɛll yaa: «Bao kũun n zã n kẽng Wẽnnaam daoã nengẽ n tɩ kõ-a, la f kos-a t'a sok Sẽn-Ka-Saab n gese, bãag ning sẽn tar maamã na n sãoogame bɩ?»

⁹A Azayɛll kẽnga a Eliize nengẽ, la a talla kũuni, la a bao Damaas tẽngã bõn-sõama buud fãa n zɩlg yʋgma pis-naas n zã n na n tɩ kõ a Eliize. A Azayɛll sẽn ta a Eliize nengẽ, a yeelame: «Yãmb biig a Bɛn-Hadaad sẽn yaa Siiri rĩmã tʋma maam yãmb nengẽ, tɩ m wa sok-y n gese, bãag ning sẽn tar bãmbã na n sãoogame bɩ?»

¹⁰A Eliize leoka yẽnda yaa: «N-yẽe! Kẽng n tɩ yeel-a t'a na n sãoogame! La Sẽn-Ka-Saab yaool n wilga maam t'a na n kiime.»

¹¹La Wẽnnaam dao a Eliize yalsame, n get a Azayɛll kuii, n wa yãbda.

¹²La a Azayɛll sokame: «M soaala, yaa a wãn tɩ yãmb yãbda?» T'a Eliize leok-a yaa: «Mam sẽn yãbdã, yaa tɩ mam nee wẽng ning fo sẽn na n wa maan Israyɛll nebã. Bala, wakat n wate, tɩ fo na n yõog b tẽms nins b sẽn me lals n gũbgã bugum, la f kʋ b kom-bɩɩsã ne zabr sʋʋga, la f kʋ bãmb kom-bãoonegã, la f weed b pagb nins sẽn tʋtã pʋse.»

¹³A Azayɛll leokame: «Yãmb tʋmtʋmdã me la ãnda? Baag wa maamã me na n yɩɩ wãn n tõog n maan yel-bɛd a woto?» A Eliize yeel-a lame yaa: «Sẽn-Ka-Saab wilga maam tɩ foom n na n wa lebg Siiri rĩmã.»

¹⁴A Azayɛll lebgame n kẽng rĩmã sẽn yaa a soaalã nengẽ. La a soaalã sok-a lame t'a Eliize yeelame tɩ bõe. T'a leok t'a Eliize yeelame t'a ka na n ki ye.

¹⁵La vẽkembeoogo, a Azayɛll rɩka fu-goabg n los koomẽ n dɩk n pil rĩmã neng t'a ki, la yẽnda leda a zĩigẽ n dɩ naam.

¹⁶Israyɛll dĩm a Akaab biig a Zoram sẽn deeg a naamã tɩ yʋʋm nuunẽ, la a Zozafat biig a Zehoram me lebg Zʋʋda rĩmã.

¹⁷Yẽnda sẽn wa n deegd naamã t'a tara yʋʋm pis-tã la a yiibu, la a rɩ a naamã Zeruzalɛm yʋʋm a nii.

¹⁸Yẽnda me maana wa Israyɛll dĩm-dãmb a taabã sẽn maanã, la wa a Akaab buudã me sẽn maanã. Bala, yẽnda peega a Akaab bi-pugl n maan a paga, n maan sẽn yaa wẽng Sẽn-Ka-Saab nifẽ.

¹⁹La Wẽnnaam tʋmtʋmd a Davɩɩd zug maasem yĩnga, Sẽn-Ka-Saab rag n ka rat n sãam Zʋʋda ye. Bala, Sẽn-Ka-Saab rag n yeelame tɩ b na n kɩtame t'a Davɩɩd ne a yagensã kell n soog Israyɛll naamã wakat fãa.

²⁰Yaa a Zehoram zamaanẽ, la Edom nebã zab n zãgs tɩ b ka rat tɩ Zʋʋda rĩmã soog-b ye. La bãmb yãka b ned a ye n kɩt t'a lebg b rĩmã.

²¹A Zehoram yikame n dɩk a saar-dãmbã fãa n kẽng Sayɩɩr tẽnga. A yika ne yʋngo, n peeg a tãb-biisã nanambs sẽn get saar-dãmbã yellã, n tɩ zab ne Edom nebã sẽn dag n wa n gũbg bãmbã, n tõog-ba, la Edom nebã lebg n zoe n kuilame.

²²La hal tɩ ta rũndã, Edom nebã kell n kɩɩsame tɩ b ka na n sak tɩ Zʋʋda nebã soog-b ye. Wakat-kãnga, Libna nebã me zãgsame tɩ b ka na n sak ye.

²³A Zehoram tʋʋm a taabã ne bũmb nins fãa a sẽn maanã gʋlsa Zʋʋda rĩm-dãmbã kibay sebr pʋga.

²⁴A Zehoram saka a saam-dãmba, la b mum-a lame n naag ba-rãmbã, a Davɩɩd tẽngã pʋga. La yẽnda biig a Akaazɩya n led yẽnda zĩigẽ n dɩ naamã.

²⁵Israyɛll dĩm a Akaab biig a Zoram sẽn deeg naam tɩ yʋʋm piig la a yiiblẽ, la Zʋʋda rĩm a Zehoram biig a Akaazɩya lebg Zʋʋda rĩmã.

²⁶A Akaazɩya sẽn wa n na n deeg naamã t'a tara yʋʋm pisi la a yiibu, la a rɩɩ naam Zeruzalɛm yʋʋm-yɛnga. A Akaazɩya ma yʋʋr la a Atali, n yaa Israyɛll dĩm a Omri roogã bi-pugla.

²⁷Yẽnda me rɩka rĩm a Akaab naoore, n maan sẽn yaa wẽng Sẽn-Ka-Saab nifẽ, wa a Akaab buudã me sẽn dag n maanã. Bala, yẽnda rag n yaa a Akaab buudã rɛɛmba.

²⁸Rĩm a Akaazɩya tũu rĩm a Akaab biig a Zoram n kẽng Ramot sẽn be Galaadã n na n tɩ zab ne Siiri rĩm a Azayɛlle, la Siiri rãmbã pogla rĩm a Zoram.

²⁹Rĩm a Zoram lebg n leba Zizreyɛll n na n tɩ tɩp a poglgã. La a Akaazɩya sẽn yaa Zʋʋda rĩmã kẽnga Zizreyɛll n na n tɩ ges a Akaab biig a Zoram gãaga, bala, a poglgã rag n namsd-a-la wʋsgo.