Read SEBR SÕNGO, 1998 2 Rĩm-dãmba 9 Bible Online

2 Rĩm-dãmba 9 - SEBR SÕNGO, 1998 bible

2 Rĩm-dãmba 9

¹Daar a yembre, Wẽnnaam no-rɛɛs a Eliize boola no-rɛɛsdbã karen-biig a yembr n yeel-a yaa: «Yik n sẽbg f sɛɛga, n deeg tʋg-kãngã ne kaamã n kẽng Ramot sẽn be Galaadã.

²Fo sã n ta beenẽ, bɩ f kẽng n tɩ bao a Nimsi biig a Zozafat biig a Zehu. Fo sã n yãnd-a, bɩ f kɩt t'a yik n yi a tũud-n-taasã sʋka, tɩ f peeg-a n kẽ ro-pʋgẽ, tɩ yaa yãmb y yiib bal n be be.

³Dẽ moasã, bɩ f rɩk tʋkã ne kaamã n pʋdg a zugu, la f yeel-a tɩ Sẽn-Ka-Saab yetame: ‹Mam ningda fo zug naam kaam tɩ f lebg Israyɛll dĩma.› La rẽ poore, bɩ f pak roogã noor n yi n zoe n loog n da yals ye.»

⁴Bi-bɩɩgã sẽn yaa Wẽnnaam no-rɛɛsa yikame n kẽng Ramot sẽn be Galaadã.

⁵Yẽnda sẽn ta beenẽ, a mikame tɩ tãb-biisã nanambs dag n tigma taaba. Yẽnda yeelame: «Naaba, mam tara koɛɛg yãmb yĩnga.» La a Zehu sokame tɩ yaa bãmb sʋkã nin-bʋg yĩnga. La bi-bɩɩgã yeelame: «Naaba, yaa yãmb yĩnga.»

⁶Dẽ, a Zehu yikame n kẽ roogẽ wã, la bi-bɩɩgã rɩka kaamã n pʋdg a Zehu zugu, la a yeel-a: «Sẽn-Ka-Saab sẽn yaa Israyɛll Wẽnnaamã yetame: ‹Mam pʋdgda fo zug kaam tɩ f lebg rĩmã, n soog Israyɛll nebã sẽn yaa Sẽn-Ka-Saab nebã.

⁷Fo na n kʋʋ f soaal a Akaab buudã, tɩ mam tõe n dok m sũur ne a Zezabɛlle, yẽnda sẽn dag n daag maam a Sẽn-Ka-Saab no-rɛɛsdbã ne m tʋmtʋmdbã fãa zɩɩmã yĩnga.

⁸A Akaab buudã gill na n sãamame. Mam na n menesa a Akaab buudã raopã fãa sẽn be Israyɛllã, sã n yaa yembse, wall burkĩmba.

⁹La mam na n kɩtame t'a Akaab roogã yɩ wa a Nebat biig a Zeroboaam doogã, la wa a Ayiya biig a Basa roogã.

¹⁰La sã n yaa ne a Zezabɛlle, baas n na n wãb a kũumã Zizreyɛll zĩ-vɩʋʋgẽ wã, tɩ ned ka yãnd-a n dɩk n mum ye.› » La bi-bɩɩgã sẽn gom woto n sɛ, a paka roogã noor n yi n zoe.

¹¹A Zehu yiime n lebg n leb a soaalã tãb-biis nanambs a taabã nengẽ, la b sok-a lame yaa: «Yaa noog tɩ gãeen-kãngã wa yãmb nengẽ?» A Zehu leok-b lame yaa: «Yãmb mens mii raoã ne a gom-toogã halɩ!»

¹²La b yeela a Zehu yaa: «Ka sɩd ye. D kotame tɩ f togs tõnd raoã sẽn yeel tɩ bũmb ninga.» Dẽ, a Zehu yeel-b lame yaa: «Ade, a goma ne maam bũmb wʋsg yelle. A yeela maam tɩ Sẽn-Ka-Saab yetame: Mam ningda fo zug kaam tɩ f lebg Israyɛll dĩma.»

¹³Bãmb sẽn wʋm woto, b yeesa b futã n dʋʋg rʋʋdgã zugu, n kɩt t'a Zehu zĩndi, la b peeb baorg n yeele: «Wẽnd na kaoos rĩm a Zehu!»

¹⁴Woto, a Nimsi biig a Zozafat biig a Zehu baood n zãmba a Zoram. Wakat-kãng t'a Zoram ne Israyɛll nebã fãa rag n bee Ramot sẽn be Galaadã n gũud tẽngã, tɩ Siiri rĩm a Azayɛll ra wa tõog n zab ne-a ye.

¹⁵La mikame t'a Zoram sẽn dag n zab ne a Azayɛll tɩ Siiri rãmbã pogl-a wã, a rag n lebg n leba Zizreyɛll n na n tɩ tɩp a menga. A Zehu yeela tãb-biisã yaa: «Yãmb sã n bee mam poorẽ, bɩ y gũus tɩ ned da wa yi tẽngã pʋg n kẽng Zizreyɛll n tɩ togs bũmb ning sẽn maan ka wã ye.»

¹⁶Dẽ zugẽ, a Zehu kẽng n tɩ kẽ a saar n na n kẽng Zizreyɛlle. Bala, a Zoram sãmpogrã ra gãneg-a lame, tɩ Zʋʋda rĩm a Akaazɩya me rag n kẽng be n na n tɩ ges-a.

¹⁷Tẽn-gũud ning sẽn dag n be Zizreyɛll tẽn-gũudbã gãosgã zugã zĩnda lalgã zug n yãnd kʋʋng sẽn tũud a Zehu n watẽ, la a yeelame tɩ yẽnda nee kʋʋng sẽn wate. La a Zoram yeelame t'a tʋm wed-rʋʋd t'a tɩ seg-b n sok n ges yaa noogo.

¹⁸La wed-rʋʋdã tɩ sega a Zehu n yeele: «Rĩmã yeelame tɩ b wa sok-y n ges yaa noogo?» T'a Zehu leok-a: «Yaa noog tɩ ka noogo, bʋg n pak foom? Wa loog n tũ maam.» La tẽn-gũudã togsame tɩ wed-rʋʋdã taame, la a ka lebg n watẽ ye.

¹⁹Rĩm a Zoram leb n kɩtame tɩ b tʋm wed-rʋʋd a to. La wed-rʋʋdã taa a Zehu rãmb nengẽ n yeele: «Rĩmã sokdame tɩ yaa noogo?» T'a Zehu leoke: «Yaa noog tɩ ka noogo, bʋg n pak foom? Wa loog n tũ maam.»

²⁰La tẽn-gũudã togsame tɩ wed-rʋʋdã taame, la yẽnda me ka wat ye, tɩ la sẽn paasde, ned ning sẽn be-a taoorã zoees wẽnda a Nimsi biig a Zozafat biig a Zehu. Bala, yẽnda zoeta wa gãeenga.

²¹A Zoram yeelame tɩ b sog a saarã. La b soga a saarã. Dẽ, Israyɛll dĩm a Zoram ne Zʋʋda rĩm a Akaazɩya ned kam fãa kẽ a saar pʋga, tɩ b yi n na n seg a Zehu, la b tɩ seg-a-la Zizreyɛll dao a Nabot pʋʋgã pʋga.

²²A Zoram sẽn yãnd a Zehu wã, a sok-a lame yaa: «Zehu, yaa noogo?» La a Zehu leokame: «Na n yɩ a wãn n yɩ noog tɩ yãmb ma a Zezabɛll ket n waoogd wẽn-naandse, la a bʋgd bagre?»

²³A Zoram wẽnemda tao-tao t'a na n zoe, la a yeela a Akaazɩya yaa: «Akaazɩya, b zãmba maam!»

²⁴La a Zehu rɩka a tãp n yãag n tão a Zoram bãgdã sʋka, la peemdã tɩ kõsa a sũurã n sãag n yi, la a Zoram lʋɩ a saarã pʋg n ki.

²⁵La a Zehu yeela a wed-kɩɩm-naab a Bidkaar sẽn be ne yẽnda wã yaa: «Rɩk-a n lob Zizreyɛll rao a Nabot pʋʋgẽ wã. Bala, fo meng tẽra kãab-wẽng ning Sẽn-Ka-Saab sẽn dag n kãab a Zoram wakat ning maam ne foom sẽn wa n zao d wiidã n tũud yẽnda ba a Akaabã.

²⁶Sẽn-Ka-Saab meng yeelame yaa: ‹Zaamẽ, maam a Sẽn-Ka-Saab yã a Nabot ne a kambã zɩɩm fo sẽn daagã. Pʋ-kãngã pʋga, mam na n daaga fo me zɩɩm n lebse!› La a Zehu yeelame: Dẽ wã, rɩk-a n lob pʋʋgã pʋga, wa Sẽn-Ka-Saab meng sẽn dag n yeelã.»

²⁷Zʋʋda rĩm a Akaazɩya sẽn yãnd woto, a rɩka Bɛt-Gãn sor n na n zoe. La Zehu pʋgla yẽnda, la a kõ noor n yeel tɩ b kʋ yẽnda me. La b tão a Akaazɩya a saarã pʋg n pogle. Dag n yaa b sẽn wa n dʋʋd Guur tãngã sẽn pẽ Yibleyamã, la a Akaazɩya zoe n kẽnga Megido n tɩ pa be n ki.

²⁸A Akaazɩya tʋmtʋmdbã rɩka a kũumã n kẽng Zeruzalɛm n tɩ mum-a a yaoogẽ wã a Davɩɩd tẽngã pʋgẽ, n naag a saam-dãmbã.

²⁹Yaa a Akaab biig a Zoram sẽn deeg naam tɩ yʋʋm piig la a yembrẽ, la a Akaazɩya rag n lebg Zʋʋda rĩmã.

³⁰A Zehu sẽn wa n kẽed Zizreyɛll tẽngã pʋgã, a Zezabɛll wʋmame n yik n ning a nin kɩrʋ, la a maneg a zugu, n kẽng n tɩ be a roogã võorẽ n lɩkd n getẽ.

³¹A Zehu sẽn ta tẽngã noore, a Zezabɛll soka yẽnda yaa: «Nin-kʋʋd wa a Zimri,[7] yaa noogo? Ka foom n kʋ f soaalã wɛ?»

³²La a Zehu nakame n ges roogã võorẽ n sok yaa: «Ned ka be beenẽ n be mam poorẽ la? Ned ka be?» Dẽ, zu-soben-dãmb a yiib bɩ a tãab n zĩnd yĩngrã n lɩk n ges a Zehu.

³³La a Zehu yeelame: «Rɩk-y-yã-a n lob tẽnga.» Woto, b rɩka a Zezabɛll n tũnug roogã võor n tus-a t'a lʋɩ tẽng t'a zɩɩmã yɩg n fẽ lalgã ne wiidã. La a Zehu tab-a-la ne a saarã n looge.

³⁴Dẽ poore, a Zehu kẽe na-yirã n dɩ la a yũ, n yaool n yeel neb nins sẽn be beenẽ wã yaa: «Kẽng-y n tɩ rɩk-y pʋg-yoog a Zezabɛll n mume, bala a yaa rĩm biiga.»

³⁵Bãmb sẽn kẽng n na n tɩ rɩk a Zezabɛll n mumã, b tɩ mikame tɩ yaa a zu-wangã ne a naoã la a nusã bal n dag n kete.

³⁶Woto, bãmb lebg n tɩ togsa a Zehu bõn-kãnga. La yẽnda yeelame: «Yaa Sẽn-Ka-Saab goamã n paam pidsgu. Bãmb dag n goma ne Tisbe tẽng rao a Eli sẽn yaa bãmb tʋmtʋmdã n yeele: Baas n na n wãb a Zezabɛll nemd Zizreyɛll zĩ-vɩʋʋgẽ wã.

³⁷A Zezabɛll kũumã na n zendmame n sãeeg weoogã pʋg wa birg b sẽn gãneg pʋʋgo, Zizreyɛll pʋʋgã pʋga, hal tɩ ned ka tõe n yeel t'a Zezabɛll la woto ye!»