Read SEBR SÕNGO, 1998 1 Kibayã 29 Bible Online

1 Kibayã 29 - SEBR SÕNGO, 1998 bible

1 Kibayã 29

¹Rĩm a Davɩɩd yeela zãma wã fãa yaa: Yaa mam biig a Salmo a yembr bal la Wẽnnaam yãk yã, la a yaa bi-bilfu, n nan ka mi bũmb ye. Tʋʋmdã yaool n yaa kãsenga. Bala, ro-bed-kẽen-kãngã ka ninsaal doog ye. Yaa Wẽnnaam Sẽn-Ka-Saab roogo.

²Mam segla m Wẽnnaamã roog meeb ne m pãngã fãa. Mam segla sãnem, sãnem teedã fãa yĩnga, ne wanzuri, wanzuri teedã fãa yĩnga, la zũudu, zũud teedã fãa yĩnga, ne bãense, bãens teedã fãa yĩnga, la onigs kug-neeb ne kug-sẽgdɩ, la kug-pɩndse, ne kug sẽn tar kõbg buud toor-toore, la kug-sõama buud fãa ne kug-pɛɛl wʋsgo.

³Sẽn paase, mam sũurã sẽn loe ne m Wẽnnaamã roogã yĩnga, mam dɩkda m meng paoong sẽn yaa sãnem ne wanzuri, n na n paas bũmb nins fãa mam sẽn segl zĩ-sõngã yĩngã, n kõt m Wẽnnaamã roog yĩnga.

⁴Yaa ofɩɩr sãnem toan koabga, ne wanzuri halaal toan kobessi la pis-naase, sẽn na n tall n bol Wẽnnaam doogã lalse,

⁵sãnem, sãnem teedã yĩnga, ne wanzuri, wanzuri teedã yĩnga, la ne tʋʋm nins fãa tʋʋm-mitbã sẽn na n maanã yĩnga. Moasã, ãnda yãmb sʋkã n na n yãk a sãnem ne a wanzuri n kõ Sẽn-Ka-Saab ne yamleoog rũndã?

⁶Dẽ, buudã kãsem-dãmba, ne Israyɛll buudã nanambse, la tãb-biis tusr-tusr ne tãb-biis koabg-koabg nanambsã, n paas ne rĩmã tʋʋmã taoor dãmb yãka yam, n na n kõ kũun ne yamleoogo.

⁷Bãmb kõo sãnem talã-rãmb tus a nu, sãnem wakɩ-koeems tus piiga, wanzuri talã-rãmb tus piiga, zũud talã-rãmb tus piig la a nii, ne kut talã-rãmb tus koabga, Wẽnd doogã tʋʋm yĩnga.

⁸Neb nins sẽn dag n tar kug-sõama wã tallame n wa kɩs Gersom buudã ned a Yekiyɛlle, t'a ning Sẽn-Ka-Saab roogã laog bĩngr zĩigẽ.

⁹Nebã maana sũ-noog ne kũun nins b sẽn tall n wa ne yamleoogã, bala, yaa ne b sũyã fãa la b sak ne yamleoog n tall n wa kõ Sẽn-Ka-Saabo. Rĩm a Davɩɩd me sũurã yɩɩ noog hal wʋsgo.

¹⁰Dẽ, a Davɩɩd pẽga Sẽn-Ka-Saab zãma wã fãa taoor n yeele: «Sẽn-Ka-Saab sẽn yaa tõnd yaab a Israyɛll Wẽnnaam, reeg-y pẽgr zamaan woo zamaane!

¹¹Yãmb yaa kãsenga, y tara pãnga, y tara naam la ziiri, la neerlem yaa yãmb n so. Bala, bũmb nins fãa sẽn be yĩngr la tẽngã yaa yãmb n so. Yãmb n so naam, la y so bũmb fãa.

¹²Arzɛk la ziir yita yãmb nengẽ, la y yaa bũmb fãa soaala. Yãmb tara pãnga, n tõe tɩ ned lebg kãsenga, la y kõ-a pãnga.

¹³Moasã, tõnd Wẽnnaam, tõnd pʋʋsda yãmb barka, la d balemda yãmb yʋʋrã sẽn tar ziirã.

¹⁴Mam yaa ãnda, la mam nebã yaa ãnda rãmba, tɩ tõnd tõe n kõ kũun a woto ne yamleoogo? Bũmb fãa yita yãmb nengẽ, la bũmb nins tõnd sẽn kõt yãmbã fãa yaa yãmb n kõ tõndo.

¹⁵Tõnd yaa sãamb la nin-loogds yãmb taoore, wa d yaab-rãmbã fãa. Tõnd vɩɩmã dũniyã zug ka yaa wa sulunsuku, tɩ tẽeb kaẽ ye.

¹⁶Tõnd Wẽnnaam Sẽn-Ka-Saabo, arzɛg-kãensã fãa tõnd sẽn segl n na n me roog yãmb yĩnga, la y yʋ-sõngã yĩngã yita yãmb nengẽ. Bũmb fãa yaa yãmb n so.

¹⁷Mam Wẽnnaam, mam miime tɩ yãmb feesda sũyã, la y nonga tɩrlem. Mam kõo yãmb yamleoog kũun-kãensã fãa ne sũur sẽn yaa tɩrga, la yaa ne sũ-noog la mam get yãmb nebã sẽn be ka wã sẽn wa ne kũun n kõt yãmb ne yamleoogã.

¹⁸Sẽn-Ka-Saab sẽn yaa tõnd yaab-rãmb a Abrahaam ne a Izak la a Zakoob Wẽnnaam, bɩ y kɩt tɩ tagsg a woto kell n zĩnd y nebã sũy pʋse, tɩ b yam kẽ yãmba.

¹⁹Kõ-y mam biig a Salmo sũur sẽn pid ne ratem, t'a tõe n sak yãmb tõodã ne y zãmsgã la y noyã, la a rɩk b fãa n ning b nao-kẽndr zugu, n tõog n me roog ning mam sẽn segl bũmb fãa a yĩngã.»

²⁰A Davɩɩd yeela zãma wã fãa yaa: «M kot-y lame tɩ y pẽg-y Sẽn-Ka-Saab sẽn yaa yãmb Wẽnnaamã!» Dẽ, nebã fãa pẽga Sẽn-Ka-Saab sẽn yaa b yaab-rãmbã Wẽnnaamã. Bãmb wõgemda Sẽn-Ka-Saab taoore, la rĩmã taoore.

²¹Vẽkembeoogo, Israyɛll nebã maana maand sẽn yõogd bugum n kõ Sẽn-Ka-Saabo. Bãmb kʋʋ lols tusri, ne pe-raad tusri, la pe-bi tusri, ne b bõn-yũudl kũunã, la maand wʋsg n kõ Sẽn-Ka-Saabo, Israyɛll nebã fãa yĩnga.

²²Badaare, bãmb dɩɩme la b yũ Sẽn-Ka-Saab taoor n maan sũ-noogo, la b moon naoor a yiibẽ soab n yeele, t'a Davɩɩd biig a Salmo yaa rĩmã. B pʋdga a Salmo zug rĩung kaam, t'a lebg naab Sẽn-Ka-Saab yĩnga, la b pʋdg a Sadok me zug kaam t'a lebg maan-kʋʋda.

²³A Salmo zaoonda Sẽn-Ka-Saab zaoorẽ wã, n na n led a ba a Davɩɩd zĩigẽ n lebg rĩmã. A paama tõogr wʋsgo, la Israyɛll nebã fãa rag n kelgd-a lame.

²⁴Nanambsã fãa ne gãndaadã, la baa ne rĩm a Davɩɩd kom-dibli a taabã fãa sulga b mens rĩm a Salmo taoore.

²⁵Sẽn-Ka-Saab zẽka a Salmo, n kɩt t'a lebg nin-kãseng Israyɛll nebã fãa nifẽ. Bãmb kɩtame t'a Salmo naamã tall ziir n yɩɩd Israyɛll rĩm-dãmb nins fãa sẽn deng yẽnda wã.

²⁶A Izayi biig a Davɩɩd rɩɩ naam Israyɛll tõrã fãa zugu.

²⁷Yẽnda sẽn dɩ naamã Israyɛllã yɩɩ yʋʋm pis-naase: Ebrõ yʋʋm a yopoe, Zeruzalɛm yʋʋm pis-tã la a tãabo.

²⁸Yẽnda paama sũ-noog a kʋʋlem wakate, n yaool n ki. Yẽnda rag n kʋʋla wʋsgo, n tar arzegs ne ziiri. La yẽnda biig a Salmo n led a zĩigẽ n lebg rĩmã.

²⁹Rĩm a Davɩɩd kibarã sɩngrã ne a baoosgã fãa gʋlsa bãngd a Sãmwɛll kibarã sebr pʋga, ne Wẽnnaam no-rɛɛs a Natã kibarã sebr pʋga, n paas yãt a Gaad kibarã sebr pʋga.

³⁰Seb-kãens leb n wilgda a Davɩɩd rĩungã fãa ne a gãndaalmã tʋʋmã, la bũmb nins fãa a sẽn maan Israyɛll pʋgẽ, wall tẽmsã soolem-dãmbã fãa pʋsẽ.