Read SEBR SÕNGO, 1998 1 Kibayã 5 Bible Online

1 Kibayã 5 - SEBR SÕNGO, 1998 bible

1 Kibayã 5

¹A Israyɛll bi-kãseng a Rubɛn kom-dibli la woto. A Rubɛn n dag n yaa a ba wã bi-kãsenga, la yẽnda sẽn kẽ ne a ba pagã yĩnga, b reega a kãosengã n kõ a Zozɛf me sẽn yaa a Israyɛll biigã kom-dibli. Woto, b ka leb n geelg a Rubɛn wa a ba wã bi-kãseng yɛs ye.

²A Zʋʋda n dag n tar pãng n yɩɩd a ba-biisã, la yẽnda yageng a yembr n lebg Israyɛll dĩma. La baoosgo, a Zozɛf n kell n soog kãosengã.

³A Israyɛll bi-kãseng a Rubɛn kom-dibli la woto: yaa a Enoke, a Palu, a Ɛtsron ne a Karmi.

⁴A Zowɛll roga a Semaya, t'a Semaya rog a Googe, t'a Goog rog a Simeyi,

⁵t'a Simeyi rog a Miise, t'a Miise rog a Rehaya, t'a Rehaya rog a Baalle,

⁶t'a Baall rog a Beera. A Beera rag n yaa Rubɛn buudã kãsem a yembre, tɩ Asiiri rĩm a Tɩlgat-Pilnezɛɛr kɩt tɩ b yõk-a n tall n kẽng yembdo.

⁷Ad a Beera saam-biisã b sẽn sõd roog-roogo, tɩ b yʋyã be sõadgã sebr pʋga, wa sẽn zems b buudu: kãsmã yaa a Yeyiyɛlle, tɩ sẽn pʋgd yaa a Zakari.

⁸Yaoolem soab yaa a Azaaz biig a Bela sẽn yaa a Sema yagenga, la a Zowɛll yagen-tʋbrakẽega. A Beera saam-biisã rag n bee Arowɛɛre, hal n tãag Nebo ne Baall-Meyon.

⁹Yaangã sẽnẽ, bãmb dag n bee hal we-raoogã noore, Efrat kʋɩlgã sẽnẽ. Bala, b rũmsã rag n yaa wʋsg Galaad tẽngã.

¹⁰A Sayull rĩungã wakate, a Rubɛn yagensã zaba ne Hagaar nebã n tõog-ba. Bãmb deega b fu-rotã n kẽ n zĩndi, n soog Galaad soolmã yaang tẽmsã fãa.

¹¹Gaad yagensã sẽn dag n beẽ wã teesa bãmba, sẽn sɩng ne Basan tẽngã n tɩ tãag Salka yaanga.

¹²A Zowɛll n dag n yaa naabã, t'a Safam pʋgda, t'a Yanayi ne a Safat sẽn be Basandã pʋgda.

¹³Bãmb ba-biis a yopoe wã yʋy la woto buud-buudu: a Mikayɛlle, a Mesulam, a Seba, a Yorayi, a Yakan, a Ziya, ne a Ebɛɛre.

¹⁴A Abigayɩll yagens la woto: yaa a Uuri kom-dibli, a Yaroa kom-dibli, a Galaad kom-dibli, a Mikayɛll kom-dibli, a Yesisayi kom-dibli, a Yado kom-dibli, ne a Buuz kom-dibli.

¹⁵A Guni biig a Abdiyɛll biig a Ayi, n dag n yaa b buudã naabã.

¹⁶B rag n bee Galaad ne Basã, la tẽms nins fãa bãmb sẽn dag n so wã, n paas ne Saaron tẽn-kɩremsã n tɩ tãag b todsã.

¹⁷B sõda bãmb fãa Zʋʋda rĩm a Zotam ne Israyɛll dĩm a Zeroboaam wakatẽ wã.

¹⁸A Rubɛn yagensã sẽn yaa Gaad buudã, ne Manaase buudã pʋɩ-sʋkã rag n tara gãndaad sẽn tõe n bob gãnd ne zabr sʋʋse, la sẽn yaa tãb-tãoodba. Sẽn tõe n bob-b zab-teedã sõor yaa neb tus pis-naas la a naas la kobs-yopoe la pis-yoobe.

¹⁹Bãmb zaba ne Hagaar nebã, la ne a Yetʋʋr la a Nafiis ne a Nodaabe.

²⁰Bãmb paamame tɩ b sõng-b n zab ne Hagaar nebã. Dẽ, b yõga Hagaar nebã ne neb nins fãa sẽn dag n be ne bãmbã. Bala, zabrã wakate, bãmb kelem n boola Wẽnnaam, la Wẽnnaam leoka b kosgã, b sẽn dag n dɩk b teegrã n teeg Wẽnnaamã yĩnga.

²¹B yõga b rũmsã fãa: yaa yʋgma tus pis-nu, rũm-bãooneg tus kobessi la pis-nu, bõens tus a yiibu, n paas neb tus koabga.

²²Bãmb tõog n kʋ b bɛɛbã sʋk neb wʋsg tɩ bala, Wẽnnaam meng n zab zabrã. Dẽ, bãmb deega Hagaar nebã tẽnga, n zĩnd be n tãag wakat ning b sẽn tall-b n loog yembdã.

²³A Manaase buudã pʋɩ-sʋk rag n bee tẽngã pʋga, sẽn sɩng ne Basan n tɩ tãag Baall-Hɛrmon ne Seniir la Ɛrmon tãngã. Bãmb dag n yaa wʋsgo.

²⁴B buudã nanambs la woto: yaa a Efɛɛre, a Yiseyi, a Eliyɛlle, a Azriyɛlle, a Zeremi, la a Odaviya ne a Yadiyɛlle, n paas gãndaado, ne nin-kãsems sẽn yaa b buudã kãsem-dãmba.

²⁵La bãmb maana sẽn kisi, n beeg b yaab-rãmbã Wẽnnaam, n paam lagem-n-taar ne tẽms nins Wẽnnaam sẽn dag n sãam bãmb nifẽ wã wẽnnaam-dãmba.

²⁶Israyɛll Wẽnnaamã pirsa Asiiri rĩm a Pulli, ne Asiiri rĩm a Tɩlgat-Pilnezɛɛre, n kɩt t'a Tɩlgat-Pilnezɛɛr yõg Rubɛn nebã ne Manaase buudã pʋɩ-sʋk n tɩ kẽes yembdo. A tall-b lame n kẽng Hala, Haboore, Haara, Gozan kʋɩlgã noore, la b keta beenẽ n tãag rũndã.

²⁷A Leevi kom-dibli la woto: yaa a Gɛrson ne a Kehat la a Meraari.

²⁸A Kehat kom-dibli yaa a Aram, a Yitsaare, a Ebrõ ne a Uziyɛlle.

²⁹A Amram kom-dibli yaa a Aarõ, a Moyiisi, ne a Miryam. A Aarõ kom-dibli yaa a Nadaabe, a Abiyu, a Eleyazaare, ne a Itamaare.

³⁰A Eleyazaar doga a Fineyaase, t'a Fineyaas rog a Abisuwa,

³¹t'a Abisuwa rog a Buki, t'a Buki rog a Uuzi,

³²t'a Uuzi rog a Zeraya, t'a Zeraya rog a Merayote,

³³t'a Merayot roga a Amariya, t'a Amariya rog a Akituube,

³⁴t'a Akituub rog a Sadoke, t'a Sadok rog a Ayimaase,

³⁵t'a Ayimaas rog a Azariya, t'a Azariya rog a Yohanan,

³⁶t'a Yohanan rog a Azariya sẽn dag n yaa roog ning a Salmo sẽn dag n me Zeruzalɛm pʋgẽ wã maan-kʋʋda.

³⁷A Azariya roga a Amariya, t'a Amariya rog a Akituube,

³⁸t'a Akituub rog a Sadoke, t'a Sadok rog a Salum,

³⁹t'a Salum rog a Hilkiiza, t'a Hilkiiza rog a Azariya,

⁴⁰t'a Azariya rog a Seraya, t'a Seraya rog a Yehosadake.

⁴¹A Yehosadak looga wakat ning Sẽn-Ka-Saab sẽn kɩt t'a Nebukatnedzaar yõg Zʋʋda ne Zeruzalɛm nebã n tall n kẽng yembdã.