Read SEBR SÕNGO, 1998 2 Kibayã 18 Bible Online

2 Kibayã 18 - SEBR SÕNGO, 1998 bible

2 Kibayã 18

¹A Zozafat paama arzegs la waoogr wʋsgo. La yẽnda yõga reemd ne a Akaabe.

²La yʋʋm bilf sẽn looge, a Zozafat yikame n na n kẽng Samaari n tɩ pʋʋs a Akaabe. Woto, a Akaab kʋʋ piis la niig ka tɛka, a Zozafat ne a poorẽ dãmba fãa yĩnga, la yaa sẽn na n yɩlẽ t'a Zozafat sõng-a t'a tɩ zab ne Ramot tẽngã sẽn be Galaadã.

³Dẽ, Israyɛll dĩm a Akaab soka Zʋʋda dĩm a Zozafat yaa: «Yãmb na n sak n wa tũu maam n kẽng n tɩ zab ne Ramot tẽngã sẽn be Galaadã bɩ?» La a Zozafat yeelame: «N-yẽe! Tõnd na n tũu yãmb n kẽng zabrã. Yãmb zabr yaa mam zabre, la yãmb nebã zabr yaa mam nebã zabre.»

⁴A Zozafat leb n yeela Israyɛll dĩmã yaa: «La mam kot-y lame tɩ y reng n sok Sẽn-Ka-Saab n gese.»

⁵Dẽ, Israyɛll dĩmã tigma a no-rɛɛsdb kobs-naasã n sok-b yaa: «D tog n kẽng n tɩ zaba ne Ramot tẽngã sẽn be Galaadã bɩ, bɩ d tog n basame n ka kẽnge?» La bãmb fãa leokame n yeele: «Kẽng-y tɩ Sẽn-Ka-Saab na n ninga tẽngã rĩma nugẽ.»

⁶La dĩm a Zozafat sokame yaa: «Dẽ yĩnga, Sẽn-Ka-Saabã no-rɛɛs ba a ye ka be ka tɩ tõnd tõe n leb n soka n gese?»

⁷La Israyɛll dĩmã leoka a Zozafat yaa: «Ned a ye n ket tɩ d tõe n sok Sẽn-Ka-Saabã n gese, yaa a Yimla biig a Miise, la mam kis-a lame. Bala, a zɩ n togs maam koɛɛg sẽn noom maam ye, yaa koe-beed bala.» La a Zozafat yeelame yaa: «Bɩ rĩma ra gom woto ye.»

⁸Dẽ, Israyɛll dĩmã boola a sõgen a ye n yeel-a t'a bool a Yimla biig a Miise t'a wa tao-tao!

⁹Israyɛll dĩmã ne Zʋʋda dĩmã dag n yeelga b naam futu, la bãmb ned kam fãa dag n zaoo a naam geer n be zĩ-vɩʋʋg ning sẽn be Samaari tẽngã noorã. La bãngdbã rag n yɛsa b taoore n gomd b bãngrã goamã.

¹⁰A Kenaana biig a Sedesiyaas dag n kuda kut yɩɩla, la a yeelame: «Ad Sẽn-Ka-Saab sẽn yeta: ‹Ne yɩɩn-bãmbã, fo na n tãa Siiri nebã hal n kʋ-b zãnga.› »

¹¹La bãngdbã fãa rag n gomda gom-yɛng n yetẽ: «Kẽng-y Ramot tẽngã sẽn be Galaad soolmẽ wã, tɩ y na n tõog-a lame! Sẽn-Ka-Saab na n ning-a-la dĩmã nugẽ.»

¹²Ned ning rĩmã sẽn tʋm t'a tɩ bool a Miise wã yeela a Miise yaa: «Bãngdbã fãa zemsa taab noor a ye n gomd n kãabd dĩmã noogo. Bɩ fo me maan wa bãmba, n gom n kãab rĩma noogo.»

¹³Dẽ, a Miise leok-a lame n yeele: «Mam wẽenda ne Sẽn-Ka-Saab sẽn vɩ wã, tɩ yaa bãmb sẽn na n yeel maam bũmb ninga bal la m na n togse.»

¹⁴A Miise sẽn ta rĩmã nengẽ wã, rĩmã sok-a lame yaa: «Miise, d tog n kẽng n tɩ zaba ne Ramot tẽngã sẽn be Galaad soolmẽ wã bɩ, bɩ m tog n basame n ka kẽnge?» La a Miise leokame n yeele: «Kẽng-y tɩ y na n tõogame! La Sẽn-Ka-Saab na n kɩtame tɩ reeg tẽmsã.»

¹⁵La rĩmã yeela a Miise yaa: «Naoor a wãn la m na n kɩt tɩ f wẽen tɩ f na n togs-m-la sɩd Sẽn-Ka-Saab yʋʋrã yĩnga?»

¹⁶Dẽ, a Miise leokame n yeel yaa: «Mam yãnda Israyɛll nebã gill sẽn sãeeg tãmsã zutu, wa piis sẽn ka tar pe-kɩɩm ye. La Sẽn-Ka-Saab yeelame: Nin-bãmbã ka leb n tar Soaal ye. Bɩ ned kam fãa lebg n kuil a yir ne bãane.»

¹⁷Israyɛll dĩmã yeela a Zozafat yaa: «M dag n ka pĩnd n yeel yãmb tɩ nin-kãngã zɩ n togs maam koɛɛg sẽn noom tɩ sã n ka koe-beed bala?»

¹⁸Dẽ, a Miise yeelame: «Bɩ y kelg-y Sẽn-Ka-Saab koɛɛga. M yãnda Sẽn-Ka-Saab tɩ b zao b geerẽ wã, tɩ saasẽ tãb-biisã yɛs b goabg la rɩtgo.

¹⁹La Sẽn-Ka-Saab sokame: ‹Ãnda n na n belg Israyɛll dĩm a Akaabe, t'a kẽng Ramot tẽngã sẽn be Galaad soolmẽ wã n tɩ ki.› La ned n leok gomde, t'a to me leok gomd a to.

²⁰Woto, sɩɩg n wa n kolg Sẽn-Ka-Saab taoor n yeele: ‹maam n na n tɩ belg-a!› La Sẽn-Ka-Saab sok-a lame yaa: ‹Fo na n maana wãn-wãn n belg-a?›

²¹Tɩ sɩɩgã yeele: ‹M na kẽngame, la m na n lebga zĩrẽ-beed sɩɩg a bãngdbã fãa noyẽ.› Dẽ, Sẽn-Ka-Saab yeel-a lame yaa: ‹Sã n yaa woto, f na n belg-a lame, la f na n tõog n tudg-a lame, kẽng n maan a boto!›

²²La a Miise leb n yeelame: ‹Ade, Sẽn-Ka-Saab basame tɩ zĩrẽ-beed sɩɩg kẽ y bãngdbã tɩ b gomda, la b yaool n yãka yam n na maan yãmb wẽnga.› »

²³Dẽ, la a Kenaana biig a Sedesiyaas kolg n wẽ a Miise noorã n yeele: «Yaa so-bʋg la Sẽn-Ka-Saab Sɩɩgã tũu n yi mam pʋgẽ wã n wa be fo pʋgẽ n gomda?»

²⁴La a Miise yeelame: «Fo sẽn n wat n zoet n kẽed ro-yaang n na n soondã la f na n bãnge.»

²⁵Woto, Israyɛll dĩmã yeelame yaa: «Yõk-y-yã a Miise, n tɩ kɩs tẽngã komber a Amo, la na-biig a Zoaase.

²⁶La y yeel-b yaa: ‹Dĩmã koɛɛg la woto: Kẽes-y nin-kãngã roogo, la y kõt a bur la koom bala, n gũud m sẽn na n lɛɛg n wa ne bãane.› »

²⁷La a Miise yeelame: «Yãmb sã n tɩ paam tõogr n lebg n wa, rẽnd Sẽn-Ka-Saab ka gom ne mam noor ye.» La a leb n yeel yaa: «Nebã fãa, bɩ y kelge.»

²⁸Dẽ, Israyɛll dĩmã, ne Zʋʋda dĩm a Zozafate, kẽng n na n tɩ zaba ne Ramot tẽngã sẽn be Galaad soolmẽ wã.

²⁹La Israyɛll dĩmã yeela a Zozafat yaa: «Ade, mam na n toeema fut n kẽng zabrã, la ne yãmba, bɩ y yeelg-y y naam fuugu.» Dẽ, Israyɛll dĩmã sɩd teema futu, tɩ b kẽng zabrã.

³⁰La Siiri dĩmã yaool n dag n kõ-a saar-dãmbã nanambs no-kãnga: «Da bao-y n na n zab-y ne nin-naaba, bɩ nin-zaalg ye, zab-y ne Israyɛll dĩmã bala.»

³¹Dẽ, saar-dãmbã nanambse sẽn yãnd a Zozafatã, b yeelame: «Yaa Israyɛll dĩmã!» La woto, b fãa wẽnemdame n tɩ gũbg a Zozafate. La a Zozafat kelmame, la Sẽn-Ka-Saab wa sõng-a lame n kɩt tɩ b zãag n bas-a.

³²Bala, bãmb sẽn bãng tɩ ka Israyɛll dĩmã yĩnga, b loogame n bas-a.

³³La rao a yembr n waa n yãag a tãp n tão yaare tɩ yõk Israyɛll dĩmã kutã fuug sogbã zĩigẽ wã. Dẽ, dĩmã yeela sẽn tɛt-a saarã yaa: «Wẽnemd tɩ m yi zabrã sʋka, tɩ m paama sãmpogre.»

³⁴Zabrã wɩnga wʋsg badaare, la Israyɛll dĩmã kell n yalsa yĩngr a saarã pʋg hal tɩ ta zaabr Siiri nebã taoore, la wĩndgã lʋɩɩs wakate, yẽnda kiime.