Read SEBR SÕNGO, 1998 2 Kibayã 24 Bible Online

2 Kibayã 24 - SEBR SÕNGO, 1998 bible

2 Kibayã 24

¹A Zoaas sẽn wa n na deeg naamã t'a tara yʋʋm a yopoe, la yẽnda zĩnda Zeruzalɛm n dɩ naamã yʋʋm pis-naase. A Zoaas ma wã yʋʋr dag n boondame t'a Sɩvya n yit Bɛɛrseba.

²Maan-kʋʋd a Zehozada vɩɩmã fãa tɛka, a Zoaas maana sẽn noom Sẽn-Ka-Saabo.

³Maan-kʋʋd a Zehozada baoo pagb a yiib n kõ a Zoaase, la a roga kom-dibli, la kom-pugli.

⁴Dẽ zugẽ, a Zoaas yãka yam n na n maneg Sẽn-Ka-Saab roogã.

⁵Woto, yẽnda tigma maan-kʋʋdbã ne Leevi nebã n yeel-b yaa: «Saag-y Zʋʋda tẽmsã fãa pʋsẽ yʋʋmd fãa, n deeg ligd Israyɛll nebã fãa nengẽ, tɩ yʋʋmd fãa, bɩ y manegdẽ y Wẽnnaamã roogo, la maan-y tao-tao!» La Leevi nebã ka maan tao-tao ye.

⁶Dẽ, rĩm boola maan-kʋʋd kãsem a Zehozada n yeel-a yaa: «Bõe yĩng tɩ fo ka kɩt tɩ Leevi nebã saag Zʋʋda pʋgẽ n dees yaood ning a Moyiis ne Israyɛll nebã sẽn dag n lugl Sɛk roogã yĩngã.

⁷Bala, sã n yaa ne nin-wẽng a Atali, pʋg-kãngã kambã wurga Wẽnnaam doogã n kẽ n wʋk Sẽn-Ka-Saab roogã teed nins sẽn welg toorã n kõ Baall-dãmbã wẽn-naandsã.»

⁸Dẽ, rĩmã kɩtame tɩ b maan koglg n dɩgl Sẽn-Ka-Saab zakã noor yɩngã,

⁹la a kɩt tɩ b moon Zʋʋda ne Zeruzalɛm pʋgẽ, tɩ b tall yaood ning Wẽnnaam tʋmtʋmd a Moyiis sẽn dag n vigl Israyɛll nebã yĩng we-raoogẽ wã, n wa kõ Sẽn-Ka-Saabo.

¹⁰Nanambsã ne nin-buiidã fãa maana sũ-noogo, la b talla ligd yaoodgã n wa ning koglgã pʋg hal tɩ pidi.

¹¹La wakat ning Leevi nebã sẽn wat n yãnd tɩ ligdã lebga wʋsg tɩ b tog n tall n kẽng rĩmã yel-gɛtã nengẽ wã sẽn ta, rĩmã seb-gʋndã, ne maan-kʋʋd kãsmã yel-gɛtã watame n vaag ligdã koglgã pʋgẽ, la b tall koglgã n tɩ lebs a zĩigẽ. La bãmb dag n maanda woto daar fãa, la b paama ligd wʋsgo.

¹²Dẽ, rĩmã ne a Zehozada rɩka ligdã n kõ neb nins sẽn get-b Sẽn-Ka-Saab roogã tʋʋmdã yelle, la bãmb talla ligd-kãens n yao kug-pɛɛsdbã, la ra-wãadbã, tɩ b tõe n lebs Sẽn-Ka-Saab roogã a zĩigẽ, la sẽn tʋmd-b kutã, la ne sẽn tʋmd-b zũud tʋʋmã, tɩ b tõe n lebs n maneg Sẽn-Ka-Saab roogã.

¹³Tʋmtʋmdbã sɩnga tʋʋmdã, la tʋʋmã kẽnga taoor b nugẽ. Bãmb kell n manega Sẽn-Ka-Saab roogã n paas-a pãnga.

¹⁴Bãmb sẽn tʋm n sɛ, b rɩka ligdã sẽn kellã n tɩ kɩs rĩmã, ne a Zehozada. La b rɩkame n maan teed Sẽn-Ka-Saab roogã yĩnga: teed nins sẽn na n maand tʋʋmdã, maand sẽn yõogd bugum teedo, ne la-bãoonego, la sãnem ne wanzuri lagd a taaba. A Zehozada vɩɩmã tɛk fãa, b rag n maanda maand sẽn yõogd bugum wakat fãa Sẽn-Ka-Saab roogã pʋga.

¹⁵A Zehozada kʋʋla wʋsg n yaool n ki. La a sẽn wa n na n ki wã t'a rag n tara yʋʋm koabg la pis-tã.

¹⁶La b mum-a-la a Davɩɩd tẽngã pʋg ne rĩm-dãmb a taabã. La yaa yẽnda sẽn maan neer Israyɛll yĩngã, la ne Wẽnnaam ne b roogã yĩngã.

¹⁷A Zehozada kũumã zugẽ, Zʋʋda nanambsã wa n wõgemda rĩmã taoore, la rĩmã sak n kelga b koɛɛgã.

¹⁸Bãmb basa Sẽn-Ka-Saab sẽn yaa bãmb yaab-rãmbã Wẽnnaamã roogo, n waoog a Aseera ra-lugdsã, la wẽn-naands a taaba. Sẽn-Ka-Saab sũurã puug ne Zʋʋda la Zeruzalɛm nebã.

¹⁹Dẽ, Sẽn-Ka-Saab tʋma b no-rɛɛsdb bãmb sʋka, tɩ b tɩ keoog-ba, sẽn na n yɩlẽ tɩ b lebg n wa tũ bãmb a Sẽn-Ka-Saabo, la b ka kelg ye.

²⁰Woto, Wẽnnaam Sɩɩgã kẽe maan-kʋʋd a Zehozada biig a Zakari, t'a yik n yals nebã fãa taoor n yeel yaa: «Yaa bõe tɩ yãmb kɩɩsd Sẽn-Ka-Saab tõodã? Ade, yãmb ka na n tõog ye! La yãmb sẽn bas Sẽn-Ka-Saabã yĩnga, bãmb me na n basa yãmba.»

²¹Dẽ, bãmb seda ne taaba, la rĩmã kõo bãmb noor tɩ b lob-a ne kug n kʋ Sẽn-Ka-Saab roogã zak pʋga.

²²Woto, rĩm a Zoaas kɩtame tɩ b kʋ maan-kʋʋd a Zehozada a biig a Zakari n ka tẽeg maan-neer ning a ba wã sẽn dag n maanã ye. A Zakari sẽn wa n na n ki wã, a yeelame yaa «Bɩ Sẽn-Ka-Saab gese, la b sɩbge.»

²³Yʋʋmd sẽn vẽke, Siiri tẽngã tãb-biis kẽng n na n tɩ zaba ne a Zoaase, la bãmb waa Zʋʋda ne Zeruzalɛm tẽngã, n yõg nanambsã fãa n kʋ, la b wʋk tẽngã paoong fãa n tɩ kõ Damaas rĩmã.

²⁴Siiri tãb-biisã rag n ka waoog ye. La baoosgo, Sẽn-Ka-Saab kɩtame tɩ bãmb tõog a Zoaas tãb-bi-kʋʋngã. Bala, bãmb basa Sẽn-Ka-Saab sẽn yaa bãmb yaab-rãmbã Wẽnnaamã. Woto Siiri nebã sɩbga a Zoaase.

²⁵La Siiri nebã sẽn wa n loog n bas a Zoaasã, t'a rag n gãee ne toogo. La yẽnda meng sõgen-kambã seda ne taab n yik n kʋ-a a gãagã zugu, yẽnda sẽn kʋ maan-kʋʋd a Zehozada kom-dibli wã yĩnga. La b muma yẽnda a Davɩɩd tẽngã pʋga, la b ka ning yẽnda rĩm-dãmbã yaadẽ ye.

²⁶Ad neb nins sẽn sed-b ne taab n kʋ a Zoaasã: Yaa a Amo ned a Simeyat biig a Zabaade, la Moaab ned a Simrit biig a Zozabaade.

²⁷A Zoaas kambã kibare, ne pĩnd-n-bãngr goam nins b sẽn dag n gom n keoog-a wã, a sẽn yaoolg nebã to-to wã, ne a sẽn maneg Wẽnnaam doogã. Bõn-kãens fãa gʋlsa rĩm-dãmbã vɩɩm kibayã sebr pʋga. Yẽnda biig a Amatsɩya leda yẽnda zĩigẽ n lebg rĩma.