Read SEBR SÕNGO, 1998 2 Kibayã 26 Bible Online

2 Kibayã 26 - SEBR SÕNGO, 1998 bible

2 Kibayã 26

¹Zʋʋda nebã naaga taab n yãk a Oozɩyaas sẽn dag n tar yʋʋm piig la a yoobã, n kɩt t'a lebg rĩm n led a ba a Amatsɩya zĩigẽ.

²Yɩɩ a Oozɩyaas n tõog n lebs n me Elat tẽngã n kɩt t'a leb Zʋʋda soolem, rĩm a Amatsɩya sẽn ki n bʋʋg a saam-dãmbã zugẽ.

³A Oozɩyaas sẽn wa n na n deeg naamã t'a rag n tara yʋʋm piig la a yoobe, la yẽnda rɩɩ naamã yʋʋm pis-nu la a yiib Zeruzalɛm. Yẽnda ma wã yʋʋr la Yekoliya n yaa Zeruzalɛm bi-pugla.

⁴Yẽnda maana sẽn yaa tɩrg Sẽn-Ka-Saab nifẽ. Yẽnda kell n maana wa a ba a Amatsɩya sẽn dag n maanã.

⁵A Oozɩyaas baoo Wẽnnaam a Zakari vɩɩmã tɛka. A Zakari yaa ned sẽn dag n tar Wẽnnaam vẽnegr bãngre. La wakat ninga a Oozɩyaas sẽn dag n baood Sẽn-Ka-Saabã sasa, Sẽn-Ka-Saab dag n sõngd-a lame.

⁶A Oozɩyaas kẽng n tɩ zaba ne Filistẽ-dãmbã, n wã Gate, ne Yabne la Asdood lalsã. La yẽnda maneg n mee tẽms Asdood pʋgẽ, ne Filistẽ-dãmbã soolem pʋga.

⁷Wẽnnaam sõnga yẽnda t'a zab ne Filistẽ-dãmbã, ne Araab-rãmb nins sẽn be Gʋʋr-baalã, la Mawõ tẽngã nebã n tõoge.

⁸La Amo nebã me rag n yaooda a Oozɩyaas yõor yaoodo, la yẽnda yʋʋrã da zẽkame n saag n ta hal Ezɩpte, bala, a pãngã rag n lebga wʋsgo.

⁹A Oozɩyaas mee gãs-bɛd Zeruzalɛm lalgã zugu. Yaa tẽngã rignoorẽ wã, la rignoor ning sẽn be lal-gõdrẽ wã, ne rignoor ning sẽn teesa tãn-longã, la lalgã pẽkẽ dignoorã zugu. La a paas-b-la pãnga.

¹⁰La yẽnda mee gãsd we-raoogẽ wã, la a tu buls wʋsgo, bala, yẽnda rag n tara rũms wʋsg kũnkubã ne zĩ-lamsẽ. A Oozɩyaas rag n tara ka-koaadb londã, la bãadã pʋse, la tar reezẽ tɩɩs pʋt Karmell tãngã zugu, tɩ neb gũudẽ. Sɩdã, yẽnda rag n nonga koobo.

¹¹A Oozɩyaas rag n tara tãb-biis sẽn mi zabr sõama n tõe n zabe. La b rag n weela bãmb sull-sull sõadg ning seb-gʋnd a Yeyiyɛlle, la seb-gʋnd a Maseya sẽn sõd sõadgã wakatã. La yaa a Hananiya sẽn yaa rĩmã nanambg a yembrã n dag n so bãmba.

¹²La nanambs nins sẽn dag n so-b tãb-bi-gãndaadã sõor yaa tus a yi la kobs yoobe.

¹³La bãmb dag n soo tãb-biis tus kobs-tã la a yopoe la kobs-nu, sẽn tõe n zab ne pãng la raood n sõng rĩmã n zab ne a bɛɛbã.

¹⁴A Oozɩyaas kõ-a tãb-biisã fãa gãndo, kãna, kut-pugli, gãn-tigsi, tãbdo, la loobse.

¹⁵Yẽnda kɩtame tɩ tʋʋm-mitb maan zab teed sẽn yaa bɛd sẽn tõe n tall n tão pɛɛm la lob kug-bɛda. La yẽnda ning-b-la gãsd nins sẽn be b lalgã gõadẽ wã. A Oozɩyaas yʋʋrã zẽkame n saag zĩig fãa, bala, Wẽnnaam sõng-a-la ne sõngr sẽn yaa toor zalle, hal t'a wa tar pãng wʋsgo.

¹⁶La yẽnda sẽn wa n mik t'a pãngã lebga wʋsgã, yẽnda wuka a meng tɩ wa ne a sãoongo. Bala, yẽnda maana sẽn ka zems ne Sẽn-Ka-Saab sẽn yaa yẽnda Wẽnnaamã. Yẽnda kẽe Sẽn-Ka-Saab roogã pʋg n na n yõog tɩdar wisd tẽn-kugrã zugu.

¹⁷Dẽ, maan-kʋʋd a Azariya pʋgla a Oozɩyaas n kẽ ne Sẽn-Ka-Saab maan-kʋʋdb pis-nii sẽn tar sũ-keelem.

¹⁸Bãmb gɩdga rĩmã n yeel-a yaa: «Dĩma Oozɩyaase, ka yãmb n tog n yõog wisd n kõ Sẽn-Ka-Saab ye. Yaa a Aarõ yagensã b sẽn welg toor tɩ b yaa maan-kʋʋdbã bal n tog n maan bõn-kãnga! Bɩ y yi sɛk roogã pʋga, bala, yãmb maanda sẽn ka zemse, la bõn-kãng ka na n yɩ waoogr yãmb yĩng Sẽn-Ka-Saab taoor ye.»

¹⁹Rĩm a Oozɩyaas sẽn wa n zãad wisd yõogr laagã, a sũurã yika ne maan-kʋʋdbã. La wakat ning a sũurã sẽn wa n yik ne maan-kʋʋdbã, wãood n puk a rĩirẽ wã maan-kʋʋdbã taoore, Sẽn-Ka-Saab roogã pʋga, wisd yõogr tẽn-kugrã sɛɛgẽ.

²⁰La maan-kʋʋd kãsmã a Azariya ne maan-kʋʋdb a taabã sẽn wẽnemd n ges yẽnda, b mikame tɩ wãood n be a rĩirẽ wã! Dẽ, bãmb yiis-a-la tao-tao, la yẽnda mengã yãgame na n yi, bala, Sẽn-Ka-Saab meng n sɩbga.

²¹A Oozɩyaas paa ne a wãoodã n tãag a kũum. La yẽnda sẽn dag n yaa wãoorã yĩnga, b ning-a-la kɛɛng n ka leb n bas-a t'a kẽ Sẽn-Ka-Saab roogã pʋg ye. A biig a Zotam n dag n get a zakã yelle, la a soolmã me yelle.

²²A Oozɩyaas tʋʋmã a taabã a sẽn maanã sɩngr n tɩ tãag a baoosgã fãa, yaa Amots biig a Ezayi n gʋlse.

²³A Oozɩyaas kiime n bʋʋg a saam-dãmba, la b mum-a-la toor rĩm-dãmbã yaadẽ, bala, b rag n yetame t'a yaa wãoore.