Read SEBR SÕNGO, 1998 2 Kibayã 28 Bible Online

2 Kibayã 28 - SEBR SÕNGO, 1998 bible

2 Kibayã 28

¹A Akaaz sẽn wa n na n lebg rĩma, t'a tara yʋʋm pisi. La a rɩɩ naamã yʋʋm piig la a yoob Zeruzalɛm. Yẽnda ka maan sẽn tat Sẽn-Ka-Saab yam wala a yaab a Davɩɩd ye.

²Yẽnda maana wa Israyɛll rĩm-dãmbã sẽn dag n maanã, n maan kut wẽn-naands baall yĩnga.

³La yẽnda mengã yõoga wisd Bɛn-Hinom tãn-longẽ wã, la a yõog a kambã bugum, wa buud a taab nins Sẽn-Ka-Saabã sẽn dag n rig Israyɛll nebã taoorã sẽn dag n maand yel-beed ninsã.

⁴Yẽnda maana maoong la a yõog tɩdar maoong kʋʋb zĩisẽ wã, la kunkuba zutu, la tɩ-bɛdã tẽngre.

⁵Rẽ kɩtame, tɩ Sẽn-Ka-Saab sẽn yaa yẽnda Wẽnnaamã kɩt tɩ Siiri rĩmã tõog a Akaaz n yõg a neb wʋsg n tall n kẽng Damaase. La Sẽn-Ka-Saab leb n basame tɩ Israyɛll dĩmã tõog a Akaaze, n kʋ a neb wʋsgo.

⁶A Remaliya biig a Peka kʋʋ Zʋʋda tãb-bi-gãndaad tus koabg la pisi daar a yembre. Bala, bãmb dag n basa Sẽn-Ka-Saab sẽn yaa bãmb ba-rãmbã Wẽnnaamã.

⁷La Efrayiim gãndaoog a Zikri kʋʋ rĩma biig a Maseya, la a Aazrikam sẽn yaa sõgen-kãsengã, ne rĩmã pʋgdga a Ɛlkana.

⁸Israyɛll kambã yõga b saam-biisã neb tus kobs yi. Yaa pagba, kom-dibli, la kom-pugli. La b leb n wʋka b paoong wʋsg n tall n loog Samaari.

⁹La Samaari pʋgẽ wã, Sẽn-Ka-Saab no-rɛɛs a yembr n dag n be beenẽ t'a yʋʋr boondẽ t'a Obɛɛde. Yẽnda yiime n seg Israyɛll tãb-biisã sẽn lebg n wat Samaari wã n yeel-b yaa: «Ade, yaa Sẽn-Ka-Saab sũurã sẽn yik ne Zʋʋda nebã yĩng n kɩt tɩ bãmb bas tɩ yãmb tõog-ba, la yãmb kʋ-b-la ne sũ-yikr sẽn zẽk n tat hal saasẽ.

¹⁰La moasã, yãmb gomdame tɩ y na n dɩka Zʋʋda ne Zeruzalɛm kambã n maan y yembse, la y tʋmtʋmd-pogse! Dẽ yĩnga, yãmb me ka beeg ne Sẽn-Ka-Saab sẽn yaa yãmb Wẽnnaamã sɩda?

¹¹Moasã, bɩ y kelg-y m koɛɛgã, lebs-y yembsã yãmb sẽn yõg y saam-biisã nengẽ wã tɩ b kuili, sã n ka rẽ, Sẽn-Ka-Saab sũurã na n yika ne yãmba.»

¹²Efrayiim nebã nanambs kẽer yika ne sẽn kẽng-b zabrã n lebg n watẽ wã. Yaa a Yohanan biig a Azariya, a Mesilemot biig a Berekɩya, a Salum biig a Ezekɩyaas la a Adlayi biig a Amasa.

¹³Bãmb yeel-b lame: «Da kẽ-y ne y sẽn yõg b rãmba ka ye. Bala, bõn-kãng na n kɩtame tɩ d beeg Sẽn-Ka-Saabo, yãmb sẽn gomdã yaa sẽn paasd tõnd beegrã ne d kongrã, tõnd zoe n tara kongr wʋsgo, la Sẽn-Ka-Saab sũ-puugrã bee Israyɛll zugu.»

¹⁴Woto, tãb-biisã basa yembsã b sẽn dag n yõgã, ne paoongã b sẽn dag n wʋkã kãsem-dãmba taoore, la zãma wã fãa taoore.

¹⁵La neb nins b sẽn pʋd-b yʋy n boolã yikame n bels yembsã. Bãmb dɩka teed nins tãb-biisã sẽn tall n wa wã, n yeelg b rãmb nins sẽn yaa b bɛɛlã, la b kõ-b futu, neooda, rɩɩbo, la b tɩp b noadã, la b rɩk neb nins fãa sẽn dag n ka tõe n kẽna n zombg bõense, n tall-b n kẽng b saam-biisã nengẽ Zeriko sẽn yaa koms tẽngã. Dẽ, bãmb lebg n leba Samaari.

¹⁶Wakat-kãnga, dĩm a Akaaz tʋmame tɩ b tɩ kos Asiiri rĩmã sõngre.

¹⁷Bala, Edom nebã rag n leb n waame n zab ne Zʋʋda nebã n tõog-b n yõg-b neb n looge.

¹⁸La Filistẽ-dãmbã me rag n yiime n tɩ zab ne tẽms nins sẽn be londẽ wã, la Negɛɛv sẽn yaa Zʋʋda soolmã: Yaa Bɛt-Semeese, Ayalõ, Gederote, Soko ne a tẽn-bãoonegã, Timna ne a tẽn-bãoonegã, Gimzo ne a tẽn-bãoonegã, n deeg-b n sooge.

¹⁹Sɩda, rĩm a Akaaz yĩng kɩtame tɩ Sẽn-Ka-Saab ning Zʋʋda nebã yãnde, bala, a Akaaz rag n kɩtame tɩ nebã maan sẽn ka zems ne Sẽn-Ka-Saabo.

²⁰La Asiiri rĩm a Tɩlgat-Pilnezɛɛr sẽn wa wã a basa a Akaaz sõngr n zab ne-a.

²¹La a Akaaz kong n yãka Sẽn-Ka-Saab roogã teedã, ne na-yirã, la a Kug-zĩidbã zakẽ teedã, n kõ Asiiri rĩma, la baoosg zãnga rẽ ka sõng-a ye.

²²La yẽnda sẽn wa n be toogã pʋgã, a kell n maana sẽn ka zems n beeg ne Sẽn-Ka-Saab n paase.

²³A Akaaz maana maoong n kõ Damaas nebã sẽn tõog yẽnda wã wẽn-naands n yeel yaa: «Siiri nebã wẽn-naandsã sẽn sõngd-bã yĩngã, mam me na n maana maoong n kõ-b tɩ b wa sõng-ma.» La yaa wẽn-naands bãmb n wa ne a Akaaz ne Israyɛll nebã sãoongo.

²⁴A Akaaz wʋka Wẽnnaam doogã teed fãa n pãb n wã, la a pag Sẽn-Ka-Saab roogã kʋɩlemsã, la a maan tẽn-kug n ning Zeruzalɛm so-yagsã fãa zutu.

²⁵Yẽnda maana maoong kʋʋb zĩis Zʋʋda tẽmsã fãa pʋsẽ, n na n yõog tɩdar n kõt buud a taabã wẽnnaam-dãmbã, yẽnda maana woto n beeg Sẽn-Ka-Saab sẽn yaa yẽnda yaab-rãmbã Wẽnnaamã.

²⁶A Akaaz tʋʋm a taabã fãa ne bũmb ning fãa, a sẽn maanã, a sɩngr ne a baoosg fãa gʋlsa Zʋʋda ne Israyɛlle, rĩm-dãmbã sebr pʋga.

²⁷A Akaaz kiime n bʋʋg a saam-dãmba, la b muma yẽnda Zeruzalɛm tẽngã pʋga, la ka yɩ rĩm-dãmbã yaadẽ ye. La a biig a Ezekɩyaas leda yẽnda zĩigẽ n dɩ naamã.