Read SEBR SÕNGO, 1998 2 Kibayã 29 Bible Online

2 Kibayã 29 - SEBR SÕNGO, 1998 bible

2 Kibayã 29

¹A Ezekɩyaas sẽn wa n na n lebg rĩma, t'a tara yʋʋm pisi la nu. La a rɩɩ naamã yʋʋm pisi la a wɛ Zeruzalɛm. La yẽnda ma wã yʋʋr dag n boondame t'a Abiya, n yaa a Zakari bi-pugla.

²A Ezekɩyaas maana sẽn yaa neer Sẽn-Ka-Saabã nifẽ, wa a yaab a Davɩɩde.

³La yẽnda sẽn deeg a naamã pipi yʋʋmdã pipi kiuugã, yẽnda pagsa Sẽn-Ka-Saab roogã kʋɩlemsã n lebs-b n manege.

⁴La yẽnda boola maan-kʋʋdbã ne Leevi nebã, n tigs-b zĩ-yaleng ning sẽn be yaang kɩrengã.

⁵A Ezekɩyaas yeel-b lame yaa: «Leevi nebã, kelg-y-yã! Yɩlg-y y mense, la y yɩlg Sẽn-Ka-Saab sẽn yaa yãmb ba-rãmbã Wẽnnaamã roogã, la y yiis rẽgd buud fãa zĩ-sõngã pʋgẽ.

⁶Bala, tõnd ba-rãmbã maana sẽn kisi, bãmb dag n maana sẽn ka noom Sẽn-Ka-Saab sẽn yaa tõnd Wẽnnaamã sũuri, bãmb wẽnemd n basa Sẽn-Ka-Saab roogã, n tud-a b kuidga.

⁷Bãmb n tol n kiisa fɩtl-dãmbã bugum, la b pag ro-yɩngã rignoyã, n bas n ka leb n yõogd tɩdare, la b ka leb n maand maoong sẽn yõogd bugum zĩ-sõngã pʋgẽ.

⁸Rẽ kɩtame tɩ Sẽn-Ka-Saab sũurã puug ne Zʋʋda, ne Zeruzalɛm n kɩt tɩ b lebg yel-beed la rabeem bũmbu, wa yãmb sẽn ne t'a yaa a soab rũndã wã.

⁹Yaa rẽ n kɩte, tɩ b kʋ tõnd ba-rãmbã ne zabr sʋʋga, la b yõg d kom-dibli wã, ne d kom-pugli wã, la d pagbã n loog yembdã.

¹⁰Moasã mam dat n maana kaool ne Sẽn-Ka-Saab sẽn yaa Israyɛll Wẽnnaamã, tɩ bãmb tõe n zãag b sũ-puugrã ne-do.

¹¹Woto yĩnga, m kamba, da leb-y n lak-y ye. Bala, yaa yãmb la Sẽn-Ka-Saab yãk tɩ y yals bãmb taoor n tʋm n kõ bãmba, la y waoog bãmba, la y yõogd tɩdar bãmb yĩnga.»

¹²Dẽ, Leevi nebã yikame: A Kehat pendẽ wã, yaa Amasayi biig a Maata, ne a Azariya biig a Zowɛlle, sã n yaa ne a Meraari pendẽ wã, yaa Abdi biig a Kiisi, ne a Yeyalelɛll biig a Azariya, a Gerson pendẽ wã, yaa Zima biig a Zoa, la a Zoa biig a Edɛn.

¹³A Elisafan kamba sʋka yaa: a Simri ne a Yeyiyɛlle. A Azaf kambã sʋka: yaa a Zakari ne a Mataniya.

¹⁴A Eman kamba sʋka: yaa a Yekiyɛll ne a Simeyi, a Yedutun kamba sʋka: yaa a Semaya ne a Uziyɛlle.

¹⁵Bãmb tigma b saam-biisã, tɩ b yɩlg b mense. Dẽ poore, bãmb saka rĩmã noor n kẽng n tɩ yɩlg Sẽn-Ka-Saab roogã, wa Sẽn-Ka-Saab sẽn dag n gom bũmb ningã.

¹⁶Dẽ, maan-kʋʋdbã kẽe Sẽn-Ka-Saab roog pʋgẽ, n na n yɩlg-a. La bãmb yiisa bũmb nins fãa b sẽn yãnd Sẽn-Ka-Saab doogã pʋgẽ, tɩ yaa bõn-dẽgdã n dʋʋg zakã pʋga. La Leevi nebã wʋk-b lame n tɩ lob Sedrõ ko-soogẽ wã.

¹⁷Leevi nebã sɩnga Sẽn-Ka-Saab roogã zak yɩlgr pipi kiuugã pipi daare, la a rasem a nii wã daare, bãmb taa Sẽn-Ka-Saab roogã ro-yɩngã. La bãmb tʋma roogã yɩlgr tʋʋmd rasem a nii, la yaa bãmb sẽn sɩng tɩ rasem piig la yoob yĩng la b sɛ roogã.

¹⁸Dẽ poore, bãmb kẽe rĩm a Ezekɩyaas nengẽ n tɩ yeel-a yaa: «Tõnd yɩlga Sẽn-Ka-Saab roogã fãa, maoong sẽn yõogd bugum tẽn-kugrã, ne a teedã fãa, la kaset taablã ne a teedã fãa n sɛ,

¹⁹Tõnd manega teed nins rĩm a Akaaz naamã wakat a sẽn maan sẽn ka zems n yiis Sẽn-Ka-Saab roogã pʋgã n yɩlge, rẽ la sẽn dɩg Sẽn-Ka-Saab tẽn-kugrã taoorã.»

²⁰La rĩm a Ezekɩyaas yika yibeoog pĩnda, n tigs a tẽngã taoor dãmb tɩ b kẽng Sẽn-Ka-Saab roogẽ wã.

²¹Bãmb waa ne lols a yopoe, pe-raad a yopoe, pe-ribli a yopoe, n paas boees a yopoe yel-wẽnã sugr kosg maoong rĩma zak yĩnga, la zĩ-sõngã, ne Zʋʋda nebã fãa yĩnga. La yẽnda yeela maan-kʋʋdbã sẽn yaa a Aarõ yagensã tɩ b maan maoongã tẽn-kugrã zugu.

²²Maan-kʋʋdbã kʋʋ rũm-bɛdã n yãk b zɩɩmã n tɩ ning tẽn-kugrã zugu. Bãmb kʋʋ pe-raadã n yãk b zɩɩmã n tɩ ning tẽn-kugrã zugu, la b kʋ pe-ribli wã me n yãk b zɩɩmã n tɩ ning tẽn-kugrã zugu.

²³La bãmb talla boeesã n kẽng rĩmã ne zãma wã taoore, tɩ b tẽeg b nus b zutu.

²⁴Maan-kʋʋdbã kood-b lame n daag b zɩɩmã tẽn-kugrã zugu tɩ yɩ sugr kosg maoong Israyɛll nebã fãa yĩnga. Bala, rĩmã rag n yeelame tɩ maoong sẽn yõogd bugmã, ne sugr kosg maoongã yaa Israyɛll gillã fãa yĩnga.

²⁵Bãmb ninga Leevi nebã Sẽn-Ka-Saab roogã pʋg ne kɛma, kʋla, pendse, wa Sẽn-Ka-Saab sẽn dag n wilg yãt a Gaad ne a no-rɛɛs a Natã tɩ b rag n wilg a Davɩɩdã.

²⁶Leevi nebã sẽn wa n dɩk b zĩisã ne a Davɩɩd yʋʋm-teedã n sɛ wã, tɩ maan-kʋʋdbã me yasa ne b tãntãadã.

²⁷Rĩm a Ezekɩyaas kõo noor tɩ b kʋ maoong sẽn yõogd bugmã tẽn-kugrã zugu. La b sẽn sɩng maoongã kʋʋbã, la Sẽn-Ka-Saab yɩɩlã me sẽn sɩnge, tɩ tãntãadã peebdẽ, tɩ kɛmã wẽedẽ, tɩ pɛndgã la ruudgã wãagdẽ, wa Israyɛll rĩm a Davɩɩd sẽn dag n viglã.

²⁸Zãmã wã fãa wõgemdame, la b rag n yɩɩndame, tɩ tãntãadã peebdẽ, hal tɩ b wa n maan maoong sẽn yõogd bugmã n sɛ.

²⁹La b sẽn maan maoongã n sɛ, dĩmã ne a poorẽ dãmb yĩgimdame, n wõgemde.

³⁰Dẽ poore, dĩm a Ezekɩyaas ne nanambsã yeela Leevi nebã tɩ b waoog Sẽn-Ka-Saab ne a Davɩɩd yɩɩlã, la ne yãt a Azaf yɩɩlã. Woto, bãmb waooga Sẽn-Ka-Saab ne sũ-noogo, la b yĩgimdi, n wõgemde.

³¹A Ezekɩyaas zẽka a koɛɛg n yeel yaa: «Moasã, yãmb sẽn dɩk y mens n kõ Sẽn-Ka-Saabã, bɩ y kolg ne y lagem-n-taar maandã, la y bark pʋʋsg maandã.» Woto, zãma wã talla lagem-n-taar maandã, ne b bark pʋʋsg maandã n wa, la neb nins fãa sẽn dat n kõ ne yamleoogã waa ne maoong sẽn yõogd bugum rũmsi.

³²Maand sẽn yõogd bugmã rũms nins zãmã wã sẽn tall n wa wã yɩɩ niig pis-yopoe, pe-raad koabga, pe-ribli kobs-yi, la b rɩka fãa n maan maand sẽn yõogd bugum Sẽn-Ka-Saab yĩnga.

³³Maand a taab nins b sẽn kõ wã yɩɩ niig kobs-yoobe, la piis tus a tã.

³⁴La Maan-kʋʋdbã sõor sẽn dag n paood tɩ b ka tõe n sɩɩg maandã fãa wã, b kɩtame tɩ Leevi nebã sõng-b hal tɩ fãa wa sɛ, la tɩ maan-kʋʋdbã fãa me yɩlg b mens n sɛ. Sɩda, Leevi nebã wilga b ratmã, bãmb sẽn deng maan-kʋʋdbã n yɩlg b mensã yĩnga.

³⁵Bala, maand nins sẽn yõogd bugmã, ne laafɩ maandã kaamã rag n yaa wʋsgo. Yɩɩ woto la b lebg n lebs tʋʋm nins sẽn maand Sẽn-Ka-Saab roogẽ wã a zĩigẽ.

³⁶Rĩm a Ezekɩyaas ne nebã maana sũ-noog ne Wẽnnaam sẽn dag n segl bũmb ning fãa nebã yĩngã, bala, bõn-kãng fãa maana wakat-yɛnga.