Read SEBR SÕNGO, 1998 2 Kibayã 3 Bible Online

2 Kibayã 3 - SEBR SÕNGO, 1998 bible

2 Kibayã 3

¹A Salmo sɩnga Sẽn-Ka-Saab roogã meeb Zeruzalɛm, Moriiza tãngã zugu, Zebu raoa a Orma zɛɛgẽ wã, zĩig ning yẽnda ba a Davɩɩd sẽn dag n seglã. Yaa zĩ-kãng la Sẽn-Ka-Saab Malɛɛkã sẽn da vẽneg a meng ne a Davɩɩde.

²La yaa a Salmo sẽn deeg a naamã tɩ yʋʋm naaslẽ, kiuug a yiib soabã rasem a yiib daar la a sɩng roogã meebo.

³Ad a Salmo sẽn yẽbg Wẽnnaam doogã to-to: A woglmã yaa kãntɩɩg pis-yoobe t'a yalmã yaa kãntɩɩg pisi wa pĩnd dãmbã kãntɩ-makdgã

⁴La a ro-pʋg ning sẽn be-a noorẽ wã woglem yaa kãntɩɩg pisi, n zems wa roogã yalmã, la zãntlmã rag n yaa kãntɩɩg koabg la pisi. A Salmo bolga roogã pʋg fãa ne sãnem halaale.

⁵La yẽnda rag n luda ro-bedrã pʋg zãng ne oliiv tɩɩs raado, n bolg-a ne sãnem halaale, n ning koms vãad la yãmd roogã lalg zugu.

⁶La yẽnda nagsa roogã ne kug-neeb buud toor-toore, la sãnemã rag n yita parvayim tẽngã.

⁷Rĩm a Salmo kɩtame tɩ b bolg roogã, ne a ra-lugdsã, la rigno-kogsã, ne lalsã, la rignoorã kʋɩlemsã ne sãnem. La a kɩtame tɩ b gʋl serubẽ rãmb lalsã zutu.

⁸La roogã pʋgẽ, yẽnda maana zĩig sẽn yaa zĩig sẽn welg toor n yɩɩd fãa, t'a woglmã rag n yaa kãntɩɩg pisi wa sẽn zems roogã yalmã, t'a yalmã rag n yaa kãntɩɩg pisi. La b bolga roogã pʋg gill fãa ne sãnem halaal talã tus-pisi.

⁹La sãnemã kaads nins b sẽn tall n ka roogã zɩslem rag n taa kɩlo pʋɩ-sʋka, la yẽnda bolga yɩng ro-pʋsã fãa me ne sãnem.

¹⁰La yẽnda maana serubẽ-rãmb a yiib n bolg b zãng ne sãnem n ning zĩig sẽn welg toor n yɩɩdã pʋgẽ

¹¹Serubẽ-rãmbã pɩgs fãa woglem dag n yaa kãntɩɩg pisi. Pipi soabã pɩgsr woglem sẽn yaa kãntɩɩg a nu wã rag n sɩɩsda roogã lalga, tɩ pɩgsr a yembrã me woglem sẽn yaa kãntɩɩg a nu wã sɩɩsd serubẽ a yembrã pɩgsre.

¹²La serubẽ fãa rag n tara pɩgs a yiib sẽn tẽege, tɩ pɩgsr fãa woglem yaa kãntɩɩg a nu, pɩgsr a yembr n dag n sɩɩs roogã lalga, t'a yembrã sɩɩsd serubẽ a to wã pɩgsre.

¹³La bãmb b yiibã fãa pɩgsã sẽn tẽegã woglem rag n taa kãntɩɩg pisi. Serubẽ-rãmbã rag n yasa yĩngr tɩ b nensã wẽnemd n get roogã sẽnẽ.

¹⁴Yẽnda kɩtame tɩ b wʋg fu-lillidgã ne gĩs sẽn yaa kẽeg haoo, la gĩs moaama, ne gĩs miuudu, la lamd gĩs-bãanega, n kãd serubẽ-rãmb a zugu.

¹⁵Yẽnda kɩtame tɩ b lugl da-lugds a yiib roogã noore, la ra-lugdg fãa woglem rag n taa kãntɩɩg pis-tã la nu, la pugli wã sẽn dag n be ra-lugdsã zutã, a yembr fãa rag n taa kãntɩɩg a nu.

¹⁶La a kɩt tɩ b maan kut yãmd n ning ra-lugdsã zutu. La a kɩt tɩ b maan gernaad biis koabg n ning yãmdã zutu.

¹⁷Yẽnda lugla ra-lugds a yiibã Sẽn-Ka-Saab roogã noore, a yembr dɩtgo a yembr goabga. La yẽnda pʋda rɩtg soabã tɩ Yakĩn[1], la a pʋd goabg soabã tɩ Boaaze[2].