Read SEBR SÕNGO, 1998 2 Kibayã 34 Bible Online

2 Kibayã 34 - SEBR SÕNGO, 1998 bible

2 Kibayã 34

¹Rĩm a Zoziyaas sẽn wa n na n deeg naamã t'a tara yʋʋm a nii, la a rɩɩ naamã yʋʋm pis-tã la a ye Zeruzalɛm.

²A Zoziyaas maana sẽn tat Sẽn-Ka-Saab yam, n tũ a yaab a Davɩɩd naoor n ka bʋdg n leb goabg bɩ rɩtg ye.

³Rĩm a Zoziyaas sẽn deeg a naamã tɩ yʋʋm niinẽ, n dag n ket n yaa biigã, yẽnda sɩngame n baood a ba a Davɩɩd Wẽnnaamã. La a sẽn deeg a naamã tɩ yʋʋm piig la a yiiblẽ, yẽnda sɩngame tɩ yɩlg Zʋʋda ne Zeruzalɛm soolmã n yiis maoong kʋʋb zĩisã, la a Aseera ra-lugdsã, ne bõn-naandgã b sẽn yõgã.

⁴La b wãa Baall tẽn-kugã yẽnda nifẽ, la yẽnda kɩtame tɩ b wã wisd laasã sẽn dag n be b zutã, la a wã a Aseera ra-lugdsã, la wẽn-naandsã ne bõn-naandgã b sẽn yõgã, n neem-b n kɩt tɩ b lebg zom n wʋk b tomã n tɩ lob neb nins sẽn dag n maand maoong b zutã yaad zugu.

⁵La a kɩt tɩ b yõog maan-kʋʋdb-kãens kõabã b tẽn-kugã zutu. Yɩɩ woto la yẽnda yɩlg Zʋʋda ne Zeruzalɛm tẽngã.

⁶A Zoziyaas maana woto me Manaase, ne Efrayiim, la Sɩmyõ ne Neftali tẽmsã pʋsẽ, ne tẽms nins sẽn gilg bãmb n yaa raboodã pʋsẽ.

⁷Yẽnda wãa tẽn-kugã, la a kɛ a Aseera ra-lugdsã, la a wã wẽn-naandsã, n neem-b n kɩt tɩ b lebg zom. Yẽnda sãama wisd laas nins fãa sẽn dag n be Israyɛll soolmã fãa pʋgẽ wã, la a lebg n wa Zeruzalɛm.

⁸Rĩm a Zoziyaas sẽn deeg a naamã tɩ yʋʋm piig la a niinẽ, sẽn na n yɩl n yɩlg tẽngã ne Sẽn-Ka-Saab roogã, yẽnda tʋma a Atsaliya biig a Safãn ne tẽngã naab a Maseya, la a Yohakaaz biig a Yoha sẽn yaa sɛb-bĩngdã tɩ b tɩ maneg Sẽn-Ka-Saab sẽn yaa yẽnda Wẽnnaamã roogo.

⁹Dẽ, bãmb kẽnga Maan-kʋʋd kãsem a Hilkiiza nengẽ n tɩ kɩsa ligd ning Leevi neb nins sẽn yaa dignoorã gũudbã sẽn dag n reeg Manaase buudã, ne Efrayiim buudã, la Israyɛll buud a taab nins sẽn ketã nengẽ, n paas Zʋʋda ne Benzame buudã nengẽ wã, la b lebg n wa Zeruzalɛm.

¹⁰La b rɩka ligd-kãng n kɩs neb nins sẽn get Sẽn-Ka-Saab roogã tʋʋmd yellã. Dẽ, bãmb dɩka ligdã kõ neb nins sẽn tʋmd n na n maneg Sẽn-Ka-Saab roogã n paas-a pãngã.

¹¹La b kõ ra-wãadbã, la tãn-metbã tɩ b tõe n da kug-bɛd ne raad b sẽn tõe n tall n maneg Sẽn-Ka-Saab roogã, Zʋʋda rĩm-dãmbã sẽn sãamã.

¹²Nebã rag n tʋmda b tʋʋmã ne pʋ-peelem. Sẽn dag n yaa b taoor dãmb n get tʋʋmdã yellã yaa Leevi nebã. Yaa a Yahat ne a Obadiya sẽn yaa a Meraari yagensã, la a Zakari ne a Mesulam sẽn yaa Kehat yagensã. La Leevi nin-bãmb fãa rag n yaa yʋʋmba.

¹³La bãmb n dag n get te-zɩtbã yelle, ne sẽn tʋmd-b tʋʋm buud toay-toayã yelle. Leevi neb kẽer rag n yaa seb-bĩngdba, bɩ seb-gʋndba, wall rigno-gũudba.

¹⁴Wakat ning b sẽn wa dɩkd ligdã nebã sẽn tall n wa Sẽn-Ka-Saab roogẽ wã, la Maan-kʋʋd a Hilkiiza yãnd Sẽn-Ka-Saabã tõogã b sẽn dag n kõ b tʋmtʋmd a Moyiisã sebre.

¹⁵La Hilkiiza yeela a Safan yaa: «Gese, mam yãnda tõodã sebr Sẽn-Ka-Saab roogã pʋgẽ n dɩke.» Dẽ, yẽnda rɩka tõodã sebr n kɩs seb-gʋnd a Safan.

¹⁶La seb-gʋnd a Safãn kẽnga rĩm a Zoziyaas nengẽ n tɩ yeel-a yaa: «Yãmb sẽn yeel y nebã tɩ b maan tʋʋmd ningã, b maaname.

¹⁷Yãmb tʋmtʋmdbã tigsa ligd ning sẽn be Wẽnd doogẽ wã n kɩs neb nins sẽn get Sẽn-Ka-Saab roogã tʋʋm yellã taoor dãmba.»

¹⁸Seb-gʋnd a Safãn leb n yeela rĩma yaa: «Maan-kʋʋd a Hilkiiza kɩsa maam sebre.» La yẽnda karma sebrã rĩma taoore.

¹⁹B sẽn karem tõodã sebr tɩ rĩm a Zoziyaas wʋm goam nins sẽn gʋls sebrã pʋgẽ wã, yẽnda pãrsa a futu.

²⁰Rĩmã yeela maan-kʋʋd a Hilkiiza ne a Safãn biig a Ayikam, la a Miise biig a Abdõ, ne seb-gʋnd a Safãne, la rĩmã tʋmtʋmd a Aazaya yaa:

²¹«Kẽng-y n tɩ sok-y Sẽn-Ka-Saab n bãng sebr ning b sẽn yãndã goam võor n wa togs maam ne Israyɛll la Zʋʋda nebã fãa. Bala, Sẽn-Ka-Saab sũur puuga wʋsg ne tõndo. Bala, tõnd yaab-rãmbã rag n ka sak seb-kãngã goamã ye, la b ka maan wa b sẽn gʋls a pʋgẽ wã me ye.»

²²Maan-kʋʋd a Hilkiiza ne rĩmã sẽn yãk b rãmbã kẽnga a Hasra biig a Tokhat biig a Salum sẽn yaa fu-bĩngdã pag a Ulda sẽn yaa Wẽnnaam no-rɛɛsã nengẽ. Pʋg-kãng dag n bee Zeruzalɛm tẽngã sag-paall a yembr pʋga. Bãmb sẽn togs pagã n sɛ,

²³pagã yeela bãmb yaa: «Ade, Sẽn-Ka-Saab sẽn yaa Israyɛll Wẽnnaamã yetame: Tɩ yeel-y ned ning sẽn tʋm-a yãmb mam nengẽ wã,

²⁴tɩ mam na n kɩtame tɩ toog paam tẽn-kãngã ne a nebã, wa sẽn zems goam nins fãa sẽn gʋls sebrã pʋgẽ tɩ Zʋʋda rĩmã karem n yãndã.

²⁵La yaa bãmb sẽn bas maam n yõog wisd n kõ wẽn-naandsã yĩnga, la b maan tʋʋm-wẽns buud fãa n beeg maamã yĩng n kɩt tɩ mam sũurã yik ne tẽn-kãngã, n ka na n tol n sig ye.»

²⁶La y tɩ yeel Zʋʋda rĩmã sẽn tʋm yãmb tɩ y wa sok Sẽn-Ka-Saabã yaa: «Sẽn-Ka-Saab sẽn yaa Israyɛll Wẽnnaamã yetame: ‹Sã n yaa ne goam nins fo sẽn wʋmã, na n yɩɩ woto bala.›

²⁷La fo sẽn wʋm b sẽn wilg mam sẽn na n maan Zeruzalɛm ne a nebã to-to, tɩ fo sũurã sãam tɩ f sik f meng mam taoorã, bɩ f bãng tɩ fo sẽn sik f meng n pãrs f futã, n yãb mam taoorã, mam me wʋmame. Yaa Sẽn-Ka-Saab n yeele.»

²⁸Ade, mam na n kɩtame tɩ f sak f saam-dãmba n gãand f yaoogẽ ne bãan n ka tol n yãnd tood nins mam sẽn na n kɩt tɩ tẽn-kãngã paama ye. La b kẽng n tɩ togsa rĩmã gom-kãens fãa.

²⁹Rĩmã kɩtame tɩ b tigim Zʋʋda ne Zeruzalɛm kãsem-dãmbã.

³⁰Rĩmã kẽnga Sẽn-Ka-Saab roogẽ wã ne Zʋʋda la Zeruzalɛm nebã fãa, ne maan-kʋʋdbã la Leevi nebã, ne tẽngã nin-buiidã fãa, sẽn sɩng ne kãsem n tɩ tãag yao zʋʋga. Dẽ, b karma goam ning fãa sẽn gʋls kaoolã sebrã b sẽn yãnd Sẽn-Ka-Saab roogã pʋgẽ wã goamã fãa, tɩ nebã fãa kelge.

³¹Rĩmã yika a zĩigẽ wã n yals Sẽn-Ka-Saabã taoor n maan kaool t'a na n tũu Sẽn-Ka-Saabo, la a sak bãmb tõodã, ne b noyã, la b zãmsgã ne a sũurã fãa, la a yamã fãa, wa kaoolã goam b sẽn gʋls sebrã pʋgẽ wã.

³²La yẽnda kɩtame tɩ neb nins fãa sẽn dag n wa Zeruzalɛmã, ne Benzame la Zeruzalɛm nebã, naag yẽnda n wẽene. La b maana wa b yaab-rãmbã tõogã sẽn yeelã.

³³Dẽ zugẽ, a Zoziyaas menesa tẽms a taabã wẽnnaam-dãmbã sẽn yaa yel-beedã, Israyɛll nebã sẽn dag n tarã. La a modga neb nins fãa sẽn dag n be Israyɛll pʋgẽ wã tɩ b waoog Sẽn-Ka-Saab sẽn yaa bãmb Wẽnnaamã. A Zoziyaas vɩɩmã tɛka, a ka tol n bʋdg baa bilf n bas Sẽn-Ka-Saab sẽn yaa bãmb yaab-rãmb Wẽnnaam ye.