Read SEBR SÕNGO, 1998 2 Kibayã 35 Bible Online

2 Kibayã 35 - SEBR SÕNGO, 1998 bible

2 Kibayã 35

¹A Zoziyaas kɩtame tɩ b maan Sẽn-Ka-Saab Pakã tigr Zeruzalɛm, la bãmb kʋʋ Pak pe-bilã pipi kiuugã rasem piig la naas daarã.

²A Zoziyaas leb n ninga maan-kʋʋd fãa a tʋʋmd sullẽ, la a gesame tɩ ned kam fãa sɩd tõog n maan a tʋʋmd Sẽn-Ka-Saab roogã pʋga.

³A Zoziyaas yeela Leevi neb nins sẽn da get-b nebã zãmsgã yellã la sẽn da yɩlg b mens Sẽn-Ka-Saab yĩnga yaa: «Ning-y kaoolã koglgã roog ning Israyɛll dĩm a Davɩɩd biig a Salmo sẽn me wã pʋgẽ, tɩ ka leb n yaa tɩlɛ tɩ y palg-a y bãgdẽ ye. Tʋm-y Sẽn-Ka-Saab sẽn yaa yãmb Wẽnnaamã yĩnga, la Israyɛll sẽn yaa bãmb nebã yĩng me.

⁴Yõgen tʋʋmdã roog-roogo, wa sẽn zems y sagsã, wa Israyɛll dĩm a Davɩɩd sẽn dag n gʋls t'a biig a Salmo ra viglã.

⁵Yals-y sɛk roogã pʋg wa sẽn zems y buudã sẽn weel to-to wã, la wa sẽn zems Leevi buudã me ne b sagsã.

⁶Kʋ-y Pak tigrã pe-bila, la y maneg y mens n yɩ yɩlma, n tõog n segl y saam-biisã wa sẽn zems Sẽn-Ka-Saab goamã bãmb sẽn dag n kõ a Moyiisã.»

⁷A Zoziyaas yãka pe-bi, la bulli tus pis-tã, la lols tus a tãab a rũmsã pʋgẽ, n kõ Pak tigrã yĩnga, la sẽn tigim-bã me yĩnga. B yãka bõn-kãens rĩmã paoongã sʋka.

⁸A Zoziyaas nanambsã me yãka yamleoog kũun b rũmsã pʋgẽ, n kõ nebã, ne maan-kʋʋdbã ne Leevi nebã. A Hilkiiza, ne a Zakari la Yeyiyɛll sẽn yaa Sẽn-Ka-Saab roogã nanambsã me kõo maan-kʋʋdbã rũm-bãooneg tus a yi la kobs yoobe, la lols kobs tã, Pakã tigr yĩnga.

⁹A Konaniya, ne a Semaya, la a Netaneyɛll ne a saam-biis a Hasabiya la a Yeyiyɛll ne a Zozabaad sẽn yaa Leevi buudã nanambsã, kõo Leevi nebã rũm-bãooneg tus a nu, la lols kobs-nu.

¹⁰Woto, bãmb segla tʋʋmã n sɛ, la maan-kʋʋdbã yalsa b zĩisẽ, tɩ Leevi nebã me sẽn zems b sagsã me yalsa b zĩisẽ wa sẽn zems noor ning rĩmã sẽn dag n kõ wã.

¹¹Woto, b kʋʋ Pakã pe-bi, la maan-kʋʋdbã koka zɩɩmã n tɩ raag tẽn-kugrã zugu. La yaa Leevi nebã n dag sɩɩd piisã.

¹²La bãmb dag n yãkda bũmb ninga b sẽn da tog n yãk n kõ Sẽn-Ka-Saabã toore, n kõ buud fãa tɩ b tõe n maan maoong sẽn yõogd bugum Sẽn-Ka-Saab yĩnga, wa b sẽn gʋls a Moyiis tõodã sebr pʋgã. B maana woto me ne rũm-bɛdã.

¹³Dẽ, bãmb sẽe Pak pe-bilã nemd wa tõogã sẽn wilgã. La b yaool n dʋg maand a taabã nemd ne rʋgdo, la laase, n zoe tao-tao n saag n kõ nebã.

¹⁴Dẽ zugẽ, bãmb dʋga nemd ning sẽn yaa bãmb ne maan-kʋʋdbã rẽndã, bala, maan-kʋʋdb nins sẽn yaa a Aarõ yagensã da ka tar weer ye, bãmb da yõogda maand sẽn yõogd bugmã, la b yõogd ne maand a taabã nem-kaamã hal tɩ ta yʋngo. Yaa rẽ n kɩt tɩ Leevi nebã rʋg bãmb ne maan-kʋʋdb nins sẽn yaa a Aarõ yagensã nemdã.

¹⁵La yɩɩn-yɩɩndbã sẽn yaa a Aazaf yagensã me ra bee b zĩisẽ, wa sẽn zems noor ningã a Davɩɩde, ne a Azafe, la a Eman ne a Yedutun sẽn yaa rĩma bãngdã sẽn da kõ wã. La sẽn da gũudb dignoyã me ka serg n bas-b zĩisã ye, Leevi nebã sẽn yaa b saam-biisã segla bãmb dẽndã n wa kõ-ba.

¹⁶Yɩɩ woto la bãmb maan tʋʋmdã badaar Sẽn-Ka-Saab roogẽ wã Pak tigrã yĩnga, la b maan maoong sẽn yõogd bugum Sẽn-Ka-Saab tẽn-kugrã zug wa sẽn zems noor ning rĩm a Zoziyaas sẽn kõ wã.

¹⁷Israyɛll nebã sẽn dag n be beenẽ wakat-kãngã maana Pak tigrã, ne bur sẽn ka be rã-bɩllã tigr dasem a yopoe.

¹⁸Hal sẽn sɩng ne Wẽnnaam no-rɛɛs a Sãmwɛll zamaane, Israyɛll dĩm ba a yembr na n zɩ n maan Pak tigr a woto buud wa rĩm a Zoziyaas ne maan-kʋʋdbã, la Leevi nebã, la Zʋʋda ne Israyɛll neb nins sẽn dag n be Zeruzalɛm ne Zeruzalɛm nebã sẽn maanã ye.

¹⁹Yaa a Zoziyaas sẽn deeg a naamã tɩ yʋʋm piig la a niinẽ, la b maan Pak-kãnga.

²⁰Bõn-kãens fãa poore, a Zoziyaas sẽn wa n maneg Sẽn-Ka-Saab roogã n sɛ, Ezɩpt rĩm a Neko yiime n kẽng Karkemis sẽn be Efrat kʋɩlgã noorã n na n tɩ zabe. La a Zoziyaas yiime n na n seg yẽnda.

²¹La a Neko tʋma neb tɩ b tɩ yeel-a yaa: «Zʋʋda rĩma, yaa wãn tɩ f rat n gɩdg-ma? M ka wat dũndã n na n zab ne foom ye. Yaa ne buud a to la m kẽnd n na n tɩ zab ne. La Wẽnnaam yeel-m lame tɩ m maan tao-tao. Dẽ wã bɩ f ra kɩɩs Wẽnnaam sẽn be ne maamã ye, sã n ka rẽ b na n sãam-f lame.»

²²La ba ne rẽ fãa, a Zoziyaas ka kelg goam ninga a Neko sẽn gom sẽn yit Wẽnnaam nengẽ wã n lebg n basa a Neko ye, yẽnda toeema a futã n na n tɩ zab ne-a Megido longã pʋgẽ.

²³Tãb-tãoodbã tãoome tɩ yõg rĩm a Zoziyaase, dẽ yẽnda yeela a tʋmtʋmdbã tɩ b talla n loog t'a sãmpogrã yaa kãsenga.

²⁴La woto, a Zoziyaas tʋmtʋmdbã yiis-a-la Saar ninga a sẽn be wã pʋgẽ n kẽesa Saar a to pʋgẽ n tall-a n kẽng Zeruzalɛm. A Zoziyaas kiime tɩ b muma a ba-rãmb yaadẽ, la Zʋʋda ne Zeruzalɛm dãmba fãa yãba a kʋʋre.

²⁵A Zeremi gʋlsa sũ-sãang yɩɩll a Zoziyaas yĩnga, yɩɩn-yɩɩndbã sẽn yaa pagb la raopã fãa me goma a Zoziyaas yell b yɩɩlã pʋgẽ. La hal tɩ ta rũndã b yãka noor tɩ bõn-kãng lebg mining Israyɛll pʋgẽ. La yɩɩn-bãmb gʋlsa sũ-sãang yɩɩlã sebr pʋgẽ.

²⁶A Zoziyaas tʋʋm a taabã a sẽn maanã, ne a sẽn maan sɩd ne bũmb ning sẽn gʋls Sẽn-Ka-Saab tõogã sebr pʋgẽ wã

²⁷A Zoziyaas kibarã sɩngr ne a baoosg fãa gʋlsa rĩm-dãmbã sebr pʋgẽ.