Read SEBR SÕNGO, 1998 2 Kibayã 4 Bible Online

2 Kibayã 4 - SEBR SÕNGO, 1998 bible

2 Kibayã 4

¹Yẽnda maana tẽn-kugr ne zũudu, t'a woglmã yaa kãntɩɩg pisi, t'a yalmã me yaa kãntɩɩg pisi, t'a zãntlmã yaa kãntɩɩg piiga.

²Yẽnda maana sĩn-bedr ne zũudu, t'a noorã yalem yaa kãntɩɩg piiga, t'a zãntlmã yaa kãntɩɩg a nu, la a sẽn gilg n sogã yaa kãntɩɩg pis-tã.

³La sĩngã no-koakã tẽngr sẽn gilgã fãa, b rag n gʋla lols naanã n gilgi, b rag n yaa rulg a yiibu, la kãntɩɩg fãa yaa lols piiga. B rag n naaga bãmb ne sĩng n yag tɩ yaa bũmb a yembre

⁴La sĩngã rag n doga zũud lols piig la a yiib zugu. Lols a tãab nems n wẽnemd n tees goabga, t'a tãab tees yaanga, t'a tãab tees rɩtgo, t'a tãab tees nin-taoore. Sĩngã rag n doga bãmb zugu. La b mensã zãng rag n bee sĩngã tẽngre.

⁵La sĩngã taglmã rag n taa nug-yakemd pʋɩ-sʋka. La b rag n maana a noorã tɩ wẽnd wũmbl noore, n yaa wa tɩ-puudu. A rag n tõe n deega sẽn kolg ko-yʋy tus a yiibu.

⁶Yẽnda leb n maana sĩm-bi piiga. La yẽnda ninga a nu goabga, la a ning a nu rɩtgo, tɩ b pegsd rũms nins b sẽn kõ tɩ yaa maoong sẽn yõogd bugmã yĩnga. La sĩn-bedrã rag n yaa maan-kʋʋdbã mens yɩlgr yĩnga.

⁷ Yẽnda maana sãnem fɩtl dogends piig wa sẽn zems nao-tũudrã. La yẽnda ning-b-la Sẽn-Ka-Saab roogã pʋgẽ, a nu rɩtgo, a nu goabga.

⁸Yẽnda maana taabl-dãmb piig n ning bãmb me Sẽn-Ka-Saab roogã pʋgẽ, a nu rɩtgo a nu goabga. La a maan sãnem la-bãooneg koabga.

⁹Yẽnda maana zak maan-kʋʋdbã yĩnga, la zak a to sẽn yaa kãseng n ning zag-noorã kʋɩlems n bolg ne zũudu.

¹⁰La b rɩka sĩn-bedrã n ning Sẽn-Ka-Saab roogã nug-rɩtg sẽn lebd yaang sẽnẽ.

¹¹A Huram maana tompeglem laase, kardo, la la-bãoonego. Yɩɩ woto, la Huram maan bũmb nins fãa a Salmo sẽn dag n kos yẽnda t'a maan Sẽn-Ka-Saab roogã yĩngã n sɛ.

¹²Yaa kut ra-lugd-bɛd a yiibã, ne kut pugli a yiibã sẽn dog ra-lugdsã zutã, n paas kut gãmba a yiibã sẽn ning pugli wã sẽn be ra-lugdsã zutã,

¹³ne gernaad biis bãmb kobs-naasã sẽn ning gãmba wã sẽn be pugli a yiibã zut rulg a yiib-yiibã,

¹⁴n paas sĩn-bi piigã ne b rogendsã,

¹⁵la sĩn-bedr a yembrã ne a niig piig la a yiibã sẽn be a tẽngrã,

¹⁶ne tompeglmã laasã, la pɛll-dãmba, la kõsdsã sẽn tar n yaasd nemdã. Teed nins fãa a Salmo sẽn kɩt t'a Huram-Abiib maan Sẽn-Ka-Saab roogã yĩngã, rag n yaa ne zũud sẽn pɩnda.

¹⁷Yaa Zʋrdẽ tãn-longã sẽn be Sukot ne Seredata tẽngã sʋk yagd pʋgẽ, la rĩm a Salmo kɩt tɩ b maan bõn-kãensã fãa.

¹⁸Teedã a Salmo sẽn kɩt tɩ b maana rag n yaa wʋsg hal tɩ b rag n ka tõe n geelg zũudã zɩslem n bãng ye.

¹⁹La a Salmo leb n maana Wẽnnaam doogã pʋgẽ teedã fãa: Yaa sãnem tẽn-kugrã, la taabl nins b sẽn dogend kaset burã,

²⁰la a maan fɩtl-dogendsã ne a fɩtl-dãmbã sẽn tog n wid zĩ-sõngã noorã ne sãnem halaale.

²¹La fɩtl dogendsã tɩ-puudã, ne fɩtl-dãmbã, la yɩʋʋdã ne sãnem halaale.

²²La sʋʋsã, ne la-bãoonegã, la ko-teesã, la wisdã laas ne sãnem halaale. La Sẽn-Ka-Saab roogã dignoyã sẽn tees zĩ-sõngã, ne a kʋɩlemsã, la ro-kãsengã noor kʋɩlemsã me ne sãnem.